ئەوەی دەتوانین بە شێوەیەكی گشتی سەرنجی بدەین لە بارەی كارنامەی حكومەتەكەی دكتۆر عادل عەبدولمەهدی سەرۆك وەزیرانی عێراق، ئەوەیە كە بۆ یەكەمین جارە بەرنامەی حكومەت بەم وردەكارییەوە دابڕێژدرێت و ئامادە بكرێت. كە ئێمە هەوڵدەدەین لە رێی دابەشكردنی بەسەر چەند تەوەرێكدا تیشكیان بخەینەسەر و تاوتوێیان بكەین.

یەكەم: دەستنیشانكردنی ئامانج و بەرپرسیارێتیی وەزارەتەكان
كارنامەكەی حكومەتی د.عادل عەبدولمەهدی دەستنیشانكردنی ئامانج و بەرپرسیارێتی وەزارەتەكان لەخۆ دەگرێت، كە بەشێكی هەنووكەییە و دەبێت لەماوەی 3-6 مانگدا جێبەجێ بكرێت و بەشێكی دیكەی مامناوەندییە و جێبەجێكردنی لەنێوان 16-18 مانگ دەخایەنێت و بەشەكەی دیكەی درێژخایەن و دوورمەودایەو جێبەجێكردنی 19-48 مانگ دەخایەنێت، بەمشێوەیە ئامانجەكان و بەرپرسیارێتی وەزارەتەكانیش لە جێبەجێكردنی ئەم ئامانجانە لە رووی ماوەی زەمەنی دەستنیشان كراوە. تەنانەت وردەكاریی ئەوەش لەخۆ دەگرێت كە وەزارەتێكی دیاریكراو چ ئامانجێك بەدی بهێنێت، یان چ بەرپرسیارێتیەك بگرێتەئەستۆ. ئەگەر هەڵسەنگاندنیشی بۆ بكەین، ئەوا من پێموایە ئەمە جۆرە پۆلێنكردنێكی سەرەتایی و گرنگە بۆ سەرۆكی حكومەت، كاتێك ئەم جۆرە دیدگایەی هەبێت، ئەمەش بە واتای ئەوە دێت كە د.عادل عەبدولمەهدی رۆئیایەكی روونی هەیە بۆ داهاتووی عێراق لە ماوەی چوار ساڵی داهاتوودا.
دووەم : سەرچاوەكانی داڕشتنی بەرنامەی حكومەت
ئێمە دەزانین لەماوەی رابردوودا و پێش ئەوەی د.عادل عەبدولمەهدی راسپێردرێت بۆ پێكهێنانی حكومەتەكەی زۆربەی سەرنج و تێڕوانین و تێبینیەكانی خۆی لەبارەی پرۆسەی حكومڕانی لە عێراق و لەسەر دیاردە سیاسییەكان لە چوارچێوەی كۆمەڵێك گوتاردا خستۆتەڕوو، ئەمەش بە واتای ئەوەی ئەو تێڕوانینی خۆی هەبووە لەسەر پرسەكانی پەیوەست بە حكومڕانی و ئێستاش بەشێكی ئەو وتار و سەرنجانەی خۆی كردوونەتە بنەمای بەرنامەی حكومەت. كەوابێت خاڵێكی گرنگی ئەم بەرنامەیە ئەوەیە كە تەنیا چەند دەستەواژە و گوزارشتێك نین كە ئامانجی لێیان تەنیا بەدەستهێنانی متمانەی پەرلەمانی عێراق بووبێت، هەروەك ئەوەی هەندێ لە چاودێران بەم شێوەیە لێی دەڕوانن، بەڵكو كۆمەڵێك سەرچاوە و بابەتی دیكە كراونەتە بەشێك لە بەرنامەكە، مەبەستم ئەوەیە ئەگەر بمانەوێت لە بەرنامەكەی بەڕێز د.عادل عەبدولمەهدی تێبگەین، ئەوا دەبێت بگەڕێینەوە بۆ سەرچاوەكانی داڕشتنی ئەو بەرنامەیە، كە ئاشكرایە سەرچاوەی سەرەكی و یەكەمی دەستوورە، هەروەها ئەو خۆی پێشتر پەیپەرێكی نووسیوە بە ناوی (المرتكزات الاولیة للحكومة القادمة)، بە هەمان شێوە نەتەوە یەكگرتووەكانیش لە رێی یۆنامییەوە پەیپەرێكی پێشكەش كردووە لەم رووەوە، ئەمە جگە لەو پێشنیار و تێبینییانەی كە لایەنە سیاسییەكان بە بەڕێز د.عادل عەبدولمەهدی پێشكەشیان كردووە. هەروەها پلانێك هەیە پێی دەڵێن پلانی گەشەپێدانی عێراق لە 2018-2022 كە د.عادل عەبدولمەهدی بەشێكی زۆری ئەم پلانەی كردووە بە بەرنامەی حكومەتەكەی خۆی، بابەتێكی دیكەش هەیە بە ناوی (رؤیة العراق التنمویة) تێڕوانینی گەشەپێدانی عێراق بۆ 2030- واتە ئایا عێراق لە ساڵی 2030دا دەگاتە چ ئاستێك لە گەشەكردن-. لەلایەكی دیكەوە نەتەوە یەكگرتووەكان ئاماژەكانی گەشەپێدان بۆ ساڵی 2030 داڕشتووە (مؤشرات التنمیة) كە هەر وڵاتێك دەتوانێت لە رێگەی ئەم ئاماژانەوە بزانێت كە لە ماوەی چوار ساڵدا چی كردووە. واتە دەكرێت سوود لە ئاماژەكانی گەشەپێدانی وەربگرین كە نەتەوە یەكگرتووەكان دەستنیشانی كردووە بۆ 2030 لە هەموو بوارەكاندا، بۆ نموونە ئێمە كە دەچینە بواری تەندروستی بەشێك لە ئاماژەكانی گەشەپێدانی پەیوەندی بە ژمارەی پزیشك و ژمارەی دانیشتووانەوە هەیە، واتە ئەم ئاماژانە پێوەر لەخۆدەگرێت، بۆ نموونە دەكرێت بە گوێرەی ئەم پێوەرانە ئێمە ئەوە دەستنیشتان بكەین كە لە ئێستادا لە كوردستان پێویستمان بە 20 هەزار پزیشك هەبێت لە كاتێكدا رەنگە تەنیا 6-7 هەزار پزیشكمان هەبێت، واتا 15 هەزار كەمتر پزیشكمان هەیە، خۆ ئەگەر بێت و ئێستا ئێمە دەستبەكار بین و بڵێین پێویستە ژمارەی پزیشكەكانی ئێمە لە چوارچێوەی ئاماژە جیهانییەكانی گەشەپێدان بن، ئەوا دەتوانین دوای شەش ساڵی دیكە دەرئەنجامەكە وەربگرین، چونكە دوای شەش ساڵ ئەوان خوێندن تەواو دەكەن. كەواتە بوونی ئەم تێڕوانینە گرنگە، چونكە كاتێك تۆ تێڕوانین و دیدگایەكت هەبوو دەتوانیت سیاسەتی گشتی خۆتی لەسەر دابڕێژیت، پێموایە د.عادل عەبدولمەهدی ئەم تێڕوانینەی لا زۆر روونە و بە تەواوەتی دەستنیشانی كردووە بۆ ئەوەی كاری لەسەر بكات.
سێیەم: دیاریكردنی سەقفی زەمەنی
یەكێك لەبنەماكانی دیكەی بەرنامەكەش لەوەدایە كە لە ماوەی 100 رۆژدا د.عادل عەبدولمەهدی كاردەكات لەسەر ئەوەی كە وەزارەتەكان وردەكاری چۆنیەتی ئەنجامدان و سیاسەتی جێبەجێكردنی ئەم پلانە و بەرنامە و ستراتیژیەتە رەوانەی ئەنجومەنی وەزیران بكەن، ئالێرەدا چەند تێبینییەكی سلبی لەسەر كارەكانی سەرۆك وەزیران هەیە، كە دەبووایە بەرنامەی وەزارەتەكان بۆ سێكتەرەكان پێشتر ئامادە كرابێت، واتە دەبوو بە پشتەستن بە سەرچاوەكانی داڕشتنی بەرنامەكەی وردەكاری بۆ ئەو سێكتەرانەش دابنایە بۆ ئەوەی بگونجێن لەگەڵ ئەو دیدگایەی كە خۆی هەیەتی. دواتر ئێمە لە 100 رۆژی یەكەمی دەستبەكاربوونی حكومەتدا چاوەڕێی دەستكەوت و دەرئەنجام دەكەین، نەك وردەكاری جێبەجێكردنی بەرنامەكە. لەگەڵ ئەوەشدا، رەنگە ئەو هەڵسەنگاندنێكی واقیعیانەی هەبێت و ئەوەی لەبەرچاوگرتبێت كە ئاست و ئەندازەی ئاڵۆزییەكانی عێراق بە چەشنێكن كە رەنگە پێویست بەوە بكات وەزارەتەكان لە ماوەی ئەو 100 رۆژەدا ئەزمونێكی تەواویان هەبێت بۆ ئەوەی خوێندنەوەیەكی گشتیان لا گەڵاڵە بێت و حكومەتی عێراق وەك یەك تیم كاربكەن.
چوارەم : تەوەرەكانی بەرنامەی حكوومی
یەكێك لە گرنگترین تەوەرەكانی بەرنامەی حكوومی مەسەلەی تەواوكردنی بنەماكانی بنیادنانی دەوڵەتی عێراقە، كە چەند تەوەرێك دەگرێتەوە و پەیوەندیدارن بە دەستوور و جێبەجێكردنی سەرجەم دەقە دەستوورییەكان، كە چەندین بڕگە و ماددەی ئەم دەستوورە پەكخراون. چونكە كاتێك ئێمە ریفراندۆممان ئەنجام دا، یەكێك لەو هۆكارانەی كە بۆ كۆمەڵگەی نێودەوڵەتی و بۆ ناوخۆش دەمانخستەڕوو، ئەوە بوو كە دەستوور وەك خۆی جێبەجێ نەكراوە و زیاتر لە 55 ماددەی دەستووری فەرامۆش كراون و پێشێل كراون. لێرەدا ئەو پرسیارە دروست دەبێت: ئایا تاچەند پەرلەمانی عێراق پشتیوانی سەرۆك وەزیران دەكات بۆ جێبەجێكردنی دەقە دەستوورییەكان؟ چونكە جێبەجێكردنی پێویستی بە دەركردنی یاسا هەیە و هەندێ یاساش هەیە كە دەبێت بە زۆرینەی دوو لەسەر تێپەڕێندرێن. ئەو دەزگا سەرەكییانەی لە رێی یاساوە دروست دەبن، وەك ئەنجومەنی ئیتیحادی، دادگای فیدڕاڵی، كە دەكرێت تەوافوقێكی تەواویان لەسەر دروست بێت. لەلایەكی دیكەوە رەنگە دەرچوواندنی هەندێ یاسای وەك یاسای نەوت و غاز كێشەی قووڵتر دروست بكات و رەنگە ببێتەهۆی قووڵكردنەوەی قەیرانی سیاسی لە عێراقدا، ئەمە لە كاتێكدا یەكێك لە ئامانجەكانی د.عادل عەبدولمەهدی ئەوەیە بە كەمترین قەیران ئەم چوار ساڵە تێپەڕێنێت و هەوڵبدات قەیران و ململانێی سیاسی دروست نەبێت، بەتایبەتی لە نێوان هەرێمی كوردستان و بەغدا، بەڵكو كات و كۆشش تەرخان بكرێت بۆ دەستەبەركردنی خزمەتگوزاری و بۆ بونیادنانەوەی عێراق و بەهێزكردنی ئابوورییەكەی، كە ئێمەش دەزانین بووژاندنەوەی ئابووری لەگەڵ ناسەقامگیریی سیاسیدا ناگونجێت.
پێنجەم: پرسی هەمواركردنەوەی دەستوور
خاڵێكی تری هەستیار ئەوەیە كە باس لەوە دەكات لە هەر هەڵبژاردنێكدا سندوقێكیش بۆ راپرسی دابنرێت، مەبەستیش راپرسییە لەسەر ئەو ماددە دەستوورییانەی لەلایەن پەرلەمانەوە هەموار دەكرێت، كە دەبێت كوردستان بە وریاییەوە مامەڵە لەگەڵ ئەم پرسەدا بكات. چونكە ئەمە مەترسی تێدایە، مەترسیەكەش لەوەدایە كە ئەوان دەیانەوێت لە میانەی هەمواركردنەكەدا بەشێك لەو ماددە دەستوورییانە هەموار بكرێنەوە كە پەیوەستن بە كێشەكانی عێراق، بۆ نموونە ئەو ماددانەی پەیوەستن بە بنەما سەرەكییەكانی دەستووری عێراقەوە، كە لە سەرەتای دەستووردا هاتوون و بەشێكیان پەیوەندیدارن بە ماف و ئازادییەكان و هەندێكیان بە مافی هەرێم و پارێزگاكانەوە. لێرەدا جێی خۆیەتی ئاماژە بەوە بكەین كە تا ئێستا ماددەی 142 ی دەستووری عێراقی جێبەجێ نەكراوە، كە باس لەوە دەكات ئەنجومەنی نوێنەران لە خولی یەكەمی لێژنەیەك پێك دەهێنێت بۆ پێداچوونەوە بەو ماددە دەستوورییانەی كە پێویستە هەموار بكرێنەوە و دواجار دەخرێتە راپرسی، بەڵام ئەگەر دوو لەسەر سێی 3 پارێزگا رەتیان كردەوە، ئەوا ئەمە هەمواركردنە جێبەجێ ناكرێت. كەواتە ئەمە رێگرە لەبەردەم ماددەی 126ی دەستووری عێراقی كە ماددەی هەمواركردنی دەستوورە. ئێستا عێراقییەكان دەتوانن بنەما سەرەكییەكان هەموار بكەن، تا دێنەسەر ماف و ئازادییەكان، واتە دەتوانن سەرجەمیان هەموار بكەن. جگە لەو ماددانەی پەیوەستن بە دەسەڵاتی هەرێمەكان كە ناتوانن دەستكارییان بكەن. بەڵام مەسەلەكە ئەوەیە كە هەموو شتێك پەیوەندی بە دەسەڵاتەكانی هەرێمەكانەوە نییە، واتە ئەوان دەتوانن بە گوێرەی ماددەی 126 ناسنامەی دەوڵەتی عێراق بگۆڕن و تەنانەت دەتوانن ماددەی یەكەمیش بگۆڕن، ئەمە خاڵێكی گرنگەو لەبەرنامەكەدا هاتووە، بۆیە دەبێت سەركردایەتی سیاسیی كوردستان و هێزە سیاسییەكان زۆر بە وردی لەسەر ئەم بابەتە بوەستن و كاری لەسەر بكەن، بەوەی بزانن ئایا نییەت و مەبەستی سەرۆك وەزیران چییە لە ئێستادا كە باسی هەمواركردنەوەی دەستوور دەكات، چونكە هێشتا ماددەی 142 ماوە كە بووەتە قفڵ بۆ هەمواركردنەوەی دەستوور و تەنانەت دادگای فیدڕاڵیش ئەمە قبووڵ ناكات. بەڵام ئەگەر ئێستا ئیرادەیەكی سیاسی دروست بووە بۆ تێپەڕاندنی ئەوا ئەمە مەترسیدارە. چونكە چەند جارێك دەستەواژەی (لایجوز) هاتووە، بۆ نموونە كە باسی (لا یجوز تعدیل المبادئ الاساسیة الواردة في الباب الاول و الحقوق و الحریات الواردة في الباب الثاني الا بعد دورتین انتخابیتین متعاقبتین) دەكات، كە دوو خولی هەڵبژاردنیش رۆیشتووە، كە لە سەردەمی مالیكی خولی دووەمیش تەواو بوو و دواتر سەردەمی دەسەڵاتی عەبادی دەستی پێكرد كە ئەو كاتە شەڕ بوو و فریا نەكەوتن، بەڵام ئێستا ئەوان دەتوانن هەمواركردنەوەیان بۆ بكەن، مەبەستم لە بنەما سەرەكییەكانە، كە ناسنامەی دەستووری عێراق تێیدا چەسێپندراوە و لە دەستوورەكەدا هاتووە كە (لا یجوز تعدیل المواد الاخری غیر المنصوص علیها فی البند ثانیا من هذه المادة الا بعد موافقة ثلثي اعضاء مجلس النواب علیه و موافقة الشعب بالاستفتاء العام و مصادقة رئیس الجمهوریة)، ئەوانی دیكەش بە رەزامەندی دوو لەسەر سێ هەموار دەكرێنەوە كە ئێستا هەندێ ماددەی دەستووری هەن شیعە و سوننە رێككەوتوون لەسەر ئەوەی هەمواریان بكەنەوە و دەتوانن دەنگی دوو لەسەر سێی بۆ مسۆگەر بكەن، دواتر كاتێك ماددەكە دەڵێت رەزامەنديی گەل لە راپرسی گشتیدا، ئەمەش واتای زۆرینەیە، تەنیا ئەوە نەبێت كە دەڵێت ( لا یجوز اجراء اي تعدیل علی مواد الدستور من شأنه ان ینتقص من صلاحیات الاقالیم التي لا تكون داخلە من ضمن الاختصاصات الحصریة للسلطات الاتحادية الا بموافقة السلطة التشریعیة في الاقلیم المعني و موافقة اغلبیة سكانه باستفتاء عام). كەواتە یەكێك لە خاڵانەی كە دەبێتە كێشە و هۆكاری قەیرانی سیاسی ماددەی 126 و ئەوەیە كە لە بەرنامەكەی د.عادل عەبدولمەهدی هاتووە كە دەڵێت: دەبێت هەمواركردنە دەستوورییەكان بكرێت، واتە ئەو ماددەی 140ی دەستووری فەرامۆش كرد و راستەوخۆ تەركیزی لەسەر ماددەی 126 كردووە.
شەشەم: چارەسەركردنی كێشەكانی هەرێم و بەغدا
لە میحوەری یەكەم كە باسی تەواوكردنی بنەماكانی دەوڵەتی عێراق دەكات، ئاماژە بەوە كراوە كە هەرێم و بەغدا هەوڵی چارەسەركردنی كێشەكان بدەن، وەك كێشەی پەیوەندیدار بە نەوت و غاز و كێشەكانی دیكە. تەنانەت لەبەرنامەكەی د.عادل عەبدولمەهدی لەهەر شوێنێك باسی سوپای عێراق كرابێت، ناوی پێشمەرگەشی هێناوە لەسەرجەم بوارەكانی پڕچەككردن و ئامادەكردن و راهێنان، بەڵام لەژێر ناونیشانێكی دیاریكراو كە هەموویان سەر بە فەرماندەی گشتی هێزە چەكدارەكانی عێراق بن، لێرەدا رەنگە دكتۆر عادل عەبدولمەهدی جیاوازی لەگەڵ عەبادی و مالیكی هەبێت و متمانەی زیاتری هەبێت، بەڵام خۆ ئێمە تەنیا مامەڵە لەگەڵ عادل عەبدولمەهدی ناكەین، بەڵكو مامەڵە لەگەڵ ئەو عەقڵییەتە دەكەین كە بەشێوەیەكی گشتی حكومەتی عێراق بەڕێوە دەبات. لەلایەكی دیكەوە گرنگییەكی زۆر دراوە بە پیشەسازیی سەربازی و بە یەكێك لە ریزبەندی كارەكانی ئەم حكومەتە دادەنرێت. ئێمە دەزانین كە مەسەلەی بەرگری مەسەلەیەكی سیادییە، بەڵام ئایا پشك یان لانیكەم پلانی هەرێمی كوردستانیش دەبێت لەم بوارەدا چی بێت، بۆ ئەوەی ئێمەش ئیمتیازی پیشەسازی سەربازی بمانگرێتەوە، چونكە بەپێی زانیارییەكان ئێستا حەشدی شەعبی پیشەسازیی سەربازییان هەیە و لە چوار ساڵی داهاتوو زۆر بەهێز دەبن لەم بوارەدا، بۆیە دەبێت ئێمەش لە كوردستان كار لەسەر ئەم خاڵە بكەین.
حەوتەم: سەروەریی عێراق
د.عادل عەبدولمەهدی زۆر جەختی لەسەر سەروەریی عێراق كردۆتەوە، لەگەڵ چۆنیەتی گەڕاندنەوەی شكۆی دەوڵەت بۆ سەرجەم ناوچەكانی عێراق و زاڵكردنی سەروەری بەسەر هەموو پرسێكدا و دەستێوەردانی دەوڵەتە هەرێمییەكان كەم ببێتەوە لە كاروباری ناوخۆی عێراق و عێراقیش لە رێی دەسەڵاتی ئیتیحادییەوە خاوەنی دەسەڵاتی سەربەخۆی خۆی بێت. كە دەتوانم بڵێم رەنگە ئەمە بە هێزی نەرم بكات، واتە لە رێگەی ئەنجامدانی دانوستان و گفتوگۆ لەگەڵ حكومەتی هەرێمی كوردستان، لە رێی بەردەوامیدان بەو لێژنە هونەرییانەی پێكیانهێنابوو لە دوای ریفراندۆمەكەوە، كە حكومەتی هەرێم و حكومەتی بەغدا توانیان لە رێی ئەم لیژنانەوە دانوستانێكی دوورو درێژ بكەن، بە بێ ئەوەی هیچ لایەكیان تووشی ئیحراجبوونێكی سیاسی ببنەوە. بۆیە لەوە باوەڕەدام كە د.عادل عەبدولمەهدی درێژە بەم دانوستاندنە تەكنیكییانە بدات بۆ چارەسەركردنی كێشەكان.
هەشتەم: گەشەپێدان و ئابووری
ئەوەی تێبینی دەكرێت لە چوارچێوەی پرسی گەشەپێدان و ئابووریدا ئەوەیە د.عادل عەبدولمەهدی جیاوازی نەخستۆتە نێوان بەسرە و هەرێمی كوردستان لە پرسی گەشەپێدان و ئابووریدا، وەك رێگا و بان و دروستكردنی رێگای خێرا لە نێوان پارێزگاكاندا، هەروەها لە بوارەكانی دیكەی گەشەپێداندا، واتە مەبەستی ئەوەیە یەك پلانی گشتگیری سەرتاسەری بۆ گەشەپێدان لە عێراقدا دەستپێبكات، كە سەرۆك وەزیران دەیتوانی تێڕوانینەكانی بگەیەنێتە حكومەتی هەرێمی كوردستان و هێزە سیاسییەكانی فەرمانڕەوا لە حكومەتدا بۆ ئەوەی ئەگەر سوودی بۆ هەرێمی كوردستان هەیە، ئێمەش بە میكانیزمێك سوود لەو بەرنامەیە وەربگرین، بەتایبەتی ئەگەر سوودی بۆ گەشەپێدان هەبێت. هەروەها لە بواریی دەستەبەركردنی خزمتگوزاریشدا بەرنامەیەكی وردی داڕشتووە بۆ ئەوەی جێبەجێی بكات.
نۆیەم: پرسی چارەسەركردنی گەندەڵی
لە راستیدا پرسیاری سەرەكی ئەوەیە تا چەند ئەم بەرنامەیە دەبێتە هۆكارێك بۆ نەهێشتنی گەندەڵی و تا چەند خودی گەندەڵی دەبێتە رێگر لە بەردەم جێبەجێكردنی ئەم پلانە. من پێموایە كێشەكە لە خودی سەركردایەتی، یان وەزیرەكاندا نییە، بەڵكو كێشەكە ئەوەیە تۆ لە نێو دامەزراوەیەكدا كار دەكەیت كە لە سەرەوە تا خوارەوە نوقمی گەندەڵی بووە و بگرە لەوێ گەندەڵی بۆتە مەسەلەیەكی كەلتووری، لەبەر ئەوە پێموانییە ئەو بەرنامەیەی دایناوە بە ئاسانی جێبەجێ ببێت، كە رەنگە بتوانێت لە هەندێ بواری دیاریكراودا سەركەوتوو بێت و سەركەوتووش دەبێت. بەڵام دەبێت ئەوەشمان لەبەرچاو بێت كە خەڵكیش سەبر و ئارامی نەماوە، بەتایبەتی لە ناوچەكانی ناوەڕاست و باشووری عێراق، هەر بۆیە پێشبینی دروستبوونەوەی خۆپیشاندانەكان دەكرێت، لەولاشەوە رەنگە هاوپەیمانی سائیرون و هەندێك لە هێزە عێراقییەكانی دیكە دەرفەتێك بدەنە حكومەتەكەی د.عادل عەبدولمەهدی بۆ ئەوەی هەندێ دەستكەوتی بەرچاوی هەبێت، كە خۆیشی 100 رۆژی داناوە بۆ داڕشتنی وردەكارییەكانی جێبەجێكردن و جێبەجێكردنی هەندێ پرس و مەسەلە بە شێوەیەكی خێرا. بە شێوەیەكی گشتی ئەو پێشبینیەش هەیە كە خۆپیشاندانەكان درێژە بكێشن و ئەم حكومەتەش تا سەر بەردەوام نەبێت. چونكە راستە بەرنامەكەیان رێكوپێكە و دەكرێت سەرۆكی حكومەتی ئەم رۆئیایەی هەبێت و بەدواداچوون بۆ جێبەجێكردنی بەرنامەكە بكات، بەڵام رەنگە قورس بێت كە توانای جێبەجێكردنی ئەم بەرنامەیەی هەبێت، هەر بۆیە بۆچوونێك هەیە پێشبینی ئەوە دەكات لە ماوەیەكی دیاریكراودا ئەم حكومەتە بڕووخێت. بەڵام رەنگە خودی ئەم پێشبینییە ببێتە پاڵنەر و هاندەریان بۆ باشتركردنی ئەدای خۆیان و ئەو راستییەیان لەبەرچاو بێت كە ئەم حكومەتە بە چەشنی حكومەتەكانی دیكە نییە و هەر كاتێك خەڵكی بیانەوێت، دەیڕووخێنن.
لە كۆتاییدا پێموایە ئەم مۆدێلەی د.عادل عەبدولمەهدی دایناوە لە زۆربەی وڵاتان كاری لەسەر دەكرێت، واتە بەرنامەی حكومەت دەبێت بەم شێوەیە وردەكاری لەخۆبگرێت. كە دەكرێت ئێمە سوودی لێوەربگرین، چونكە پێشتر حكومەتی هەرێمی كوردستان بەرنامەی خۆی دەخستەڕوو و راستەوخۆ دەستیان بە جێبەجێكردنی دەكرد، كە پەیوەست بوون بە راییكردنی كاروباری رۆژانە، لەوانەیە لە هەندێ كەرتدا ستراتیژیەت هەبووبێت، وەك كەرتی نەوت، بەڵام لە زۆربەی هەرە زۆری كەرتەكانی دیكە كێشەی ستراتیژیەتمان هەبوو، لەبەر ئەوە دەكرێت ئێمەش سوود لەو سەرچاوانە وەربگرین كە د.عادل عەبدولمەهدی بەكاری هێناون بۆ داڕشتنی بەرنامەكەی- و جگە لە بەرنامەی سیاسیی حزبە بەشداربووەكانی حكومەت- دەتوانین سوود لە ئاماژەكانی گەشەی مرۆیی وەربگرن، هەروەها ئەو دیراسەتانەی دیكەش كە لەبارەی هەرێمی كوردستانەوە كراون، كەوابێت ئەمە سوودێكی زۆری دەبێت چونكە ئێمەش ئیستیحقاقی پێكهێنانی حكومەتی هەرێممان لە پێشە و دەكرێت سەرۆكی ئەنجومەنی وەزیرانی داهاتووی هەرێمی كوردستان بە رۆئیایەكەوە بۆ كاركردنی چوار ساڵی داهاتوو دەست بە هەڵگرتنی هەنگاوەكانی بكات، كە دواتر ئێمە دەتوانین ئەو هەنگاوانەی وەك ئاماژەیەك دەستنیشان بكەین.