نەجما و نەجلا دوو خویشک و کچێن کوردێن ئێزدی، یێن کۆ ل کارەساتا جینۆسایدا شنگالێ ش لایەنێ داعشێ ڤە، وەک جاریە، ھاتین ڕەڤاندن، دا بۆ ئەمیرەکێ وێ ڕێکخراوا دڕندە بن، و ھەر تشتەکێ کرێت و نەمرۆڤایانە دگەل ھاتینە ئەنجامدان، و نۆکە و پشتی ئازادبوونێ، ل کەمپەکا کوردستانێ، د ڕەوشەک خرابا دەروونی دا دژین، نموونەکا بچویکن ژ ھزاران نموونەیێن مە پالددەن، ئەم بۆ ڕیفراندۆمێ شەرمێ ژ وان بکەین، و ب دل و گیان تێدا بەشدار ببین.
ئەڤ جۆرە کارەساتە، دبیتن بۆ وەلاتەکێ بناڤ ئایینی و شێعە و سۆننە، نە ھند یا گرنگ بیتن، چونکی ھەکەر وەسا نەبایە ھەر ئێک ژ لایێ خۆڤە ھاریکاری و پشتەڤانییا وان نەدکر، و گرنگ نینە ھزاران کەسێن دڕندە ش وان وەلاتان وەکی نێری و گایێن دابەستی بۆ تامراندنا حەز و ئاگرێ سێکسیێ شەھوەتا خۆ یا گیانەوەرانە، ئەڤێ چەندێ دکەن،و بۆ سەدان سالە بسەرێ کچ و ژنێن کوردستانێ دئینن، و ب ھزاران ژ وان تووشی کاودانەک نالەبار و ڕەوشەکا دژوارا دەروونی کرین و ژیانێ بۆ وان بێ ڕامان دکەن. بەلێ گرنگ و مخابنی ئەوە چەوا ھندەک بناڤ و ھێجەتێن جۆدا، خۆ ب کورد دزانن، بەلێ ب ھزر و کریار، دووبارەبوونا وان کارەساتا مسۆگەرتر دکەن، و دژاتییا ڕیفراندۆما ئازادبوونا کچ و ژن و خویشکێن مە ل کوردستانێ ژ وان روویدانان دکەن، و ئەڤە تنێ ب ئێک ژ ھزاران پیلانێن وان دھێنەھژمارتن؟
لدەمەکی فەرە ئەڤ تۆخمە مرۆڤە ژی ل کوردستانێ بھێنە ڕیسواکرن، ھند ژی فەرە چەکدارێن داعشێ، یێن ل گرتیخانێن کوردستانێ، سەرباری سنوورداربوونا وی کاری و ئاستەنگێن نیڤدەولەتی بۆ وێ چەندێ، ھیچ نەبیتن ئەوێن ژ ھەمیان دڕندەتر و خوینمێژتر و تاوانبارتر، ب ڕێکێن تایبەت بھێنە ژناڤبرن. ئەڤە نە ڕەشبینی و نەتۆلڤەکرن، و نە دڕندایەتییە. ئەڤە کێمترین مافێ وانە یێ ئەو فەرە وەربگرن و بگەھنە وی سزای. ئەو داعشێن بەردەست و زیندانی، ژبلی کۆ دوژمنێن مرۆڤاتیێ نە، ژبەرکۆ سەدان تاوانێن وەسا یێن کرین کۆ یێن ھاتینە ڕاھاتن، و دگەل ڤێ چەندێ ژی یێن د بلندترین ئاستێ نەخۆشیێن دەروونی یێن کۆشندەیێن وەکی سایکۆپاتی (ئەنتی سۆشیالی ) دا، و چ جیاوازییا وان دگەل گۆرگ و شێر و ھرچەک دڕندە و کویڤی و ھۆڤ دا نینە، و ئەڤ کۆشتنە بۆ وان کێمترین و نازکترین دەرگەە و ڕێک و دەلیڤە و ھێڤییە بۆ چارەسەرکرنا وان، چونکی ئەو ھێدی نەشێن و نەڤێتن ببنە مرۆڤەک ئاسایی و دلۆڤان، و بێگۆمان ژی ئەو ھەردەمەکێ بھێنە ئازادکرن و بچنە ناڤ مرۆڤان، و دەلیڤەیێ وەسا بۆ ھەبیتن ھەمان ئەو دڕندە و گیانەوەر و نەساخێن دەروونی یێن بێ دلۆڤانن، و دیسانێ دێ زڤڕنە سەر دەە و دۆیا جاران و ھزاران تاوانێن وەکی شنگال و سپایکەر و ... ھتد، دووبارە کەن.
ب کۆشتنا وان گیانەورێن نەخۆش دەروون و ھۆڤ، کەس و کارێن وان و ھەمی مرۆڤایەتی دێ ژ ئاگرێ وان قۆرتال بیتن. ئەم ژی بلا شەرمێ ژ نساخێن دەروونی یێن وەکی نەجلا و نەجمایێ بکەین، کۆ ئێش و ئازارێن وان یێن دەروونی و جڤاکی بەرھەمێ شەھوەتراِنییا ھندەک داعشۆکانن، و ڕەوشا وان گەھشتیە ھندێ ھێدی چاڤ ب ڤی وەلاتی و خزم و کەس و کارێن خۆ ناڕابن و شەرمێ ژ خۆ دکەن و نەشێن تەماشەی ناڤ چاڤێن خزمان بکەن و دخوازن ژ ڤێ کوردستانێ بچن و ل دەرڤەی وەلاتی بژین. ئەو دوو کچێن بەستە زمان شەرمێ ژ وێ تاوانێ دکەن یا وان چ بەھر و پشک تێدا نەھەی و بناسێن ھندەک نێرییانە ھەتا ھزار سالێن دیتر دێ بچاڤێ جاریە تەماشەی خویشک و ژن و کچێن مە کەن و وەکی کۆرەمارەکێ ژەھراوین ڤەناندینە، کەنگی سەگەکێ دڕندەیێ وەک ئەبووبەکرێ نەبەغدادی خۆ ھەلاڤێژیتن و وەک زۆھاکێ خوینمێژ داخوازا کچان و ژنێن جاریە کەتن، دا ھندەکێن ژ وی کمباختر بکەڤنە دویڤ و وێ مرادێ بۆ ( حاسل ) بکەن.پێدڤیە ئەم ش خۆ ب شەرم بین و شەرمێ ش کچێن وەکی نەجلا و نەجمایێن کوردستانێ بکەین، و ب دل و ھناڤەک و بێھنفرەییەک دیتر، بچینە دەنگدانێ، دا ئەم ھیچ نەبیتن، لدویڤ شیانا خۆ مافێ وان بدەینێ، و خویشک و ژنێن خۆ ژی بپارێزین، ئەڤرۆ دۆرا نەجلا و نەجایێ بی سۆباھی دێ دۆر یێت مە ئێتن. ژێدەر: کەنالێ ڕووداو، ل (٦/٨/٢٠١٧).
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ