تاوتوێكردنی ئاكامی هەڵبژاردنەكانی ئەمجارەی ئەنجومەنی نوێنەرانی عێراق و جۆر و شێوە و رێژەی بە شداریی هاووڵاتیانی كوردستان لەو هەڵبژاردنە، هەروەها ئەو ژینگە سیاسییەی زۆنی سەوز و نیلی كە بە (ژینگەی ئیرهابی فیكری) ناو دەبردرێت و بە هەموو شێوەیەك دژایەتیی پارتی دیموكراتی كوردستان دەكات، ئەمانە و چەندین پرسی دیكەی گرینگ و هەنووكەیی، ناوەرۆكی ئەم دیمانەیەی گۆڤاری گوڵان لەگەڵ پارێزەر سیروان حەمەشەریف هەڵگری بڕوانامەی ماستەر لە یاسای نێودەوڵەتی پێكدەهێنن.

* لە هەڵبژاردنەكانی ئەمجارەی عێراقدا ئاستی بە شداریی هاووڵاتیانی كوردستان لە دەڤەری سلێمانی نزم بوو، ئایا هۆكاری ئاستی نزمی بەشداریی هاووڵاتیان لەو دەڤەرە بۆچی دەگەڕێتەوە؟
- دیارە هەر وەك چۆن داڕشتن و دەركردنی یاسایەكی باش لە وڵاتێكدا دەبێتە بنەمایەكی باش بۆ دەركردنی یاسایەكی باشتر و دەركردنی یاسایەكی خراپ، دەبێتە بنەمایەك بۆ یاسایەكی خراپتر، ئەوا بۆ پرۆسەكانی هەڵبژاردنیش هەر بەو شێوەیەیە. هەر كاتێك لە پرۆسەیەكی هەڵبژاردندا خەڵك متمانەی كەم بێت بەو پرۆسەیە، ئەوا دەبێتە بنەمایەك بۆ قۆناخێكی بێ متمانەیی زیاتر لە هەر هەڵبژاردنێكی دیكەشدا، بۆیە لەم چوارچێوەیەدا ئاستی نزمی بەشداریی هاووڵاتیانی دەڤەری سلێمانی و هەڵەبجە لە پرۆسەی هەڵبژاردنی ئەمجارەی عێراقدا دەبێتە هۆكاری ئەوەی لە هەڵبژاردنەكانی داهاتوودا خەڵكی ئەم ناوچەیە زیاتر بێ متمانە بێت و كەمتر لە رێژەی ئەم جارە بەشداری بكات.
* باشە ئەگەر بەجۆرێكی دیكە پرسیار بكەین، ئەو هۆكارانە چین كە بوونە هۆكاری ئەوەی خەڵكی هەردوو پارێزگای سلێمانی و هەڵەبجە بەشدارییان لە پرۆسەی هەڵبژاردن كەم بێت؟
- ئاشكرایە پارتی دیموكراتی كوردستان ژینگەی سیاسیی زۆنی سەوز و نیلی ناو لێناوە (ژینگەی ئیرهابی فیكری)، بەڵام من پێشتریش وتوومە و ئێستاش دەیڵێمەوە، پێدەچێت پارتی خاتری ئەو ژینگەیەی گرتبێت، ئەگەرنا وەك عەلی شەریعەتی كە بیرمەندێكی ئێرانی و خۆرهەڵاتییە و بزوێنەری شۆڕشی ئیسلامیی ئێرانە، ناوی لە ژینگەی سیاسیی لەمجۆرە ناوە (ئیستحمار)، ئەمەش واتە لێسنەندنەوەی ئەقڵ لە خەڵك و ئاراستەكردنی بەو جۆرەی خۆیان دەیانەوێت، ئەگەر لەناو ئەم ژینگەیەی كە ئەقڵی لە خەڵك سەندۆتەوە، پارتی و حكومەتی هەرێمی كوردستان بە نموونە وەربگرین، دەبینین حكومەتی هەرێمی كوردستان بە حوكمی ئەوەی پارتی نوێنەرایەتیی سەرەكیی دەكات، ئەوا هەنگاوە باشەكان و كارەكانی حكومەتی هەرێمی كوردستان لەم دەڤەرە بە ناشیرینی وێنا دەكرێت و جارانی سفر دەكرێت، یان لەبەر ئەوەی پارتی دیموكراتی كوردستان بەیداغی ریفراندۆم و سەربەخۆیی كوردستانی بەرز كردۆتەوە، ئەوا لەم ژینگەیەدا دژایەتیی ریفراندۆم و سەربەخۆیی كوردستان دەكرێت، ئەمە لە كاتیكدا لە بیستەكانی سەدەی رابردوو كاتێك لیژنەی كۆمەڵەی گەلان رای خەڵكی كوردستانی وەرگرت، بەوەی ئایا رازین بەشێك بن لە عێراق، تەنیا لە ناوچەكانی سلێمانی و گەرمیان داوایان كردووە كە دەبێت كوردستان سەربەخۆ بێت و سەر بەبەغدا نەبێت، بەڵام لە ئێستا وەك دەبیینین شاڵاوێكی گەورە لە میدیا و سۆشیال میدیاوە دەستی پێكردووە، بۆ ئەوەی خەڵك بڵێت من ریفراندۆم و سەربەخۆییم ناوێت، بۆیە ئەم ژینگەیە بۆتە هۆكاری ئەوەی خەڵك ئینتیمای بۆ نەتەوە و كوردستان نەمێنێت، راشكاوانە دەیڵێم لە شاری سلێمانی كە خۆی بە پایتەختی رۆشنبیری دەزانێت، زۆر ئاساییە كەسێك كادری حزبی نەسری عەرەبی بێت، بەڵام كەسێك كادری پارتی دیموكراتی كوردستان بێت دەكرێتە ئامانج و هێرش دەكرێتە سەری و قسەی پێ دەگوترێت. ئەوجا بۆ رووبەڕووبوونەوەی ئەو هێرشە ناڕەوایەی لە میدیا و سۆشیال میدیاوە دوور لە هەموو بنەمایەكی ئەخلاقی و ویژدانی دەكرێت و بۆتە هۆكاری ئەوەی هێماكانی (نەتەوە و دەوڵەت و ئاڵا) كاڵ ببێتەوە، پێویستە پارتی دیموكراتی كوردستان و حكومەتی هەرێمی كوردستان كاری لەسەر بكەن و بەرپەرچی بدەنەوە، ئەم بەرپەرچدانەوەیە دەبێت لەسەر بنەمای كار و كاردانەوە بێت و ئاستی ئەو ئەو هەڵمەتەی لە زۆنی سەوز و نیلییەوە دەكرێتە سەر هێما پیرۆزەكانی (نەتەوە و دەوڵەت و ئاڵا)، دەبێت كاردانەوەی پارتی و حكومەتیش لە هەمان ئاستدا بێت. هەروەها دەبێت ئەو خەڵكانەی تایبەتمەندن لە پرسەكانی نەتەوە و دەوڵەت و پاراستنی ئەخلاقی كۆمەڵایەتی لە میدیا و سۆشیال میدیا، بایەخی زیاتریان پێبدرێت و هەوڵبدەن خەڵك هۆشیار ببێتەوەو لەو ژینگە سیاسییە بەئاگا بێتەوە كە دەیانەوێت ئەقڵی هەر تاكێكی كوردستان سڕ بكەن.
* ئەگەر سەیری ئاكامی هەڵبژاردنی ئەمجارەی سنووری هەردوو پارێزگای سلێمانی و هەڵەبجە بكەین، ئاكامە بەراییەكان وا دەردەكەون كە خەڵكی ئەو ناوچەیە یەكێتی خەڵات كردبێت و كۆی حزبە سیاسییەكانی دیكەی سزا دابێت، لەسەر ئەم پرسە راتان چییە؟
- لە زمانی عەرەبیدا چەمكی «عقل سلیم» هەیە، واتە ئەقڵێكی ساخڵەم، ئەوجا ئەگەر بە ئەقڵێكی ساخڵەم بەرارودی بارودۆخی یەكێتی لەگەڵ هەڵبژاردنی ئەمجارە بكەین، ئەوا دەبوو دەنگەكانی یەكێتی زۆر زۆر كەمی بكردایە، من تەنیا وەك شرۆڤەوانێك قسە دەكەم و چاودێر نەبووم لەسەر سندوقەكانی دەنگدان هەتا بزانم شێوازی ساختە كارییەكە چۆن بووە، بەڵام بەپێی بنەمایەكی یاسایی كە دەڵێت: كەسێك بانگەشە بۆ پرسێك بكات، دەبێت بتوانێت بیسەلمێنێت، بۆیە ئەگەر لەسەر ئەم بنەمایە سەیر بكەین، دەبیینین هەموو حزبەكان (گۆڕان، كۆمەڵ، یەكگرتوو، نەوەی نوێ، هاوپەیمانی، شیوعی) هەموویان دەڵێن: ئێمە دەیسەلمێنین كە یەكێتی نەك هەر تەنیا ساختەكاری كردووە، بەڵكو وەك ئادەم سیسمس دەڵێت: «هەمووی بۆ خۆم و بۆ ئەوانی دیكەش هیچ»، یەكێتی ئەم بنەمایەی پیادە كردووە كە هەموو دەنگەكان بۆ خۆی بەرێت و ئەوانی دیكەش هیچ، بۆیە ئەمە تەنیا قسەی من نییە و قسەی كۆی حزبە سیاسییەكانی كوردستانە (بێجگە لە یەكێتی)، هەموو ئەمانەش لە میدیا و سۆشیال میدیا بڵاو دەكرێنەوە و باس دەكرێت، لەم بازنەیەدا ئەقڵی ساخڵەم گومان دەخاتە سەر ئەو دەنگانەی یەكێتی هێناویەتی و دەنگەكان بە نادروست لەقەڵەم دەدات، هەروەها ئەو دەنگانەشی حزبەكانی دیكە هێناویانە، دیسان بە ناتەندروستی دەزانێت. ئەگەر لێرەوە تەنیا دەنگەكانی پارتی لە هەردوو پارێزگای سلێمانی و هەڵەبجە بە نموونە وەربگرین، ئاشكرایە دەنگەكانی پارتی لەم دەڤەرە تا رادەیەك جێگیرە، باشە بۆچی دەنگی پارتی بۆتە سێیەك لە كاتێكدا پارتی پێشەنگی پرۆسەی ریفراندۆم و سەربەخۆیی كوردستانە كە 93%ی خەڵكی كوردستان بە بەڵێ دەنگی بۆ داوە، بەڵام یەكێتی دەنگەكانی دوو هێندەی خۆی زیاد بكات؟ ئەمەیە ئەو بەراوردەیە كە ئەقڵێكی ساخڵەم پێی قبووڵ ناكرێت.
* لەگەڵ ئەوەی پارتی لەو دەڤەرە پێش ئەنجامدانی هەڵبژاردن لەمیانەی ئەو هەڵمەتە دژەی دەكرایە سەری، غەدری لێكرا و لە هەڵبژاردنەكانیشدا دەنگەكانی لەو دەڤەرە دزران، بەڵام لە ناوچەكانی دیكەی كوردستان زۆرینەی خەڵكی كوردستان دەنگی بە پارتی دایەوە، ئایا ئەمە چ ئاماژەیەكی لێ دەخوێندرێتەوە؟
- پارتی دیموكراتی كوردستان ئەو لایەنەیە كە بەیداخی ریفراندۆم و سەربەخۆیی كوردستانی بەرزكردۆتەوە، بۆیە گەلی كوردستان كە گەورەترین نەتەوەی بێ دەوڵەتە لە رۆژهەڵاتی ناوەڕاست و جیهانیشدا، هەست بەو غەدرە دەكات كە لێی كراوە، بۆیە دەبوو پارتی لەم هەڵبژاردنە زۆر لەو دەنگانە زیاتری بەدەست بهێنایە كە ئێستا بەدەستی هێناوە و پشكی شێری دەنگەكانی بەر بكەوتایە، بۆیە پارتی دەنگەكانی زۆر زیادی نەكردووە، هۆكارەكەشی دەگەڕێتەوە بۆ ئەو بانگەشە دژەی لە زۆنی سەوز و نیلییەوە دەكرایە سەر پارتی. دیارە زۆنی سەوز و نیلی زۆنێكی دیموكراتی نییە، بەڵكو زۆنێكی حزبۆكراسیە، دیموكراتی سنووری خۆی هەیە، بۆیە ئەو بانگەشە حزبییە دژەی لەم زۆنەوە دژی پارتی ئاراستە كرا، غەدرێكی گەورە بوو لە پارتی كرا، ئەگەر ئەمە نەبوایە، پارتی دەنگێكی زۆر زیاتری لە هەردوو پارێزگای سلێمانی و هەڵەبجە بە دەست دەهێنا. خەڵكی كوردستان هەڵوێستی پارتی لەبەرچاوە، كاتێك بۆتە بەیداخهەڵگری ریفراندۆم و سەربەخۆیی كوردستان، لە پرۆسەكەدا هەموو حزبەكانی دیكە بەوانەشی دژ بوون لەسەرەتاوە، بەڵام دوایی هاتن و دەنگیان بە بەڵی بۆ ریفراندۆم دا، بەڵام كاتێك پرۆسەكە رووبەڕووی پیلانگێڕی هاتەوە، پارتی بەتەنیا شانی دایە بەر و دەرهاویشتە نەرێنییەكانی هەمووی رووبەڕووی پارتی بوونەوە و بەرگەی ئەو دەرهاویشتە خراپانەی گرت و نەیهێشت كوردستان لەناو بچێت. پارتی دیموكراتی كوردستان لە پێناوی سەربەخۆیی كوردستاندا باجی گەورەی داوە، ئەگەر مەبەستی دەسەڵات بوایە دەیتوانی لەگەڵ حكومەتی عێراق دەست تێكەڵ بكات و جاشایەتی قبووڵ بكات، بۆ ئەوەی بۆ چەندین ساڵی دیكەش دەسەڵاتەكەی خۆی بپارێزێت، بەڵام پارتی پارتێكی نەتەوەییە و بڕوای بەوە هەیە كە دەبێت ئەم نەتەوە بێ دەوڵەتە ببێتە خاوەنی دەوڵەتی سەربەخۆی خۆی. لێرەدا دەمەوێت ئاماژە بۆ ئەوە بكەم، من كەسێكم لەناو خەڵكم، راشكاوانە دەڵێم: خەڵك ئەگەر ئومێدێكی مابێت، ئەو ئومێدەی بە پارتی ماوە، ئەمەش لەبەر ئەوەیە:
1- پارتی لەگەڵ دەنگدەری خۆی راستگۆیە.
2- دۆستایەتییەكەی، دۆستایەتییە و نادۆستایەتیشی، نادۆستایەتییە.
لەسەر ئەم بنەمایەش هەر بۆ نموونە، كۆماری ئیسلامی راشكاوانە دەزانێت هەڵوێستی پارتی چۆنە، كۆماری توركیا دەزانێت هەڵوێستی پارتی چۆنە، بۆیە ئەوان دەتوانن بە یار، یان بە نەیار مامەڵە لەگەڵ پارتی بكەن، ئەمەش مانای ئەوەیە پارتی كەسایەتییەكی دامەزراوەیی هەیە و هەڵوێستی روون و ئاشكرایە.
* دیارە بێجگە لە پارتی هەر لە زۆنی سەوز و نیلی، دوو پارتی دیكەش هەن وەك (یەكگرتوو و سۆشیالیست) كە پشتگیریی ریفراندۆم و سەربەخۆییان كرد، ئایا ئەوان بۆ دەنگەكانیان نەماوە؟
- بێگومان سیستمی دیموكراتی لەناو سیستەمە خراپەكاندا كەمتر لەوانی دیكە خراپترە، یان دەبێت بڵێن باشی ناو خراپەكانە، بۆیە سیستمی دیموكراتیش بێ كەموكورتی نییە، یەكێك لە دیاردە ناشیرینەكانی دیموكراتی ئەوەیە كە وەك هیتلەر دەڵێت: گوزەركردنی وشترێك بە كونی دەرزیدا، زۆر ئاسانترە لەوەی كەسێكی شیاو بۆ پۆستێكی شیاو بە رێگەی دیموكراتی دیاری بكەیت، هەروەها كابرایەكی پێڵاو دروو توانی قسەی خۆی بەسەر سوكراتدا زاڵ بكات. بیرمەندانی جیهان لەسەر ئەوە دەڵێن: ئەگەر ئەقڵی سوكرات پێوانە بكرایە، هێندەی هەموو ئەقڵی یۆنان دەبوو، بەڵام لە ژینگەی دیموكراتیدا چەرم بە سەر ئەقڵ و زانست و مەعریفە و ئەخلاقدا زاڵ بوو. ئەوجا ئەگەر لێرەوە بگەڕێینەوە بۆ هەڵوێستی كاك محەمەدی حاجی مەحموود و حزبی سۆشیالیست، جیا لەوەی حزبی سۆشیالیست حزبێكی شۆڕشگێڕە، لە هەمانكاتدا كاك محەمەدی حاجی مەحموود لەناو سەنگەردا كوڕەكەی لە تەنیشت خۆی شەهید بوو، لەبەردەستی خۆی گیانی سپارد، لەگەڵ ئەوەشدا ئامادە نەبوو بەرەكانی شەڕ بەجێ بهێڵێت، هەتا بە زۆر سەرۆك مسعود بارزانی لەگەڵ تەرمی كوڕەكەی ناردیەوە، بەڵام لەناو ئەو ژینگە دیموكراسییەی كوردستاندا كورسییەكی پێ رەوا نەبینرا، بۆیە زۆر جار دەڵێم، دیموكراتی زوڵمیشی تێدایە، زوڵمەكەش ئەوەیە راستە لە رووی ژمارەوە حیسابی بۆ دەكرێت، بەڵام لەناو ئەو ژمارانەشدا كەسانێك هەن، سەد هێندەی ئەوانەی دیكە لێهاتوون، بەڵام دیموكراسی ئەمە ناخوێنێتەوە، بەڵام ئەگەر لە رووی مەعنەوییەوە سەیری بكەین، دەبینین كاك محەمەدی حاجی مەحموود، ئەو كەسایەتییەیە كە سەرۆك بارزانی حیسابێكی تایبەتی بۆ دەكات، ئەم رێزگرتنەی سەرۆك بارزانی بۆ كاكە حەمە، وایكردووە حزبەكانی سلێمانی بەچاوی رق و كینە سەیری كاكە حەمە و حزبی سۆشیالیست بكەن. حزبەكانی سلێمانی هەر لە ساڵی 2001 ـەوە تا ئێستا ژینگەی سیاسی و كۆمەڵایەتی ئەم دەڤەری ئێمەیان تێكداوە.


* هەر لەسەر دەرهاویشتە خراپەكانی ئەو ژینگە ئاڵۆزەی سلێمانی، دیارە وەك هەموو لایەك گوێمان لێ بووە، یەكێتی نیشتمانی هەڕەشەی پەنجە بڕین دەكات و بزووتنەوەی گۆڕانیش كە تا ئێستا بانگەشەی ئەوەی دەكرد، حزبێكی مەدەنییە، كەچی ئێستا ئەویش هەوڵی دروستكردنی میلیشیایەكی چەكداری دەدات، ئایا ئەم دەرهاویشتە نەرێنییە چۆن سەیر بكەین؟
- ئەمەی گۆڕان كاردانەوەی هێرشی چەكدارانی یەكێتییە بۆ سەر بارەگەكەیان، با واقیعیی بین. تۆ بێچووە باڵندەیەكیش زۆر ئازار بدەیت، لێت هەڵدەگەڕێتەوە دەنووكێكت لێ دەدات، بۆیە سیاسەت نە بەو میتۆدەی یەكێتی دەكرێت، نە بەو میتۆدەی گۆڕانیش كە هەموو شتێك رەتدەكەنەوە و دەیكەین بە سفر، بزووتنەوەی گۆڕان پێی وایە 2+2=4 دەبێت هەر بەم جۆرە مامەڵەی لەگەڵ بكرێت، بەڵام وەك شیعرەكەی قازی دەڵێت، 2+2 = 1، ئەمەش بەو مانایەی هەر چوار پارچەی كوردستان یەكسانە بە یەك كوردستان، بۆیە زۆر ئەم بیركردنەوەی گۆڕان بۆتە هۆكاری ئەوەی خۆی لاواز بكات، لە حاڵی ئێستایاندا، گۆڕان دەڵێت، یەكێتی دەنگەكانی ئێمەی بردووە و غەدری لێكردووین، باشە بۆچی گۆڕان پێكەوە هێرش دەكاتە سەر پارتی و یەكێتی و پارتی گرێدەداتەوە بە یەكێتییەوە؟ بۆیە دەبوو گۆڕان لەگەڵ پێنج حزبە سیاسییەكەی دیكە بۆ ئێستا هاوپەیمانیی پارتی بكات، بۆ ئەوەی پێگەی خۆی بەرامبەر یەكێتی بەهێز بكات، بەڵام ئەو ئەمە ناكات، مانای ئەوەیە سیاسەتەكەشی بەرهەمی نابێت، سەبارەت بە یەكێتیش دیارە من خۆم گوێم لەو ئەندام مەكتەب سیاسییەی یەكێتی بوو كە گوتی: ئەوەی یەكێتی تۆمەتبار بكات، پەنجەی دەبڕین، دیارە سەركردایەتی و مەكتەبی سیاسی یەكێتی ئەگەر خۆیان بە میراتگری سیاسەتی مام جەلال دەزانن، ئەوا دەبێت بزانن سیاسەت بەمجۆرە ناكرێت، جۆلیان ئەندرسۆن كە رۆژنامەنووسێكی ئەمریكییە و دوو كتێبی نووسیوە بە ناونیشانی (كەوتنی بەغدا و پیاوەكانی)، سەبارەت بە مام جەلال دەڵێت، مام جەلال ئەو كەسایەتییەیە كە لەیەك كاتدا دەیتوانی بۆ بەرژەوەندیی پرسی كورد، ئەملاو ئەولای ئەحمەدی نەژاد و كوڵمەكانی كۆندالیزا رایز ماچ بكات، لەمەش مەبەستی ئەوەیە مام جەلال دەیتوانی هاوسەنگی رابگرێت و هاوكێشە سیاسییەكان بە وردی بخوێنێتەوە، بۆیە ئەگەر یەكێتی بیەوێت میراتگری ئەو سیاسەتە بێت، ئەوا دەبێت باش بزانن بە هەڕەشەی پەنجە بڕین و بە دروستكردنی گوشار و سەپاندنی دەسەڵاتی سەربازی كێشەكان ئاڵۆزتر دەكەن و بۆیان چارەسەر ناكرێت. بۆ ئەم كێشەی ئێستا كە شەش حزبەكە لەگەڵ یەكێتی هەیانە، گرنگە یەكێتی بە دوای رێگەچارەیەكدا بگەڕێت و چارەسەری بۆ بدۆزێتەوە، لەمەش زیاتر دەبێت بزانین كێشەكانی هەرێمی كوردستان بە هێزی لۆژیك چارەسەر دەكرێت نەك بە لۆژیكی هێز، ئەگەر خوانەخواستە دوای لۆژیكی هێز بكەوین كێشەكان ئاڵۆزتر دەبن و چارەسەریشیان ئەگەر مەحاڵ نەبێت، ئاسان نابێت.
* پارتی دیموكراتی كوردستان، وەك حزبی یەكەم و سەرەكی لە كوردستان پشكی شێری بەردەكەوێت بۆ رێكخستنەوەی نێوماڵی كوردستان، ئایا پارتی پێویستە چۆن لۆژیكانە مامەڵە لەگەڵ ئەم بارودۆخە بكات بۆ ئەوەی پێگەی كوردستان لە بەغدا بەهێز بێت؟
- ئەگەر واقیعییانە سەیری هاوكێشەی سیاسیی هەرێمی كوردستان بكەین، ئەوا پارتی ئەو هێزەیە كە دەتوانرێت بینای لەسەر بكرێت، هەموو هێزە نێودەوڵەتی و هەرێمییەكان باش دەزانن، ئەگەر پارتی هەڵوێستی خۆی لەسەر پرسێك دەربڕی، ئەم قسە و هەڵوێستەی خۆی دەباتەسەر و خاوەنی قسە و هەڵوێستی خۆیەتی، كەواتە رووی بەغدا و دەوڵەتانی هەرێمی و نێودەوڵەتی لە پارتییە، پارتییش دەبێت هەموو هێزەكانی كوردستان پێكەوە كۆبكاتەوە، بۆ ئەوەی بتوانێت نوێنەرایەتیێكی بەهێز بكات، لەسەر ئەم بنەمایە پارتی دەبێت موراعاتی دڵی هەموو ئەو حزبانە بكات كە لە زۆنی سەوز و نیلی بە جۆرێك لە جۆرەكان دڵیان شكاوە، ئەمەش بەرپرسیاریەتیێكی گەورەیە و دەكەوێتە سەرشانی پارتی، ئەمەش لەبەر ئەوەیە خواستی هەندێك لە دەوڵەتانی هەرێمی ئەوەیە هەرێمی كوردستان تێكبچێت و سنووری دێگەڵە دووبارە زیندوو ببێتەوە، ئەوجا تا ئەوە روونەدات، دەبێت پارتی خاوەنی دەستپێشخەری بێت و لەگەڵ یەكێتی قسە بكات، بۆ ئەوەی رێگەیەك بدۆزرێتەوە ئەو حزبانە رازی بكرێنەوە، ئێستاش كە سەرەتای قسەكردن و پەیوەندیكردن لە نێوان پارتی و چەند لایەنێكی عێراقی دەستی پێكردووە، ئاماژەیە بۆ رۆڵی گرنگی پارتی لە پرۆسەی سیاسیی عێراقدا، بەڵام بۆ ئەوەی بتوانین لانیكەم مافە دەستوورییەكانی كوردستان لە دەستووری عێراقدا جێبەجێ بكەین، ئەوا دەبێت هەرچۆنێك بێت، گوتارێكی كوردستانی دروست بكرێت و بەو گوتارەوە لەگەڵ بەغدا قسە بكرێت.