زۆلی كۆری، پڕۆفیسۆری زانستی سیاسییە لە سكوڵی ماكسۆێڵ لە زانكۆی سیراكیوز، بەڕێوەبەری ئامۆژگای ئاسایشی نەتەوەیی و بەرەنگاربوونەوەی تیرۆریزمە لە هەمان زانكۆ. تایبەتمەندە لە چەند بوارێكی گرنگدا، وەك ئاسایشی نەتەوە و نێودەوڵەتی، پرسە مرۆییەكان و جیهانگەرایی، لە دەرفەتێكدا ئەم وتووێژەمان لەگەڵ ساز كرد و بەمجۆرە وەڵامی پرسیارەكانی گوڵانی دایەوە.

* بە شێوەیەكی گشتی چۆن لە سیاسەتی ئیدارەی ئێستای ئەمریكا دەڕوانیت لە ئاست رۆژهەڵاتی ناوەڕاستداو ئایا وڵاتانی ناوچەكە چۆن لەو سیاسەتە دەڕوانن؟
- لە راستیدا ئەوەی دەتوانین بیڵێین ئەوەیە كە وڵاتانی ناوچەكە- جگە لە چەند وڵاتێكی دیاریكراو نەبێت- پشتیوانی لە سیاسەتی ئیدارەی ترەمپ دەكەن لە ئاست ناوچەكەدا، بەتایبەتی پاڵپشتی لە هەوڵەكانی ژەنەڕاڵ ماتیس- وەزیری بەرگریی ئەمریكا- دەكەن بۆ چڕكردنەوەی فشارەكانی لەسەر داعش، ئەوە بوو لە عێراقدا تێكشكاندنی داعش بە بەشداریی هێزە چەكدارە عێراقییەكان و هێزەكانی ئۆپەراسیۆنی تایبەت جێبەجێ كران، ئەمەش رێگاچارەیەكی كارا بوو، كە لە ناوچەكەدا بە باشی پێشوازی لێكرا. كەواتە لە پەیوەندی بە بەرەنگاربوونەوە و تێكشكاندنی داعشدا، سیاسەتی ترەمپ كارا بووە و پێشوازی باشی لێكراوە.
* ئاماژەت بە بەرەوپێشچوونی شەڕی دژ بە تیرۆریستان و بەتایبەتی داعش كرد لە عێراق و سووریادا، بەڵام رەخنەی ئەوەش لە ئیدارەی ئەمریكا دەگیرێت كە تەنیا خۆی پەیوەست كردووە بە تێكشكاندنی سەربازیی داعشەوە، بە بێ ئەوەی چارەسەری هۆكارەكانی سەرهەڵدانی گرووپی هاوشێوەی داعش بكات، بۆچوونی ئێوە لەم بارەیەوە چییە؟
- من پێم وانییە مەسەلەكە بەم شێوەیە بێت، بەڵكو ئەوەی هەستی پێدەكرێت ئەوەیە كە هەم ئیدارەی ئەمریكا و هەم رای گشتی ئەو وڵاتە هەست بە شەكەتبوون دەكەن- هەم لە رووی سیاسی و هەم لە رووی ئابوورییەوە- لە ئاست شەڕەكانی رۆژهەڵاتی ناوەڕاستدا، هەروەها بێزار بوون لە بینینی دیمەنی سەربازە كوژراو و بریندارەكانیان لە رۆژهەڵاتی ناوەڕاستەوە بگەڕێنەوە، بەڵام ئەمە بە مانای كۆتاییهاتنی پشتیوانیی ئەمریكا نایەت بۆ حكومەتی عێراقی و بۆ بەرەنگاربوونەوەی داعش. واتە پێموایە ئەم ئیدارەیەی ئێستای ئەمریكا پشتیوانی لە هەوڵەكانی حكومەتی عێراقی دەكات لەم رووەوە. دواتر ئەوەی پەیوەندی هەبێت بە هۆكارە ریشەییەكانی سەرهەڵدانی ئەم گرووپانەوە، ئەوا من باوەڕم وایە چارەسەركردنی ئەم هۆكارانە لە دەرەوەی توانای ئەمریكاوەیە، واتە دەكرێت ئەمریكا هاوكاری دەستەبەر بكات و پشتیوانیی دارایی دابین بكات و لە رووی دیپلۆماتی و بوارەكانی حكومڕانییەوە پاڵپشتی بكات، واتە ئەمریكا دەتوانێت ئەم جۆرە هاوكارییانە دەستەبەر بكات و بەردەوامیش دەبێت لەسەر فەراهەمكردنیان. بەڵام هەڵوێستی ئیدارەی ئێستای ئەمریكا رەنگدانەوەی هەستی شەكەتبوونی رای گشتیی ئەمریكایە لە ئاست بوونی ژمارەیەكی زۆری سەربازی ئەمریكی لە رۆژهەڵاتی ناوەڕاستدا.
* كەواتە بەرپرسیارێتی سەرەكیی چارەسەركردنی ئەم هۆكارانە دەكەوێتە ئەستۆی حكومەتەكانی ناوچەكە؟
- بەڵێ، ئەمە بۆچوونی منیشە، هەروەك ئاماژەم پێكرد، ئەمریكا بەردەوام دەبێت لەسەر دەستەبەركردنی هاوكارییەكان، بەڵام كێشەی توندڕەوی پرسێك نییە كە ئەمریكا بتوانێت بۆ عێراقییەكانی چارەسەر بكات، چونكە ئەمانە كێشەی قورسن، هەرچەندە ئەمریكاش دەتوانێت هاوكار بێت بۆ چارەسەركردنیان.
* باست لەوە كرد كە بە شێوەیەكی گشتی پشێوازی لە سیاسەتەكانی ترەمپ دەكرێت لە ناوچەكەدا، بەڵام هەندێ بڕیاری دیكەی ترەمپ هەن لە ئاست وڵاتانی ناوچەكەدا، بەتایبەتی بڕیاری كشانەوە لە رێككەوتنە ئەتۆمییەكە لەگەڵ ئێران، بۆچونی جیاوازی بەدوای خۆیدا هێنا؟ تێڕوانینی ئێوە لەم رووەوە چییە؟
- ڕاستە بڕیاری دەستەبەرداربوون لەو رێككەوتنە ئەتۆمییە مایەی مشتومڕ بوو، بەڵام نابێت ئەوەش لە یاد بكەین كە هەندێ هێز هەن لە ناوچەكەدا هاوهەڵوێستن لەگەڵ ئەم بڕیارەدا و پشتیوانی لێدەكەن، وەك سعودیە و ئیمارات، بە شێوەیەكی گشتی وڵاتانی كەنداو پێشوازی لە هەوڵەكانی گۆشەگیركردنی ئێران لە رووی سیاسی و ئابورییەوە دەكەن.
* باشە پێت وایە عێراق لە چ پێگەیەكدایە لەم رووەوە؟
- عێراق لە پێگەیەكی دژواردایە لە پەیوەندی بەم سیاسەتە نوێیەی ئیدارەی ئەمریكاوە لە ئاست ئێراندا، چونكە ئاشكرایە ئەمە ئاڵوگۆڕێكی گەورەیە كە بەسەر سیاسەتی ئەمریكادا هاتووە لە ئاست ئێراندا- بە بەراورد بە سیاسەتی ئیدارەی ئۆباما لە ئاست ئەو وڵاتەدا-. بەڵام دەمەوێت ئەوە دووپات بكەمەوە كە هاوپەیمانە تەقلیدییەكانی ئەمریكا لە ناوچەكەدا پشتیوانی لەم سیاسەتەی ترەمپ دەكەن، بەڵام زەحمەتە ئەمە بۆ عێراق راست بێت، چونكە لە نێو عێراقدا دابەشبوون هەیە لە پەیوەندی بە پشتیوانیكردنی ئێرانەوە. من نازانم رای گشتی لە عێراقدا چۆنە، بەڵام ئەوەی پەیوەندی هەبێت بە بەرپرسەكانەوە، ئەوا پێموایە ئەو كاربەدەستانەی عێراق كە راستەوخۆ هاوپەیمانێتییان نییە لەگەڵ ئێراندا، هەست بە گەشبینی دەكەن كە ئەم جۆرە سیاسەتە-لەلایەن ئیدارەی ترەمپەوە- بۆ گۆشەگیركردنی ئێران ببێتەهۆی دروستكردنی پانتاییەك بۆ حكومەتی فیدڕاڵی بۆ ئەوەی بتوانێت سنوورێك بۆ دەستێوەردانی ئێران لە عێراقدا دابنێت.
* ئایا هاوڕایت لەگەڵ ئەوەدا كە ئەم بڕیارەی ترەمپ بۆ كشانەوە لە رێككەوتنە ئەتۆمییەكە باری ناسەقامگیری و نائارامی لە ناوچەكەدا ئاڵۆزتر دەكات؟
- من پێم وانییە باری ناسەقامگیری زیاتر بكات، بەڵكو ئەوەی هەیە، بوونی كۆدەنگییەكە لە نێو زۆرینەی وڵاتە موسڵمانەكانی ناوچەكەدا كە ئێران رۆڵی تێكدەر دەبینێت و كاراكتەرێكی خراپە لە ناوچەكەدا و پێیانوایە هەوڵەكانی ئیحتیواكردنی ئێران درەنگوەختن. كەواتە هیچ وڵاتێكی ناوچەكە نییە، جگە لە ئێران و سووریا، كە هاوڕا نەبن لەگەڵ كشانەوە لە رێككەوتنەكە، تەنانەت رووسیاش زۆر نیگەران نەبوو لەم روەوە.
* كەواتە پێتوایە ئەمریكا توانیویەتی درز و كەلێنێك لە نێوان رووسیا و ئێراندا دروست بكات و رووسیا لە ئێران دوور بخاتەوە؟
- من دڵنیانیم و نازانم ئایا سەركەوتووانە ئەم كارەی ئەنجام داوە، یان نا. بەڵام ئاشكرایە هەوڵەكانیان بە ئامانجی ئەوەیە ئێران لە هەر هاوپەیمانێكی داببڕێت لە ئایندەدا، هەروەها لەم رووەوە دەتوانین بڵێین ئەمریكا كاری كردووە بە ئاراستەی لێكدابڕینی ئێران و ئەوروپا لە رووی ئابوورییەوە. چونكە ئێمە دەزانین كە وڵاتانی ئەوروپا وەبەرهێنان و بەشداریی ئابووریی خۆیان زیاتر كرد لە ئێراندا لە دوای ئەوەی باراك ئۆباما رێككەوتنە ئەتۆمییەكەی لەگەڵ ئێراندا واژوو كرد. بەڵام ئێستا ئەمە تا راددەیەك پێچەوانە بۆتەوە. ئێستاش ئەگەر حكومەتەكانی وڵاتانی ئەوروپاش بیانەوێت درێژە بەو پەیوەندییە ئابوورییانە بدەن، تەنانەت دوای بڕیاری كشانەوەی ترەمپ لە رێككەوتنە ئەتۆمییەكە ئەوا كۆمپانیا و كەرتی تایبەتی ئەو وڵاتانە رووبەڕووی مەترسی و فشارەكانی پەیوەست بە سزاكانی ئەمریكا دەبنەوە. لە راستیدا ئەمەش ئەو رێگاچارەیەمان پێدەڵێت كە ئیدارەی ترەمپ دەیگرێتەبەر، كە ئەویش بریتییە لە بەكارهێنانی فشار و سزای ئابووری بە شێوەیەكی توند. ئێوە بڕواننە پرسی سەپاندنی گومرگ و شەڕی بازرگانی لەگەڵ چین و كەنەدا. كەواتە ترەمپ فشاری ئابووری بە شێوەیەكی زۆر توند بەكاردەهێنێت بۆ جێبەجێكردنی ئامانجەكانی سیاسەتی دەرەوەی وڵاتەكەی. هەروەها ئەگەرچی وا دەردەكەوێت كە ئەمە مایەی گیروگرفت بێت، بەڵام پێدەچێت رێگاچارەیەكی كارا بێت. واتە هەرچەندە بە رێگاچارەیەكی سەیر دەردەكەوێت لە بواری سیاسەتی دەرەوەدا، بەڵام وا دەردەكەوێت كە كارا و سەركەوتوو بێت.
* ئایا ئێران لە بارێكدایە بتوانێت بەرگەی ئەو فشارە ئابوورییانە بگرێت؟
- ئێمە دەزانین دوای واژووكردنی رێككەوتنە ئەتۆمییەكە لەگەڵ ئیدارەی ئۆباما، ئێران پارەیەكی زۆری بلۆككراوی بۆ گەڕایەوە، بەڵام لە شەڕی سووریادا بەكاری هێنان، ئەمە لە كاتێكدا ئێران دەیتوانی ئەو پارانە بەكار بهێنێت بۆ پەرەپێدانی پەیوەندییە ئابوورییەكانی لەگەڵ یەكێتیی ئەوروپا و وڵاتانی دراوسێی، خۆ ئەگەر ئەم كارەی بكردایە- هەرچەندە من زانیاریم نییە لەم رووەوە- بەڵام بە مەزەندی من ئەگەر ئەم كارەی بكردایە ئەوا لە ئێستادا لە پێگەیەكی باشتردا دەبوو بۆ بەرگەگرتنی فشارە ئابوورییەكان. ئەوەتا لە ئێستادا لە هەندێ رووەوە سەقامگیریی ئابووری لەدەست داوە كە ئەمەش دەرهاویشتەی خۆی هەبووە وەك خۆپیشاندانەكانی ئەو وڵاتە و بۆتەهۆی ئەوەی خەڵكی نەك پرسیار لەبارەی سیاسەتی وڵاتەكەیانەوە بكەن، بگرە لەسەر پرسی ئابوورییش هەڵوەستە بكەن. كەواتە ئێستا ئێران رووبەڕووی دەرهاویشتەكانی بژاردە هەڵەكانی بۆتەوە، هەڵە لە بەكارهێنانی ئەو داهات و پارەیەی بۆی گەڕایەوە دوای واژووكردنی رێككەوتنەكە لەلایەن ئیدارەی ئۆباماوە. هەر لەبەر ئەوەشە كە ئێستا ئابووریی ناوخۆی ئێران پارێزراو نییە و ئەو وڵاتەش بە شێوەیەكی بنەڕەتی دوچاری گۆشەگیری بۆتەوە لە سەر ئاستی بارزگانی جیهانی و لەسەر ئاستی پەیوەندییە دەرەكییەكانی بە زۆرێك لە وڵاتانی دراوسێیەوە و تەنانەت بە وڵاتانی دیكەشەوە، وەك وڵاتانی یەكێتیی ئەوروپا. ئەمە ئەگەرچی پەیوەندیی ئابووری لەگەڵ چیندا هەیە كە من پێموایە لە ئایندەشدا هەوڵی درێژەپێدان و پارێزگاریكردن لەو پەیوەندییانە دەدات.
* ئەی پێتوایە ئامانجی راستەقینەی ئەمریكا لە زیادكردنی فشارەكانی لەسەر ئێران چییە؟
- من ناتوانم بە دڵنیاییەوە بڵێم ئامانجی ئیدارەی ئەمریكا چییە، بەڵام ئەو خوێندنەوەیەشی بۆ دەكرێت كە ئیدارەی ئەمریكا دەیەوێت لە رێی زیادكردنی فشارە ئابوورییەكانەوە كاریگەری بكاتەسەر سیاسەتی ئەو وڵاتە. واتە ئامانجەكە ئەوەیە كە لە رووی ئابوورییەوە ئیحتیوا بكرێت بۆ ئەوەی لە رووی سیاسیشەوە ئیحتیوا بكرێت. لەلایەكی دیكەوە دەبێت ئێمە ئەوە بزانین كە خەڵكانێكی زۆر هەبوون لە ئەمریكا پشتیوانییان لەم رێككەوتنە نەدەكرد و بە رێككەوتنێكی باشیان نەدەزانی، هەروەها ئەمە رێككەوتنێكیش بوو كە كۆنگرێس پشتیوانی لێ نەكرد. كەواتە لە روانگەی بەشێكی رای گشتی ئەمریكاوە كە موحافیزكارن، ئەم رێككەوتنە كێشە و گیروگرفتی زۆری هەبووە، كەواتە بەشێكی پەیوەستە بە رووكردنە ئەم خەڵكەوە بە ئامانجی ئەوەی پشتیوانیی سیاسی ئەو كەسانە بەدەست بهێنێت بۆ دووبارە هەڵبژاردنەوەی. بەڵام لەگەڵ ئەوەشدا، من پێموایە ئەو دەیەوێت هاوكاریی هاوپەیمانەكانی بكات لە ناوچەی كەنداودا، بەتایبەت سعودیە، چونكە تێڕوانینێك هەیە لە نێو ئیدارەی ئێستای ئەمریكا كە ئیدارەی پێشوو- سەردەمی سەرۆك باراك ئۆباما- وڵاتانی ناوچەی كەنداو خرابوونە دۆخێكی خراپەوە، لەم روانگەیەوە ئەو دەیەوێت ئەم پەیامە بگەیەنێت كە لە پەیوەندی بە سەقامگیری كەنداوەوە، ئەوا هەر شتێك هاوكار نەبێت بۆ ئەم ناوچەیە، ئەوا هاوكار نابێت بۆ ئەمریكا و بۆ یەكێتیی ئەوروپاش.
* كەواتە دەكرێت بڵێین ئیدارەی ترەمپ توانیویەتی هاوپەیمانەكانی لە ناوچەكەدا دڵنیا بكاتەوە و بەرپەرچی نەیارەكانی بداتەوە، بەتایبەتی دوای ئەوەی دەوترا ئەمریكا هاوپەیمانەكانی لە ناوچەكەدا پشتگوێ خستووە و لە نەیارەكانی نزیك بۆتەوە، بەتایبەتی لە سەردەمی ئیدارەی ئۆبامادا؟
- من دەڵێم بە دڵنیاییەوە هاوپەیمانەكانی ئەمریكا لە ناوچەكەدا دڵنیا بوونەتەوە، تەنانەت من هاوەڵ و قوتابیی عەرەبم هەن كە زۆر خۆشحاڵن بە گرتنەدەستی دەسەڵات لەلایەن ترەمپەوە و بە سەركردەیەكی سەرسوڕهێنەری دادەنێن و تەنانەت ئەمە هەستی قوتابییە سوورییەكانیشە، ئەمەش سەیرە، چونكە كەسانێك هەن لە ئەمریكا كە خۆشحاڵ نین بە سەرۆكایەتیی ترەمپ.
* هەر لە پەیوەندی بە زیادكردنی فشارەكان لەسەر ئێرانەوە، بەم دواییە ئەمریكا لە رێی وەزیری دەرەوەی وڵاتەكەی- مایك پۆمپیۆ- رایگەیاند كە دەبێت ئێران بە تەواوەتی لە سووریا بكشێتەوە، ئایا تا چەند ئەمە سیاسەتێكی واقیعبینانەیە و قابیلی بەدیهاتنە؟
- هەروەك پێشتریش ئاماژەمان پێكرد، ئابووریی ناوخۆیی ئێران رووبەڕووی فشارێكی زۆر دەبێتەوە، واتە تەحەددییە ئابوورییە ناوخۆییەكانی زیاتر دەبێت، بەتایبەتی دوای زیادكردنی فشارەكان لەسەر هەناردەكردنی نەوتی وڵاتەكەی بۆ دەرەوە، لەگەڵ ئەوەشدا زۆر زەحمەتە دەبێت بۆ ئێران كە بە شێوەیەكی تۆكمە و سیستماتیكی هێزەكانی لە سووریا پاشەكشە پێبكات.
* ئێمە دەزانین كە ئێران پێداگیری دەكات لەسەر هێشتنەوە و پەرەپێدانی بوونی سەربازیی خۆی- ئەگەرچی لە رێی وەكیلەكانیشەوە بێت- لەسەر خاكی سووریا، ئیسڕائیلیش بە هەمان شێوە پێداگیری دەكات لەسەر ئەوەی ئەم هەوڵەی ئێران پووچەڵ بكاتەوە، ئایا ئەمە پێكدادانی نێوان ئەو دو وڵاتەی لێدەكەوێتەوە؟
- لە راستیدا ئەوە گومانی تێدا نییە كە بارگرژی هەیە، بەڵام دەبێت لێرەدا ئاماژەش بەوە بكەین كە هەڵوێستی وڵاتانی عەرەبی ناوچەكە بۆ گۆشەگیركردن و ئیحتیواكردنی ئێران ئەنجامێكی باشی هەبووە بۆ ئیسڕائیل، چونكە لە ئێستادا ئیسڕائیل پەیوەندیی هەواڵگری و دیپلۆماتی ئەوتۆی لەگەڵ چەند وڵاتێك هەیە كە پێشتر بەم شێوەیە بە ئاشكرا بوونیان نەبوو، كەواتە ئیسڕائیل پشتیوانییەكی زۆری هەیە بۆ ئەم هەڵوێستەی ئێستای لە ئاست ئیسڕائیلدا كە پێشتر ئەم پاڵپشتییە بوونی نەبووە. لەگەڵ ئەوەشدا پێموانییە ئیسڕائیل بیەوێت جەنگێكی كراوەی هەبێت لەگەڵ ئێراندا، ئەگەرچی ئەو بەرگری لە بەرژەوەندییەكانی خۆی دەكات و تەنانەت لەم رووەوە ئەو گورز و هێرشانەی ئەنجامیان دەدات لە ناو خاكی سووریادا بە لێدان لە بەرژەوەندییەكانی ئێران لێكدەدرێنەوە. جارێكی دیكە دەیڵێمەوە ئیسڕائیل نایەوێت بچێتە جەنگێكی كراوە لەگەڵ ئێراندا و پێموایە ئەمریكا بەم ئاراستەیەدا كار لەگەڵ ئیسرائیل دەكات. هەرچۆنێك بێت ئەوەی هەیە هەوڵەكانی گۆشەگیركردنی ئێرانە لە ناوچەكەدا و ئێستاش ئەوەتا ئەردەنیش بۆتە بەشێك لە هەوڵەكانی ئیحتیواكردنی ئێران و پەیوەندییەكانی لەگەڵ ئیدارەی ترەمپدا بەهێز دەكات، ئەوەتا لە ئێستادا دەوڵەتە دراوسێكانی ئیسڕائیل –لوبنانی لێدەرچێت- ئەوەندی پشتگیریی ئیسڕائیل دەكەن، هێندەی پشتیوانیی ئێران ناكەن.
* كەواتە چۆن لە ئایندەی وڵاتی سووریا دەڕوانیت؟ ئایا پێتوایە لە رووی ئەمری واقیعەوە دابەش دەبێت بەسەر چەند ناوچەیەكی نفووزدا، یان رژێمی ئەسە دەتوانێت لە ئایندەیەكی نزیكدا دەست بەسەر تەواوی خاكی وڵاتەكەدا بگرێتەوە؟
- ئەگەر ئێمە لە روانگەی ئەمریكا لەم پرسە بڕوانین، ئەوا گومانی تێدا نییە كە خواستی ئەمریكا ئەوەیە سووریا بەرەو سەقامگیری هەنگاو هەڵبگرێت، ئەگەرچی چاوەڕوانی ئەوە ناكرێت كە بە چەشنی وڵاتانی عێراق و ئەفغانستان هاوكاریی سووریا بكات لەم رووەوە. لەلایەكی دیكەوە ئەوەی پەیوەندی بە رژێمی ئەسەدەوە هەبێت، ئەوا ئاشكرایە كە ئەم رژێمە كێشەی شەرعییەت و سەروەریی یاسای هەیە و تاوانی دەرهەق بە گەلەكەی ئەنجام داوە. هەروەها زۆر زەحمەتە وێنای ئەوە بكەین كە چۆن ئەسەد دەتوانێت دەست بكاتەوە بە ئاوەدانكردنەوە و بنیادنانەوەی وڵاتەكەی و چۆن دەتوانێت هاوكاریی نێودەوڵەتی بەدەست بهێنێت بۆ ئەم مەبەستە. ئەمەش جیای دەكاتەوە لەو وڵاتانەی دیكە كە دوچاری شەڕێكی ناوخۆیی سەخت بوونەتەوە. دواتر خەڵكانێكی زۆری سووریا رووبەڕووی ئاوارەیی و پەنابەرێتی بوونەتەوە، خەڵكێكی زۆری ئەم وڵاتە كۆچیان كردووە بۆ وڵاتانی ئەوروپا كە خەڵكی پیشەوەر و رۆشنبیر بوون، مەبەستم ئەوەیە ئەم وڵاتە رووبەڕووی كۆچكردن و هەڵاتنی چینی پڕۆفیشناڵ و رۆشنبیرەكەی بۆتەوە، كە ئەمەش كاریگەریی كاولكاری لەسەر كۆمەڵگەی سووری لێدەكەوێتەوە. كەواتە سووریا لە رەوشێكی سەختدایە.
* باشە ئایندەی عێراق چۆن دەبینیت؟ ئایا پێتوایە لەگەڵ زیادبوونی فشارەكان لەسەر ئێران، حكومەتی ئێران عێراق بكاتە گۆڕەپانێك بۆ ئەنجامدانی كاری تۆڵەسەندنەوە لە دژی بەرژەوەندییەكانی ئەمریكا لەم وڵاتەدا؟
- ئەمە رێی تێدەچێت، بەڵام زەحمەتە ئەویش بە لەبەرچاوگرتنی ئەو دۆخە ئابوورییە ناوخۆییەی لەو وڵاتەدا هاتۆتەئاراوە، مەبەستم ئەوەیە ئەگەر وڵاتێك لە رووی ناوخۆییەوە بە دەست ناسەقامگیرییەوە بناڵێنێت، ئەوا زەحمەتە بتوانێت پشێوی و ئاڵۆزی لە شوێن و لە وڵاتی دیكە دروست بكات.