ئازادی وەک بابەت، بنەما، ئارمانج و بەرھەم، د ھەلویستێن جۆدا، و جھێن نەوەک ئێک، ڕامانێن جۆدا یا ھەی و ددەتن. ئازادی بنەمایەکێ دیمۆکراسیەتێ، بەرھەمێ گەشەیا سیاسی و ھزری و کەلتوورییانە یێ نەتەوە و وەلاتانە، و نابیتن ھەمی کەس و ھەمی جە خۆ وەکی ئێک بۆ گەھشتن و ئازادیێ دگەل ئێک بەراورد بکەن و بپیڤن. ل جھەکی ئازادی ئازادیێ دئینیتن و مسۆگەر دکەتن، بەلێ ل جھەک و وەلات و ناوچە و دەڤەرەک دیتر ھەمان ئەو تشت و ئازادی و بکارئینانا وێ زیانێ دگەھینیتە ھەمیان.
کێر و ساتۆر و چەقۆیەک ل لێنانگەھێ شۆلەک پێدھێتەکرن، بەلێ تێنەگەھشتن ژ ئازادیێ نابیتن ببیتە بناس کەسەک، چەند یێ تێگەھشتی ژی بیتن ل پارکەکێ گەشتیاری ئەو کەرەستە د دەستی دا بیتن و دناڤ خەلکێ دا ھۆ بیت و ھۆ بچیتن. چەک ل جھێ خۆ و شەڕێ دوژمنی چەکەک بمفایە، بەلێ ھەمان ئەو چەکێ سوارکری د دەستی َکەسەکی دا و ب ناڤ و ھێجەتا ئازادیێ ل ناڤ پارکەکێ گەشتیاری دا چ ڕامانێ ددەتن؟!
ئازادی تنێ ئازادبوون نینە د ڕەفتارێ دا، بەلکۆ پیدڤییە ئازادی بۆ پێشکەفتنێ ژی بێتەمەزاختن. لێ لڤان ڕۆژان، ئەم دبینین خەلکەک ب بەژن و بالایا وێ ئازادیێ دخۆڕیتن و دڤێتن پێ ببیتە ئەگەرێ پاشکەفتنا خەڵکێ. بڕیاردان لسەر ھندێ کوردستان نەبیتە دەولەتەک سەربخۆ بڕیاردانە لسەر ھندێ تاکێ کوردێ وەکی ھەمیشە بندەست و خۆلامێ خەلکەکێ نەھەژی بیتن، و ھەڤسارێ وی د دەستێ نەتەوەک شەھمۆز و نەدلۆڤان بیتن و نەگەھیتە ئاستەکێ ئازادیێ بشێتن ب ئازادیێ ڕەفتار بکەتن و ھزر بکەتن و داھینانێ بکەتن و خۆپێش بێخیتن. ئەڤە بۆ (٥-٦) مەلیۆن کوردێن ڤێ پارچا کوردستانێ و ڕێژەک دیتر یا ھەمان کاریگەریێ بۆ (٤٠-٥٠) مەلیۆن کوردێن جھێن دیتر
لەوما ئەڤ بڕیارە بڕیارەک شاش و نەمرۆڤایانە و دویرە ژ بنەمایێن ڕەوشتێ مرۆڤاتیێ، و جیاوازە ژ گەلەک جۆرێن دیترێن بڕیارێن ئازادی تێدا پێدڤی، و ھەمی کوردستانی تێدا ھەڤپشکن. ئازادییا بڤی ڕەنگی وەک ھندێ یە کەسەک بێژیتن ئەز ئازادم ل پارکەک گشتی قۆدیکێت ڤەخۆارنێن ئەلکۆلی ڕێز بکەم و لبەر چاڤێن زارۆک و کچ و خویشک و ژنێن خەڵکێ و دناڤ وان دا ڤەخۆم! کی دێ قەبیل کەتن؟! وەکی ھندێ یە ل وەلاتەک دیمۆکراسیدا کەسەک بێژیتن ئەز ئازادم و بێتن و تژی چانتێ خۆ (TNT) بکەتن و سویاری فڕۆکەیەکێ بیتن یان چەکەکێ گەرم سویار بکەتن و بچیتە ناڤ بازاڕی و پەیاسا بکەتن، کی و کیژ وەلاتی و دەولەت دێ باوەری ب وێ و وی و وێ ئازادیێ و دیمۆکراسیەتێ ھەبیتن و ھێلیتن ئەو کەس ب ئازادی وی کاری بکەتن؟! ھەکەر ئەڤە دروستن، کەواتا بڕیارا دوژمنێن رفراندۆما ئازادییا کوردستانێ ژی دروستە !
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ