لەگەڵ ئەوەی شاری هەولێر لە رووی دابینكردنی ئاسایش و سەقامگیرییەوە بە ئارامترین شاری كوردستان و عێراق لە قەڵەم دەدرێت، بەڵام ناوبەناو رووداوی كوشتن و دزی و قوماركردن و ماددەی هۆشبەری تێدا روودەدات، بەشێك لەم رووداوانەش كە بە هۆی هەڵگرتنی چەك و پێشێلكردنی یاساوە روو دەدەن، قوربانیان لێكەوتووەتەوە، دەزگاكانی پۆلیس و ئاسایش بە هەماهەنگی لەگەڵ یەكدی خەریكی چارەسەركردن و بنبڕكردنی ئەو جۆرە رووداوانەن، بۆ قسەكردن لەسەر رەوشی ئاسایش و سەقامگیریی هەولێر و ئەو روودوانەی لە هەولێر روودەدەن، ئەم دیمانەیەمان لەگەڵ لیوای مافپەروەر عەبدولخالق تەڵعەت بەڕێوەبەری پۆلیسی هەولێر ئەنجامداو بەمجۆرە وەڵامی پرسیارەكانی گوڵانی دایەوە.

* یەكێك لەو سیما جوانانەی هەولێری پایتەخت ئەو ئاسایش و سەقامگیرییەیە كە دەزگاكانی پۆلیس و ئاسایش فەراهەمیان كردووە، ئایا چۆن توانراوە ئەم ئاسایش و سەقامگیرییە فەراهەم بكەن؟
- نهێنیی سەركەوتنمان لە دابینكردنی ئاسایش و سەقامگیری لە هەولێری پایتەخت دەگەڕێتەوە بۆ ئەوەی بڕیارەكانمان بە یەكدەنگی دەردەچن و لەسەر هەموو دەزگا و لایەنە پەیوەندارەكان گشتگیر دەكرێن و دەچێتە بواری جێبەجێكردنەوە، لەمەش زیاتر ئێمە ژوورێكی عەمەلیاتمان هەیە بۆ ئەوەی لە كاتی روودانی هەر رووداوێك لە هەولێر ئەو ژوورە كۆببێتەوە و پاش گفتۆگۆكردن هەموومان پێكەوە بڕیاری لەسەر دەدەین و بڕیاری تاكلایەنە بۆ هیچ رووداوێك نادرێت، ئەندامانی ژووری عەمەلیاتیش پێكهاتوون لە بەڕێزان (وەزیری ناوخۆ، بەڕێوەبەری ئاسایشی گشتی، بەڕێوەبەری پۆلیس و بەڕێوەبەری پۆلیسی هاتۆچۆ و بەڕێوەبەری ئاسایشی هەولێر) ئەمەش وایكردووە تا ئاستێكی بەرز هاوكاری و هەماهەنگی لەنێوان دەزگاكانی پۆلیس و ئاسایشی شاری هەولێر هەبێت. لەلایەكی دیكەوە فەرمان بۆ هەموو بنكەكانی پۆلیسی هەولێر دەركراوە، هەر بڕیارێك لە بەڕێوەبەر و جێگری بەڕێوەبەری ئاسایشی هەولێرەوە بۆیان بچێت، ئەوا بەبێ گەڕانەوەیان بۆ بەڕێوەبەری پۆلیسی هەولێر دەبێت، ئەو بنكانە ئەو بڕیارەی ئاسایش جێبەجێ بكەن، ئەمەش وایكردووە كە وەك یەك تیم كار بكەین و لە كارەكاندا سەركەوتوو بین.
* هەولێر بەرفراوانییەكی گەورەی بە خۆیەوە بینیوە، ژمارەیەكی هێجگار زۆر ئاوارە رووی تێ كردووە، ئایا تاچەند ئەم فراوانبوونە نائاساییە كارەكانی ئێوەی قورستر كردووە؟
- شاری هەولێر گەشەكردنێكی بەرفراوان و خێرای بە خۆیەوە بینیوە، بۆیە ئەگەر لەگەڵ سەرەتای راپەڕینی 1991 بەراوردی بكەین، ئەوا دەبینی ژمارەی گەڕەكەكانی چەند بەرامبەر زیادی كردووە، لەلایەكی دیكەش بەهۆی ناسەقامگیری لە بەشەكانی ناوەڕاست و باشووری عێراق و هاتنی ئاوارەكانی كوردانی رۆژئاوا و پاشانیش شەڕی تیرۆریستانی داعش و هاتنی ئاوارەیەكی زۆر بۆ كوردستان، بەشێكی زۆریان روویان لە شاری هەولێر كردووە، سەباری ئەم بارودۆخەش بە هۆی بڕینی بودجە و مووچەی خەڵكی كوردستان لە ماوەی چوار ساڵی رابردوو لەلایەن حكومەتی عێراقەوە، ئیمكانیەتی پێویست لەبەر دەست نەبووە، هەروەها فراوانبوونی خێرای ژمارەی دانیشتووان و ئەو بارە داراییە قەیراناوییە قورسایەكی زۆری لەسەر دەزگاكانی پۆلیس و ئاسایش دروست كردووە، بەڵام وێرای ئەمانەش توانیمان بە رێگەی دانانی پلانێكی زانستی و دابەشكردنی سنووری هەولێر بەسەر چەند بەشێكدا و دانانی بنكەی پۆلیس و ئاسایش بۆ هەر یەكێك لەو كەمپانەی ئاوارەكانی لێ نیشتەجێ بوون، تەنانەت ئەگەر پێویست بووبێت بنكەی زێرەڤانیشی لێ دانرا، بەم پلانە هەم توانراوە ئاسایش و سەقامگیری هەولێر بپارێزین، هەمیش توانیومانە ئاسایش و سەقامگیریی كەمپی ئاوارەكانیش بپارێزین.
* وەك ئاماژەت پێكرد، ئاوارەیەكی زۆری عەرەبی عێراقی لە هەولێر بوونیان هەیە، بەڵام لەو كاتانەشی كە هێزەكانی حەشدی شەعبی و سوپای عێراق هێرشیان كردە سەر كوردستان، هیچ كاردانەوەیەكی خراپ بەرامبەر ئەو عەرەبانە نەكرا، ئایا ئەمەیان بۆچی دەگەڕێتەوە؟
- لە رۆژی 16ی ئۆكتۆبەری 2017 و لەو كاتەی كە هێزەكانی حەشدی شەعبی و سوپای عێراق هێرشیان كردە سەر كوردستان، من خۆم خەڵكی عەرەبم لە هەولێر بینیوە كە بە عەگال و دشداشەوە سووڕاوەتەوە و كەسیش هەقی بە سەریەوە نەبووە، ئەم لایەنەیان بە پلەی یەكەم بۆ ئەو كار و رەفتارە بەرزە دەگەڕێتەوە كە خەڵكی هەولێر هەیانە و هەرگیز بیر لە تۆڵەسەندنەوە، یان جیاكاریی نەتەوەیی و ئایینی ناكەنەوە، خۆ ئەگەر چەند گەنجێكی خوێنگەرمیش هەوڵیاندابێت كاردانەوەیەكیان هەبێت، ئەوا دەزگاكانی ئاسایش و پۆلیس ریگەیان نەداوە كاری نەشیاو بكەن، بەمەش جارێكی خەڵكی شاری هەولێر سەلماندیانەوە كە پارێزگاری لە پێكەوە ژیان و ئاشتی و لێبووردەیی دەكەن، هەروەك چۆن لەكاتی راپەڕینە مەزنەكەی بەهاری 1991 بە هەزاران ئەفسەر و پلەدار و سەربازی سوپای عێراق كەوتنە بەردەستی خەڵكی هەولێر، بەڵام خەڵكی هەولێر نەك هەر بیری لە تۆڵەسەندنەوە نەكردەوە، بەڵكو بەسەر ماڵەكاندا دابەشیان كردن و وەك میوان مامەڵەیان لەگەڵ كردن، لێرەدا دەمەوێت راشكاوانە ئاماژە بەوە بكەم كە ئەم ئاكار و رەفتارە بەرزەی خەڵكی كوردستان بە گشتی و هەولێر بەتایبەتی، عەرەبی عێراقی دووچاری سەرسوڕمان كردووە، هەر بۆ نموونە زۆرجاران شێخەكانی هۆزە عەرەبەكانی ناوچەكانی فەلوجە و حەویجە و موسڵ و ناوچەكانی دیكەی عێراق دینە لامان و راستگۆیانە پێمان دەڵێن، ئێمە پێش ئەوەی بێینە كوردستان و بەتایبەتیش شاری هەولێر و پێمانوابوو ئەگەر بێینە كوردستان و لەگەڵ كورد بژین، ئەوا خۆمان دەدەینە دەست قەزاو قەدەر و تووشی سەدان كێشە و گرفت دەبین، بەڵام ئەو واقیعەی لە ماوەی چەند ساڵی رابردوو كە لە هەولێر ژیاوین و بینیوومانە، تەواو پێچەوانەیە و خەڵكی هەولێر نەك هەر هیچ كێشە و گرفتێكیان بۆ دروست نەكردووین، بەڵكو هاوكارییان كردووین و رێزیان لێ گرتووین. بەڵام ئەم كولتووری پێكەوە ژیان و لێبووردەییە لە بەشەكانی دیكەی عێراق بوونی نییە، یان ئەگەر هەشبێت، زۆر كەمە، بەداخەوە لەو خەڵكە سڤیل و كاسبكار و نەخۆش و قوتابیانەی كورد كە بۆ كاسبی و خوێندن و چارەسەر چوونە بەغدا و موسڵ و شارەكانی دیكەی عێراق، تەنیا لەسەر ئەوەی زانیویانە كوردن و بە كوردی قسە دەكەن 135 كەسیان بە دەستی عەرەبی عێراقی كوژراون. بەڵام ئەمانە خەڵكی كوردستان بەگشتی و شاری هەولێری بەتایبەتی دووچاری كاردانەوە نەكردووە و بەردەوام پارێزگاریان بۆ سیما جوانەی خۆیانەوە كردووە كە پارێزگاریكردن بووە لە ئاشتی و لێبووردەیی و پێكەوە ژیان.
* لەماوەی چەند مانگی رابردوو پلان و بڕیارێك هەبوو بۆ بنبڕكردنی دیاردەی چەكداری، ئایا ئەم بەرنامەو بڕیارە هەر ماوە بۆ نەهێشتنی دیاردەی چەكداری و دەتانەوێت چی بكەن؟
- دیاردەی چەكداری لە ناو شاری هەولێر بوونی نییە، ئەمەش بەو مانایەی خەڵكی ئاسایی نابینیت چەكی پێ بێت، بەڵام لەناو ماڵەكان چەك هەیە، بۆ بوونی چەكیش لەناو ماڵەكاندا، كۆمەڵێك هۆكار هەیە لەوانە:
1- ناسەقامگیریی ناوچەكە (نەك هەولێر یان كوردستان) ئاشكرایە ناوچەكە ماوەی چوار پێنج ساڵە بەهۆی سەرهەڵدانی تیرۆریستانی داعشەوە ناسەقامگیرە و خەڵك بە ئاشكرا دەڵێن پێویستمان بە چەكە بۆ ئەوەی بەرگری لە خۆمان بكەین و، جێگەی رێز و شانازیشە كە لەكاتی هێرشەكانی داعش بۆ سەر كوردستان بە هەزارن خەڵك بەچەكی خۆیانەوە بۆ پارێزگاری لە كوردستان دەچوونە بەرەكانی شەڕ و رووبەڕووی تیرۆریستان دەبوونەوە.
2- هەر بەهۆی شەڕی تیرۆریستانی داعشەوە، ئێمە شەوانە مەفرەزەمان بڵاودەكردەوە بۆ ئەوەی دیاردەی چەكداری بنبڕ بكەین، بەڵام هەر كەسێكمان بە چەكەوە دەگرت، دەیگوت ئێستا لە بەرەكانی شەڕ گەڕاومەوتەوە، ئەمەش وایكرد، بنبڕكردنی دیاردەی چەكداری زەحمەت بێت، لە هەموو شوێنكیش وایە كاتێك وڵاتەكەت رووبەڕووی شەڕ دەبێتەوە، بنبركردنی دیاردەی چەكداری قورس دەبێت.
3- هەر دوای تەواوبوونی شەڕی تیرۆریستانی داعش لە ئۆكتۆبەری 2017 هێزەكانی عێراق پەلاماری كوردستانیان دا و ژمارەیەكی زۆر لەو خەڵكانەی لە كەركووك و ناوچەكانی دیكەوە هاتن بۆ هەولێر، هەموویان چەكیان پێ بوو، ئەمەش وایكرد لە بری ئەوەی دیاردەی بوونی چەك كەم ببێتەوە، كەچی زیاتری كرد.
لێرەدا دەمەوێت ئاماژە بەوە بكەم كە پێش هاتنی شەڕی داعش و پەلاماریان بۆ سەر كوردستان، دەزگاكانی ئاسایش بەگشتی و بەڕێوەبەرایەتیی پۆلیسی هەولێر بەتایبەتی، پێشنیارێكمان لە رێگەی بەڕێز وەزیری ناوخۆەوە بۆ ئەنجومەنی وەزیران بەرزكردبۆەوە و داوامان كردبوو كە حكومەتی هەرێمی كوردستان ئەو چەكانەی لای هاووڵاتیانن بیانكڕێتەوە بۆ ئەوەی دیاردەی چەكداری و بوونی چەك لەناو ماڵەكاندا بوونی نەمێنێت، لەسەر ئەم پێشنیارە بەڕێز سەرۆكی حكومەت و وەزیری ناوخۆ رەزامەندییان پیشاندابوو، بەڵام بەهۆی قەیرانی ئابووری و بڕینی بودجەی كوردستان لەلایەن حكومەتی بەغداوە نەتوانرا ئەو بڕیارە جێبەجێ بكرێت.
* ئایا هیچ پلانێكتان هەیە بۆ نەهێشتن و بنبركردنی دیاردەی چەكداری و ئایا ئە هۆكارانە بێ ئومێدی نەكردوون؟
- چەند مانگێك پێش ئێستا بە بەرنامە پلانێكمان بۆ نەهێشتن و كۆنتڕۆڵكردنی دیاردەی چەكداری بۆ شاری هەولێر داڕشتووە و ئێستا بەجددی كار لەسەر ئەو پلانە دەكەین و بەپێی ئەم پلانە، هەموو جۆرە چەكێك (مۆڵەتدار و بێ مۆڵەت لە شوێنە گشتییەكان و ناو بازار و پارك و باخچەكان بە هەموو شێوەیەك قەدەغە كراوە، لەو هەڵمەتانەی بۆ ئەمە مەبەستە كردوومانە، توانراوە زیاتر لە 200 چەك دەستیان بەسەردا بگیرێت و خاوەنەكانیشیان دراون بە دادگا، هەروەها بڕیارێكی دیكەمان دەركردووە كە پێدانی مۆڵەتی چەكهەڵگرتن بە رێژەی 80% كەم بكرێتەوە، ئەو 20%ـەش كە مۆڵەتی چەكهەڵگرتنیان پێ دەدەین، دەبێت رێوشوێنی زۆر قورسیان لەگەڵدا بگیریتەبەر و مۆری پەنجەیان وەربگیرێت، موڵەتەكەش بە فلتەری چەندین لایەنی ئاسایشی پەیوەندیدار تێپەڕ بێت. بەردەوامیش مەفرەزەكانمان دەگەڕێن بۆ ئەوەی ئەگەر هەر كەسێك چەكی هەڵگرتبێت، چەكەكەی دەستی بەسەردا بگیرێت. بوونی چەك لە كۆمەڵگە كۆمەڵێك كارەساتی ناخۆش بەدوای خۆیدا دەهێنێت، هەر بۆ نموونە لەو ماوەی پێشوو لە ئاهەنگێكی بووكگواستنەوەدا كەسێك كەسێكی دیكەی لەسەر سەرچۆپی كوشتووە، یان باوكێك كوڕەكەی خۆی كوشتووە، ئەمانە ئەو رووداوانەن كە لە ئەنجامی بوونی چەكەوە روودەدەن، بۆیە پرسی بنبڕكردنی چەك دەبێت كاری جددی لەسەر بكرێت و نەهێڵدرێت.
* زۆر جار بیستوومانە كەسێك بۆ نموونە لە سلێمانی تاوانێك دەكات دێتە هەولێر، لە هەولێر تاوانێك دەكات، دەچێتە سلێمانی، یان شارەكانی دیكەی عێراق، ئایا بۆ ئەمجۆرە تاوانانە هەماهەنگی و هاوكاریتان لەگەڵ دەزگاكانی پۆلیس و ئاسایشی شارەكانی دیكەی كوردستان و عێراق هەیە؟
- لەسەر هەندێك تاوانی دیاریكراو، بەڵێ هاوكاری و هەماهەنگیمان لەگەڵ پۆلیسی شارەكانی تری كوردستان هەیە، هەر بۆ نموونە هەندێك تاوانبار تاوانیان لە هەولێر ئەنجامداوە و هەڵاتوون بۆ سلێمانی، ئێمە بڕیار و ناونیشانی تۆمەتبارەكەمان بۆ پۆلیسی سلێمانی ناردووە و داوامان كردووە كە ئەو تۆمەتبارانە دەستگیر بكرێن و بیاننێرنەوە بۆ پۆلیسی هەولێر، بەڵام وێڕای ئەوەی ئەو هەماهەنگییەش لە نێوانماندا هەیە، بەڵام پۆلیسی سلێمانی نەیتوانیوە ئەو خەڵكانە دەستگیر بكات، ئەمەش لەبەر ئەوە نییە كە پۆلیسی سلێمانی نایەوێت دەستگیریان بكات، بەڵكو بەداخەوە لە دەزگا و شوێنی دیكەی سلێمانی ئەو تۆمەتبارانە داڵدە دەدرێن و پۆلیس ناتوانێت بیانگرێت، یان زۆر جار تۆمەتباری داواكراو دەستگیر كراوە، بەڵام ئامادە نەبوون بینێرنەوە بۆ ئێمە، بەڵام لە بەرامبەردا ئەگەر پۆلیسی سلێمانی، یان هەر دەزگایەكی ئاسایش داوای تۆمەتباری هەڵاتووی شارەكەیان لە ئێمە كردبێت، ئەوا ئێمە لە سەدا سەد دەستگیرمان كردووە و تەسلیمی لایەنی پۆلیس و ئاسایشی سلێمانیمان كردۆتەوە و تا ئێستا 56 تۆمەتباری داواكراوی سلێمانی لە هەولێر دەستگیر كراون و دراونەتەوە بە پۆلیس یان ئاسایشی سلێمانی. بۆیە هەر لێرەوە لە رێگەی گۆڤاری گوڵانەوە بە برا و هاوكارەكانم لە پۆلیسی سلێمانی و شارەكانی دیكەی كوردستان دەڵێم: با رێگە نەدەین تاوانبارێك لە شارێك تاوانێك ئەنجام بدات و لە شارێكی دیكە خۆی حەشار بدات، دووبارە دوا لە برایانی پۆلیسی سلێمانی دەكەمەوە كە چ ناوێكیان لایە بۆمان بنرێن، ئەگەر لە هەولێر خۆی حەشار دابێت، ئێمە بۆیان دەستگیر دەكەین و بۆیان دەنێرینەوە.
* ئەی سەبارەت بە هەماهەنگیتان لەگەڵ پۆلیسی شارەكانی دیكەی عێراق؟
- لەگەڵ دامودەزگاكانی پۆلیس و ئاسایشی شارەكانی دیكەی عێراقیش هەماهەنگی و هاوكاریمان هەیە، بەڵام لە دوای ئۆكتۆبەری 2017 كە رێگەی نێوان هەولێر- كەركووك، هەولێر-موسڵ نەبوو، كارەكانمان زۆر سەخت و ناخۆش بوو، چونكە ئەو تاوانبارانەی دەگیران، دەبوو بە رێگەی فڕۆكەخانەی هەولێر رەوانەی بەغدا و شارەكانی دیكەی عێراق بكرێنەوە، بەڵام ئێستا بە كرانەوەی رێگاكان كارەكان ئاسایی بۆتەوە، هەروەها ئێمە نوێنەرایەتیی هاوبەشمان هەیە لەنێوان وەزارەتی ناوخۆی كوردستان و عێراقدا و دوای ئەوەی تاوانبار بڕیاری دەستگیركردنی بۆ دەردەچێت، بڕیارەكە دەچێتە لای لیژنەی هەماهەنگی و بە بڕیاری جەنابی وەزیری ناوخۆ تۆمەتبارەكە دەستگیر دەكرێت و بە نووسراوی فەرمی تۆمەتبارەكە بۆ شارەكانی خۆیان رەوانە دەكرێتەوە و بەپێچەوانەشەوە ئەگەر تۆمەتبارێك لە لای ئێمە بۆ شارەكانی عێراق رایكردبێت، بەهەمانشێوە لەپاش دەستگیركردنی بۆ هەولێری رەوانە دەكەنەوە.
* ئایا لێبووردنی گشتی و سولحی عەشائیری تا چەند كاریگەریی خراپی لەسەر كارەكانی ئێوە دروست كردووە، چونكە لە رێگای ئەو لێبووردنی گشتی و سولحەوە تاوانباری زۆر مەترسیدار ئازاد كراون؟
- لەماوەی هەشت كابینەی حكومەتی كوردستان تاوەكو ئێستاكە 3-4 لێبووردنی گشتی بۆ زیندانیانی هەرێمی كوردستان دەرچووە، ئەمەش لایەنی باش و خراپی هەبووە، بەڵام بە بۆچوونی من وەكو بەڕێوەبەری پۆلیسی هەولێر ئەو لێبووردنە گشتییانە لایەنی خراپی زیاتر بووە، چونكە كۆمەڵێك خەڵكی تاوانبار چ پێویست دەكات بەبێ ئەوەی ماوەی حوكمی خۆی تەواو كردبێت، بێنەوە ناو كۆمەڵگە، هەروەها لەمبارەوە رەخنەیەك رووبەڕووی پەرلەمانی كوردستان دەكەمەوە، لەبەر ئەوەی یەكێك لە مەرجەكانی ئازادكردنی ئەو تاونبارانە دەبەستێتەوە بەوەی دەبێت تاوانبار لەگەڵ ماڵی خاوەن ماف سوڵح بكات، ئەمەش وایكردووە كە سوڵحی عەشائیری ببێتە دیاردەیەك، ئەمە لە كاتێكدا پەرلەمان پێش ئەوەی ئەو یاسایە دەربكات، دەبوو پرس و راوێژی لەگەڵ لایەنی پەیوەندیدار بكردایە، چونكە ئەم یاسایەی پەرلەمان وایكردووە كە دیاردەی سوڵحی عەشائیری روو لە زیادبوون بكات، بە هۆی ئەم سوڵحەشەوە كۆمەڵێك تاوانبار پێش ئەوەی حوكمەكەی تەواو بكات، دەگەڕێنەوە ناو كۆمەڵگە و دووبارە تاوانێكی دی، یان تاوانێكی هاوشێوەی تاوانەكەی پێشووی دووبارە دەكاتەوە، بۆیە من وەكو بەڕێوەبەری پۆلیسی هەولێر دژی ئەوەم كە لێبووردنی گشتی بەتایبەتی كە سولحیشی تێدا بێت لە هەرێمی كوردستان دەربچێت بۆ ئازادبوونی تاوانباران و هیچ حوكمدراوێك نابێت ئازاد بكرێت تا ماوەی حوكمەكەی تەواو نەكات.
* دیاردەی قومار و هەبوونی قومارخانە چەند هۆكارن بۆ پشێوی و دروستبوونی جۆرەها كێشەو رووداو لەناو شاری هەولێردا بۆ نەهێشتنی ئەو دیاردەیە چیتان كردوە؟
- بەشێوەیەكی فەرمی هیچ قومارخانەیەك لە رووی یاساییەوە لە هەولێر بوونی نییە، ئەو شوێنانەی قوماریان تێدا كرا، هەموویان نایاسایی بوون و بە هاوكاری و هەماهەنگیی هەموو دەزگاكانی پۆلیس و ئاسایش دەستیان بەسەردا گیراوەو ئەوانەشی لەوێ بوون بە قورماچییەكان و خاوەنی قومارخانەكانیشەوە دەستگیر كراون و رێوشوێنی یاسایی بەرامبەریان گیراوەتە بەر، بەڵام ئاشكرایە هەموو ئەوانەی دەگیرێن بێجگە لەو تاوانبارانەی بەپێی ماددەی 406 مامەڵەیان لەگەڵ دەكرێت، دەتوانرێت بە كەفالەت ئازاد بكرێن، بۆیە ئەوانەشی لە قومارخانەكان گیراون بە بەكەفالەت ئازاد دەكرێن، لەگەڵ ئەمەشدا لەگەڵ ئەوەی قومارخانە لە كوردستاندا مۆڵەتی نییە و ئەوەی هەبووە دەستی بەسەردا گیراوە، بەڵام قوماركردن بوونی هەیە و زۆر جار لە ماڵەكاندا، یان لە مەزرەعەكاندا دەكرێن، ئەمەش دەست بەسەردا گرتنی قورسە و ناكرێت پۆلیس بچێتە سەر هەموو ماڵێك، بەڵام بە هەموو شێوەیەك ئەگەر بزانرێت ماڵێك بۆتە قومارخانە ئەوا دەستی بەسەردا دەگرین، قومار كۆمەڵێك كێشەی كۆمەڵایەتی دروست دەكات و كێشەی كۆمەڵایەتی و خێزانیشی لێ دەكەوێتەوە، بۆیە بە هەموو شێوەیەك هەوڵدەدەین ئەم دیاردەیە بوونی نەمێنێت.
* لەساڵی 2018 چەند كەس لەسەر رووداوی جۆراوجۆر دەستگیر كراون؟
- لە سەرەتای ساڵەوە هەتا ئێستا كە دەكاتە 11 مانگ 4324 كەس لە هەولێر لەسەر هۆكاری جیاواز دەستگیركراون، لەناو ئەمانەدا هەندێك رووداو چەند كەسێكی لەسەر دەگیریت، بەڵام پاشان ئەو كەسانەی بێتاوانن ئازاد دەكرێن.
* پرسێكی دیكەی مەترسیدار كە ئەویش تا رادەیەك بەربڵاوە، پرسی ماددەی هۆشبەرە، ئایا ئێوە وەك پۆلیس چ رۆڵێكتان لە بەرگرتن بە ماددەی بێهۆشكەر هەیە؟
- بۆ رێگرتن لە ماددە هۆشبەرەكان لەناو ئاسایشی گشتی بەڕێوەبەرایەتییەكی سەربەخۆ بە ناوی بەڕێوەبەرایەتیی نەهێشتنی ماددە هۆشبەرەكان هەیە، بەڵام بۆ رێگەگرتن لەم دیاردەیە، كارو هەماهەنگی لەنیوان هەموو دەزگاكانی ئاسایش و پۆلیسی هەولێر و ئاسایشی گشتی هەیە، ئەوەی جێگەی دڵخۆشییە ئەوەیە كە هەتا ئێستا خەڵكی هەولێر ئالوودەی ماددەی هۆشبەر نەبووە، هەر چەندە وەك ترانزێت لە هەولێرەوە بازرگانی پێوە كراوە، تا ئێستا زیاتر لە 440 كەس لەسەر بەكارهێنان و بازرگانی بە ماددەی هۆشبەر دەستگیركراون، هەروەها لەسەر بەكارهێنانی حەب وەك (ئارتین و ڤالیۆم و.. هتد) خەڵكانێكمان هەیە، پێشتر ئەم حەبانە بەپێی یاسای دەرمانخانە مامەڵەی لەگەڵ دەكراو سزاكەی سووك بوو، بەڵام ئێستا گۆڕاوە بۆ ماددەی 21ی ماددە هۆشبەرەكان و ئەگەر كەسێك نەخۆش نەبێت و راچێتەی پزیشكی پێ نەبێت، ئەوا ئەگەر ئەم حەبانەی پێ بگیرێت، بە ماددەی 21ی ماددەی هۆشبەر مامەڵەی لەگەڵ دەكرێت.
* لە كاتی روودانی هەر رووداوێكی سرووشتی وەك لافاو و ئاگركەوتنەوە، ئێوەش دەبینرێن، ئایا ئێوەش هاوكار و هەماهەنگن لەگەڵ لایەنە پەیوەندیدارەكانی ئەو رووداوانە؟
- بۆ ئەو جۆرە رووداوانە لەناو پارێزگای هەولێر لیژنەیەك هەیە بە ناوی لیژنەی هەماهەنگی و بەدواداچوون و كاری ئەم لیژنەیەش بەدواداچوون و سەرپەرشتیی ئەو رووداوانەیە و بەڕێز نەوزاد هادی پارێزگاری هەولێر سەرۆكی ئەو لیژنەیە و لیژنەكەش پێكهاتووە لە (بەڕێوەبەری ئاسایشی هەولێر و بەڕێوەبەری پۆلیسی هەولێر و بەڕێوەبەری بەرگریی شارستانی و بەڕێوەبەری گشتیی تەندروستی هەولێر و ژینگە و.. تاد).
* ئایا بەرنامەو پلانتان هەیە بۆ دانانی كامێرای چاودێری لەناو شاری هەولێر كە زیاتر سەقامگیریی ئاسایش و هێمنی شارەكە بپارێزێت؟
- ئەگەر باری دارایی و ئابووری هەرێم بەرەو باشی بچێت، ئەوا یەكێك لە گرنگترین كارەكانمان ئەوەیە كە 10 هەزار كامێرای چاودێریی پێشكەوتوو بە دوو قۆناغ لە هەموو شاری هەولێر دابنێین.