كامیان..؟ كاراكردنه‌وه، یان پاككردنه‌وه؟!
سووره مه‌رگه‌یی
خولی ئه‌مجاره‌ی په‌رله‌مانی كوردستان له سه‌ره‌تاوه به په‌كخراوی له دایك بوو، كاتێك سێ لایه‌نه‌كه‌ی ئۆپۆزسیۆن له‌به‌ر ده‌ركی سه‌را نه‌یانتوانی وه‌ك ده‌یانه‌وێ پشتیوانی گه‌لانی تونس و میسر بكه‌ن و (ارحل)یان بۆ نه‌كرا، ویستیان مه‌رام و ئه‌ركه پێسپێردراوه‌كانیان به‌رنه ناو په‌رله‌مان و به خۆڵبارانی به‌هاری عه‌ره‌بی خۆڵڕشێنی بكه‌ن و به‌و هۆیه‌وه بیكه‌نه كولانه‌ی ئاژاوه‌گێڕی و كردیشیان، بۆ ئه‌و مه‌به‌سته‌ش كه‌سێكی تیرۆریستی وه‌ك سۆران عومه‌ریان كرده سه‌رۆكی لیژنه‌ی مافی مرۆڤی په‌رله‌مان، ئاخر كوردستان مرۆڤێكی تێدا نه‌مابوو تا تیرۆریستێك بكرێته سه‌رۆكی په‌رله‌مان.
به راستی پێم سه‌یره لایه‌نه‌كان به‌ر له‌وه‌ی هه‌وڵی پاككردنه‌وه‌ی په‌رله‌مان بده‌ن، باسی كارا كردنه‌وه‌ی بكه‌ن، ئاخر هه‌ر ئه‌و لایه‌نانه بوون به مه‌به‌ستی په‌كخستنی په‌رله‌مان له رێگای چه‌ند هه‌ڵه‌وه‌ڕ و منداڵكارێكه‌وه پیرۆزی په‌رله‌مانیان نه‌هێشت و كردیانه چه‌قه‌خانه‌ی حزبی، ئه‌وه‌تا ئه‌و حزبانه‌ی په‌رله‌مانیان به چه‌قه‌خانه كرد، شه‌ڕی داعش و مه‌ترسییه‌كانی داهاتووی حه‌شدی شه‌عبی و ئاڵۆزی ناوچه‌كه و گۆڕانكاریه‌كان له‌به‌ر چاو ناگرن، دێن و بیانوو به پرۆسه‌ی سیاسی ده‌گرن و ده‌ستكه‌وتی حزبی و رشتنی كۆنه‌قین ده‌خه‌نه پێشینه‌ی كار و چالاكیه‌كانیان، جا ئه‌گه‌ر ئه‌وه هه‌ڵوێستی ئه‌و لایه‌نانه بێ! چۆن له روویان دێ باسی كارا بوون و كارا كردنه‌وه‌ی په‌رله‌مان بكه‌ن! یان ئێمه‌ی هاوڵاتی دڵمان به كوێی كارا كردنه‌وه‌ی په‌ڕله‌مان خۆش بێت؟!
