دەولەتا کوردستانێ و ریفراندۆم د ھزرا ئەحمەدێ ناڵبەند
July 31, 2017
وتار و بیروڕا
![دەولەتا کوردستانێ و ریفراندۆم د ھزرا ئەحمەدێ ناڵبەند](https://gulanmedia.com/public/old_images/nusaran/unname4d.jpg )
د بەرگێ چارێ ژ " دیوانا باغێ کوردا"، وەکی سەدان جھێن دیتر ئەوی د ئێک ژ ھۆزانێن خۆ ڕۆژانێن ئازادییا کورد و کوردستانیان ب دەستکەفتەک مەزن و بەرھەمێ ماندیبوونا گەلەک کوردستانیان دبینیتن و ب جھێ سوپاسیێ ژ یەزدانێ مەزن دزانیتن: "بمەدحێ خالقێ حەق شۆکردارم/ دگەل ئینسانێ خائین ئەز نەیارم/ بۆ تەعنا لسەر خرابا ژەھرەمارم/ دگەل چاکا نەڤێتن من عەداوەت". وی پشتی سوپاسیێ دەربڕینا ژ وان کەسان کرییە کۆ ھنگی و نۆکە و ئاییندەی دا خیانەت کرییە و دکەن، و خۆ بۆ وان وەکی ژەھر ددەتە زانین و ب ھەمی دل و دەوونڤە دوژمناتییا خۆ بۆ وان خائینان دەردبڕیتن، و بەرۆڤاژی، بۆ ئەوێن پشتەڤانی ملەتێ خۆ خۆ ب دۆست ددەتە زانین. وەکی نۆکە چەوا ھندەک ل رفراندۆما سەربخۆییا کوردستانێ، کا چەوا باب و باپیرێن وان لسەردەمێ نالبەندی و پێشی ھنگی دژمناتییا ھەڤنیشتمانیێن خۆ دکر، نۆکە ژی تویتکێن وان بڕەنگ و دەنگ و ناڤ و نیشان و ھێجەت و بۆ لایەن، و د کراس و فیستانێ یاسا و ئایینی و ...، ھتد، و بێی ھندێ بیرا خۆ بینن ئەو نۆکە ساھن چونکی یێن د بن سیبەرا خوینا شەھیدان.
دگەل ھندێ کەسەکێ وەک سەرکردە دزانیتن و بۆ مە ھلکەفتی، دبێژیتن:" ڤیا بۆ مە تەمام وی خێرە خازی/ کۆ ئەم حۆڕ بژین ھۆ بسەرفیرازی/ کەسێ باش ھەر خۆدێ ژێ بۆیە ڕازی/ لسەر وی رئیقن ناڤ و سەعادەت" و " دۆعاچینە فەقیر و ژار و برسی/ تەلەبدارن ژ ڕەبێ عەرش و کورسی/ کۆ یا ڕەبی ئەڤە لحالێ مە پرسی/ نەھێلا لسەر مە ئیستعمار و ویللەت" و " ژ زۆڵما زاڵما ئەم دەرکەتینە/ چۆ منەت دوژمنێ مە لسەر مە نینە/ ئەڤە بدل ساخی یا خۆ دل حەبینە/ خۆدان عارە خۆدان ناموس و شەوکەت" و " ئەوی زانی کۆ بندەستی عەزابە/ بۆ دینێ مە بۆ دنیا مە خرابە/ ڤیا لسەر مە نەمینیت ئەڤ عیتابە/ ڕەزالەت مە بدو تەرزا بۆ نیھایەت" و " بەرێ خۆ بدەن خوادی کر ھاریکاری/ کۆ چاڤێ دوژمنا ھێلا بۆ تاری/ دەرێخستن ھەمی ژ ڤی ملک و واری/ کۆ ئینا سەر سەرێ وان ئەو قەباحەت" و " نھۆ ھندەک ھەنە بێ عەقل و ویجدان/ نە گۆت حەیف ئەم حۆڕ و مۆسلمان/ بدەستێ دوژمنا جە ھاتە بەردان/ ژیارا مە بدەست وان بویە منەت" و " نھۆ مزگین و کیفە ل خاێ و عاما/ خۆدێ حاێل نەکر قەێدا نەماما/ زەعیم ساخ دەرکەت و ھات سەر مەراما/ نەیارا زێدە بۆ لێ ترس و ھەیبەت" و " مۆسلمان و فەلە کورد و عەرەب ئەم/ نھۆ بکەیفن کۆ بۆ شەھیانە ئەو غەم/ برینا مە ھەما ساخ بوویە ملحەم/ بەلێ بۆ مە و ھەوە ئڤرۆکە ھەلکەت" و " مە ھەمیا دگەل ھەوە قەھرا دەوامە/ کۆ ئەللاھێ مەزن ئیحسان تەمامە/ جەزائێ خۆ بزانن ھەر عەدامە/ نەما لسەر وە چۆ عەردا ئەمن و ڕاحەت" و " بزانن بەسە تەحریک و کەرینی/ نە مەغرور بن بدەوسا وی لەعینی/ بەرێ خۆ بدەن ئێولا شەرع و دینی/ چ لازم ھندە تەشویش و حەماقەت" و " ھەمی بھێلن ئەڤی عەقلێ حیماری/ نەبن پالە بۆ بێ بەخت و نەیاری/ وەکی جارا بەری ئەو بێنە واری/ ببن شۆل کەر بۆ وان ئەھلێ ھیدایەت" و " ل کوردستان ئەزم حەقی بەیانکەر/ ئەزم کۆ تێ بگەھینم ئەو کەسێ کەر/ ھەرێ ئەحمەد جەما کا عەقل و جەوھەر/ گەلەک بوون دوژمنێ ێەدرێ ریسالەت" ... (ب.٢٦٦)
راستی نالبەند چ تشتی ناھێلیتن. تڕومنەتێت دوژمنی ل مە، خائین ب ڕەنگێن خۆڤە، ئێش و ئازارێت مە کوردستانیان، ئەنجاما کارێ دۆست و زۆڵما دوژمنان، و یا ڕەفتارێن باش و خراب، و کوردستانەک ئازاد و دویر ژ بندەستیێ ھەمی ھاتیە ڕۆھنکرن. د دیوانا وی خۆدێ ژێ ڕازی دا سەدان جار و نموونەیێن دیتر ڤێ خەونا مەزن و ھزرێن جوان خۆ ڕەنگڤەددەن. دەمێ خواندەڤان دخوینیتن شەرمێ ژ خیانەت و پشتتێکرن ل وەلات و نیشتمانێ خۆ دکەتن.
بلا ئەو ھۆزانڤانێ بەھشتی بۆ مە ببیتە نموونەک، ئەم بزانین ئازادییا کوردستانیان و ش ھەمی تەخ و چین و نەتەوە و ئایینان، ھەمیشە د مێنتالیتە و ھزر و بیروباوەرێن وان دا ھەبوویە و ڕەنگڤەدایە. کرێتترین تشت لنک وی ئەوە یا ھندەک کوردستانی دەستێ خۆ بکەنە دناڤ دەستێن دوژمنی. ئەو چەند چەندەھا سالانە مالا کوردستانیان خرابکری و ھەر جار خرابتر ش جارا پێشتر، بسەرێ مە ئینای و ئامانجێن کوردستانیان و سەرکردێن وان ب ئاڤێ دا برینە و ھەمی ئەم کرینە پالێن پویشی. ڤێجا چ جاران نە ھندی ڤێ جارێ نەبوویە و نابیتن. ھەر خەنجەرەک ژ پشتێڤە، ڤێ جارێ ھندی مەلیۆن خەنجەرێن بەرێ یە. بلا خۆدانێن خەنجەر لێدان ل ڤێ قۆناغێ و رفراندۆما سەربخۆییا کوردستانێ بزانن، ھێجەت چ تشتەک بیتن ڕحا ناڵبەند و سەدان ھزارا شەھیدێن کوردستانێ چ جاران گەردەنا وان ئازا ناکەن، و تنێ چارەسەر ئەو بھێنە ناڤ ڕێزێن ئازادیخواز و نێشتمانپەروەران. بژیت (٢٥/٩/٢٠١٧) ڕۆژا بڕیارا دۆماھیکێ لسەر ئازادیێ و سەربخۆیێ. مرن و ڕویڕەشی بۆ نەیار و دوژمن و خەنجەروەشینان. بێگۆمان جھێ وان دۆزەخە. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ