پشتگیریی ریفراندۆم و سەربەخۆیی كوردستان شێوەی پشتگیرییەكی میللی وەرگرتووەو هەموو چین و توێژەكانی كوردستان پێشمەرگانە پشتگیری لەم پرۆسەیە دەكەن و هیواو ئاواتیان ئەوەیە رۆژێك زووتر بڕیاری سەربەخۆیی كوردستان بدرێت و ببن بە خاوەنی دەوڵەتی خۆیان، بۆ قسەكردن لەسەر گرنگیی ئەم پرۆسە نیشتمانییە ئەم وتووێژەمان لەگەڵ مامۆستا شێخ موحسین موفتی پێشنوێژ و وتارخوێنی مزگەوتی مەولانا خالیدی نەقشبەندی لە هەولێر ئەنجامداو بەمجۆرە وەڵامی پرسیارەكانی گوڵانی دایەوە.

* لە شۆڕشی نەتەوایەتیی گەلی كوردستاندا رۆڵی مامۆستایانی ئایینی رۆڵێكی بەرچاو بووە؛ لە ئێستاشدا كە لە ریفراندۆمی سەربەخۆیی نزیك دەبینەوە، ئایا چاوەڕێ دەكەیت مامۆستایانی ئایینی هەمان رۆڵ ببیننەوە؟
- بەناوی خوای بەخشندە و میهرەبان؛ زانایانی ئایینی لە شۆڕشەكانی كوردستاندا بەهاوشێوەی هەموو چین و توێژەكانی كوردستان رۆڵ و بەرپرسیارێتی خۆیان هەبووە. بەڵام رۆڵی زانایان و ئەهلی تەریقەت و عیرفان لەهەموو رۆڵەكانی دیكە لە كوردستاندا گرنگتر بووە، چونكە مزگەوت و تەكیە و خانەقاكانی كوردستان سەرچاوەی زانست و كانگەی رەوشت و نیشتمانپەروەری بوون، لەمەش زیاتر بەبێ ئەوەی ئەم زانایانە هیچ تەماح و ویستێكی مادییان هەبووبێت، بەڵكو هەموو ئامانجیان بۆ ئەوە بووە ببنە خزمەتكاری نەتەوەی خۆیان و خەڵكیان پەروەردە كردووە بۆ ئەوەی ئەوانیش ببنە خزمەتكاری گەل و نەتەوەی خۆیان. هەر ئەمەش وایكردووە كە زانایانی ئایینی ئیسلام و ئەهلی عیرفان و تەسەوف رۆڵێكی گرنگیان لەبەرامبەر پرسە نەتەوەییەكان گێڕاوە، بەبێ ئەوەی پاداشت و سوپاسیان پێویست بووبێت، وەك لە قورئانی پیرۆزیشدا هاتووە « لانرید منكم جزاء و لا شكورا.» لەم چوارچێوەیەدا ئەگەر رۆڵی زانایانی ئایینی و ئەهلی عیرفان و تەسەوف لەناو مێژووی بزاڤی رزگاریخوازی كوردستاندا دەربهێنین، شتێكی وامان بۆ نامێنێتەوە، هەموو ئەوانەی سەركردایەتییان كردووەو شۆڕشەكانیان رێكخستووەو خەڵكیان هانداوە بۆ دژایەتیكردنی زوڵم و ستەم و پاڵپشتیكردن لە ئایین و گەل و نەتەوەكەیان لە مزگەوت و خانەقاكانەوە پەروەردە كراون، بۆیە هەر تەریقەتێك توانی پەیوەندی خۆی لەگەڵ خودای خۆیدا بە راستی ببەستێت، ئەوا دەبێت خزمەتگوزاریی خەڵك و نیشتمانەكەی بێت، چونكە خوای گەورەو میهرەبان فەرمانی پێداوە كەوا بكات. بۆیە ئەمڕۆ ئەركی سەرشانی ئێمەیە یەكەم بە راستگۆیی لەگەڵ ئایینەكەی خۆمان بین و دووەم لەگەڵ دۆزە نەتەوەیی و نیشتمانییەكەی خۆمان بین، چونكە خوای گەورەو میهرەبان ئێمەی بە میللەتێكی رەسەن و لەسەر ئاو و خاكی خۆمان دروست كردووین، ئاو و خاكێك كە لە قورئاندا بەپیرۆزیی ناوی هاتووەو خودای گەورەو میهرەبان نزای لە حەزرەتی نوح وەرگرتووە لە شوێنێكی پیرۆزدا كەشتیەكەی گیرسانەوە كە لەسەر چیای جودی و لە ناوەندی خاكی كوردستانی گەورەدایە (رب أنزلنی منزلا مباركا وأنت خیر المنزلین)، هەر لە سەردەمی پێغەمبەر (د.خ) و خەلیفەكانەوە تا سەردەمی عوسمانی و مێژووی هاوچەرخ، زانایانی كورد دینداری و ئەخلاق و رەوشتی بەرزی مرۆڤایەتی و عیرفانیان فێری نەتەوەكانی تریش كردووە، هەر لەبەر رەوشت و دینداری و دەوڵەمەندیی وڵاتەكەمان بووە نەتەوەكانی دەوروبەرمان دژایەتی نەتەوەی كوردیان كردووەو رێگەیان نەداوین خاوەنی كیانی سەربەخۆ و ئاڵای خۆمان بین، ئەو ئاڵایەی كە لە ئایینی پیرۆزی ئیسلامدا سادەترین مافی نەتەوەكانە، پێویستە بە شكۆمەندی هەڵكراوە و شەكاوە بێت.


* بەڵام ئەوانەی ئێستا دژایەتی ئاڵا و سەربەخۆیی كوردستان دەكەن، بەداخەوە هەندێكیان ئەو نەتەوانەن كە خۆیان بە موسڵمان دەزانن، ئایا بۆ چی سەربەخۆیی بە كوردستان رەوا نابینن؟
- لەدنیادا هیچ ئاڵایەك نییە بڵێت دەتوانم شان لەشانی ئاڵای پێغەمبەر (د.خ) بدات، كە خۆی هەڵیكردووەو لەگەڵ سەحابەكاندا بەرەو مەكە رۆیشتوون، بەڵام هەموو ئەوانەی لەژێر سەركردایەتی پێغەمبەر(د.خ) بوون بۆ ئازادكردنی مەككە لە تیرەو هۆزەكان بوون و هەمووی ئاڵای خۆیان هەڵكردبوو، حەزرەتی پێغەمبەر بەهیچیانی نەوت دەستبەرداری ئاڵاكەیان بن، لەكاتی فتوحاتەكانیشدا لەهەر وڵاتێك لە خەڵكەكەی خۆیان والی و ئەمیر و سەرپەرشتیاریان بۆ دەستنیشان دەكرا و خەڵكی نامۆیان نەدەكردە والی بەسەریانەوە، ئەگەر چەند كەسێكیش لەو وڵاتەدا مابنەوە، تەنیا بۆ فێركردنی دینداری و فقهی ئیسلام و شەریعەت بووە. هەر بۆیە لە ئایینی ئیسلامدا رێگە بە گەل و نەتەوە دراوە بەوجۆرە بژی كە خۆی دەیەوێت و لەم چوارچێوەشدا شەریعەتی ئیسلام رێگەنادات هیچ نەتەوەیەك دەستدرێژی لە مافی نەتەوەیەكی دیكە بكات، ئەوانەشی دەستدرێژی لەمافی نەتەوەی كورد دەكەن و سەربەخۆیی و دەوڵەتمان پێ رەوا نابینن، ئەوانە با موسڵمانیش بن، بەڵام لەسەر بنەمای شەریعەتی ئیسلام مامەڵە ناكەن، لەبەر ئەوەی شەریعەتی پیرۆزی ئیسلام دژی ئەوە نییە كورد خاوەنی كیانی سەربەخۆی خۆی بێت و ئاڵاو سنووری وڵاتی خۆی هەبێت. ئێمە خاكەكەمان بە زوڵم داگیركراوە و بە زوڵمیش پارچە پارچە كراوە، داگیركارانی كوردستان لەسەر چەوسانەوە و درێژەدان بەو زوڵمەی دژی كورد دەیكەن، بەرژەوەندییان یەكی گرتووە، كاتێكیش كورد بۆ لابردنی ئەو زوڵمە پەنای بۆ بەرخۆدان بردووە، ئەوان پەنایان بۆ هەموو هۆكارێك بردووە كە خوا پێی خۆش نییە و خاڵی رەشە بە ناوچەوانی دوژمنكارانەوە، وەك تەرحیل و ئەنفال و بە سووتماككردنی خاكی كوردستان، بێگومان داگیركارانی كوردستان بۆیە درێژەدانیان بەم زوڵمە دژی كورد هەتا ئێستا بۆ چۆتە سەر، لەبەر ئەوە بووە، لەهیچ پارچەیەكی كوردستان خاوەنی كیانی سەربەخۆی خۆمان نەبووین، بەڵام ئێستا خوای گەورەو میهرەبان بارودۆخێكی وای بۆ هێناوینەتەپێشەوە كە گەلی كوردستان ئەو فرسەتەی بۆ رەخساوە باس لەسەربەخۆیی بكات و هەنگاوی بۆ هەڵبگرێت، پێشتر داگیركارانی كوردستان لەسەر لەناوبردنی ئێمە رێكدەكەوتن، ئێستا بارودۆخێك هاتۆتەپێشەوە پەرژینێك بۆ كوردستان دروستكراوە كە ناوێرن هێرش بكەنە سەرمان، بەڵام ئەم پەرژینەش هەروا لە خۆڕا دروست نەبووە، بەشێكی بەرهەمی قارەمانیەتیی پێشمەرگە و لێهاتوویی سەركردەكانی تێدایە كە ببینە خاوەنی كیانێكی سەربەخۆی ئەمری واقیع، بەشێكی دیكەشی كە بەشی سەرەكیی ئەو پشتگیرییەی خودای گەورەیە كە نیشانەیە بۆ ئەوەی دەیەوێت ئەم میللەتە داماوە كیانێكی بۆ دروست بكات، هەربۆیە دەبێت میللەتەكەمان ببنە بەرهەڵستكار بۆ ئەو كەسانەی دژی ویستی خودای گەورەو میهرەبان و شەریعەتی ئیسلامن كە هەموو مافێكی پێداوین ببینە دەوڵەت، ئەمڕۆ بەرەو گشتپرسی و پشت بەخوا سەربەخۆیی دەڕۆین، ئەگەر بۆ كەس و لایەنێك یا بۆ هەڵبژاردنی پەرلەمان و حكومەت و سەرۆكایەتی هەرێمە مەیكەن، یاخود ئەو كات تۆڵەی خۆتان لەكێ و چ لایەنێك دەكەنەوە بیكەن، بەڵام ئەمە بۆ نەتەوەیەك و میللەتێكە كە مافی شەرعیی خۆیەتی كیانی سەربەخۆی خۆی هەبێت، ئەو كاتەی بڕیاریشمان دا وڵاتانی دەرەوەش یان پشتگیری لێ دەكەن، یان پشتگیری لێ ناكەن و بێدەنگ دەبن، بەڵام ئەمڕۆ هیچ وڵاتێكی پێشكەوتووی دنیا ئەگەر بۆ شەرمی دنیایش بێت، روویان نایەت بڵێن ئێمە دژی گشتپرسین، چونكە دژ دەبن بە بنەماكانی دیموكراسی و مافی مرۆڤ كە واژوویان لەسەر كردووە، ئومێدم زۆرە میللەتی كورد بەتوندی دەست بە دەستكەوتەكانیەوە دەگرێت و بێدەنگیش نابێت لە داواكارییەكانی بۆ گەیشتن بە مافەكانی .


* بەڵام ئێستا هەندێك دەنگ و لایەن بەپاساو و بیانووی جۆراوجۆرەوە دژایەتیی دەوڵەتی سەربەخۆی كوردستان دەكەن، ئایا لەكاتێكدا لە ئایینی پیرۆزی ئیسلامدا ئەو مافە بە نەتەوەو تیرەو هۆزەكانیش دراوە، ئیتر بۆ دەبێت دەنگی وا لەناو میللەتەكەماندا لەم قۆناغە هەستیارەدا بوونی هەبێت؟
- من پێم سەیرە ئەمڕۆ لەكوردستاندا كەسانێك پەیدا بوون دەڵێن ئەم ئاڵایە بۆچی باشە؟ یاخود دەوڵەتمان بۆ چییە و باهەر پاشكۆی وڵاتی عێراق و خەڵكی تر بین، یاخود بۆیە شۆڕش دەكەین، هەر تەنیا ژیانمان باش بێت، ئەگەر تەنیا ئامانج لە شۆڕشدا ژیان باش بووایە، ئەو هەموو لاوەی كوردستان نەدەبوونە پێشمەرگە و شۆڕشیان نەدەكرد، ئەوانەی دەڵێن دەوڵەتمان ناوێت و تەنیا ژیانمان باش بێت، نازانن بەهای دەوڵەت چییە. بەڵێ راستە و ئەركی سەرشانی بەرپرسان و سەركردایەتی هەرێمی كوردستانە ژیانی ئەو خەڵكە باش بكەن و پەروەردەیان بكەن بۆ ئەوەی قسەكانیان لەدڵی خەڵكیدا جێگیر بێت و كەسانێكی تر نەیشێوێنن، خەڵك هەر بۆ خۆی دڵسۆزی خاك و نیشتمانە، بەڵام بەهۆی هەندێك رەفتاری بەرپرسەكانی خراپ بەكارهێنانی دەسەڵاتەوە ئەو كەلێنانە دروست دەبێت، بەڵام پرسیار لێرەدا ئەوەیە ئایا ئەوانەی تەنیا دروشمی نان و ژیانیان بەرزكردۆتەوە، ئەی دوای ئەوەی ژیانیان باش بوو، یەك ناگرن و دەوڵەتیان ناوێت؟ بۆیە ئەوە جۆرێكە لە سەرلێتێكچوون و خۆ بە هەڵەدا بردن، سەبارەت بە هەڵوێستی ئایینی پیرۆی ئیسلامیش. ئەركی ئایینی پیرۆزی ئیسلام كە سپاردوویەتی بە ئێمە لەوەدایە لەگەڵ مافەكانمان بین، بچووكترین و سادەترین ماف ئازادییە كە گەورەترین و بەهادارترین مافیشە، بەڵێ لە چوارچێوەی دەوڵەتی كوردستاندا و كیان و قەوارەو میللەت و زمان و دەسەڵات و ئاڵاو ڤیزەو سكەی خۆت دەبێت، بۆ ئەوەی كەسانێكی تر خۆی بەسەریدا زاڵ نەكات و خۆی نەسەپێنێت و كورسی خۆتت هەبێت لە نەتەوە یەكگرتووەكان و لەنێو گەلانی جیهاندا. بێگومان هەموو حزبەكانی كوردستان هەرهەموویان بە دروشم دەڵێن سەربەخۆیی كوردستانمان دەوێت، بەڵام كاتێك دێتە سەر هەنگاوهەڵگرتنی جددی بۆ ئەم پرسە گرنگە، سەیر دەكەیت دەیان كۆسپ و تەگەرە لەچواردەوری ئەو حزب و سەركردەو كەسانەش دروست دەكەن كە دەیانەوێت بەرەو سەربەخۆیی بڕۆن و بگرە دەبنە پاشكۆ و وەكیلی وڵاتانی دەوروبەر، یا هەرهیچ نەبێت هەڵسوكەوت و رەفتارو وتەكانیان لەخزمەتی داگیركارەكاندا دەبێت، تەنانەت بیروباوەڕو دیسپلینی حزبەكانیشیان حێبەجێ ناكەن، كە دەیان ساڵە خەباتی بۆ دەكەن، ئەگەر وانییە بۆچی ئەمڕۆ لەباسی گشتپرسیدا خەڵكانێك وا بیر بكاتەوە بڵێن دەبێت راوبۆچوونمان لەسەر پرسی سەربەخۆیی چی بێت! چی حزب و لایەنێكی سیاسی هەیە لە كوردستاندا باسی ئەوەی نەكردبێت كە میللەتی كوردو كوردستانییەكان مافی چارەی خۆنووسینیان هەیە! باشە كە ئەم مافە هەیە، بۆ كەی و بۆ كێ؟


* عێراق بەهەموو شێوەیەك دژایەتی مافە رەواكانی گەلی كوردستان كردووە؛ ئاشكراشە حكومەتی عێراق و سوپاكەی بەرەو حكومەت و سوپایەكی مەزهەبی هەنگاو دەنێت؛ ئایا ئێمە وەكو گەلی كورد چی بكەین بۆ ئەوەی لەقۆناغی داهاتوودا لەو شەڕەی نێوان سوننە و شیعە خۆمان بەدوور بگرین؟
- لە ئیسلامدا بیروباوەڕێك هەیە دەڵێت هەر كەسێك یارمەتی ستەمكارێك بدات، بەسەر خۆیدا زاڵی دەكات، جێی داخە ئەوانەی ئێستا لەدەورمانن و ناكۆكیی مەزهەبیمان لەگەڵیاندا هەیە و ئەوان ئێمە بە موسڵمان نازانن و رۆژگارێك بوو ئێمە داڵدەمان دەدان و وڵاتەكەیانمان بۆ بونیاد نانەوە، ئەمڕۆ ئەوان دژی ئەم میللەتە بوونەتەوە و بە موسڵمانمان نازانن و تەنانەت دژایەتی هاوڕێكانی پێغەمبەریش (د.خ) دەكەن، بۆیە لەئێستا دەبێت میللەتی كورد بە هەڵەكانی پێشوویدا بچێتەوەو جارێكی تر یارمەتی و هاوكاری ئەو گرووپ و ئەو ستەمكارانە نەكات كە ئێستا وەك شیعە لە عێراق حاكم و دەسەڵاتدارن، نابێت یەك هەنگاو لەگەڵیاندا بڕۆین تاوەكو گرەنتی نێودەوڵەتیمان نەبێت، ئەوەتا لە رووی سەربازییەوە بۆ ئازادكردنی موسڵ دەروازەكانمان بۆیان كردەوە، كەچی هەر كە سەركەوتن لە رێككەوتن و بەڵێنەكانی خۆیان پاشگەز بوونەوە، ئێستاش بۆ گرتنی تەلعەفەر و حەویجە نابێت هاوكارییان بكەین بۆ ئەوەی رێگەیان نەدەین ململانێی مەزهەبگەرایی لە قوڕگی ئێمەدا دروست بكەن و پیلان و هیلالی تایبەتیی خۆیان تەواو بكەن. شەڕی مەزهەبی نێوان شیعەو سوننە وەكو شەڕێكی رۆژهەڵاتی ناوەڕاست سەیر دەكرێت و لە دەوروبەری ئێمە بوونی هەیەو لەلایەن دەوڵەتە گەورەكان ئیستغلال دەكرێت، بۆ ئەوەی دەوڵەتەكان ناچار بكەن زیاتر پەنا بۆ ئەو وڵاتە زلهێزانە ببەن. هەرچۆنێك بێت نەك تەنیا ناوچەكە بەڵكو جیهان بەرەو شەڕ هەنگاو دەنێت، چونكە ئەوەی هێزی لەبەردەستدایە خاوەنی عەقڵ و میهرەبانی نین و لەدوای بەرژەوەندیی خۆیاندا و وێرانكردنی جیهانی سێیەمدا دەگەڕێن، شیعەكانیش زۆر مەزهەبین، هەر بۆیە چییان بە موسڵ كردو وێرانیان كرد دەستەوەستان ناوەستن خاكی ئێمەش وێران بكەن، ئینشاڵڵا ئەم وڵاتەی ئێمە هەروەكو چۆن مژدەی پیاوچاكان بووە كە دەبێتە وڵاتێكی ئاوەدان و سەقامگیر، هەرواش خوای گەورەو میهرەبان دەیپارێزێت و بەهەوڵ و كۆششی پیاوچاكان و سەرۆكەی و پێشمەرگە رزگاری دەبێت لەو هەموو دژوارییەی كە ئێستا لەناوچەكەدا هاتۆتە ئاراوە، ئەمەش بەو مەرجەی كوردستان ببێتە خاوەنی كیانی سەربەخۆ و لەناوخۆدا حزب و لایەن سیاسییەكان و گەلەكەمان یەكگرتوو بن و لەسەر شتی بێ بنەما لەیەكتر بەرنەبن. پێغەمبەرمان ( د.خ) دەفەرموێت: خێرتان تێدا نییە، ئەگەر یەكێكتان چاكەیەكی كرد، نەڵێن چاكت كردو خراپەیەكیشی كرد، نەڵێن خراپت كرد. جێگای داخە ئێستا ئێمە پێچەوانەمان كردووەتەوەو تەنیا خراپەكان دەبینن، بەمەش ناگەینە دەرئەنجام پێویستە پشتگیری كارە باشەكان بكەین و پاڵپشتی سەربەخۆیی و دەوڵەت بكەین.
* باسی ئەوەتان كرد كە هەموو حزبەكان دروشمی سەربەخۆییان لە پڕۆگرامی حزبیی خۆیاندا نووسیوە، ئایا بۆچی پێداگیری لە سەر دروشمە حزبییەكانی خۆیان ناكەن؟
- هەنگاوی راستگۆیی و مسداقیەت لەوەدایە لەمەیدانی كاردا ئەم دروشمانە ببرێتە سەر، دەبێت هەرهەمووشمان چاوەڕوان بین بزانین لەمەسەلەی سەربەخۆییدا راست دەكات، یاخود راست ناكات، ئەگەر ئەم دروشمانەی ئێستا بەرزكراوەتەوە، خوانەخواستە كەمتەرخەمییەكی تێدا دەركەوێت، ئەوا جەنابی مسعود بارزانی لەهەموو كەسێك زیاتر بەرپرسیار دەبێت، بەڵام پاڵپشتی و پشتگیریكردنی ئەركی سەرشانی هەموو موسڵمان و هاووڵاتیەكی كوردستانە، وا باشترە مرۆڤ باوەڕ بەكەسێك بكات و متمانەی پێبكات كە رێگەیەكی دروستی گرتبێتەبەر، یان دروشمێكی دروستی هەبێت، دەبێت باوەڕی پێ بكەیت. ئێستا كەس و لایەنی وا هەیە دروشمی وای بەرزكردۆتەوە لەسەر بنەمای راستی نییە، بەڵكو بنەمای دژایەتیكردنی میللەتەكەیە، هەر موسڵمانێك پشتگیری دروشمێكی راست و دروستی وەكو سەربەخۆیی و دەوڵەتی كوردی بكات، ئەوا بە قازانج بۆ هەموو موسڵمانان و گەلەكەی دەشكێتەوەو ئەگەر زیانیشی هەبێت بۆ ئەو كەس و لایەنە زیانی دەبێت كە دروشمەكەی هەڵگرتووەو راستگۆیی خۆی لەدەست داوە. من زۆرم پێ سەیرە، خۆ دروشمی گشتپرسی و سەربەخۆیی و دەوڵەتی كوردستان یەك كەس بەرزی نەكردۆتەوە، زۆربەی لایەنە سیاسی و حزبە كوردستانییەكان خاوەنی ئەم دروشمەن و لە دەنگدانەكاندا بانگەوازیان بۆ كردووە كە كوردستان بەرەو سەربەخۆیی بڕوات. دەنگی نەخێر دەنگێكی ناشازەو باری ژیانی پێ چاك نابێت، دەنگی نەخێر تەعبیر لە هەڵوێستی چوار دەوڵەتە دژەكەی چواردەوری كوردستان دەكات، دەنگێگە دەیانەوێت پاشكۆی عێراق بن و میللەتێكی ژێردەستەو مشەخۆری گوێ لەمشت و دەستی دوژمنەكانمان بین، زۆر حەیفە هەندێك بەناو رۆشنبیرەكان میللەتەكەمان تووشی هەڵدێری هزری و سیاسی بكەن. با دەنگیان بە (بەڵێ) بێت با هەنگاوەكانی تریش كورد بەرەو ئازادی و سەربەخۆیی بە دەنگی زوڵاڵی بەڵێ نزیك بخەنەوە.
* ئایا دەگونجێت بە بێ پەرلەمان داوا بكرێت گەل بڕیاری خۆی بدات بۆ ریفراندۆم؟
- گەرچی پەرلەمان دەزگایەكی تەشریعی و پێویستە، بەڵام هەموو كات مەرج نییە پەرلەمان دەنگ بە مەسەلە چارەنووسسازەكان بدات، پێش بوونی پەرلەمان لێژنەیەك دروست بوو بڕیاری دروستكردنی پەرلەمانی دا، ئێستاش ئەو حزب و لایەن سیاسییانەی كە بڕیاری گشتپرسییان داوە بەهەمان شێوەی ئەو كات بوونیان هەبووە و بڕیاریشیان داوە. لە ئیسلامدا هەرشتێك بنەمای نەبوو، بەتاڵە. كەواتا ئەگەر بڕوا بەو بڕیارە نەكرێت كەواتە پەرلەمانەكەش بوونی نییە، لە ئیسلامدا (مجلس حل عقد) هەیە كە ئەنجومەنێكی كارایەو لەكەسە ناودارو ناسراوەكانی وڵاتن و هەڵبژێردراو نین و دادەنرێن، ئێمەش ئاساییە ئەو ئیجماعە نیشتمانییەی حزب و لایەنە سیاسییەكان كە بڕیاری ریفراندۆمیاندا بەهاوشێوەی ئەو ئەنجومەنە بێت و ئەندامەكانیشی نوێنەری هەمان ئەو حزبانەن كە كاتی خۆی بڕیاریان دا پەرلەمان دروست بێت و پەرلەمانەكەش لەسەر ئەو بنەمایە دروست بوو.