ئیراق هەر ژ دەستپێکا دامەزراندنا وێ دەولەتەکا فاشل بوو، نها فاشلترە، حکومەتا وێ ژبەر داهاتێ پەترۆلێ ئێک ژ دەولەمەندترینێن وەلاتێن عەرەبی یە، لێ ئەو داهات نەبوویە ئەگەر کو ژ ئاڤەدانترین وەلاتان بیت و حکومەتا هەرێما کوردستانێ، ب بودجەیەکا گەلەک کێمتر ژ یا ئیراقێ، کوردستان کرییە ژ ئاڤەدانترین دەڤەران.
هەر ژ دەستپێکا ژناڤچوونا رژێما بەعس و دانانا سیستەم و دەستۆرەکێ نوی بۆ ئیراقێ، هەڤدە ژ سەدێ یا بودجەیا ئیراقێ ب رەنگەکێ یاسایی پێدڤی بوو ژ بۆ هەرێما کوردستانێ با، لێ حکومەتێن ئیراقێ یێن ئێک ل دووڤ ئێک و ب بەهانەیێن جودا، چو سالان ژ سێزدە ژ سەدێ یا وێ بودجێ زێدەتر نەدانە هەرێمێ، و ئەڤە نەبوو رێگر کو ئاڤەدانی ل پارێزگەهێن کوردستانێ رابوەستیت. گەر بەرێ خوە بدەینە باژێڕێن ئیراقێ بەری سالا دوهزار و سێیێ و پشتی و د هەمان دەم دا، وان باژێڕان ب هەرێما کوردستانێ هەڤبەر بکەین، جوداهی ئێکجار مەزنە. حکومەتا ئیراقێ نەشیا ب وێ بودجەیا زەبەلاح د سالێن بەری هاتنا داعشێ دا چو باژێڕێن ناڤەڕاست و باشۆرێ ئیراقێ ئاڤەدان بکەت، لێ حکومەتا هەرێمێ ب وێ بودجەیا کێمتر ژ یا قانۆنی یا بۆ هاتییە دەستنیشانکرن، ئاڤەدانییەکا مەزن ل باژێڕێن هەرێمێ کر و خزمەتگۆزاری ژبلی باژێڕان گەهاندنە گوند و دەڤەرێن ب دەستێن رژێمێن ئیراقێ هاتینە وێرانکرن و چو جاران ئاڤەدانی نەگەهشتیێ.
گەر ل ڤێرە پرسیار بکەین؛ بودجەیا زەبەلاحا ئیراقێ د ناڤبەرا سالێن دوهزار و پێنج تا دوهزار و چاردێ دا کیڤە چوو؟ دبینم بەرسڤ گەلەک رۆن و ئاشکرا یە، گەندەلی، هەموو سەرکردەیێن ئیراقێ، ب تایبەتی سەرکردەیێن شیعە کو پڕانییا هێزێ د دەست وان دابوو و تا نها ژی د دەست وان دایە، هەموو بودجەیا ئیراقێ د بەرژەوەندیێن خوە یێن کەسی دا بکار ئینا و ئیراق ژ وەلاتەکێ وێران کرنە وەلاتەکێ وێرانتر. هەرچەندە ل هەرێمێ ژی گەندەلی هەبوویە، ژبەر کو؛ بنبڕکرنا گەندەلیێ ل وەلاتێن رۆژهەلاتا ناڤەڕاست، کارەکێ ئێکجار زەحمەتە، رامان ئەو نینە کو ناهێتە بنبڕکرن، لێ نەهێلانا وێ پێدڤی ب دەمەکێ زێدەتر هەیە. هەروەسا گەندەلی ل هەرێما کوردستانێ نەگەهشتە وی ئاستی کو ئاڤەدانی رابوەستیت و وەلاتی بکەڤنە د بن هێلا هەژاریێ دا، بەلکو بەری بودجەیا هەرێما کوردستانێ بێ بەهانە ژ ئیراقێ بهێتە بڕین، رەوشا وەلاتییان ب رەنگەکێ بەرچاڤ باش ببوو.
حکومەتا هەرێما کوردستانێ ژبلی کو ئاڤەدانییەکا بەرچاڤ د سالێن بەری دەستپێکرنا قەیرانێ دا ل هەرێمێ پەیدا کر، زێدەتری بیست ژ سەدێ یا وەلاتیێن هەرێمێ کرنە مووچەخۆر، کو نە د بەرژەوەندا حکومەتێ دایە، لێ ژ ئالییەکێ دی ڤە وەلاتییان ب رەنگەکێ ئێکسەر مفا ژ وی داهاتی وەردگرت و کەسێن نها دبێژن شاشی بۆ حکومەتێ کری، بلا ل وی دەمی دەست ژ کارێن خوە بەردابان و ل کەرتێ تایبەت کار کربان، ژبەر کو ل وی دەمی، حکومەتێ سلفە بۆ پرۆژەیێن بچووک ژ پێنج ملیۆن دیناران تا گەلەک جاران ژ پێنجسەد ملیۆنان ژی دەرباز دبوون و هەر وەلاتی پرۆژەیەکێ بەرعەقل هەبا، دشیا ل وی دەمی کارێ حکومەتێ بهێلیت و دەست ب پرۆژەیێ خوە یێ تایبەت بکەت.
مە گەلەک جاران گلەیی ل سەر حکومەتا هەرێما کوردستانێ هەنە، لێ گەر ئەم بەرێ خوە بدەینە حکومەتا ئیراقێ، دێ ب دروستی زانین کا حکومەتا مە چەند شیایە د بەرژەوەندییا وەلاتیێن خوە دا کار بکەت؟ حکومەتا مە کوردستان ژ هەرێمەکا رژێمێن عەرەبان وێران کری، کرە دەڤەرەکا ئاڤەدان و حکومەتا ئیراقێ پارێزگەهێن عەرەبی ژ ئاڤەدانیێ وێران کرن و هەرتشتێ وان باژێڕان هەیی ژی، ژناڤبرن و ب ڤێ ئەم دشێین داوی پرس بەرسڤ بدەین "ئەرێ ئەم دگەل ئیراقێ بین و دوبارە ئابۆرێ خوە بێخینە بن دەستێ وێ داکو ژ هەڤدە ژ سەدێ یا مافێ مە کێمتری سێزدە ژ سەدێ ل سەر مە بکەتە منەت؟ یانژی سەرخوەبوونا خوە یا ئابۆری ب بەلێ یا رێفڕاندۆمێ دوپات بکەین و سەرخوەبوونا سیاسی ژی وەربگرین؟