زۆرجار هەل دەرەخسێت، كورد دەبێت بیقۆزێتەوە، لە زۆر توێژینەوەدا باسمان كردووە، ئێستا كاتی ئەوە هاتووە پشتیوانی ڕیفراندۆم و ڕاگەیاندنی دەوڵەتی كوردی،بكەین ، لەبەر ئەوەی هەرێمی كوردستان بە شێوەیەك شەڕی تیرۆری كردووە و دەكات، زۆر وڵات لە ڕاگەیاندنی دەوڵەتیشدا پشتمان دەگرن، بەڵام ئەوەی گرنگە لایەنە سیاسییەكان كۆك بن، چونكە ئەوە مەسەلەیەكی ستراتیژیە و پەیوەندی بە دواڕۆژی گەلی كورد هەیە، بۆیە ئەگەر لایەنەكان ئەو دەرفەتە زێڕینە لە کیس بدەن، هەموو لایەنەكان پەنجەی پەشیمانی دەگەزن و هەموومان زەرەر دەکەین؛ دیارە ئێستا كاتێكی زۆر گونجاوە هەموو لایەنە سیاسییەكان پشتگیری لە سەرۆكی هەرێم بكەن و كێشە ناوخۆییەكان وەلاوە بنێن و ڕیفراندۆم بكرێت.پێویستە هەموو لایەنەكان، حزب و لایەنە سیاسییەكان لە هەرچوار پارچەی كوردستان، پشت سەرۆكی هەرێم بگرن، چونكە ئەم هەوڵە مەسەلەیەكی حزبی نییە، بەڵكو مەسەلەیەكە چارەنووسی گەلێكی پێوە بەندە، هەموو كوردێکی دڵسۆزیش خاك و وڵاتی خۆشەویست، پێی خۆشە كوردستان ببێتە دەوڵەت. پرسی سەربەخۆیی و دیاریكردنی مافی چارەنووس، مافی هەموو میللەتێكە، گەلی كوردیش هەقی خۆیەتی باسی ئەو بابەتە بكات و بڕیار لەسەر دواڕۆژی خۆی بدات، نابێت ئەو بابەتە پەیوەست بكات بە هیچ هۆكارێكەوە و، دەبێت لە هەموو كاتێكدا باس لەو پرسە چارەنووسازە بكەین و بە مافی خۆمان دەزانین. پرسی دیاریكردتی مافی چارەنووس، پرسێكی گەورە و گرنگە بۆ گەلی كورد، بۆیە دەبێت لایەنە سیاسییەكان زیاتر لە هەموو پرسەكانی دیكە، كێشە ناوخۆییەكان وەلاوە بنێن و پێكەوە گفتوگۆ بكەن و ڕیزەكانمان یەك بخەینەوە و یەكهەڵوێست بین، بۆ ئەوەی كاتێ ڕووبەڕووی ئەو پرسە دەبینەوە كاری لەسەر بكەین، چونكە ئەركی سەرشانی هەموو تاكێك و سەرجەم لایەنە سیاسییەكانە پشتگیری لە ڕیفراندۆم بكەن كەواتە بۆچی لەو كەسایەتییە ناسراوە خاوەن پێگەیە لە مێژووی سیاسیدا پشتیوانی نەکەین کە شانی داوەتە بەر ئەم کارە؛ ئەوە بەڕاستی جێگەی سەرسوڕمانە كە هەندێك لایەن، یان كەسانێك هەبن باس لەوە بكەن كە ئەوە بانگەشەی حزبییە! نەخێر هەموو كوردێك كە ئەوە ئاواتیەتی، مادەم ئامانجی هەر تاكێكی كوردە، پێویستە لەو قۆناغەی كە ئێستا ئەو دەرفەتەی بۆ كورد ڕەخساوە، سەركردەیەكی بەهێزیش هەیە، لە ڕووی دیبلۆماسی، سیاسی، پێگەیەكی مێژووییشی هەیە و، شانی داوەتە بەر ئەو كارە، پێویستە هەموو لایەنەكان پشتگیری لێ بكەن، بۆ ئەوەی كورد بە ئاواتی خۆی بگات. بە ئەنجامدانی ریفراندۆم ئەو زۆڵم و زۆردارییە سەد ساڵە لەو ناوچانە دەکرێت کۆتایی دێت و باشترین رێگەی ئاشتی و یاسایی و سەردەمیانەیە خەڵکەکە خۆی بڕیاری خۆی بدات.
مێژوو شاهیدە كە داگیركەران و دوژمنان و كۆیلەكانیان هەموو تواناكانیان خستە گەر و دەیان پیلان و لوغمیان لە بەردەم كاروانی رزگاریخوازی و سەربەخۆیی كوردستان دانایەوە ، بەڵام نەك نەیانتوانی ساردمان بكەنەوە لە خەبات بەڵكو گەرمتر لە جاران پێداگربووین لە سەر بەدەستهێنانی مافەزەوتكراوەكانمان. پارتی دیموكراتی كوردستان لەسەر دەستی بارزانی نەمر دامەزرا، بووە رۆشناییەكی تازە بۆ شێوازی خەباتێكی نوێ لە ناو بزاڤی رزگاریخوازی كوردستاندا، ئەم وەرچەرخانە نوێیە لە شێوازی خەباتی نەتەوەیی، بۆ یەكەمجار بوو لە ناو مێژووی بزاڤی رزگاریخوازی كوردستان و تەواوی رۆژهەڵاتی ناوەڕاستدا لە سەردەستی پارتی و لە ژێر سایەی رێبازی بارزانیی نەمر هاتە ئاراوە..سەرۆك مەسعوود بارزانی كە لەم قۆناغەدا رابەرایەتیی بزووتنەوەی رزگاریخوازی گەلی كوردستان دەكات، لە پەرلەمانی كوردستان داوای ئەوەی كرد كە رێوشوێنی پێویست بگیرێتەبەر بۆ ئەنجامدانی ریفراندۆم و بڕیاردان لە مافی چارەنووس بۆ ئەوەی كوردستانیان بە ئازادی دەنگ بدەن و بڕیار لە ئایندەی خۆیان بدەن، ئەم هەنگاوە و نزیكبوونەوەی باشووری كوردستان لە بوون بە دەوڵەتی سەربەخۆ .هیچكات هەوڵەكانی بەدەستهێنانی سەربەخۆیی كوردستان بەبێ كۆسپ و لەمپەر نەبوون، ئێستایش كە هەڵوێستی كوردستان بەهێزە و لە هەموو كات زیاتر نزیكترین لە گەیشتن بەو ئاواتەی كە رۆژگارێك وەك خەون وێنا دەكرا، لێرەولەوێ چەندین هەوڵی هەمەجۆر دەدرێت بۆ ئەوەی بە ڕای گشتی رابگەیەنرێت كە ریفراندۆم و راگەیاندنی دەوڵەتی سەربەخۆ كاتی نەهاتووە و بارودۆخەكە لەبار نییە، بە گوتاری نائامادەیی كوردستان دژایەتیی رەوتی سەربەخۆخوازی دەكرێت و پاساو دەهێنرێتەوە بۆ ئەوەی ئەم دەرفەتە لەبار ببرێت، بە پێشمەرج دانان و داواكردنی دۆخێكی یوتۆپیایی كە لەو بروایەدا نیم هیچ دەوڵەتێك لە دەوڵەتانی جیهان گەیشتبێتە وەها بارودۆخێك پێش لە دایكبوونی. باوەڕی جەماوەری كوردستان بە سەرۆك مسعود بارزانی و هەوڵەكانی بۆ بە ئاكامگەیشتنی ئەم پرسە و، كورد دەگات بە ئاواتی لە مێژینەی خۆی، چونكە زۆرترینی ئازارەكانی لەدایكبوونی ئەم دەوڵەتەی چەشتووە و نزیكە لە كۆتایی ئازارەكان، دواتر لەناو ئەو دەوڵەتە سەربەخۆیەدا دەرفەتەكانی گەشەكردن و بەهێزكردنی پایەكانی بەڕێوەبردن كراوەتر دەبن و ئەو دەوڵەتەش نموونەیەكی جوان و گەشاوە لە هەمەجۆری ئیتنی و ئایینی و پێكەوەژیانی هاوسەنگ پیشانی جیهان دەدات.
بۆیە ئێتر كاتی ئەوە هاتووە كە نەكەوینە كاریگەری هاوهوشی ناحەزانی سەربەخۆیی كوردستان كە لە هەمانكاتدا نەیاری كورد و پێشكەوتن و گشت دەستكەوتەكانی كورد. پێوستە پشتیوانی هەنگاوەكانی سەرۆك بارزانی بین بۆ گەیشتن بە مافی دەوڵەتبوونی كوردستان ..