مادەم دوو خانە ل سەر کارتا دەنگدانا ریفراندۆمێ هەنە، دڤێت قەبیل بکەین کو هەرکەسێ پشکداری وێ پرۆسەیێ ببیت، دێ هەلویستێ خوە و هەلویستێ دژهەڤی خوە ژی هەبیت، واتە؛ ئەم ئەوێن "بەلێ" رکابەرێن خودان هەلویستێ "نەخێر"ین و بەرڤاژی ئەوێن "نەخێر" ژی هەڤرکن ل هەمبەر مە و چ پێنەڤێت ژی، سەرکردایەتیا کوردی دەمێ ئەڤ بژاردەیە هەلبژارتی، واتە؛ تەحەددی و قەبوولکرنا هەبوونا هەلویستێ "نەخێر" ل پێشیا خوە دانایە و ئەڤە ژی ژپێخەمەت وێ یەکێ، کو بسەلمینن، گەلێ کورد و سەرکردایەتیا وی، دخوازن دچارچووڤەیێ پرۆسەیەکا دیمۆکراسی دا، پێنگاڤان ژبۆ ئارمانجا خوە -کو بدەستختنا سەرخوەبوونێ یە- بهاڤێژن، ئەگەر هۆسا نەبا، من باوەرە، سەرکردایەتیا کوردی، دا سینگێ خوە دەتە چەپەرێ رکێ و ب زۆری و ئەگەر بەرامبەر قەبوول ژی نەکربا، دا ب شەری گاڤێن خوە یێن دڤی بیاڤی دا هاڤێت و پشتراستم ئەڤە دشیاندا بوو ژی بهێتە کرن و بساناهیتر ژی بوو، لێ مەسەلەیا گرنگ و رێگر ل هەمبەر ڤێ، نەکو نەشیان بوو، بەلکو گرتنەبەرا رویێ جوان و سەردەمانە یێ دیمۆکراسیێ بوو.
تەڤگەرەکێ (و هەرچەندە ژی گەلەك لاواز دبینم) ب کەمپینەکا پشتەڤانیکرنا دەنگێن "نەخێر" دەستپێشخەری کر و خوە بەردا د مەیدانێ دا، کو ل گۆر ئاگاهییێن چەند رۆژێن بۆری (کۆمسیۆنا بلند یا سەربخوە یا هەلبژارتن و راپرسیێ یا هەرێما کوردستانێ) داین، ئەڤی گورۆپی هەر ل دەستپێکێ سەرپێچی کر، ژبەرکو پێشدەم، دەست ب پرۆپاکەندەیا خوە کر، کو ئەو دەنگێن تا نها د ڤی بیاڤیدا تێن بهیستن، بتنێ پرسا ئەنجامدان و ئەنجامنەدانا ڤێ پرۆسەیێ، دوور ژ "بەلێ" و "نەخێر" شرۆڤەدکەن.
ژبلی ڤێ ژی، دەربارەی ئارمانجا ڤان ژ پشتەڤانیکرنا "نەخێر"ێ، کو دیتنێن جودا هەنە و ل سەرێ وان، دبیت بتنێ ژبۆ خوە دەرخستنێ و بۆ هندێ بیت، سەرکردایەتیا کوردی گرنگیێ پێبدەت و هۆسا وان و سەرکێشێ وان مەزن بکەت، یان ژی ئەڤە گورۆپەکێ سیبەر یێ گورۆپەکێ نەیارێن کوردان بیت چ ل عیراقێ و چ ژی ل دەرڤەی عیراقێ، کو پشتی بەحسکرنا وان دوکیۆمێنتێن ئاشکرنابوونا وێ پشتەڤانیکرنا ماددی یا "مالکی" و چوونا چەندجاری یا سەرکێشێ ڤی گورۆپی ژبۆ دەرڤە، ئەڤ هزرا وان هاتە هەبوونێ و دیسان ژی مفا وەرگرتن ژ ڤێ دەلیڤێ ژبوو مەرەمێن بازرگانی و دەستنەدا بەرژەوەندیێن دڤی بیاڤی دا، گەلەک دگەل ڤی گورۆپی د گونجن، ژبەرکو سەرکێشێ ڤی گورۆپی بازرگانە، نەکو سیاسەتمەدار.
ئەڤە هەمی ل رەخەکی و بهێینە ل سەر ئارمانجا گورۆپی خوە پێ دەرخستی، کو وەسا دیارکر، دەنگێ "بەلێ" دێ کارەساتباربیت ژبۆ کوردێن باشوور و دێ ب رێیا پشتەڤانیکرنێ ژبدەستخستنا دەنگێ "نەخێر" پێکۆلا لادانا وێ مەترسیێ کەن، لێ د دووماهیێ دا، دناڤبەرا هەردوویان دا هەلبژارت کو درووشمێ خوە کرە "نەخێر دنها دا" ئەڤا وان گۆتی، د کارتا دەنگدانێ دا نینە، بەلکو ئەڤە وێ چەندێ دیار دکەت، کو مەترسیا ریفراندۆمێ د دانا بریارا وێ دابوو، کو یا هاتیە دان و ئەگەر مەترسی بیت یا سەرهلدای و ب "بەلێ" و ب "نەخێر" ژی دێ هەر مەترسی بیت و ئەگەر مەرەما وان مەترسیە ژی، دڤێت ب هەمی جورئەت گۆتبا:"نەخێر" نەکو ئەوا ئەوان هەلبژارتی "نەخێر دنها" دا، چونکی بهانەیا دەمی نەیا دجهێ خوە دایە و ئەگەر هەمی بیاڤ دگونجای نەبن ژی، هەمی (ناڤخوە و ژدەرڤەژی، ژبلی هندەک عیراقیان) ل وێ باوەرێنە، کو چ دەرفەتێن دەمی یێن وەک ڤی دەمی ژبۆ ڤێ پرۆسەیێ ژبۆ کوردێن باشوور چێنەبووینە و ئەگەر ژدەست ژی چوو، چێنابنە ڤە.
یا ژ هەمیان سەیرتر ل دەف من د ناڤا وی گورۆپی دا، هەبوونا ئەندام پەرلەمانەکێ ئێکەتیا نشتیمانیا کوردستانێ بوو، کو راستە ژسالۆخەتێن جوانێن ئێکەتیێ بوویە، دکەڤندا بیروباوەێن جودا دناڤخوەدا حەواندینە و قەبوولکرینە، لێ دئاستێ نەتەوەیی دا، مافێ چارەنڤیس ب درووشمێ خوە هەلگرتیە و سەرکردایەتیێ وێ ژی، سەرباری کو پشکا گران یان تەحەددیان هەلگرتیە، لێ ب رژدی خوە دایە ل بەر هەلگرتنا بارێ گرانێ ڤێ پرۆسەیێ و یا سەیرتر ژی، گۆتن و بهانەیێن وی بوون، کو گۆت: ریفراندۆما هەرێما کوردستانێ "نەزانستی"یە، ئاها لڤێرە، چارچووڤەیێ ئەنجامدانا ریفراندۆمێ ل هەمی جیهانێ و یا هەرێمێ ژی دگەلدا، ب ئاشکرا و دیار دبینین، لێ نزانم ئەو چ کراسێ زانست و مەعریفێ یێ نوی یە، کەسێ ئاماژەپێکری دزانیت و بۆچی ژی ل جهێ پشتەڤانیکرنا "نەخێر"ێ وی ئەو کراسێ جودا یێ ل ڤێ جیهانێ ئەو بتنێ د زانیت، نەدکرە ل بەر ریفراندۆمێ و من باوەرە دا رێیا وی یا خوەشکری بیت و ئەم هەمی ژی دا پێکڤە پشتەڤانیێ ل "ریفراندۆما وی یا زانستی" کەین.