لەگەڵ دەستپێكردنەوەی جێبەجێكردنی پڕۆژەكان و كەمبوونەوەی شوێنەواری قەیرانە داراییەكە؛ لە پارێزگای هەولێر چەندین پڕۆژە دەست بە جێبەجێكردنەوەی كراوە. بۆ قسەكردن لەسەر پڕۆژەكان و چەند بابەتێكی پەیوەندیدار بە سێكتەرەكانی پەروەردەو تەندروستی چەند پرسیارێكمان ئاراستەی نەوزاد هادی پارێزگاری هەولێر كردووە، لێرەدا پوختەی قسەكانی بڵاودەكەینەوە.

* یەكێك لەو پڕۆژانەی كە جێگای سەرنجەو بۆ هەولێر و گرنگیی تایبەتی هەیە، پڕۆژەكانی رێگاوبانە، ئایا گرنگترینی ئەو پڕۆژانە چین كە لەبواری رێگاوباندا دەست بە جێبەجێكردنەوەی كراوە؟
- لەگەڵ دروستبوونی قەیرانی دارایی لە دوای ساڵی 2014 پڕۆژەكان بەگشتی راگیران، بەڵام لە هەولێر چەندین پڕۆژەی ستراتیژی و گرنگی خزمەتگوزاریی كاریان تێدا كرا، لەوانە پڕۆژەی شەقامی بازنەیی 120مەتری، كە كۆمپانیای هێمن گروپ دەستپێكی پڕۆژەی 120مەتری ئەنجامدا، كە قۆناغی یەكەمی لە رێگای موسڵ بۆ رێگای مەسیف سەڵاحەدین تەواو كرد و قۆناغی دووەمیشی ماوەیەك پێش ئێستا تەواو كرد، كە لە رێگای مەسیف سەڵاحەدین بۆ رێگای كەسنەزانە و ئێستا هێمن گروپ لەكاركردندایە بۆ تەواوكردنی قۆناغی كەسنەزان-كەركووك. هەروەها نێوان رێگای كەركووك بۆ رێگای موسڵ كە درابوو بە كۆمپانیایەكی توركی كە بەپێی ڕێككەوتنیك رەزامەندی دراوە لەو كۆمپانیا توركییە وەرگیراوەتەوە و هەر كۆمپانیای هێمن گروپ تەواوی دەكات و بە دڵخۆشییەوە هێمن گروپ بڕیاری داوە بۆ ئەمساڵ ئەو رینگەش كە دوا رینگەیە لە شەقامی 120مەتری تەواوی بكات، بەمەش 120مەتری بازنەی 360پلەی تەواو دەكات. شەقامی 120مەتری بازنەیی یەكێكە لە شادەمارە سەرەكییەكانی هاتوچۆی شاری هەولێر، چونكە شاری هەولێر بە حوكمی قەڵات ماستەرپلانیكی بازنەییە و شەقامەكانی بازنەییە، هەر بۆییە شەقامەكانی 30مەتری و 40مەتری و 60مەتری و 100مەتریمان هەبووە و ئێستاكە 120مەتریش لە قۆناغی كۆتاییدایە و شەقامی 150مەتریش و رەزامەندی لەسەر دراوە، شەقامی 120مەتری كە تەواو دەبێت، هیچ راوەستان و ترافیكێكی تێدا نییە، ئەگەرچی لە 30مەتری و 40مەتری و 60مەتری و 100مەتری كێشەی راوەستان و هەبوونی ترافیك هەیە، هەر چەندە تونێل و پردی خێرا لە 60مەتری و 100مەتری هەیە، بەڵام بەپێی پێویست نییە، بۆیە راوەستان و ترافیك لەسەر ئەو شەقامانە هەیە، بەڵام 120مەتری ئینترچەینجەكانی تەواون و هیچ لەمپەرو راوەستانی تیدا نییە، بۆیە ئەو شەقامە رەنگدانەوەو كاریگەریی باش و زۆری لەسەر كەمبوونەوەی جەنجاڵی لە شاری هەولێر دەبێت و رەنگدانەوەی باشیش لەسەر هاتوچۆ و جووڵەی بازاڕو ئابووری و بازرگانی دروست دەكات، ئەو شەقامە هێزێكی گەورە دەداتە شاری هەولێر لە هەموو بوارێكەوە، هەر بۆ نموونە ئەو قورساییەی هاتوچۆ كە لەسەر شەقامی 100مەتری هەیە، كەم دەبێتەوە و دەگوازرێتەوە بۆ سەر شەقامی بازنەیی 120مەتری، چونكە لە هەر شوێنێكی شاری هەولێر بتەوێت بچیت بۆ لایەكی تری لە رێگای 120مەتری دەتوانێت بە كەمترین ماوەو بە ئاسانی بۆی بچیت، ئەمەش چ بۆ ناو شاربێت، چ بۆ دەرەوەی شار، لەلایەكی تر ئەو ئۆتۆمبێلە بارهەڵگرانەی كە لە دەروازەی ئیبراهیم خەلیل، یا هەر ئاراستەیەكی تر بیانەوێت بێن بۆ هەولێر، لەو رێگاوەوە زۆر بە ئاسانی دەگەنە شوێنی مەبەستی خۆیان و بەپێچەوانەشەوە لێی دەردەچن و بۆ بارهەڵگرەكان ئەم شەقامە وەكو ترانزێتە و لەمەودوا بارهەڵگرەكان ناچنەوە سەر شەقامی 100مەتری، ئەمەش گەورەترین ئاسانكاری بۆ شۆفیری بارهەڵگرەكان دروست دەكات
* باسی پڕۆژەی شەقامی 150 مەتریتان لە شاری هەولێر كرد، ئەمە كەی دەست بە ئەنجامدانی دەكرێت؟
- یەكێك لەو پڕۆژانەی كە ئێستا رەزامەندی لەسەر دراوە كە بكەوێتە بواری جێبەجێكردنەوە، شەقامی 150مەترییە وەكو قۆناغی یەكەم لە رێگای بەحركە تا رێگای كەسنەزان دەستپێدەكات، ئەم بەشەی شەقامی 150مەترییە زۆر ستراتیژی و پێویست و گرنگە بۆ شاری هەولێر، چونكە ئەو ناوچانەی شارەكە زۆر بەرفراوان بووە، ئەم شەقامەش چەندین شوێن و ئاوەدانی بەیەكەوە دەبەستێتەوە، لەوانە بەڕێوەبەرایەتی هاتوچۆی نوێ و گەنجان ستی و پڕۆژەی خانووی كۆرییەكان و قونسولخانەی ئەمریكی و شاری مامۆستایان و پیرزین و ناوچەكانی دەوروبەری شاوەیس، لەلایەك دی دەسووڕێتەوە بۆ ئاشتیی دوو و كەسنەزان، واتە ئەم شەقامە بەسەر چەندین گەڕەك و ئاوەدانیدا دەڕوات و هاووڵاتیان سوودی لێوەردەگرن. بە دروستكردنی شەقامی 150مەتری، هەولێر بەرفراوانی و ئاوەدانی زیاتر بەخۆییەوە دەبینێت و ئەو پڕۆژانەی لەم دواییەو لەو قەیرانە ئەنجام دراون پشكی شێر بەر هیممەت و دڵسۆزیی هێمن گروپ دەكەوێت لەجێبەجێكردنی و كوالێتی زۆر باش و ستاندارد، هەروەها پڕۆژەیەكی تر كە لەم قەیرانە داراییە تەواو كرا، رێگای هەولێر – موسڵە بە ئەندەرپاس و ئۆڤەرپاسەوە كە كۆمپانیای دارین جێبەجێی كرد.
* ئەی سەبارەت بە شەقامەكانی ناو سەنتەری شاری هەولێر هیچ پڕۆژەیەكتان بەدەستەوەیە؟
- بەڵێ، چەندین پڕۆژە ئەنجام دراوە، ئەو چوارڕێیانەی سەر سەد مەتری كە بۆ بەحركە دەڕوات تەواوكرا، ئەمەش رەنگدانەوەی ئیجابیی زۆری هەبوو لەسەر جووڵەی هاتوچۆی هەولێر و ئەو ناوچەیە و ئاوەدانی شوێنەكە لەگەڵ تەواوبوونی ئەو پڕۆژەیەدا ئاوەدانی زیاتریان بەخۆوە بینی، كە پێشتر ئەم شوێن و شەقامە جووڵەی ئابووری لەسەر زۆر كەم بوو، ئەمەش هێزێكی بازرگانی و ئابووری داوەتە ئەو بازاڕو پێكهاتانەی لەم شوینەدا كار دەكەن، بۆیە بەپێی سرووشتی خۆی پڕۆژە خزمەتگوزارییەكان دەبنە پاڵپشت و هێزێكی گەورەو كاریگەر بۆ ئابووری و جووڵەی بازاڕ، چونكە ئەو بەرنامە خزمەتگوزارییانەی هەبووە لە هەولێر هێزێكی گەورەی بازرگانی و ئابووری پێداوە، لەلایەكی تر لەم قەیرانەدا چەندین كارو پڕۆژە بە داهات جێبەجێ كراوە، وەكو بەشێك لە دروستكردنی شەقام و كۆنكرێتكردنی كۆڵانەكانی ناو گەڕەكەكانی هەولێر و دروستكردنی چەندین باخچە و پارك و..تاد، ئەمەش بەو بودجەیە بووە كە شارەوانییەكان بەشێك لەداهاتەكانی خۆیان رەزامەندی ئەنجومەنی وەزیرانی لەسەر هەیە، پڕۆژەكانیان پێ جێبەجێ كردووەو هەر پڕۆژەیەكی تریش كە پێویست بووە.
* ئەی سەبارەت بە پڕۆژەكانی تونێل بەتایبەتی پڕۆژەی تونێلی پیرمام ئەوە بەكوێ گەیشتووە؟
- ئێستا پڕۆژەیەكی زۆر گرنگ كاركردن تێیدا دەستی پێكردۆتەوە كە ئەنجومەنی وەزیران و وەزارەتی دارایی و وەزارەتی ئاوەدانكردنەوە رەزامەندییان لەسەر داوە، ئەویش ئەو تۆنێلەی مەسیف سەڵاحەدینە ئەو بەشەی بە شەقڵاوە دەبەستێتەوە كە بەشێكی راستەوخۆ بەڕێوەبەرایەتی رێگاوبانی هەولێر دەیكات. ئەم پڕۆژەیە رێگای كۆڕێ بە قەندیلەوە دەبەستێتەوە، بە تەواوبوونی ئەوە جەنجاڵی هاتوچۆیە لە سەڵاحەدین و كۆڕێ نامێنێت و خەڵك بەئاسانی و بەماوەیەكی كەمتر لە هەولێرەوە بە شەقڵاوە دەگات، ئەمە كاریگەری لەسەر ئاسانكاری بۆ بازرگانان و گەشتیارانیش دەبێت، بۆ دەروازەی حاجی ئۆمەران و چۆمان و سۆران و رەواندزو مێرگەسۆر و.. هتد، هاوكات ئەم رێگا سەرەكییە لە هاتوچۆكردن بۆ كۆماری ئیسلامی ئێران ئاسانكاری دەكات، كە هێزێكی باش و زۆر دەخاتەوە لە بواری گەشتوگوزار و بازرگانی و ئابووریدا.
* ئایا دەستپێكردنەوەی پڕۆژەكانی رێگاوبان، رێگای نێوان هەولێر- دهۆكیش دەگرێتەوە؟
- پڕۆژەییەكی دی كە گرنگیی تایبەتی و زۆری هەیە و گرێبەست لەنێوان ئەنجومەنی وەزیران و وەزارەتی ئاوەدانكردنەو پارێزگا كراوەو رەزامەندیشی لەسەر دراوە، ئەویش رێگای سەرەكیی هەولێر – گۆپالە كە دەكاتە جووت سایدی هەولێر – دهۆك، ئەم پڕۆژەیەش بەقەرز ئەنجام دەدرێت لە چوارڕێیانی عەنكاوە – فڕۆكەخانەوە دەست پێدەكات تا دەگاتە گۆپاڵ، ئەمە پارێزگای هەولێر جێبەجی دەكات، لە گۆپالەوە بۆ دهۆك پارێزگای دهۆك ئەنجامی دەدەن، بەم پڕۆژەیە نێوان هەولێر – دهۆك دەبێتە جووت ساید كە رەنگدانەوەیەكی یەكجار زۆری لەسەر كەمبوونەوە ماوەی هاتوچۆی نێوان هەولێر – دهۆك و بۆ ئیبراهیم خەلیل دروست دەكات، واتە ئەم پڕۆژەیەش گرنگیی زۆری بۆ كوردستان و بۆ عێراقیش هەیە بەتایبەتی لە جووڵەی بازرگانی و ئابووری لەگەڵ توركیا و ئەوروپا ئەم پڕۆژەیە لە قۆناغی كۆتاییدایە كە گرێبەستەكە بكرێت .
*رێگای هەولێر- سلێمانی كە قورساییەكی زۆری لەسەرە، ئایا بۆ ئەمساڵ دەست بەجێبەجێكردنەوەی دەكرێت؟
- جووت سایدی هەولێر - كۆیە دەست پێ دەكاتەوە كە بە تۆنێلێەكەوە پێنج بەشە و لەكاتی تەواوبوونی ئەو پڕۆژەیەش رێگاكە لەنێوان هەولێر – كۆیە و سلێمانی دەبێتە جووت ساید و زۆر ئاسانكاری بۆ هاتوچۆ دەستەبەر دەبێت و تاوەكو ئەم پڕۆژەیە دەكرێت، دراسەیەكمان لەگەڵ بەڕێوەبەرایەتی رێگاوبان و ئاوەدانكردنەوەو وەزارەتی ئاوەدانكردنەوەی كوردستان كردووە كە شۆلدەرەكانی هەردوولای رێگاكەی ئێستای نێوان هەولێر – كۆیە فراوان بكەین و پڕۆژەی رێگای هەولێر – كۆیە لەبەر ئەوەی بەرزی و نزمی و گردۆڵكەی زۆری تێدایە بۆیە ماوەو زەحمەتی زۆر لەگەڵدایە.
* جگە لە بوارەكانی رێگاوبان هەولێر تا دێت گەورەتر و قەڵەباڵغتر دەبێت، هەر بۆیە پێویستی بە چەندین پڕۆژەی خزمەتگوزاریی دیكە هەیە. ئایا لەم بوارەدا چی كراوە؟
- لەبوارەكانی خزمەتگوزاری وەكو كارەباو ئاو و سێكتەرەكانی تریش چەندین پڕۆژە لە پلان و بەرنامەدا بوون، بەهۆی ئەو قەیرانەی بەسەر كوردستاندا هێنرا، نەتوانرا جێبەجێ بكرێن، بۆ نموونە ئەو ئۆڤەرلۆدەی لەسەر وێستگەكانی كارەبا هەبوو، پێویستی بە چەند وێستگەیەكی تەحویلی هەبووە، وەكو وێستگەی (132كەی ڤی و 133كەی ڤی و 400كەی ڤی) ئەم پڕۆژانە نەخرانە بواری جێبەجێكردنەوە، بەمەش ئۆڤەرلۆدی خستەوە سەر ڤیدەرەكان كە لەمەش كێشەمان لە ناوچەی زرارەتی و قوشتەپە هەیە، بەڵام ئێستا خۆشبەختانە رەزامەندیی سەرۆكایەتی ئەنجومەنی وەزیران و وەزارەتی داریی وەرگیراوە، سەرەڕای قەیرانەكە كە كێشەی كارەبای ئەو ناوچانە چارەسەر بكەین، ناوچەی زرارەتی كەڤیدەر سێی خانزاد دەكات لۆدێكی یەكجار زۆری لەسەرە، ئەوە دەست بەجێبەجێكردنی وێستگەیەكی تەحویلی بۆ ئەو ناوچەیە دەكرێت، هاوكات كێشەی كەمیی ئاومان لە ناوچەی زرارەتی هەبوو، بۆ چارەسەركردنی ئەمەش رەزامەندی درا كێشەكە چارەسەر بكرێت و بودجەشی بۆ تەرخانكرا وەزارەتی دارایی حكومەتی كوردستان ئەو بودجانەیان بۆ دابین كردووین، هەروەها كێشەی تری ئاو هەبووە لە خانزاد و دەوروبەری هەولێر لە قەزاو ناحیەكان كە كێشەكان بیری ئاویان وشكی كردووە، بەردەوام بیری تریان بۆ لێدراوە، یا كێشەی تۆڕی ئاو بووە، ئەمەشمان چارەسەر كردووە بۆ ئەو چارەسەری ئەو كێشانەش هەر بودجەكان لەلایەن وەزارەتی دارایی كوردستان تەرخانكراون و یەكێك لەو پڕۆژانەی گرنگ بووە و ئێستا لەژێر جێبەجێكردندایە لەلایەن كۆمپانیای بای وەتەری بەریتانی بریتییە لەو بەشەی پڕۆژەی ئاو حەوزێكی گلدانەوەی ئاوە دەكەوێتە پشت وەزارەتی پێشمەرگەوە لەوێووە ئاوەكە دەچێت بۆ كەسنەزان و دەوروبەری و گەڕەكەكانی قەرەبوو و هەموو ئەو شوێن و گەڕەكانە لەسەر پڕۆژەی ئاوی ئیفرازن، ئێستا لەژێر ئەنجامدانە، چونكە كێشەی ئاو لەو ناوچە و گەڕەكانە هەیە، لیڤلی كەسنەزان و ئەو شوێنانەش بەرزەو ئاوی ژێر زەوییان كەمە بەمەش خەڵكەكەی ئەو شوێنانە كێشەی ئاویان زۆر بۆ دروست بووە، بەڵام بەم پڕۆژەییە كێشەێ ئەو گەڕەك و شوێنانە لە كەمئاوی چارەسەر دەبێت و ئەم پڕۆژەیە خۆی لەخۆیدا بەشێكە لەپڕۆژەی سەرەكییەكەی ئیفراز چوار كە 25هەزار مەتر سێجا لەیەك كاتژمێر ئاو دەهێنێتە كۆگای گلدانەوەی ئاوی پشت مۆنۆمێنتی شەهیدان كە دەكاتە سەرووی كەسنەزان و بەم رێگەوە ئاو دابەش دەبێت بەسەر كەسنەزان و بنەسڵاوەو دارەتوو و مەڵائۆمەر و بەحركەو ناو شارو هەولێری نوێ و بە تەواوبوونی ئەو پڕۆژەیەش هەموو بیرەكانی ئاوی خواردنەوەی ناو شارو دەوروبەری كە هەیە كە سەرووی 1400تا 1500بیر دەبن، دادەخرێن واتە ئەو بیرانە لەگەڵ تەواوبوونی پڕۆژەی ئیفراز چوار چیتر كاریان پێ ناكرێت، كە بەمەش پاریزگاری لە ئاوی ژێر زەوی دەكرێت.
* هەولێر شارێكی گەشتوگوزارییە، لەمبارەیەوە چ پڕۆژەیەك ئەنجام دەدرێت؟
- هەموو ئەو پڕۆژە ستراتیژی و خزمەتگوزارییانەی كراون و دەكرێت، رەنگدانەوەی باش و زۆریان لەسەر گەشتوگوزارو راكێشانی گەشتیار بۆ كوردستان و هەولێر هەبووە. گەشتوگوزار سیكتەرێك نییە كە بودجەی تایبەتی بۆ دابنرێت، بەڵام بوونی ژمارەیەك پلەی بەرزی هوتێل و موتێل و چێشتخانە و هەبوونی پارك و باخچە و شاری یارییەكان و سرووشتی جوانی كوردستان هەر هەموویان تەواوكاری یەكترن بۆ زیادبوونی گەشتیار، لەلایەكی تر ئەو هێمنی و ئاسایشەی لە كوردستان بەرقەرارە و پارێزراوە، بەپلەی یەكەم دێت لەوەی كە گەشتیار زیاتر روو لە هەولێر و كوردستان دەكەن، هاوكات ئەو پێكەوەژیان و ئاشتی و لێبوردەییەی لە كوردستان و هەولێر هەیە، وایكردووە كە گەشتیاری زیاتر رووی تێبكەن و ئەم پێكەوەژیانەی كوردستان چاوی وڵاتانی دەرەوەشی لەسەرەو بەهەند و گرنگی دەزانن. ئەم جەژنی قوربانە كە رێگای هەولێر – پردێ – كەركووك كرایەوەو لەلایەن دەزگا پەیوەندارەكانی كوردستانیش ئاسانكاری زۆر بۆ گەشتیاران كرا، بۆیە رێژەی هاتنی گەشتیار لە شارەكانی ناوەڕاست و خوارووی عێراق بۆ هەولێر زۆر زیادی كردبوو، چونكە پێشتر گەشتیار زۆر بە زەحمەت و ماندووبوونی زۆر لە رێگای تەق تەق و كۆیە دەهاتن بۆ هەولێر و ناوچە گەشتیارییەكان.
* ئەم پڕۆژانەی رێگاوبان هێڵی ترامیش دەگرێتەوە ؟
- ترام پڕۆژەیەكی هاتوچۆیە كە ماستەرپلانەكەی بۆ كراوە لەلایەن كۆمپانیایەكی ئیتاڵی كە درێژی ئەو پڕۆژەی هاتوچۆییە 80كیلۆمەترە، بەڵام لەبەر نەبوونی بودجەی پێویست پڕۆژەكە دواكەوتووە، بەڵام خراوەتەڕوو بۆ ئەوەی لە رێگای كەرتی تایبەت و وەبەرهێنانەوە جێبەجێ بكرێت.
* پڕۆژەكانی نیشتەجێبوون كە بۆ گرفتی نیشتەجێبوون گرنگە، لەمبارەیەوە پڕۆژەی نوێ چۆن ئەنجام دەدرێت؟
- بە حوكمی ئەوەی لە سەرووی 70هەزار یەكەی نیشتەجێبوون لە رێگای وەبەرهێنانەوە لە هەولێر دروست كراوە، جگە لەوەی حكومەتی كوردستان بۆ كەمكردنەوەی ئەزمەی نیشتەجێبوون لەسەرووی 140هەزار پارچە زەوی بەسەر خەڵك دابەشكردووە لە هەولێر و ئەو پارچە زەوییانە لە رێگای پێدانی كارت بوون و ئەم كارتانە وەكو تاپۆ لە كڕین و فرۆشتن و سولفەی عەقاریش مامەلەی لەگەڵ كراوە، ئەگەرچی شارەوانی لەگەل تاپۆ و وەزارەتی كشتوكاڵ و فەرمانگە پەیوەندیدارەكان خەریكی ئەوەن ئەو كارتانە وەجبە بە وەجبە بكەن بە سەنەد، بەڵام ئەو كارەش چەندین كارو مامەڵەو قۆناغی پێویستە، هەر شوێن و كارتێك مامەڵەكەیان كرا بە تاپۆ، ئەوە راستەوخۆ بە خاوەنەكانیان دەدرێت.
* گلەیی زۆر لەسەر تەواونەبوونی گوندی كۆری هەیە، ئەم پڕۆژەیە بەكوێ گەیشتووە؟
- گوندی كۆری پڕۆژەیەكی وەبەرهێنانە كە كۆمپانیایەكی كۆری كارگەی خۆی هێناوە و كاری لەسەر دەكات و ئەم پڕۆژەیە 5500خانووە بۆ كرێچییان و كەمدەرامەتان دروست دەكرێت، هەر كەسێك خانووی لەو پڕۆژەیە بۆ دەرچووە، وەكو پێشەكی 7هەزار دۆلاری داوە. لە پڕۆژەی گوندی كۆری وەكو قۆناغی یەكەم ئێستا هەزار خانوو تەواو بوون و ئەوەی لەم هەزار خانووە وەردەگرێت، دەبێت 12700دۆلاری دیكە بدات و ئەم كرێچییە كلیلەكەی وەردەگرێت و لە كرێچییەتی رزگاری دەبێت و خزمەتگوزارییەكانی ئاو و كارەبا و شەقامەكانی بۆ جێبەجێ كراوە و ئەم پڕۆژەیە لە ئەنجومەنی وەزیرانی كوردستانەوە بڕیاری لەسەر دراوە و بڕیار بوو سندوقی نیشتەجێبوون هاوكاری ئەم پڕۆژەیە بكات، بەڵام قەیرانەكەی سەر كوردستان رێگای نەدا.
* هەولێر بە ئارامی و سەقامگیرییەكەیەوە ناسراوە ئایا سەبارەت بەپاراستنی سەروماڵی هاووڵاتیان هەماهەنگی لەنێوان دەزگا پەیوەندیدارەكان هەیە، بەتایبەتی بۆ كۆنتڕۆڵكردنی تاوانەكانی دزین و كوشتن؟
- ئەو هەماهەنگی و هاوكارییەی لەنێوان سەرجەم دەزگا ئەمنییەكان كە هەیە وەكو یەك تیم كار دەكەین، جگە لەوەی كە هێزی پێشمەرگەی قارەمانی كوردستان بە هێزو خوێنی خۆیان بەرگری لەپاراستنی سنوورەكانی كوردستان دەكەن، كە مایەی سەربەرزییە بۆ ئێمەی گەلی كوردستان، هەروەها هێزەكانی پێشمەرگەو هێزی 80 و زێرەڤانیش لەگەڵ لایەنەكانی تری پاراستنی ئاسایشی كوردستان و هەولێر بە یەكەوە شەو و رۆژ ئامادەن بۆ پاراستی ئەو ئاسایش و هێمنییە باش و جوانەی كە هەمانە، لەلایەكی تر ئەم هێمنی و ئاسایشەی كە لە كوردستان و لە هەولێر هەیە، بەشێكی زۆری بۆ هاوكاری و پاڵپشتی خەڵكەكە لەگەڵ لایەنە ئەمنییەكان دەگەڕێتەوە. هەرچەندە دەبینین هەولێر زۆر گەورەو بەرفراوان بووە كە پێشتر نیوە تیرەكەی 3كیلۆمەتر بوو، ئێستاكە نیوە تیرەكە بۆ 13كیلۆمەتر دەڕوات، سەرەڕای ئەوەی كە 500هەزار ئاوارەی عێراقی لە هەولێرن و ناگەڕێنەوە و 118هەزار ئاوارەی رۆژئاوای كوردستانی هەیە جگە لەخەڵكی خۆمان و كۆمپانیاكان ئەوە توانراوە بە شێوەیەكی پتەو و سیستەماتێك ئاسایش و هێمنی بەرقەرار بكرێت .
* هەولێر بە شاری پێكەوەژیان و لێبووردەیی ناسراوە بۆ پاراستنی ئەم ناسنامەیە چی كراوە؟
- هۆكارێكی تر بۆ ئاوەدانی و گەشەكردنی شاری هەولێر هەبوونی ئەو پێكەوەژیانەیە لەنێوان پێكهاتە نەتەوەویی و ئایین و ئایینزاكان و زمانی جیاجیا بە شێوەیەكی ئاشتی و لێبوردەیی، ئەمەش لەگەڵ فاكتەرەكانی تر هەر هەموویان بەهێزن بۆ ئاوەدانیی زیاتر و گەشەكردنی گەورەتر لە پایتەختی كوردستاندا، هەر بۆیەش گەشەكردنێكی زۆر بەرچاوی بازرگانی و ئابووری لە هەولێر هەیە و وڵاتانی دنیا و ئەوروپا و كۆمەڵگەی نێودەوڵەتی بە رێزەوە دەڕواننە كوردستان بەگشتی و هەولێریش بەتایبەتی وەكو پایتەخت.
* فڕۆكەخانەی هەولێر وەكو پردێكی بەستنەوەی هەولێر بە دەرەوەی وڵات دوای هەڵگرتنی گەمارۆ، ژمارەی گەشتیارانی تا چەند زیادی كردووتەوە؟
- یەكێك لە دەستكەوتەكانی حكومەتی كوردستان دروستكردنی فڕۆكەخانەكانی هەولێر و سلێمانییە و فڕۆكەخانەكان موڵكی حكومەتی كوردستانن و ئێستا فرۆكەخانەی نێودەوڵەتیی هەولێر لە رووی ستانداردی سەردەمیانە و رێنوێنییەكان یەكێك لە فڕۆكەخانە باشەكانی رۆژهەڵاتی ناوەڕاستە و تەرمینالەكەش لە پێشوازیكردن و كاری فڕۆكەخانەییدا لەسەر ئاستی نێودەوڵەتیدایە و ژمارەو رێژەی گەشتكردن و هاتوچۆ لە كوردستان و لە خەڵكی عێراقیش لە فڕۆكەخانەی هەولێر زۆر باشە و پردێكی گرنگی بەستنەوەی خەڵكە لەگەڵ دەرەوە كە رەنگدانەوەی زۆر و باشی هەیە لە سەر جووڵەی بازرگانی و ئابووری كوردستان و ئاسانكارییەكی دیارە بۆ وڵاتانی دەوروبەر و ئەوروپا و وڵاتانی دۆست و رێكخراوەكان، هەر بۆیە تەنیا حكومەتی كوردستانە چاودێرییەكی زۆر و بەردەوامی لە سەر فڕۆكەخانەكەی هەولێر هەیە هەر كێشە و كەموكوڕییەكەی خزمەتگوزاری و تەكنیكی هەبێت، دەمودەست چارەسەری دەكات.
*كەرتی تەندروستی و پەروەردە وەكو دوو سێكتەرێكی گرنگ لە شاری هەولێر بۆ پێشخستنی چی بۆ دەكرێت؟
-لەلایەن حكومەتی كوردستان كارو پڕۆژەی زۆر بۆ كەرتی تەندروستی و پەروەردە كراوە، هەر لەدروستكردنی قوتابخانەو نەخۆشخانەو بنكەی تەندروستی و دابینكردنی پێداویستیی قوتابخانەكان و پێداویستی و ئامێری تەكنەلۆژیای تەندروستی سەردەم و پێشكەوتوو، هاوكات حكومەتی كوردستان پاڵپشت و هاوكارو یارمەتیدەری كەرتی تایبەت بووە لە هەردوو سێكتەردا لە كردنەوەی هەموو قۆناغەكانی خوێندن و هاتنی چەندین وڵاتی پێشكەوتوو بۆ كردنەوەی قوتابخانە و لە بواری تەندروستیش چەندین نەخۆشخانەی تایبەت و سەنتەری پزیشكی پێشكەوتوو لە هەولێر ئێستا هەیە، بۆیە ئێستا هەولێر بۆ چارەسەری پزیشكی بۆ خەڵكی عێراق بۆتە سەنتەرێكی زۆر باش و بەسوود، ئەگەرچی پێشتر لە لای ئێمەوە بۆ چارەسەرو سەردانی پزیشك دەچووینە شارەكانی عێراق وەكو موسڵ و بەغدا، بەپێچەوانەوە ئێستا لە هەموو شارەكانی عێراق لە ناوەڕاست و خواروو بۆ چارەسەرو پشكنین و نەشتەرگەری دێنە هەولێر و سەرەڕای ئەو قەیران و بێ مووچەییە، نەخۆشخانە حكوومی و گشتییەكان لە دەوامی خۆیان بەردەوام بوون و بە ئەركی مرۆڤایەتی خۆیان هەستان و دەوامیان بایكۆت نەكرد، ئەو داتاو زانیارییانەی كە بەڕێوەبەرایەتی تەندروستی هەولێر سالانە یان ماوە ماوە بڵاوی دەكاتەوە، كە ئەوە دەردەخات و دڵخۆشكارە كە نەخۆشخانەكان و پزیشك و كارمەندانی تەندروستی چەند هیلاك و ماندوون و چەند شەونخوونی دەگێڕن كە شایانی پێزانین و سوپاسن.