بارودۆخی دوای 16ی ئۆكتۆبەر و داگیركردنەوەی ناوچەكوردستانییەكانی دەرەوەی هەرێمی كوردستان و ئەو پێشێلكارییە دەستوورییانەی كە كەشێكی نائاسایی و نایاسایی و پڕ لە نائەمنی و نەهامەتی بۆ دانیشتووانی ناوچەكە دروست كردووە، هەروەها دووبارە زیندووكردنەوەی سیاسەتی بەعسی شۆڤێنی و تەعریبكردن و سووكایەتی بە هێماكانی نەتەوەیی كورد لە كەركووك و ناوچە داگیركراوەكانی دیكە لەلایەن سوپا و میلیشیای عێراقی و چەند پرسێكی هەنوكەیی، ناوەڕۆكی ئەم دیمانەیەی گۆڤاری گوڵان لەگەڵ د.كەمال كەركووكی ئەندامی مەكتەبی سیاسیی پارتی دیموكراتی كوردستان و فەرماندەی میحوەری رۆژئاوای كەركووكی هێزەكانی پێشمەرگەی كوردستان پێكدەهێنن.

* دوای 16ی ئۆكتۆبەر كوردستان كەوتە قۆناخێكی هەستیار و ناسك، لە هەمانكاتدا گۆڕانكاریش بەسەر پێگەی كورد لە هاوكێشە سیاسییە نێودەوڵەتی و ئیقلیمی و ناوخۆییەكاندا هات، پرسیار ئەوەیە، بۆچی ئەم كارەساتە بەسەر كوردستاندا هات؟ ئایا هۆكارەكەی ئەنجامدانی ریفراندۆم بوو؟
- ئەو بارودۆخەی بەسەر كوردستاندا هات، بەرئەنجامی ئەو فیكرە شۆڤێنییەیە كە لەگەڵ پرۆسەی دیموكراتی و پێكەوەژیانی ئاشتییانە و بنەماكانی مافی مرۆڤ و یاسای نێودەوڵەتی و پەیمان و بڕیارەكانی نەتەوە یەكگرتووەكان هەڵناكات و رەتیدەكاتەوە، بۆیە هۆكارەكەی پرسی ریفراندۆم نییە، ریفراندۆم كرایە بیانوویەك كە لەو رێگەیەوە هێرش بكەنە سەر كوردستان، ئەگەرنا، بەپێی هەموو پەیمان و بڕیارەكانی نەتەوە یەكگرتووەكان و یاسای نێودەوڵەتی و پرۆسەی دیموكراتی و مافی مرۆڤ، ریفراندۆم مافێكی رەوای هەموو گەلێكە كە لەسەر ئەو خاكەی لەسەری دەژی، خۆی وەكو گەل بە ئاشتی بڕیار لەسەر چارەنووسی خۆی بدات. هەر بۆ نموونە لە بڕگەی دووی ماددەی یەك لە پەیماننامەی نەتەوە یەكگرتووەكاندا دان بەم مافەدا نراوە و هەروەها لە ماددەی (55) دووبارە جەختی لەسەر كراوەتەوە، ئەوجا لەمەش زیاتر نەتەوە یەكگرتووەكان مافی بڕیاردانی بۆ دیاریكردنی چارەنووس لە پرانسیپەوە گۆڕیوە بۆ ماف، ئەمەش بەو مانایە دێ، مافی بڕیاردان بۆ دیاریكردنی چارەنووس مافە، مافیش مولزمە بۆ ئەوەی جێبەجێ بكرێت. لەلایەكی دیكەشەوە بەپێی بڕیارەكانی نەتەوە یەكگرتووەكان لە هەردوو بڕیاری (١٥١٤) و (2200) و زۆر بڕیاری دیكەی نەتەوە یەكگرتووەكان و یاسای نێودەوڵەتی و مافی مرۆڤ و پرۆسەی دیموكراسی، باس لەوە كراوە، هەر گەلێك لەسەر خاكی خۆی مافی خۆیەتی، بۆ دیاریكردنی چارەنووسی خۆی بڕیار بدات، گەلی كوردیش لەسەر خاكی خۆی كە كوردستانە، زمانی خۆی، ناسنامەی خۆی، كەلتووری خۆی، ئایینی خۆی هەیە و، زیاتریش هەرێمی كوردستان كیانی خۆی هەیە، كە خاوەنی پەرلەمانی خۆیەتی، ئەم پەرلەمانە چوار خولی هەڵبژاردنی ئەنجامداوە، لەم هەرێمە، میدیا و فرەنەتەوەیی و ئایینی ئازادن، بۆیە ئەو گەلە مافی خۆیەتی كە بە شێوەیەكی ئاشتییانە بڕیار لەسەر چارەنووسی خۆی بدات. بەڵام حكومەتی عێراق ئەمەی پێ قبوڵ نەبوو. بۆچی؟ چونكە باوەڕی بە پێكەوەژیانی ئاشتییانە لە كەشوهەوایەكی دیموكراسیدا نییە، خۆ پێشتریش كە هێزی سەربازییان ئامادە كرد بۆ ئەوەی هێرش بكەنە سەر دووز و خانەقین و كەركووك، ئەوكات لە كوردستان باسی ریفراندۆم نەكرابوو. هەروەها كاتێك بودجەی خەڵكی كوردستانیان بڕی، لەگەڵ ئەوەی ریفراندۆم مافی گەلی كوردستانە، هەر باسی پرۆسەی ریفراندۆم نەكرابوو، هەرێم دەستی بە نەوت فرۆشتنیش نەكردبوو. ئەوان بەردەوام هەڕەشە بوون لەسەر مافە رەواكانی گەلی كوردستان، هەر ئەوان بە نادەستووری و ناعەدالەتی و بە زوڵم و پیلان، هێرشی سەربازییان كردە سەر كوردستان، باشە ئەگەر خۆیان بە هەق دەزانن، بۆچی پەنایان نەبردە بەر دادگای فیدڕاڵی بە ئاشتی و دوور لە توندوتیژی چارەسەری كێشەكان بكەن؟ ئەوجا ئەگەر لێرەوە بگەڕێینەوە سەر ئەو كارەساتەی لە 16ی ئۆكتۆبەری 2017 بەسەر كوردستاندا هات، بێگومان حكومەتی عێراق بە تەنیا نەیدەتوانی هێرش بكاتە سەر كوردستان، بۆیە بە پشتیوانیی هێزی دەرەكی و بەكارهێنانی تاقمێكی خائین و خۆفرۆش و نەفسنزمی ناو یەكێتی نیشتمانی كە بوونە خولامی زۆر نزمی بەر دەستی داگیركەران، هێرشیان كردە سەر كوردستان، تاقمی خیانەتكاران ئامادەكارییان بۆ خیانەتەكەیان كردبوو، (٢١) قەڵا كە وەزارەتی پێشمەرگە بۆ قایمكردنی سەنگەرەكانی پێشمەرگە لە سنووری میحوەری چوار لە باشووری كەركووك دروستیان كردبوو، تاقمی خیانەتكار بە پێشمەرگەكان چۆڵیان كرد بۆ حەشد، ئەوانیش چوونە ناو قەڵاكان و زۆر لە كەركووكەوە نزیك بوونەوە. زۆر شوێنی دیكەی هەستیاریان لە باشووری كەركووك بۆ حەشد و پۆلیسی ئیتحادی بە پێشمەرگەكان چۆڵ كردبوو. چاوساخییان بۆ داگیركەران دەكردو پێش هێزەكانی داگیركەران كەوتبوون بۆ ناو كەركووك و لە كەناڵەكانی تەلەفزیۆنەكانیانیش داوایان لە هاووڵاتیانی كەركووك دەكرد، ئارام بن و دەیانگوت: هیچ نییە و بچنەوە ماڵەكانتان. ئەو پیلانە بووە هۆی تێكچوونی سیستەمی پاراستن و بەرگریی كەركووك و ناوچەكانی دیكە وەكو دووز و خانەقین. هێزەكانی میحوەری رۆژئاوای كەركووك كە لە پێشمەرگەكانی پارتی و یەكێتی پێكهاتبوون، دیارە پێشتر پێكەوە لە ژێر فەرماندەیی میحوەری رۆژئاوای كەركووك شەڕی زۆر باشی سەركەوتوویان لە دژی داعش كردبوو، بەڵام لە (١٦ی ئوكتۆبەر) ئەو رۆژە بە تەلەفۆنی ئەو تاقمە خائینە شەش لیوای هێزەكانی یەكێتی نیشتمانی كوردستان سەنگەرەكانیان بەجێ هێشت و ئەو چەكی قورس و ئالیاتەی كە هەیانبوو لەگەڵ گشت پێشمەرگەكانی یەكەی (٧٠) بە بێ موافەقەتی میحوەر و بەرپرسی میحوەر هەموو سەنگەرەكانیان چۆڵ كردو بووە هۆی تێكچوونی بەرگریكردن لە ئەتراف و ناوەوەی كەركووك. ئەو كارەساتەی لە كەركووك و دووز و خانەقین روویان دا، پیلانی گەورە و خەتەری دیكەیان لە بەرنامە بوو بۆ داگیركردنی هەولێری پایتەختی كوردستان و شوێنەكانی دیكەی هەرێمی كوردستان. بۆیە تەنیا پێشمەرگە سەربەرزەكانی پارتی دیموكراتی كوردستان بە ئەركی مێژوویی و پیرۆزی خۆیانیان زانی شكۆی پایتەخت و هەرێمەكەیان، كە هەرێمی كوردستانە بە رۆح و بە گیانیان بپارێزن. ئەوە بوو وەكوو میحوەری رۆژئاوای كەركووك بە بێ هێزەكانی یەكەی (٧٠) واتە بە بێ پێشمەرگەكانی یەكێتی نیشتمانی كوردستان، جەبهەیەكی بەهێزی بەرگری لە پردێ دامەزراند، بۆ ئەوەی بەرپەرچی ئەوانە بدرێنەوە كە تەماحیان لە هەولێر و هەرێمی كوردستان كردبوو كە داگیری بكەن. هێزی پێشمەرگەی پارتی توانییان بە تەنیا رۆڵێكی بەرگریكردنی بەرز ببینن و هێرشی داگیركەران تێكبشكێنن و بەرەو دوا راویان بنێن.

* داگیركردنەوەی كەركووك واقیعێكی تاڵی دروست كردووە، بەتایبەتی كە ئێستا جارێكی دیكە ئەو شارە كەتووەتەوە بەر هەڵمەتی رەشی تەعریب، ئایا چۆن مامەڵە لەگەڵ ئەم واقیعە تاڵە دەكرێت و تاچەند ئەم ئەمری واقیعە قبووڵ دەكرێت؟
- ئەمە ئەمری واقیع نییە، بەڵكو ئەو بارودۆخەی هاتووەتەپێش، بە هۆی خیانەتێكی گەورەی مێژوویی هاتەپێش، ئەو رێكخستنە ئەمنییەی پێشتر بۆ ئەو ناوچەیە رێكخرابوو، ناوچەكەی دەپاراست، بەتایبەتی دوای ئەوەی داعش موسڵ و حەویجەی گرت و بەرەو كەركووك دەهاتن و نیازیان هەبوو كە كەركووكیش داگیربكەن، هێزی پێشمەرگەی كوردستان لە قۆناخی یەكەمدا توانی پێشڕەوییەكانی داعش رابگرێت و لە قۆناخی دووەمدا پاشەكشەیان پێ بكات و تەنانەت بەشێكی زۆری ناوچەكانیشی لە دەستی داعش پاك كردەوە هەتا گەیشتینە (٢٢) كیلۆمەتری حەویجە، هەربۆیە لە چوارچێوەی ئەو رێكخستنانەی پێشمەرگە و دەزگا ئەمنییەكان لە ساڵانی رابردوو بۆ پاراستنی ئەو ناوچانە دانرابوون، تەواوی ناوچەكە ئارام بوو، بەڵام پیلان بۆ داگیركردنی كەركووك و ئەترافی بە هاوكاری دەرەكی و خۆفرۆشتنی ژمارەیەك خائین لە ناو ریزەكانی یەكێتی نیشتمانی كوردستان ئەنجام درا، كە بوونە هۆی تێكچوونی هەماهەنگیی نێوان هێزەكانی پێشمەرگەی یەكەی (٧٠) و یەكەی (٨٠) و دەزگا ئەمنییەكان و چۆڵكردنی سەنگەرەكانی پێشمەرگە لە میحوەری رۆژئاوای كەركووك لەلایەن (یەكەی ٧٠و بەرگری و فریاكەوتن) كە بە بێ ئاگاداری و موافەقەتی بەرپرسی میحوەری رۆژئاوای كەركووك لە بەرەی پاراستنی كەركووك كشانەوە، بۆیە بە هێرشی سوپا و حەشدی شەعبی و حەشدی وەتەنی و هێزی دەرەكی، ئەو رێكخستنە ئەمنییە تیكچوو، ئەوانیش بۆیان رێكناخرێتەوە، بۆیە تەواوی بارودۆخی ئەو ناوچەیە زۆر ترسناكەو رۆژانە خەڵك دەكوژرێت و دەڕفێندرێت و خانووی خەڵك دەتەقێندرێتەوە. سەبارەت بە كەركووكیش، ئێمە كەركووك بە شارێكی داگیركراو دەزانین و ئەم شارە لەلایەن میلیشیاكانی عێراق و هێزی دەرەكی و بە بەكارهێنانی تاقمی خیانەتكاری ناو ریزەكانی یەكێتی داگیركراوە، بۆیە ئەو بارودۆخە قبووڵ ناكرێت و دەبێت چارەسەر بكرێت، هەتا ئێستا بە هۆی ئەو داگیركارییە ئەنجومەنی پارێزگای كەركووك لە كار خراوە، پارێزگاری هەڵبژێردراو و شەرعی لەلایەن ئەنجومەنی پارێزگای كەركووكەوە، لە (١٦ی ئوكتۆبەری ٢٠١٧)وە گیانی لەمەترسیدایە و لە بەر داگیركاران دەربەردەر كراوە و دەستیان بكەوێت، دەستگیری دەكەن، یان دەیكوژن. لەو رۆژەوە تا ئێستا زیاتر لە 11 هەزار خێزانی عەرەبیان هاوردەی كەركووك كردووە، بۆ ئەوەی دووبارە شارەكە تەعریب بكەنەوە. لەم بارودۆخەدا رێگەچارە ئەوەیە كە پێش هەموو شت دۆخی كەركووك ئاسایی بكرێتەوە و میلیشیاكانی حەشدی شەعبی و هێزەكانی پۆلیسی فیدڕاڵی و سوپا كە بۆ داگیركردنی كەركووك هێنراون، هەموویان بكشێنرێنەوە، ئەوجا جارێكی دیكە بەپێی دەستووری عێراق هەوڵبدرێت ماددەی 140 جێبەجێ بكرێت، بەپێی ئەم ماددەیە ئەوا دەبێت، یەكەم بارودۆخی كەركووك ئاسایی بكرێتەوە، پاشان سەرژمێری بكرێت و ئەوجا گشتپرسی لەسەر چارەنووسی كەركووك ئەنجام بدرێت و رێز لە ئالای كوردستان بگیرێت. بەپێی دەستووری عێراق، هێزەكانی عێراق ئەو مافەیان نییە لەسەر پرسی ریفراندۆم هێرشی سەربازی بكەنە سەر كوردستان، لەبەر ئەوەی لە دەستووری عێراقدا باسی ئەوە نەكراوە كە نابێت هەرێمەكان ریفراندۆم ئەنجام بدەن، هەروەها باسی ئەوەش نەكراوە بڵێت ئەنجامدانی ریفراندۆم لە چوارچێوەی دەسەڵاتە سنووردارەكانی دەسەڵاتی فیدڕاڵییە، دەستووری عێراق لەسەر سێ بنەما داڕێژدراوە، كە بریتین لە دەسەڵاتە سنووردارەكان كە دەسەڵاتی حكومەتی فیدڕاڵییە، دەسەڵاتی هەرێمەكان، یان ئەو پارێزگایانەی لە هەرێمەكاندا رێكنەخراون، هەروەها بەشێك لە دەسەڵاتەكانیش هاوبەشن لە نێوان هەرێمەكان و حكومەتی فیدڕاڵیدا، بەپێی ماددەیەكی ئەو دەستوورەش، ئاماژە بەوە كراوە ئەگەر كێشەیەك كەوتە نێوان حكومەتی هەرێمەكان و حكومەتی فیدڕاڵی، ئەگەر نەكەوتە چوارچێوەی دەسەڵاتە سنووردارەكانی حكومەتی فیدڕاڵییەوە و بەشێك بوو لە دەسەڵاتە هاوبەشەكانی نێوان هەرێمەكان و حكومەتی فیدڕاڵی، ئەوا بڕیارەكە بۆ بەرژەوەندیی دەسەڵاتی هەرێمەكان یەكلایی دەكرێتەوە.
* باس لەوە دەكرێت كە لە چوارچێوەی جێبەجێكردنی دەستووری عێراقدا، ئەو ناوچانە بە هاوبەشی لەنێوان پێشمەرگە و سوپای عێراق بەڕێوە ببرێت، ئەمەش مانای ئەوەیە دەبێت پێشمەرگە بگەڕێتەوە بۆ ئەو ناوچانە، ئایا ئەمە بەكردەیی هەنگاوی بۆ هەڵگیراوە؟

- پێش هەموو شت، ئەو ناوچانە وەك خاك، خاكی كوردستانن و بەهیچ شێوەیەك سازش لەسەر ناسنامەی كوردستانیبوونی ئەو ناوچانە ناكرێت، سەبارەت بە ئیدارەی شارەكەش دەبێت بارودۆخەكە ئاسایی بكرێتەوە و هیچ هێزێكی سەربازی و میلیشیای چەكدار و هێزی بیانی لەناو شارەكە نەمێنێت، پاشان هێزی پێشمەرگە و سوپای عێراق لەگەڵ هێزەكانی ئەمریكا لە دەرەوەی شارەكان دەبن، ئێمە خوازیاری ئەوەین بە شێوەیەكی ئاشتییانە بارودۆخی كەركووك ئاسایی بكرێتەوە، ئەگەرنا خەڵكی كەركووك ئەوە قبووڵ ناكات، ئەو كاتەش شێوازێكی دیكە دێتە پێشەوە.
* هەر لەچوارچێوەی درێژەدان بە پرۆسەی تەعریب، باس لەوە دەكرێت پارێزگاری بە وەكالەتی كەركووك بەنیازە بە رێگەی رووخاندنی ماڵە كوردەكان لەژێر نێوی زیدەڕۆیی، ژمارەیەكی دیكەی كوردی كەركووك ئاوارە بكاتەوە، لەسەر ئەم پرسە رای ئێوە چییە؟
- بەپێی ئەو زانیارییانەی لای ئێمە هەن، ئەو پارێزگارەی ئێستا لە كەركووك دانراوە، (١١) هەزار خێزانی عەرەبی هاوردەی كەركووك كردووە و بە ئارەزووی خۆشیان زیدەڕۆیی دەكەن، ئەمەش هەنگاوێكە دژی كوردی كەركووك و بۆ ئەوەیە بارودۆخی كوردی كەركووك بەرەو خراپتر بەرن و دیموگرافیی كەركووك بگۆڕن و كەركووك زیاتر لە زەمانی رژێمی دیكتاتۆریی بەعس تەعریب بكرێت، لەمەش زیاتر ئێستا بەرپرسی ئەمنییەتی پارێزگاری كەركووك كەسێكە كە پێشتر بەرپرسێكی داعش بووە لە ناحیەی زاب، ئەو كەسە وەك ئاوارە هاتبووە دیبەگە، پارێزگاری ئێستای كەركووك بە وەكالەت هێناویەتی و لە كەركووك نیشتەجێی كردووە و ئێستا ئەو كەسە بەرپرسی ئەمنییەتی پارێزگاری كەركووكە (ئەمە بە شایەدی زۆر لە عارەبەكانی سنووری قەزای حویجە). ئێستا چوار فیرقەی هێزە چەكدارەكانی عێراق لە پۆلیسی ئیتحادی و دژە تیرۆر و زیاتر لە (١٢) جۆری میلیشیای حەشد هێنراونەتە كەركووك و هەر ئەم رۆژانە زیاتر لە 1300 پۆلیسی دیكەیان لە بەغداوە هێناوە بۆ كەركووك و داقوق، بەڵام ئەگەر حكومەتی عێراق بەو خەیاڵە بێت كە دەتوانێت بە زەبری هێز سەقامگیری لە كەركووك دروست بكات، ئەوا خەیاڵی خاوە و دەبێت لەوە دڵنیا بێت كە لەهیچ شوێنێكدا سەقامگیری دروست نابێت، هەتا خەڵكەكەی و خاوەنەكەی رازی نەكرێت، ئەوجا بۆ ئەوەی خەڵكی كەركووك و خاوەنەكەی رازی بكرێت و سەقامگیری بگەڕێتەوە، دەبێت وەكو باسمان كرد، پێش هەر شتێك كەركووك ئاسایی بكرێتەوە و پاشان ماددەی 140 جێبەجێ بكرێت.

* لە ئێستادا زۆر باس لە یەكڕیزیی نێوماڵی كوردستان دەكرێت، پرسیار ئەوەیە ئایا پەرتەوازەیی لەنێوان حزبە سیاسییەكانە، یان نێوماڵی كوردستان پەرتەوازەیە؟
- سەبارەت بە یەكڕیزیی نێوماڵی كورد، من هەست دەكەم هەڵەیەك هەیە و ئەم هەڵەیەش زۆر جار لە ئاستی بەرزیش گوێم لێی دەبێت و دەڵێن ناو ماڵی كوردستان پەرتەوازەیە، بەڵام لەباری واقیعیدا ناوماڵی كوردستان یەكڕیز و یەكگرتووە، لە ریفراندۆمی 25ی ئەیلوولی 2017 دەركەوت كە گەلی كوردستان بە رێژەی 92.7٣% دەیەوێت سەربەخۆ بێت، ئەمە ناوماڵی حەقیقیی كوردە و جیاوازە لە پەرتەوازیی حزبەكان. حزبەكان لە هەموو گەل زۆرتر نین و ئاشكرایە كە گەل لە حزب گەورەترە، پاكترە، زاناتر و دروستترە، دڵسۆزترە. حزبە سیاسییەكان هەموویان بانگەشە بۆ ئەوە دەكەن كە لەپێناوی ئەوە دامەزراون، خزمەتی گەلەكەیان بكەن، بەڵام بە كردەوە ئەمە وا نییە، زۆربەی حزبەكان بۆ دەستخستنی پۆست و پلە و بەرژەوەندیی حزبی خۆیان و مەرحەبایەكی ئەملاو ئەولا، دژی بەرژەوەندیی گەلەكەی خۆیان كار دەكەن، هەروەها حزبی سیاسی هەیە دژی سەربەخۆیی كوردستان هاوكاری و هاوپەیمانی لەگەڵ داگیركاراندا دەكات و نۆكەری دەكات بۆ ئەوەی شەڕی دژی سەربەخۆیی بكات، بەڵام گەلی كوردستان هەموویان پشتگیری سەربەخۆیی دەكەن، بۆیە ئەوا راست نییە كە باس لە پەرتەوازەیی گەل دەكرێت، ئەو پەرتەوازەییە لەناو حزبەكانە و كاتی ئەوەش هاتووە كە حزبەكان باش لەوە تێبگەن كە گەلی كوردستان رەش و سپی لە یەكتری جیادەكاتەوە.
* هێشتا مەترسییەكان لەسەر كوردستان دوور نەكەوتوونەتەوە، ئەگەرەكان بە ئەگەری شەڕیشەوە كراوەن، ئایا ئەگەر خوانەخواستە شەڕێك بەسەر هێزی پێشمەرگەدا فەرزكرایەوە، مەترسیی ئەوە ماوە كە كارەساتێكی دیكەی هاوشێوەی 16ی ئۆكتۆبەر روونەداتەوە؟
- با بە راشكاوی بدوێم، هەتا هێزی پێشمەرگەی كوردستان بە سەر یەكەی (80) و یەكەی (٧٠) دابەش بووبێت و پارە لە حزبەكان وەربگرن، ئەوا هەرگیز یەكبوون لەناو هێزی پێشمەرگە دروست نابێت، هەربۆیە هەركاتێك بارودۆخێكی تازە هاتبێتە پێشەوە، ئەوا هەر لایەنێكی سیاسی چۆن فەرمان بكەن، پێشمەرگەكانی سەر بە ئەوان جێبەجێی دەكەن، بۆیە ئەم حاڵەتە بەوە چارەسەر دەكرێت، كە سەرچاوەی مووچەی هێزی پێشمەرگە لەدەستی حزبەكان نەمێنێ و لەلایەن وەزارەتی پێشمەرگەوە دابین بكرێت، پێشمەرگە پاك و دڵسۆز و قارەمان و سەربەرزن، بەس سەرچاوەی دارییان وای لێیان كرد پێشمەرگەكانی یەكەی (٧٠) لە 16ی ئۆكتۆبەر سەنگەرەكانیان بەجێ بێڵن. كەچی خواستی خۆیان نەبوو، ئەو هێزەی لەوێ بوو، كاتێك رۆیشتبوون و پاشان تەلەفۆنیان دەكرد، زۆر پێیان ناخۆش بوو، بەڵام كشانەوە لەبەر ئەوەی دەیانگوت نانی ماڵ و منداڵەكانمان دەبڕن. هەربۆیە تەنیا رێگا، بۆ ئەوەی هێزی پێشمەرگە یەكگرتوو بێت، دەبێت سەرچاوەی مووچەكانیان لەیەك سەرچاوە بێت و سەرچاوەكەش وەزارەتی پێشمەرگە بێت، وەزارەتی پێشمەرگەش مووچەكانیان لە رێگای بانكەوە بدات، تاكو راستەوخۆ بگاتە دەستی پێشمەرگەكان.
* لەناو شاری كەركووك حزبە سیاسییەكان بارەگاكانی خۆیان كردۆتەوە، بەڵام تەنیا پارتی دیموكراتی كوردستان بارەگاكانی داخراوە، ئایا بۆچی پارتییش ناگەڕێتەوە هەتا بارەگاكانی خۆی لەو شارە بكاتەوە؟
- هۆكاری ئەم پرسیارە دوو لایەنە، لایەنی یەكەمیان دیارە پارتیش دەتوانێت وەك ئەو حزبانە بگەڕێتەوە و بارەگاكانی بكاتەوە، بەڵام پارتی ئامادە نییە وەك ئەو حزبانە بە بێ ئاڵای كوردستان و لە بن دەستی حەشد و پۆلیس و دژەتیرۆر و كەركووكێكی داگیركراودا بارەگاكانی بكاتەوە، هەر بۆ نموونە هەندێك لایەن ئەوەیان قبووڵ كردووە سووكایەتییان پێ بكەن و ئاڵای كوردستان دابگرن و نەهێڵن بە كوردی قسە بكەن، كە زمانی كوردی، بەپێی دەستووری عێراق زمانی فەرمیی دەوڵەتی عێراقە، دیارە پارتی ئەوە قبووڵ ناكات، هەر بۆیە پارتی لایەنی دووەمی هەڵبژاردووە كە ئەویش ئەوەیە بەرگری لە مافە رەواكانی گەلی كوردستان دەكات و بە پشتیوانیی گەلی دڵسۆزی كوردستان، كەركووكیش بە داگیركراوی ناهێڵێت، بە سەربەرزی و بە كەرامەت و بە ئاڵای كوردستانەوە دەگەڕێتەوە كەركووكی دڵی كوردستان.