ئەگەر لە قەسیدەیەك یان لە كورتە سەرنجێكی فەیسبووك بە جۆریەك ڕەخنە لە كولتوورێكی دواكەوتوووانەی 1400 ساڵی پێش ئێستا بگریت، شار و وڵات دەخروشێت. زۆریەك ئەوە بە بێڕێزیی بە باوەڕی خۆی دەچووێنێت. بەڵام ئەگەر یەكێك سوكایەتیی بە خواستی نەتەوەیەك بكات و دژی سەربەخۆیی و مافی چارەی خۆنووسین بێت، كە گەورەترین سوكایەتییە بە قوربانیدانی سەد ساڵەی نەتەوەكەمان، كەچی بە ئازادیی بیروڕا و دیموكراسی لەقەڵەم دەدرێت.
نەتەوەی كورد قوربانییەكی زۆری داوە، كەچی لە سەرووی هەموو ئەو قوربانییانەوە ئێستا زەینی زۆریەك لە تاكەكانی كورد بە كولتوورێك ژەهراوی كراوە، كە ئێستا بێ‌ شەرمانە بۆ دەقێكی شیعری كە باسی مەمكی ژنێك دەكات، دێنە دەنگ. وەلێ‌ بۆ ڕەتكردنەوەی سەربەخۆیی چەپڵە لێ‌ دەدەن. تراژیدیای گەورە ئەوەیە كۆمەڵگە لە ئاستی پرسە مەزن و گرنگەكاندا بێ‌ هەڵوێست بێ‌ و لە ئاستی پرسە بچووك و بێ‌ بایەخەكاندا وەدەنگ بێت، ئەمە جگە لە گەمژەبوونی كۆمەڵگە هیچی تر ناگەیەنێت.
ئەم ژەهراویبوونەی مێشكی خەڵك لە خۆوە دروست نەبووە، بەڵكو بەرنامە بۆ داڕێژراوە و میدیا و تۆڕە كۆمەڵایەتییەكانی بۆ خراوەتە گەڕ، كە ناپاكییەكی گەورەیە و داتكاندنی نەتەوەی كوردە لە بەها پیرۆزە نەتەوەیییەكەی و، دوورخستنەوەی ئەم گەلەیە لە ڕێگە سەرەكی و دروستەكە. بە داخەوە دەبوو لەبری ئەم ژەهراویكردنە، زەینی تاكی كورد بە پرسی گرنگ و چارەنووسسازی وەك سەربەخۆیی قان بدرایە.
لەوەیش كارەساتتر ئەوەیە؛ پەرلەمانتارێكی كورد كە نوێنەری كوردە لە بەغدا، پێیوایە؛ دەنگدان بە سەربەخۆییی كوردستان ناپاكیكردنە لەو سوێندەی بۆ پاراستنی یەكپارچەییی خاكی عێراق لە زاری هاتووەتە دەر، بەبێ‌ ئەوەی بزانێت ئەگەر بە دەنگی كورد نەبووایە ئەو ناگاتە پەرلەمانی عێراق. هاوكات ناپاكیكردنی لە دۆزی ڕاستەقینەی گەلەكەی خۆی بە ناپاكی نابینێ‌، وەلێ‌ دابەشبوونی عێراق بە ناپاكی دەبینێت.