بارزانی –دامەزرێنەر؟ لێڤەگەر!
پێشوار عەگید
رێفراندوم بریارا 16 ئالیێن سیاسى و پێكهاته‌یێن ئۆلى و نه‌ته‌وه یێن كوردستانێ یه و رژدییا بارزانى و ئالییێن بریار ل سه‌ر ژڤانێ پرۆسێ داین، وێ راستیی نیشان دده‌ت كو مه‌حاله پاشڤه‌زڤرین ژ رێفراندومێ هه‌بیت و هه‌ر ئالیه‌كێ ب به‌هانه‌یه‌كێ خوه دووربكه‌ت و ته‌ڤلى پرۆسێ نه‌بیت، خوه‌كوشتنه‌كا سیاسى و جڤاكییه و تا ئه‌به‌د دێ د دیرۆكا ره‌شا ڤى گه‌لى دا بیت.
ئێدى رێفراندوم ژ پرۆپاگنده‌یه‌كا حزبى ده‌ركه‌فتییه و بۆ گۆڕان و كومه‌لا ئیسلامى ژى روونبوویه كو رێفراندوم بۆ سه‌رخوه‌بوونێ یه و دێ ل 25 ئیلۆنێ هێته كرن، له‌و هه‌ردو ئالى د ناڤبه‌را به‌لێ و نه‌خێرا رێفراندومێ دا ماینه و داكو دیرۆك نه‌فره‌تان لێ نه‌كه‌ت، نه‌شێن ب ئاشكرایى بێژن نه‌خێر، ڤه‌گه‌ریان بۆ ناڤ پرۆسێ ژى ئیحراجه‌كا سیاسییه بۆ هه‌ردو ئالییان، هه‌روه‌ك هاتنه پێشا پارتى و لادانا هه‌موو مه‌رجێن كاراكرنا په‌ڕله‌مانى ژ پێخه‌مه‌ت سه‌رخستنا پرۆسا رێفراندومێ و پشكداریكرنا هه‌موو ئالییان دڤێ پرۆسێ دا، بۆ گۆڕان و كۆمه‌لا ئیسلامى شوكه‌كا مه‌زن بوو و هه‌موو رێ ل به‌هانه‌یێن وان ئالییان گرتن، له‌و نها كو چ به‌هانه و كارتێن فشارێ ل دژى پارتى د ده‌ست وان دو ئالییان دا نه‌ماینه، ئه‌و ژى گه‌هشتینه وێ باوه‌رێ كو هه‌تا قانوونا سه‌رۆكاتییا هه‌رێمێ ژى بهێته راستڤه‌كرن و په‌رله‌مانێ كوردستانێ ب رێفراندومێ راببیت و وێ پرسێ ژ ده‌ست بارزانى و پارتى بكێشن ژى، لێ داوى جار هه‌ر بارزانى بوویه كو بریار ل دۆر رێفراندومێ دایى و ژڤانێ وێ ده‌ستنیشانكرى!
خویایه كو به‌ریا كۆمبوونا 7 خزیرانا ئه‌ڤساله یا سه‌رۆكێ هه‌رێمێ دگه‌ل ئالییێن سیاسى ژى كو تێدا ژڤانێ رێفراندومێ هات ده‌ستنیشان كرن، بارزانى هه‌ر سه‌ركێشێ ره‌وتا سه‌رخوه‌بوون خوازبوو و د هه‌موو كۆمبوونێن فه‌رمى و سه‌ره‌دانێن دبلۆماسى و ناڤه‌ندێن نێڤده‌وله‌تى دا دوپاتى ل سه‌رخوه‌بوونا كوردستانێ دكر.
نهاژى و پشتى كو چه‌ندین جاران داخوازا كۆمبوونا دگه‌ل ئالییان و ده‌ستنیشانكرنا كه‌سه‌كى بۆ سه‌رۆكاتییا هه‌رێمێ لجهێ وى و خه‌مسارییا ئالیێن سیاسى، بارزانى ئه‌ركێ خوه‌یێ دیرۆكى بجهئینا و نها ب كریار سه‌رپه‌رشتییا جڤاتا بلندا رێفراندومێ دكه‌ت كو سه‌ره‌وه‌ریه‌كا دى یه بۆ دیرۆك و خه‌باتا وى، ئێدى سه‌رخوه‌بوونا كوردستانێ نزیكه ببیته دیفاكتۆ و ژ چارچووڤێ دروشم و فشاران ده‌ركه‌ڤتییه، بێ گۆمان ب سه‌ركه‌فتن و شكه‌ستنا پرۆسا رێفراندومێ كو شكه‌ستنا وێ مه‌حاله، بارزانى هه‌ر دروستكه‌رێ ده‌وله‌تا كوردستانێ یه و مولكدارییا ده‌وله‌تێ هه‌ر بۆ بارزانى یه ئه‌فجا راگه‌هاندنا وێ ده‌وله‌تێ سوبه یان ژى پشتى 50 سالێن دى بیت.
پێشنیاز
پشتى ئارمانجا مه‌زن كو ده‌وله‌ته و بارزانى رێیا گه‌هشتنێ بۆ ده‌وله‌تێ ڤه‌كر و رێفراندوم وه‌كو ئامراز بۆ گه‌هشتن ب ئارمانجێ كره راستى، ئێدى وه‌ك بارزانى بخوه‌ژى گۆتى، ئه‌و به‌رده‌وامیێ ب پۆستێ سه‌رۆكاتییا هه‌رێمێ ناده‌ت و هه‌ر كه‌سه‌كێ ب هه‌لبژارتن ببیته سه‌رۆك یان ژى ئالیێن سیاسى ل سه‌ر رێكبكه‌ڤن، ئه‌و دێ ب هه‌موو ئه‌مانه‌ت پۆستێ سه‌رۆكاتیێ راده‌ست كه‌ت و پشته‌ڤانێ گاڤێن سه‌رۆكێ نوو ژى بیت، له‌و ب دیتنا من، بۆ قۆناغا پشتى رێفراندومێ و ڤالاهییا نه‌بوونا چو لێڤه‌گه‌رێن نه‌ته‌وه‌یى، بارزانى ب پێشمه‌رگه‌تى و خه‌باتا خوه‌یا چیایى، دیرۆكا مالباتا خوه و دروستكرن و سه‌رپه‌رشتیكرنا دبلۆماسیه‌تا هه‌رێمێ و دامه‌زرێنه‌ر و گه‌هاندنا هه‌رێمێ ب ده‌روازه‌یا ده‌وله‌تێ، تاكه سه‌ركرده‌یێ كورده كو ببیته لێڤه‌گه‌رێ نه‌ته‌وه‌یى و ب حكمه‌ت و سیاسه‌تا خوه، وێ ڤالاهییا مه‌زن پڕ بكه‌ت.
