لەبەرئەوەی بزووتنەوەی رزگاریخوازیی كوردستان، بزووتنەوەیەكی هەقخواز و هەڵقوڵاوی كۆمەڵگەی كوردستان بووە، هێز و توانای لە خەڵكی كوردستانەوە سەرچاوەی گرتووە، داگیركەران هەمیشە بەدوای ئەوەدا گەڕاون شەرعییەت بۆ پەلاماردانی ئەو هێزە پەیدا بكەن، تا خەڵكی كوردستان بێكەس بهێڵنەوە و ئاسانتر داگیركردنی خاك و لەناوبردنی خەڵكیان بۆ بچێتەسەر، ئێستاش سەربەخۆیی كوردستان بە دامەزراندنی ئیسرائیلی دووەم دادەنێن.
دژایەتیكردنی پێشمەرگە لە دوای 2003 ـەوە، بۆ ئەوە بووە، ئەو هێزە مێژووكردە نەمێنێ، لێرەوەیە پێویستە ئەوە بزاندرێ، هێشتا قۆناغی رزگاریی كوردستان تەواو نەبووە، ئەو حزبانەی بۆ پەیداكردنی دەنگ هەوڵی ئەوە دەدەن، خەڵك واتێبگەیەنن ئەو قۆناغە تەواوبووە، هەڵەیەكی گەورە دەكەن، نەخێرەكەش ماڵكاولییەكی گەورەترە.
بەغدا خەڵكی كوردستان بە هاوبەش نازانێت، كاریش بۆ ئەوە دەكات كە هاوبەشیان نەبێت، ئەوە ململانێی حزبییە وایكردووە، هەبن كار بۆ ئەوە بكەن گەڕانەوە بۆ ژێر چەپۆكی بەغدا بە باش بزانن، بەداخەوە ئێستا ئەو هەوڵە بەوە گەیشتووە، هێز و توانای دارایی و میدیایی بۆ ئەوە تەرخان بكرێت، بە (نەخێر) سەربەخۆیی رەتبكرێتەوە و گەڕانەوەی هەتا هەتایی بۆ ژێردەستەیی بەغدا بكرێتە تاكە رێگە.
پێویستە هەموومان بزانین، كێ چاوەڕوانی ئەو (نەخێرە) ی كوردستان دەكات، چونكە (نەخێر) ی كوردستان، سەرچاوەیە بۆ ئەوانەی دەڵێن كاتی ریفراندۆم نییە و نابێ كوردستان سەربەخۆ بێت، یەكەم لایەن كە چاوەڕێی (نەخێر) دەكات بەغدایە، پایتەختەكانی دەوروبەریش بزەیان دێتێ، ئەو نەخێرە تەواوكاری بەرنامەی بەغدا و بێ بەرنامەیی زادەی ناكۆكیی حزبیی كوردستانە، لە سەرەتای قۆناغی دوای 2003 بە دەستوور هەڵیانخەڵەتاندین، كەچی لە پەنای دەستوور، مەرجەعی باڵای شیعە، بەناوی شەڕی دژی داعش، فتوای دروستكردنی میلیشای حەشدی شەعبی دا، لە 2016 نوێنەرانی كوردستانیش دەنگیان بە یاسای حەشدی شەعبی دا، راستە نوێنەرەكانیشمان دەنگیان نەدابا، دەنگی پێویستی دەهێنا، بەڵام بۆ مێژوو نەدەبوو كوردستان دەنگ بەو هێزە میلیشیایە بدات، كە هەر لەسەرەتاوە هەموو خەڵك و پێشمەرگە پێیانوابووە، شەڕی داهاتوومان لەگەڵ ئەو میلیشیایەیە.
بە (نەخێر) لە رۆژی ریفراندۆم، شەرعییەت دەدەینەوە بەغدا پەلامارمان بدات، شەرعییەت دەدەینە دۆستانمان كە بێدەنگی هەڵبژێرن، ئەوانەی كار بۆ (نەخێر) دەكەن، دەیانەوێ وا لە خەڵك بگەیەنن بە (بەڵێ) قات و قڕی دروست دەبێت، ئەی پێمان ناڵێن (نەخێر) ـەكەی ئێوە چیمان بۆ دەكات؟ ئەو هەڕەشەیەی لە سەر بوونمان هەیە، بە (نەخێر) زیاتر دەبێت، ئەو نەخێرە رێگە بۆ داگیركردنەوەی كوردستان خۆش دەكات، مەینەتییەكانمان زۆر دەبن، ئەوانە تەنیا رق لە پارتییان كردۆتە بنەمای كاركردن، باسی ئەو بەهەشتەمان لە سایەی بەغدا بۆ ناكەن، بەڵام كارەسات ئەوەیە، خەریكە كار بۆ ئەوە دەكرێت، ئەو رقە بكرێتە قەناعەت.
لەبەرئەوەی (نەخێر) نایباتەوە و (بەڵێ) دەیباتەوە، ئەو حزبانەی حەزیان لە نەخێرە و ناتوانن بە رەسمی رایبگەیەنن، خەریكە بەرە بەرە، هەڵەیەكی گەورەتر دەكەن، كەمپینی (نەخێر) بەناوی خەڵكەوە دەكەن و خۆیان لە پشتی دەوەستنەوە، ئاخر دەبێ ئەو راستییە بزانین، بە (نەخێر) نەك گوزەرانمان خۆش نابێت، بەڵكو هەڕەشە لەسەر بوونیشمان زیاتر دەبێت، هێشتا هیچ نەبووە، ئەو رێژەیەی لە مووچەی فەرمانبەرانی كەركووكی دەگێڕنەوە دەدرێتە حەشدی شەعبی، حەشدی شەعبیش مایەی نەگبەتییە بۆ كەركووك و دەوروبەری، هەقە ئاقڵمەندانی ئەو حزبانە رێگە لەو هەڵە ستراتیجییە بگرن، چونكە ژیان و گوزەرانی خەڵك، بەو هەڵەیە خراپتر دەبێت، هێشتا دەرفەت ماوە، بۆ ئەوەی رێگە نەدەین هەتا هەتایە بە ژێردەستەیی بمێنینەوە.