ھێشتانێ ئەو کرێتییا ئەنجامێن دەنگدانا ب ڕێژەیێن ( وەھمی) وەکی (٩٩,٩٩%) ل ھەلبژارتنێن ھندەک وەلاتێن جیھانێ نەھاتیە پنیکرن و ژبیرکرن، و ھێشتانێ جھێ پێتڕانکییا مرۆڤان، و " بەنیشتە خۆشە" و " قاچکێ دەڤێ" وانە، و خۆزی ئەو چەند ل گشتپرسییا سەربخۆییا کوردستانێ ڕووی نەدەتن، چونکی نەک نەیا ئاساییە، بەلکۆ جھێ گۆمانێ یە.
جیاوازی جوانیێ و ڕامانێ ددەتە ژیانی، چونکی ھەکەر " تپلێن دەستان ھەمی وەک ئێک بان" دا چ ڕامان ھەبیتن. ئەو جیاوازییا بنەمایێ وێ تێگەھشتنا ڕاستی و ھەلسەنگاندنا بابەتیانەیا تشتەکی بیتن، نەک بەرھەمێ پاشڤڕێکرەک نەرێنی بیت.
پاشڤڕێکر (feedback) تێگەھەکێ سەردەمیانەیە د زانستێ سایکۆلۆژیایا پەروەردەیی و کارگێڕی و سیاسەتێ دا، و (٢) جۆرێن ئەرێنی و نەرێنی بخۆڤەدگریتن.
جۆرەکێ وێ نەرێنی، یێ کۆ ل ڤێ دۆماھیکێ دەرکەفتی بکارئینانا تێگەھێ" دەولەتا دیکتاتۆری" یە، کە پشتی سەرھلدانا ھزرا ڕیفراندۆمێ و ڕژدییا کوردستانیان لسەر سەرئێخستنا وێ، زێدەتر بوویە. ڤی کاری ژبلی کارتێکرنەک نەرێنی یا ڕەشبینکەرانە و بەلاڤکرنا وی کەلتوورێ کۆژەک و زیانمەدن بۆ تاکێ کوردستانی و بنیاتێ سایکۆلۆژیێ وی، بێھنەک نەخۆش و ڕزی ژ بکارئینانا وێ تێتن، و نەخاسمە ھەکەر ئەو کەسێن کاری پێدکەن و وێ د وێ جەنکێ دەروونیێ د ڕاگەھاندنێ دا و بناڤێ ئازاداییا ڕاگەھاندنێ ل دژی کوردستانیان و بەلکۆ مەبەستەک تایبەت بکار دئینن، و پاشڤڕێکرەک و ( ئیعازەک) نەرێنی ددەنە بەر گۆھێن دەنگدەران، تنێ دا گێولێ وان بشکێنن.
یان ئەڤ مرۆڤە ڤی کاری ب بەرنامە و پلانداڕشتی ئەنجام ددەتن و بەردەوامییا ڕەنگێن دژاتیکرنا کوردستانێ یە بڕەنگەک ( ب خەیالا خۆ یا ساویلکانە ڤەشارتی )، یان ژی ئەو کەس کەسەک نڤستییە و ئاگەە ژ کوردستانێ و ڕەوشا وێ و وێ دەولەتێ و دەستەھەلاتدارییا وێ نینە و نووچەیان ناخوینیتن و بگۆتنەک دیتر " د گۆھێ گای دا نڤستینە"، و ب شەڤێ ب دڵڕەشییا " وەھما " کەرب ھلگرتن ژ کەسەکی و لایەنەکی دنڤن، و سپێدێ ب ھەمان ئاراستە و " ھەزەیانا" زکڕەشییا وی و وان، دەربڕینێ ژێ دکەن، و بزاڤێ دکەن ھەر دوو وان ساخلەتێن کەسێن شکستخواری، ڤەدگۆھێزنە خواندەوانان.
بەلێ پا خۆشبەختانە، تنێ ئەو کەس باوەر دکەن یێن وەکی وان. چونکی دبیتن گەلەک ژ وان ئەون یێن ھێشتان " گۆنڕەش" نەدیتین ( بەرێ، بابێ من گاڤا ش مە دقەھری کۆ مە دگۆت ئەم ب حالێ خۆ نەڕازینە، ھەر وەدگۆت نۆکە گەلەک بکار نائینیتن!) و نەدیتیە کا زۆرداریێ چ ڕامان ھەیە، و ستەمگەرێن دیرۆکێ چ دگەل خەلکێ و خەلکێ کوردستانێ کرییە، و وەسا دبینن ھەر سەرکردەکێ ژ خەمخۆرییا خۆ بۆ خەلکێ خۆ نەچار بیتن تووند و تیژ و تەحل و دژوار بیتن دا کەس خەلکێ وی و نەتەوەێ نەخۆت و نەداعویریتن، ئەو ژی دیکتاتۆرەکێ وەکی سەدامێ گۆڕ ب گۆڕ، ستالین و موسولینی و مارکوس و ... ھتد، کە ب سەدان ھزار مرۆڤێن بێ تاوان ژناڤبرین.
د ڕاستیدا، ئەڤ مرۆێن ساویلکە، نزانن لدویڤ بنەمایێن تیۆرێن زانستی، سەرکردەکێ سەرکەفتی تنێ ئەوە یێ دەمێ پێدڤی تووند و دژوار بیتن، و ئەڤە نەک دیکتاتۆریەتە، بەلکۆ " خۆ قەلاندنا" وی سەرکردەیە دا کەس و دوژمن ڤی تاکێ ساویلکە " نەقەلینیتن". بەلێ پا " نانێ ھندەکا بێ خۆیێ" یە، و ھندەک مرۆڤ ب سروشت وەسا ھاتینە پەروەردەکرن " کتکا کۆرەنە"، و توو ھەتا ئێڤارێ ل پشتا خۆ بکەی و لدۆر جیھانێ بگێڕی ھندە ھندی تە دەینای و نابینیتن. ڕاستی ئەڤ جۆرێ مرۆڤان ھێشتان جێوازییا دناڤبەرا ڕێڤەبرنێ و دیکتاتۆریەتێ ناکەن و ئەڤ جێوازییە تنێ ئەلفبایا سیاسەتێ یە، و ئەوێن وێ نزانن چەوا مایێ خۆ د تشتێ مەزنتر دا دکەن، و گۆمانێ بۆ تاکێن جڤاکێ پەیدا دکەن، و بەحسی وی تشتی و وێ رَۆژا نەھاتی و نەدیتی ب خرابی دکەن، و ھیچ نەبیتن بلا جارێ ب چاڤەک گەشبین بەرێ خۆ بدەنێ ھەتا کا دێ گەھیتە کیرێ. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ