بزدیان (ھلع) ئاستەکێ بلندێ ترسیانێ، و قۆناغەک دژوارە ژ قۆناغێن سەرھلدانا نەخۆشیێن دەروونی، و ھزاران سالە د ناڤەرۆکا پێکھاتا سایکۆلۆژیایا مرۆڤی دا جێگیرە، و چ لسەر ئاستێ تاکی و بچویک، و چ لسەر ئاستێ مەزن، دھێتە دیتن. بزدیان، لسەر ئاستی َتاکی، ژ ڕوویدانەک مەترسیدار مرۆڤی تووشی شۆکەیەک دەروونی، و بەلکۆ ژی نساخییەک دەروونی دکەتن. لسەر ئاستێ مەزنێن سیاسی ھەمان ئەنجام و ڕەفتار دھێنە چاڤەڕێکرن.
د سەروبەندێ بەرەیەکی َخەمخۆر ل کوردستانێ و ب سەرۆکاتییا جەنابێ سەرۆک بارزانی، بزاڤا سەربخۆییا ڤی قەوارێ جۆگرافیایێ بەرزە و نخاتی و ڤەشارتی یا بڕێڤە، و ئەو ژی بڕێکا ڕیفراندۆمەکا ئازاد، و دگەل دا ژی دیالۆگ و گفتگۆ دگەل لایەنێن پەیوەندار، وەک پرۆسێسەک بەردەوامە. لێ لایەن یی َھەی، نۆکە و ھەمیشە، ئاشکرا و ڤەشارتی ژ ڤێ چەندێ نەک تنێ دترسن بەلکۆ یێن بزدیاین. دیارە مەزنترین ئەگەر ژی ئەوە وەلاتێن وان تژی کەس و لایەن و نەتەوەنە ل ھەلوێستەکێ وەسا و وەکی ڕیفراندۆما کوردستانێ دگەرَھن، دا ئەو ژی وی کاری بکەن.
وەلاتێن عەرەبی ئەو ئاریشەیا دگەل چەند ئایین و نەتەوەیێن وەکی مەسیحی و ئەمازیقی، و ...ھتد و تورکیایێ دگەل کوردان، و ئیرانێ دگەل چەند نەتەوان، و ھند و پاکستانی َدگەل کشمیرییان، و چینێ دگەل تایوان و تێبێت و ئورومچی، و ڕۆسیا دگەل گەلەک جھێن وەکی داغستان، و تەتەرستان، و چێچێن و ئەنگۆشیا و ھتد، و سریلانکا دگەل تامیل، و ئەمریکا دگەل ھندەک و یلایەتان و کەنەدا دگەل کێبێکا فرەنسی، و ئیسپانیا دگەل باسک و ... ھتد، و یەمەن دگەل حۆسیێن زێدی یێن شێعە مەزھەب، و مەغرب و مۆریتانیا دگەل بیابانی َڕۆژئاڤا، و ... ھتد، ھەین. ئەڤە ئاریشەکا جیھانییە.
ل دەمەکی کۆ مرۆڤایەتی ب دەست ھزاران ئاریشەیێن سایکۆلۆژی و جڤاکی و ئایینی و سیاسی و ژینگەھی دنالینیتن، ئەڤە قۆناغەکە ئازادییا مرۆڤاتیێ گەھشتیە ئاستەک بلند، و ئەگەر بڤی دەست و داری بچیتن، دی َھندەک گۆندێن جیھانێ ژی بنە دەولەت و خۆدان ئالا و حکومەت و پەرلەمان، چونکی ئازادییا مرۆڤان تشتەک نینە بشێتن دەست ژێ بھێتەبەردان، ھەرچەندە ژی ئاستەنگێن مەزن یێن د ڕێکا وێ دا ھەین.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ