ئازادی نەپەقەکا سەرئاڤێ یە، و نە پڤینەکە ژ دەڤەکێ درَھای دەردکڤیتن، و نە ڤێن و نەڤزێنەکە ژ پەڕێن پێشیەکێ و مێشەکێ دھێتن، و پشتی بێھنەکێ چ شوینوارەک ژێ نامینیتن و چ تشتەک ژێ پەیدا نابیتن.
ئازادی چیڕۆک و ئەفسانەیەکا دویرودرێژە و زانست و فەلسەفە و دەروونناسی ھزاران سالە پێڤە مەحتلە و ژێ دئاخڤیتن. زانست و فەلسەفە سەرکفتنا ئازادیێ ب سەرفیرازییا خو دزانن. ھەروەسا مێژوو.
ئازادی باھۆز و باکۆزیرک و بارۆڤ و تیفانەک مەزنە، و ژ دلێن تێھنیێ ئازادیێ دەردکەڤیتن، ئەوێن دەھا و بەلکۆ ھزاران سالە ژ دیتن و ھەبوونا وێ ھاتینە زڕبەھرکرن، و ئەم کوردستانی نموونەک ژ وانین.
ھەمی کەس و لایەن و مرۆڤ ئازادیێ ناخوازن و نابینن. ئازادی تنێ بەھرا مێرخاس و عەگید و وێرەک و خۆشمێر و قەھرەمان و وان کەسانە یێت دوێرن وێ بخازن و بۆ گەھشتنا وێ ئامادەنە بۆ ھەر تشتەکی، و ژ ھەمیا مەزنتر و شرینتر ژی ڕحا وانە دا بکن قۆربانی.
کەسێن نەمێرخاس و نەعەگید و نەوێر و نەقەھرەمان و نەخوشمێر نەک چ جاران ناگەھنێ، بەلکۆ چ کارەکی و تشتەکی ژی بۆ گەھشتنا وێ ناکەن و ھەتاھەتایە دمینن بندەست و بەندە. دبیتن کمباختر ژی بن و بزاڤێ بکەن خۆ و خەلکێ ژی بھێلن بندەست، و ش وێ گەلەک خرابتر ب دل و گیان دژمناتیا وێ ژی بکەن.
ئەڤرۆ دەمێ نیشانادان مەزنترین بزاڤا ئازادیخوازییا کوردستانیان یا ھاتی. یا مای لسەر مل و لنک ھەمی تەخ و ئایین و نەتەوەیێن وێ د ریفراندۆمی َدا بسەربکەڤن. ئەڤ سەرکەفتن و سەرنەکەفتنە ھەمان مان و نەمانە.
ڤێجا ھەلی بابێ وی یێ عەگید و قەھرەمان ژ یێ نەعەگید و نەوێرەک کا دێ چ کەتن و کیژ ژ وان ھەلبَژیریتن: سەرکەفتن و ئازادی یان ژی سەرنەکەفتن و نەئازادی.
وەرن ئازادیێ مسۆگەر بکەن دا زانست و فەلسەفە و مێژوو سەرشۆڕ نەبن.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ