نه‌وشیروان مسته‌فا چی له سلێمانی ده‌وێ؟
سووره مه‌رگه‌یی
له ساڵی 1925 (عه‌سه‌بلئومه‌م) نه‌ته‌وه یه‌كگرتووه‌كانی ئێستا، بۆ یه‌كلاكردنه‌وه‌ی كێشه‌ی ویلایه‌تی موسڵ كه باشووری ئێستای كوردستان سه‌ر به‌و ویلایه‌ته بووه، به مه‌به‌ستی بڕیاردان له چاره‌نووسی خۆیان راپرسییه‌ك ئه‌نجام ده‌دات، له 90% خه‌ڵكی سلێمانی ده‌نگ بۆ سه‌ربه‌خۆیی ده‌دات، به‌ڵام خه‌ڵكی هه‌ولێر ده‌نگ بۆ مانه‌وه له‌ناو حكومه‌تی عێراق ده‌دات، ئێستا دوای تێپه‌ر بوونی 91 ساڵ به‌سه‌ر ئه‌و راپرسییه و روودانی كاره‌ساتی ئه‌نفال و كیمیاباران و زینده به چاڵكردنی (8000) بارزانی و په‌رده لادان له‌سه‌ر سیاسه‌تی له‌ناو بردنی كورد رووداوه‌كان پێچه‌وانه بوونه‌وه، ئه‌وه‌تا له راپرسی زانكۆی ئه‌مه‌ریكی خواستی سه‌ربه‌خۆیی لای خه‌ڵكی سلێمانی له‌ژێر كاریگه‌ری سیاسه‌تی چه‌واشه‌كاری نه‌وشیروان مسته‌فادا له 90% بۆ 67% دابه‌زیوه، خواستی سه‌ربه‌خۆیی لای خه‌ڵكی هه‌ولێریش له هیچه‌وه بۆ 87% هه‌ڵكشاوه، ئه‌وه‌ش په‌یوه‌ندی به‌و سیاسه‌ته دژمن دۆستیه‌وه هه‌یه كه له ناوه‌ڕاستی شه‌سته‌كانی سه‌ده‌ی رابردووه‌وه له‌ناو سلێمانیدا كاری له‌سه‌ر ده‌كرێ و له ئێستاشدا نه‌وشروان مسته‌فا بازاڕی سیاسی خۆی پێ گه‌رم كردۆته‌وه، هه‌ڵكشانی خواستی سه‌ربه‌خۆییش له هه‌ولێر و دهۆك په‌یوه‌ندی به‌و سیاسه‌ته نه‌ته‌وه‌ییه‌وه هه‌یه كه هه‌ولێریه‌كان و دهۆكیه‌كان ئاڕاسته ده‌كات.
لێره‌دا ده‌پرسین: ئایا كاتی ئه‌وه نه‌هاتووه سلێمانیه‌كان ئاوڕێك له سه‌روه‌ریه مێژووییه‌كانی باب و باپیرانیان بده‌نه‌وه و به نه‌وشیروان مسته‌فا بڵێن: ئایا ده‌ته‌وێ ئه‌منه سووره‌كه بۆ به‌غدای عرووبه نۆژه‌ن بكه‌یه‌وه؟ ئایا له ساڵی 2016 ده‌ته‌وێ مێژووی ناوه‌ڕاستی شه‌سته‌كانی سه‌ده‌ی رابردوومان پێ بووسیه‌وه! ئه‌رێ پێمان ناڵێی: ئه‌وكات چیت له به‌غدا ده‌ستكه‌وتوو چیت بۆ سلێمانی هێنا؟ ئایا له 17ی شوباتی ساڵی 2011 بۆچی و له پێناو چیدا به‌رده‌ركی سه‌رای ره‌مزی به‌رگری و كوردایه‌تیت كرده سه‌كۆی (ارحل)ی به‌هاری عه‌ره‌بی؟ ئایا تاكه‌ی دیموكراتی و داواكاری خه‌ڵكمان لێ ده‌كه‌یه به‌ره‌ڵایی و هه‌ڵكوتانه‌سه‌ر و له‌ناو دڕكوداڵی شارچێتیدا گوڵی نه‌ته‌وه‌ییمان پێ هه‌ڵده‌پڕووكێنی؟ ئه‌گه‌ر سلێمانی و سلێمانیه‌كان داوای وه‌ڵامی ئه‌و پرسیارانه و زۆر پرسیاری تریش له نه‌وشیروان مسته‌فا نه‌كه‌ن، ئه‌وا ده‌بێ ده‌ست له نازناوی رۆشنبیر بوون و شانازیه‌كانی هه‌ڵمه‌ت و قوربانی و سه‌روه‌ریه‌كانی پێشه‌نگی كوردایه‌تی بشۆن.
