دیارە خەم و خەیاڵ و ئاریشە و نەساخیێن دەروونی یێن کوردستانیان بەرھەمێ گەلەک فاکتەر و ئەگەرانە، بەلێ پا پشکەکا مەزن ژی ژ ئەنجامێ بندەستیا وانە.
نموونە ژی ئەو ئاریشەنە یێن تنێ ڤان دوو سالان و ژ ئەگەرێ بڕینا بوودجە و مووچەی پەیدا بین، و سەدان و ھزاران خێزان و تاک پەریشان کرین، و ژبلی ڕوویدانێن دلتەزین و کارەساتێن نەخۆش وەکی خۆکۆشتن و توشبوون ب نەساخیێن دەروونی دناڤ جڤاکێدا.
بێگۆمان ب سەربخۆییا خۆ، کوردستانی ھێدی نەچار نابن، د ئاگرێ نەزانی ( جاھلیەت) و کەرب و کین و ململانێیا شێعە و سۆننە، و ھندەک ژ نەتەوە و خەلکا دیتر دا یا دەمارگیر ل دەڤەرێ، بسۆژیتن و خەمێن وان ژی ھلگرن.
خەمێن ھەر ئێک ژ تاک و مالباتێن کوردستانێ تێرا مە ھەنە و زێدە ژیکن، و نەخاسمە د ڤی کاودانێ نەخۆشێ دیرۆکی و چەرخێ ئالۆزێ سەردەمدا، زێدەی شیانێن مەنە.
ئەم پێدڤی ب بێھنڤەدانەکا دۆمدرێژین ھەتا ھندەک بسەرخۆڤە بێین. تنێ سەربخۆیی دادێ مە ددەتن، و ھەر ڕێکەک ژبلی وێ تنێ کۆشتنا دەمی و پاشئێخستنا چارەسەرا خەمێن کوردستانیانە.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ