پێشمەرگە و پەرلەمانتار (سەروان هەركی) ئه‌ندامى پەرلەمانی كوردستان، لە لێدوانێكی تایبەتدا بۆ گوڵان رەخنەی توند لەو حزب و لایەنە سیاسییانە دەگرێت، كە دژی جێبەجێكردنی پرۆسەی چاكسازین، جه‌ختيش له‌وه‌ ده‌كاته‌وه،‌ كه‌ ئەو كەس و گرووپانە خیانەتیان لە دەنگدەر و هاووڵاتیانی كوردستان كردووە. ئەو پەرلەمانتارە جێبەجێكردنی یاسای چاكسازی لەم بارودۆخە سەخت و ناهەموارەدا به‌ كارێكى زۆر پێويست ده‌زانێت و، راى وايه‌، چاكسازييه‌كان به‌رژه‌وه‌نديى گشتى و مافه‌كانى هاونيشتمانيان ده‌پارێزێت.

ئامادەكردنی: شەماڵ نوری

پەرلەمانتار سەروان هەركی لە گفتوگۆیەكدا بۆ گۆڤاری گوڵان، سه‌رسوڕمانى خۆى له‌وه‌ ده‌ربڕى كه‌ "چەند لایەنێكی سیاسی و كەسانێك باسی گەندەڵی و چاكسازیی دەكەن، كەچی لەكاتی جێبەجێكردنیدا لێی دەترسن و بە پاساو و بیانووی جۆراوجۆر دژی ڕادەوەستنەوە، له‌ هه‌مان كاتدا حكومەت سەرقاڵی كێشەو گرفتی لابەلا دەكەن و، پشێوی و ناسەقامگیریی سیاسی دەخەنەوە. " هاوكات ده‌ڵێت: "كەسانی دڵسۆزو نیشتمانپەروەر زۆرن كە بەو درۆ و قسە بێ بنەمایانە هەڵناخەڵەتێن، بەڵام لاوازيی راگەیاندن و سۆشیال میدیای بەرەی نیشتمانپەروەر و دڵسۆز وای كردووە، ئەوان بەردەوام بن لەسەر ئەو چەواشەكارییانە، پێشتریش ئەوانە خۆیان گەندەڵكارو تاوانبار بوون، تەنانەت ئەو حزبە ئیسلامەوییانەی كە گەمە بە ناوی پیرۆزی ئیسلامیشەوە دەكەن، خۆ خۆیان لەكابینەی پێشوو لەناو حكومەت بوون، كاتی ئەوە هاتووە خەڵكی دڵسۆزو بەش مەینەت ڕێگا نەدەن كەسانێك كە خۆیان پارەی گشتيی خەڵكیان بەناوی قەرزەوە وەرگرتووە و ئامادە نین بیدەنەوە فریویان بدەن. "
سەروان هەركی سەبارەت بە رێكخستنەوەی مووچەی فەرمانبەران و دووبارە داڕشتنەوەی خەرجیيەكان وتی: "ئەوانەی دژی چاكسازی دەوەستنەوەو مووچەخۆران دەترسێنن و دەیانەوێت فریویان بدەن، جارێ خۆی لەخۆیدا بەهیچ شێوەیەك دەستكاریی مووچەی فەرمانبەران ناكرێت، بەڵكو لیستی فەرمانبەران لە بندیوار و ناوی وەهمی و مووچەی پێدراوی بەناهەق پاك دەكرێتەوە، لەلایەكی دیكەوە مەسەلەی رێكخستنەوەی مووچە بەشێكە لە پرۆسەیەكی چاكسازیی فراوان كە هەموو هاووڵاتیانی كوردستان داوای جێبەجێكردنی دەكەن و بەو پارت و لایەنە سیاسییانەی كە ئێستاش بەناو و پاساوی جۆراوجۆرەوە خەڵكی دژی حكومەتەكەیان هان دەدەن و، پێشتر دەنگیان بەناوی جێبەجێكردنی چاكسازی كۆكردۆتەوەو بوونەتە خاوەنی كورسيی پەرلەمانی، كەچی بەداخەوە هەر دوێنێ بوو پەرلەمانتارێكی نەوەی نوێ كه‌ گومانی لە بوونی كۆرۆنا و داتاكانی وەزارەتی تەندروستی بڵاودەكردەوە، لەبیری كرد، نابزووتنەوەكەیان باسی ئامادەكردنی نەخۆشخانەی 100 قەرەوێڵەیی بۆ كۆرۆنا دەكرد، لەم كوردستانەدا فەرمانبەر و مامۆستا گوناحیان چییە بندیوار لەناو توێژەكەیان بێت، لە وەزارەتی ئەوقاف هەر ئەندامی ئەو لایەنە سیاسییە ئیسلامانەیە بندیوارن، حزبەكەیان هەموو هەراكەیان بۆ ئەوەیە كە دێنە حكومەت لیستێكی گەورە دەهێنن، بۆ ئه‌وه‌ى دادیانبمەزرێنن.
پەرلەمانتار سەروان هەركی سەبارەت بە چارەسەركردنی ئەم دۆخە وتی: "ئێمە لەكوردستان پێویستیمان بە كەسانێك هەیە بەویژدان و بەئەخلاق و دڵسۆزبن و، راستەقینە قسەو رەفتار بكەن و خەڵكی چەواشە نەكەن، ئەمانەی ئێستا سواری شەپۆلی ناڕەزایەتی خەڵكی بوون، دوورن لەبەها مرۆیی و رەوشتی و ئەخلاقییەكانەوە، چونكە لەكاتێكدا مرۆڤایەتی دوچاری قەیران و نەهامەتی گەورە بووەو تاكە چارەسەر بۆ ئێمە بۆ ئەوەی لێكەوتەكانی كۆرۆنا لەسەر میللەتەكەمان كەم بكەینەوە، بەهێزبوونی حكومەتەكەی خەڵكە، نەك بەپێچەوانەوە هەوڵی رووخاندنی و زیانگەیاندنی بدەین، باشە بۆ داواكاریی خەڵك و هەنگاوەكانی حكومەت بەئاقارێكی باشتر نەبەین، بۆ ئیسلامەتی و دینی پیرۆزی ئیسلام بۆ مەبەست و مەرامی سیاسی بەكاربهێنین... ئايینی پیرۆزی ئیسلام زۆر لەوە پیرۆزترە بۆ مەرامی شەخسی و بۆ حزبایەتیكردن و گەیشتن بەدەستكەوت و بەرژەوەنديی ماددی بەكاربهێنرێت، من هەر ئەوە چاوەڕوان لە كەسانێكی بەناو سیاسی دەكەم كە ئایينی پیرۆزی ئیسلام بۆ مەرامی شەخسی و حزبی دەقۆزنەوە لەكاتێكدا هەموومان موسڵمانین، ئەمانە ئەوە رەفتاریان بێت، ئەدی چۆن چاكسازیی ناقۆزنەوەو بەلاڕێيداى نابەن. پارتی نەك تەنیا وەكو ئەوان بە گوتار چاكسازی دەكات، بەڵكو بەكردار چاكسازی جێبەجێ دەكات و كوردستانێكی بەهێز بنیات دەنێت و خەڵكی تێیدا سوودمەندی یەكەم دەبن. ئێمە لە پارتی دیموكراتی كوردستان خۆمان بە خاوەنی هەموو خانەوادەی شەهیدان و پێشمەرگە و كاسبكارو گەنجان دەزانین، بۆیە بە كردار چاكسازی دەكەین و، داوامان كردووە ئەوانیش هاوبەشمان بن و لە پرۆسەكەدا بەشدار بن.ط

سەروان هەركيی پەرلەمانتار و پێشمەرگە، سەبارەت بەهۆكاری نانەوەی ئەو پشێوی و پڕوپاگەندانە زياتر وتی : "مادام حكومەتێك بەرنامەی چاكسازی جێبەجێ دەكات، كەواتە بەهێزە ئەو حكومەتە و هاووڵاتیانیش لەم قەیران و مەترسيیانەی كە مرۆڤایەتی تێی كەوتووە رزگار دەكات، ئا لێرەدا ئەمە بە دڵی زۆر لایەن و كەسانێكی قین لەدڵ نیيه‌ بەرامبەر خەڵك و حكومەت، بابەتەكە هەر مووچەخۆری بندیوار نییە، لەهەرشوێنێك گەندەڵی كرابێت، بۆ نموونە لە سەرپێچی و داگیركردنی زەوی و زار و قەرزی حكومەت و بەخشینەوەی سامان و موڵكی گشتی، پارتە سیاسییەكان كە نایانەوێت میللەتەكەیان لە خێرو خۆشیدا بن و ئارام و سەقامگیر بن، بۆ ئەوەی بەردەوام سوود لە مەینەتی و ناڕەزایەتیيەكانی ئەوان وەربگرن، راگەیاندنەكانی خۆیان و سێبەرەكانیان خستۆتەكار بۆ دژایەتیكردنی پارتی و هەموو ئەو پێكهاتەو حزبانەشی پاڵپشتی و پشتگیریی چاكسازی دەكەن ، تەنانەت لەناو یەكێتی نیشتمانی كوردستاندا ئەوانەی پاڵپشتی چاكسازی دەكەن، ده‌نگيان زۆر زۆر زیاترە لەدەنگی چەند كەسێك، لەناو حزبە ئیسلامیەكانیشدا كەسانێك هەن، كوردستان و خەڵكی لا پیرۆزترە لە بەرژەوەنديی تەسك و خۆدەرخستنی چەند پەرلەمانتارو بەرپرسێكی ناو حزبەكەیان، ئەوانەی پاڵپشتی چاكسازی دەكەن و هەستی نیشتمانپەروەرییان بەرزە، زۆر زیاترن لەوانەی دژی چاكسازیی دەوەستنەوە، باشە لەدەستچوونی كەركوك چی سوودێكی بۆ كەركوكیەكان و كوردستانیەكان هەبوو تا كار لەسەر دابڕانی سلێمانیش لەناو بازنە نیشتمانی و كوردستانیيەكەی بكرێت، رۆشنبیران و دڵسۆزانی سلێمانی ئەوەندە زۆرن كەسانێكی گەندەڵ و فریودەر ناتوانن لە رۆشنبیری و هوشیاريی ئەو شارە كەم بكەنەوە، كۆمەڵە بەرپرسێكی ناو چەند پارتێكی سیاسی چۆن جورئەت دەكەن سلێمانی لەچوارچێوە نیشتمانی و نەتەوەییەكانی دابڕن، هەرگیز باوەڕ ناكەم بتوانن كارێكی وا بكەن، چونكە ئەمەی روودەدات هاشوهوشی پڕوپاگەندەو سۆشیال میدیایە كە بەداخەوە سوودیان لە لاوازيی راگەیاندنی ئەو پارتە سیاسییانە وەرگرتووە كە هەڵگری پەیامی نەتەوەیی و نیشتمانین و سەقامگیری و سەلامەتیى ماڵ و ژیانی خەڵكیان پاراستووە. ئەمڕۆ پارتی دیموكراتی كوردستان نەرمی دەنوێنێت لەپێناو پاراستنی ئەو سەقامگیرییەی كە بۆ خەڵكی و باروبژێوی ژیانیان پێویستە، ئێمە لەساڵی 1946 تاكو ئێستا هەر لەم پێناوەدا كارمان كردووەو زۆرجار وەكو حزب زیانی گەورەمان بەركەوتووە، بەڵام ئامانجی ئێمە دروستبوونی دەوڵەتی كوردیيە، ئەو دەوڵەتەی كە هاووڵاتی و حكومەت تێیدا بتوانن كێبڕكێی دەوڵەتانی دیكەو میللەتە پێشكەوتووەكانی دنیا بكەن و بژێوی و ژیانیان پارێزراو بێت. "

سەبارەت بە گرتنەبەری رێكاری یاسایی و جەماوەری له‌ دژی ئەوانەی زیان بە بەرژەوەندیى گشتی دەگەیەنن و پڕوپاگەندە ئاراستەی سەرۆك و پەرلەمانتارو بەرپرسی دڵسۆز دەكەن، ئەو پەرلەمانتارە وتى: " ئیرهابی فيكری له‌ كوردستاندا مێژوویەكی دوورو درێژی هەیە و، زیانی گەورەی بە خەباتگێڕان و دڵسۆزانی گەلەكەمان گەیاندووە، بۆیە كاتی ئەوە هاتووە ئێمە دەستوورمان هەبێت و، زیاتر پاڵپشتی و پشتگیری یاسا و دادگاكان بكەین، زۆرجاریش وا پێویست دەكات بە زمان و كردەوەی ئەوان رەفتاریان لەگەڵ بكرێت، چونكە ئەو كەسەی خیانەت لە نیشتمان و گەلەكەی بكات، گاڵتە بە یاساو دادگاكان دەكات و گەمەیەكی ناشيرین پیادە دەكات . "