- پەرلەمانتار لەیلا عەبدولجەبار : ( كەرتی تەندروستی و لەناویشیدا ماف و ئەركەكانی نەخۆش بەیەكێك لەو خاڵە گرنگانە دادەنرێت كە لەدنیای هاوچەرخدا بایەخێكی زۆری پێ دەدرێت، بەتایبەتی لەم سەردەمەدا كە پەتاو نەخۆشیەكان زیادیكردووەو بوونی ڤایرۆسی كۆرۆناش ئەوەندەی دیكەی ئەم بوارەی خستۆتە ریزبەندی یەكەمی ئەركەكانی حكومەت ، تەنانەت حوكمڕانە باش و بەهێزەكان بێ گەشەی كەرتی تەندروستی هەڵناسەنگێنرێن، هەربۆیە دەستپێكردنی خولی پایزەی پەرلەمان بە گفتوگۆكردن لەسەر ئەم پرۆژە یاسایە گرنگی و بایەخی خۆی هەیە چونكە پەیوەندی بەتاك و خێزان و كۆمەڵگاو باشكردنی كەرتی تەندروستی و لەناویدا هاوڵاتیانی كوردستان بەتایبەتی ئەوانەی نەخۆشن یاخود ئەو خانەوادانەی نەخۆشیان هەیە ، هەموو لایەكیش دەزانن كە پێشخستنی كەرتی تەندروستی و پاراستنی مافی نەخش لەریزبەندی پێشەوەی كارو ئەركەكانی كابینەی نۆیەمی حكومەتی هەرێمی كوردستان دێت و دەستخۆشی لە لێژنەی تەندروستی پەرلەمان دەكەم بۆ پێشنیازكردنی ئەم پرۆژە یاسایە، كە لەلایەك دەبێتە هۆی پڕكردنەوەی پۆشایی یاسایی لەكەرتی تەندروستی لەبوارێكی گرنگدا كە پەیوەندی بە ماف و ئەركەكانی نەخۆشەوە هەیە و لەلایەكی دیكەوە دەبێتە هۆی بڵاوكردنەوەی هوشیاری تەندروستی .
- لەیلا عەبدولجەبار سەبارەت بە ووردەكارییەكانی ناو پرۆژە یاسای ماف و رەكی نەخۆش وتی : هەڵبەتە هەر پێشنیاركردنی هەر پرۆژە یاسایەك لەوەوە دێت كە تاچەند لەم بوارەدا پۆشایی یاسایی هەیە ، هەمووان دەزانن زۆربەی جار كە كێشەیەك لەرووی تەندروستی و پزیشكی دروست دەبوو لە غیابی یاسا دەبووە كێشەیەكی كۆمەڵایەتی هەربۆیە دەبێت یاسایەك هەبێت بۆ رێكخستنی ئەم بوارە ، پرۆژە یاساكە كە لە5 بەش و 13 ماددە پێك هاتووە گرنگی خۆی هەیە لەدیاریكردنی ( ماف و ئەركی نەخۆش و حوكمە گشتیەكانی ) ، من لەو دانیشتنەدا تەئكیدم لەسەر سێ خاڵی گرنگ كردەوە كە دەبێتە هۆی دەوڵەمەندكردنی یاساكەو دروستكردنی متمانە لەنێوان نەخۆش و پزیشك كە جێگای داخە لەم ساڵانەی دواییدا ئەم متمانەیە كەم بووەتەوەو بەزیانی هەردوو لا نەخۆش و پزیشك و لایەنی تەندروستی تەواو بووە. بۆیە داوام كرد كە ئەو خاڵە زیاد بكرێت كە نابێت لەیەك كاتدا لەنەخۆشخانەكان پزیشك چەند نەخۆشێك ببینێت و قەرەباڵغی دروست بێت، ئەم حاڵەتە زیان بە ئاستی ئەو چارەسەرییە دادەنێت كە پزیشك پێشكەشی بەنەخۆشی دەكات و لەهەمان كاتیشدا ئەمە دژی مافی نەخۆشە و كات و گرنگی بەو نەخۆشە بەپێی پێویست نادرێت، هەروەها داوام كرد كە سەردانی نەخۆش بۆ لای نەخۆشەكان لەنەخۆشخانە گشتیەكان رێكبخرێتەوە نابێت نەخۆش ژمارەیەكی زۆری كەسوكارو ناسیاوی سەردانی بكەن و ببێتە هۆی قەرەباڵغی و زیان بە نەخۆش و چارەسەركردنی بكەیەنێت ، بڕگەیەكی دیكە كە داوام كرد بۆ پرۆژە یاساكە جەختی لەسەر بكرێتەوە تایبەت بوو بەپاراستنی زانیاری كەسی و تایبەتی نەخۆش كە لەكاتی بڵاوبوونەوەی زیانی دەروونی بۆ نەخۆش هەیە، هەموو ئەم سێ بڕگەیە ئەو متمانەیە لەنێوان نەخۆش و پزیشك دەگەڕێنێتەوەو مافی نەخۆش و هاوڵاتیان زامن دەبێت. لەگەڵ پەسەندكردن و بڵاوبوونەوەی یاساكە هەموو نەخۆشێك ماف و ئەركەكەی دەزانێت و بەیاسا رێك دەخرێتەوە و لەلایەك دامەزراوەكە و پزیشك رێز لەمافەكانی نەخۆش دەگرێت و لەلایەكی دیكەشەوە دەبێت نەخۆش و هاوەڵەكانی رێز لە یاسا و رێنمایی و راسپاردەكانی ئەو دامەزراوەیە بگرن، بەمەش لایەنێكی گرنگی كەرتی تەندروستی لەو بۆشاییە یاساییە دەربازی دەبێت كە ئێستا بەداخەوە تێیكەوتووین.