دەبێت رۆشنبیران و نووسەرانی كورد دژی ئەوانە بوەستنەوە كە دژایەتیی دەوڵەتی كوردستان دەكەنفوئاد محەمەد ئەمین سەڕاج، نووسەر و رووناكبیری شاری سلێمانی و جێگری سەرۆكی یەكێتی نووسەرانی كورد، ئەندامی كاژیك (كۆمەڵەی ئازادی ژیانەوەی یەكێتی كورد) بووە، ساڵی 1991 لەگەڵ پۆلێك لە رۆشنبیران و نووسەرانی كورد دەستەیەكی كاتیی یەكێتی نووسەرانیان پێكهێناوە و لەدوای راپەڕین بارەگای یەكێتی نووسەرانی كوردیان دامەزراندووەتەوە و چەندین چالاكییان ئەنجامداوە، سەبارەت بە پرسی دەوڵەتی كوردستان و گرنگیی ئەو دەوڵەتە بۆ شكۆی نەتەوە و ئەو دەرفەتە مێژووییەی بۆ كوردستان هاتۆتەپێشەوە؛ چەند پرسیارێكمان ئاراستەی كرد، لێرەدا پوختەی قسەكانی بڵاودەكەینەوە.

هەر حزب و لایەنێكی سیاسی دژی سەربەخۆیی كوردستان بوەستێتەوە بەرەو پووكانەوە هەنگاو هەڵدەگرێت



* تاچەند بوونی دەوڵەت بۆ شكۆی نەتەوە گرنگە و تاچەند نەبوونی دەوڵەت نەتەوە لە دواكەوتوویی و پەراوێزدا دەهێڵێتەوە؟
- وڵاتانی داگیركاری كوردستان هەرگیز نەیانویستووە كورد خاوەنی ئاڵاو دەوڵەت و كیانێكی سیاسی و تایبەت بە خۆی بێت، بەپێچەوانەوە هەمیشە سامانی نەتەوەیی كوردیان بۆ لێدانی ئێمە و توانەوەمان بەكار هێناوە. ئەگەر ئێمە ببینە دەوڵەت، ئەوا لەناو مەحافیلە دوەلییەكان و نەتەوە یەكگرتووەكان وەكو نەتەوەیەكی سەربەخۆ، پێگەیەكی دیكەمان دەبێت. من لەبیرم دێت لە ساڵی 1964 تەنیا مەنگۆلیا لەسەر ئێمە هاتەدەنگ و ئەویشیان كپ كرد بەبیانووی ئەوەی كێشەی كورد كێشەیەكی نێوخۆییە. كاتێكیش چەكی كیمیایی و تۆپ و تەقەمەنی گەورەیان دەدایە رژێمە سەركوتكارەكان و ئێمەی میللەتی كوردیان كۆمەڵكوژ دەكرد، هەر بەهۆی نەبوونی دەوڵەت و كیانێكی سەربەخۆوە بوو. لە دوای رووخانی دەوڵەتی عوسمانی و هاتنی ئینگلیزو فەڕەنسییەكان، پەیماننامەیەك هەبوو بە ناوی پەیمانی سیڤەر كە لەبەندی –62و 63و 64 باس لەدەوڵەت و كیانی كوردستان دەكات و دەڵێت: ئەگەر توانییان خۆیان بەڕێوەببەن ئەوا دەكرێت ئیعترافیان پێ بكرێت، بەڵام بەداخەوە دواتر پەیمانی لۆزان هاتەئاراوە كە ئومێد و ئاواتی كوردی خنكاند و بەستنەوەی هەر بەشێكی كوردستانیش بە عێراق و توركیا و ئێران و سووریاوە بووە هۆی ئەوەی خاكی كوردستان پارچەپارچە بكرێت، هەربۆیە زۆربەی جار كە لە بارزانی-یان پرسیوە، وتوویەتی: «كوردستان یەكپارچەیە و ئەو سنوورانەی لێكی جیاكردۆتەوە، دەستكردە»، تەنانەت هەموو شاعیران و نووسەران و ئەدیبان و هونەرمەندانی كورد هەست و ئینتیمای نەتەوەییان بەرزبووە و خواستی ئەوەیان هەبووە كورد قەوارەی خۆی هەبێت، شیعر و دەقە ئەدەبی و هۆنراوە و سروودە كۆنەكان شاهیدی ئەم قسەیەن كە لەناو تاكی كورددا بەردەوام هەست و سۆز و جۆش بۆ دەوڵەتی كوردستان هەبووە. كە ئەوەش مافێكی رەوای خۆمانە. كورد بڕوای بە برایەتی نێوان كوردو نەتەوەكانی دیكە بووە، بەڵام بڕوای بە برایەتی لەگەڵ داگیركەران نەبووە، داگیركارانی كوردستانیش بڕوایان بەو برایەتییە نەبووە و تەنیا بۆ فریودان بەكاریان هێناوە. چونكە برایەتی كاتێك دەبێت كە كورد مافی هاووڵاتیبوون و یەكسانی و دادپەروەری هەبێت، نەك بكوژرێت و خاكەكەی زەوت بكرێت. كەواتە دەوڵەتبوون مافێكی رەواو شەرعی خۆمانەو پێداگیری لەسەری و خەباتكردن بۆی ئەركێكی نیشتمانی و نەتەوەییە، بەدیهێنانی ئەم مافەش پێمان نابەخشرێت، بەڵكو لێمان زەوت كراوە و دەبێت وەریبگرینەوە. تۆ بڕوانە میشیل عەفلەق تا سەدام حوسێن و سەركردەكانی رژێمی بەعس و، ئێستاش سوننە و شیعە و رژێمەكانی ناوچەكە چۆن مافی دەوڵەتبوون بەكورد رەوا نابینن، لە سایەی دەسەڵاتی عەبدولكەریم قاسم و لە ماددەی 3 ی دەستووردا دەڵێت: كورد و عەرەب هاوبەشن لەم نیشتمانە – كەچی بەیانێك لەدوای ئەمە دەرچوو دەڵێت: عێراق بەشێكە لەوڵاتانی عەرەبی و دابەش ناكرێت.- واتە بەپێی لێكدانەوەی ئەوان ئێمە بەشێك نین لە خاكی كوردستان، بەڵكو بەشێكین لە خاكی عەرەب و ئەوەش رەوا نییە. بەداخەوە لای خۆشمان هەندێ دەنگ هەن كە دژی دەوڵەت بوون دەوەستنەوە و ئەمەش هەر لە كۆنەوە هەبووە، بۆ نموونە من لە كتێبی كوردایەتی بیرێكی زیندووە، باسم لەوە كردوە كە لەساڵی پەنجاكان كاتێك كاژیك دروست بوو، كەسانێكیان هێنا سووكایەتی بەكورد بكەن و داوای یەكگرتنی میللەتانیان دەكرد و دەیانوت: «كورد كورتە و نابن بەهیچ»، پرسیارەكە ئەوەیە بۆچی داواكردنی سەربەخۆیی تاوان و ناڕەوایەتی بێت بۆ كورد؟ لەبەر ئەوە دووبارەی دەكەمەوە مافی بە خاوەن دەوڵەت بوون مافێكی رەوایە و پێویستە بۆ بەدیهێنانی خەبات و پێداگری بكەین و دەبێت خەڵك لەسەر ئەم رۆحیەتە پەروەردە بكرێت، نەك ئەوەی سەرقاڵ بكرێت بە هەندێ دروشمی دەرەكی و سواو.

* ئێستا باس لەوە دەكرێت هەلێكی زۆر باش بۆ كوردستان هاتۆتەپێشەوە بۆ سەربەخۆیی؛ ئایا وەك رۆشنبیرێك چۆن سەیری ئەم دەرفەتە بۆ كوردستان دەكەیت و چی بكەین بۆ ئەوەی ئەم دەرفەتە لەدەست نەدەین؟
- هەموو كوردێكی دڵسۆزو بەئەمەك و شۆڕشگێڕ خەون بە دەوڵەتی كوردییەوە دەبینێت، گۆڕانكارییەكانی دنیا هەر لە رووخانی دیواری بەرلین و هەڵوەشانەوە و تێكشكانی یەكێتی سۆڤیەت و دروستبوونی دەیان دەوڵەت لە ئەوروپای رۆژهەڵات و گۆڕانكارییەكانی دواتر، وامان لێ دەكەن پێداگری لەسەر ئەم مافە بكەین. ئێمە دەبینین دوای رووخانی رژێمی بەعس كە بەشداریمان كردووە لە داڕشتنەوەی دەستووری عێراقدا، دەبێت ئەوە وەك هەنگاوێك لێكبدەینەوە بۆ ئەوەی پتر لە سەربەخۆیی نزیكمان بكاتەوە. شتێكی حەتمییە كە دەنگە ناوخۆییە نانەتەوەییەكان و ئەو دەوڵەتە داگیركارانەی كە سەروەت و سامانی ئێمەیان بەتاڵان بردووە، بەرەنگارمان دەبنەوە. لێرەدا ئەركی ئێمەیە وەكو رۆشنبیرو نووسەرانی كورد ئەوەیە هۆشیاری بەمیللەتی خۆمان بدەین و بەرەنگاری هەموو ئەو لایەن و كەس و حزب و دەوڵەتانە ببینەوە كە دژی دەوڵەتی كوردستان و دژی مافی رەوای میللەتی كوردن. من دەڵێم هەر حزبێكی سیاسی لە كوردستاندا ئەگەر لە پاشكۆی خۆی دەستەواژەی كوردستانی بەكارهێنابێت، دەبێت كوردستانێكی سەربەخۆی بوێت، چونكە ئەگەر كوردستان سەربەخۆ نەبێت، ئەوا هەمیشە كۆیلە و ژێردەستە دەبین. ساڵی 2004 لە سلێمانی خۆپیشاندانێكی گەورەمان ئەنجامداو هەموو چین و توێژەكانی شار ئامادەییان هەبوو، لەو رۆژەدا رۆژنامەیەكمان دەركردو داوای سەربەخۆیی كوردستانمان كردو یاداشتنامەیەكمان ئاراستەی نوێنەری نەتەوە یەكگرتووەكان كرد و هەموو توێژ و چینەكانی سلێمانی بە یەك دەنگ داوای دەوڵەتی سەربەخۆی كوردستانیان دەكرد. دواتر ئێمە دەزانین كە كۆمەڵێك گۆڕانكاری لەم ناوچەیەدا هاتوونەتەئاراوەو هاتنی ئەمریكا و هێزە ئەوروپییەكانی دیكە بۆ ئەم ناوچەیە، ئاماژەن بەوەی كە كوردستان بۆتە ناوچەیەكی گرنگ و ستراتیژی بۆ پاراستنی بەرژەوەندی ئەمنی ئەمریكا و جیهان، هەربۆیە پێویستە ئەم دەرفەتە لەدەست نەدەین و كار و خەبات بۆ بونیادنانی دەوڵەت بكەین، هەركەس و لایەن و گروپێك دژی ئەم ویستە و ئیرادەی خەڵكی كوردستان بێت، من ناڵێم جاشە، بەڵام نامۆیە بە كوردایەتی و بە خاكی كوردستان و بە ئاوات و ئومێدی خەڵكی كوردستان.

* ئێستا لەكوردستان هەوڵەكان بەو ئاراستەیەن كە كۆمیتەیەك بۆ ریفراندۆم لەنێوان حزبەكان پێكبهێندرێت، ئایا تاچەند گرنگە حزبە سیاسییەكان لەسەر پرسی ریفراندۆم یەكدەنگ و یەكڕیز بن و ئەم پرسە چارەنووسسازە لە ئەجێندەی حزبی دووربخرێتەوە؟
- لە ریفراندۆمی 2004 خەڵكێكی زۆر دوای ئەو هیواو ئاواتە كەوت و دەنگیان بۆ سەربەخۆیی كوردستان دا، ریفراندۆمیش پەیامێك دەبێت بۆ ئەوەی بیخەینەڕوو كە كورد خواست و هەژان و ئیرادەی سەربەخۆیی لە ناخیدایە. من دەپرسم حزبی سیاسیی كوردی بۆچی خەباتی كردووە؟ ئایا بڕوایان بەوە هەیە سبەی عەرەبی سوننە، یا شیعە دەرفەت بەكورد دەدەن وەكو برا بە یەكسانی پێكەوە بژین؟ دواتر داواكردنی سەربەخۆیی و دەوڵەت بۆ هیچ نەتەوەیەك شۆڤێنییەت نییە، كوردیش هەرگیز شۆڤێنی نەبووە و نابێت، مێژووی دوور و درێژی ستەم و چەوساندنەوەی نەتەوەكەمان رەوایەتی بەهەموو تاكێكی كورد دەدات، بە (بەڵێ) دەنگ بۆ دەوڵەتی كوردستان بدات. بۆ ئەوەی مافەكانی زەوت نەكرێت و بە ئازادی و بە كەرامەتەوە لەسەر خاكی خۆی بژی. دواتر قسەیەكی بێشكچی هەیە كە دەڵێت: (ئیدارەیەكی كوردی و پڕ لە كەموكورتی زۆر باشترە لە ئیدارەیەكی نامۆی دەستی داگیركاران). ئەمڕۆ كەس ناڵێت گەندەڵی و كەموكوڕی بوونی نییە و گلەیی و رەخنەمان نییە، بەڵام نابێت ئەمانە ببنەهۆی ونكردن و لەباربردنی خواستی بەدەوڵەت و بەدەستهێنانی سەربەخۆیی، ئەگەر لە دواڕۆژ كیانێكی سیاسیمان هەبێت و یاسا سەروەر بێت، دەتوانین ئەو كەسانەش بانگ بكەین و لێیان بكۆڵینەوە كە چۆن سەروەت و سامانیان كۆكردۆتەوە. ئەو دەنگانەشی كە دژی سەربەخۆیی و دەوڵەتی كوردین، پێیان دەڵێین بەهەڵەدا چوون و پێیان دەڵێین با گوڕ و تین و و وزەتان لە پێناوی ئاواتی سەربەخۆیی و دەوڵەتدا بێت، چونكە ئەمە مافی رەوای خۆمانە و ئەمە هێنانەدیی خەونی شەهیدان و ئەنفالكراوان و كیمیابارانكراوەكانە. سەبارەت بەدروستكردنی كۆمیتەیەكیش بۆ پرسی ریفراندۆم و سەربەخۆیی پێویستە بپرسین ئەو كۆمیتەیە كێ دروستی دەكات؟ ئەگەر لەلایەن حزبەكانەوە دروست دەكرێت، پێویستە بە فەرمی و بە یاداشت ئەو حزبانە هەموویان ئاگادار بكرێن و پێیان بوترێت ئەمە هەل و دەرفەتێكی مێژوویی و دەگمەنە دەستمان كەوتووە و ئێوەش وەرن هاوبەش بن و بە ویژدان و گوتار و پێناسەی خۆتان و بە یەكگرتوویی و یەكڕیزی بەشداری ئەو كەرنەڤاڵە مێژووییە بكەین، چونكە یەكێتی كورد لەهەموو یەكێتییەكان گەورەترە و پەیامێكە بۆ داگیركاران و دۆستان. چونكە هەندێ جار باس لەناكۆكیی نێوان كوردەكان دەكرێت لەسەر ئەنجامدانی ریفراندۆم و سەربەخۆیی كوردستان، ئەوەش جێی داخە، لەبەر ئەوەی جاری وا هەیە ویستێكی وا دروست بووە، دەڵێن مادام فڵان حزب داوای ریفراندۆم و سەربەخۆیی دەكات، ئەوا من بەشدار نابم و ناچمە نێو ئەو كاروانە، ئەم بیركردنەوانە نەك تەنیا خۆهەڵخەڵەتاندنە، بگرە دواكەوتنە لەكاروانی خواستە جەماوەرییەكە. كەواتە ئەگەر ئەو كۆمیتەیە، كۆمیتەیەكی سەربەخۆی نیشتمانی و نەتەوەیی بێت، ئەوا دەبێت هەموو تاكێكی كورد بە منداڵ و گەنج و پیر و ئافرەت و پیاو و هەموو چین و توێژەكان و سەرجەم حزبەكانەوە لەگەڵیدا بن، بەپێچەوانەشەوە هەر لایەنێكی سیاسی و حزبێك بە ئەجێندەی داگیركەرانی كوردستان هەڵسوكەوت بكات و بجووڵێتەوە، واتا خائینە و لە دواڕۆژدا بەرەو پووكانەوە دەڕوات، چونكە سەربەخۆیی كوردستان موڵكی گەلە، نەك حزبێكی سیاسی.

* پرسی سەربەخۆیی كوردستان كراوە بە پرۆسەیەك و هەنگاوەكان بەو ئاراستەیەن كە بەشێوەی دیالۆگ و ئاشتییانە ئەم پرۆسەیە سەربخرێت، تاچەند دەتوانین ئەم پرۆسە گرنگە بەئاشتی سەربخەین؟
- بۆ سەرخستنی پرۆسەی سەربەخۆیی كوردستان زمانی دیالۆگ لەناوخۆی كوردستان و لەگەڵ ئەو هێزانە پشتیوانیمان دەكەن و تەنانەت لەگەڵ داگیركارانیشدا پێویستە. ئێمە لەدوای بڕیاری دامەزراندنی نەوای دژە فڕین و ئارام، بەڕێوەبردنێكی سەربەخۆمان بووە. لەچەند ساڵی رابردوو بەئەزموون بۆمان دەركەوت كە حكومەتی عێراق دەستوور پێشێل دەكات، لە هەمان كاتدا حوكمڕانەكانی عێراق رایانگەیاندووە كە نابێت كوردستان جیاببێتەوە و عێراق دابەش بێت. هەر جارێكیش كە هاتوونەتە كوردستان، ئەوا بە هەگبەی بەتاڵ رۆیشتوونەتەوە و ئێمەش هیچمان پێنەبڕاوە، لەبەر چی؟ لەبەر ئەوەی هەر كاتێك باسی سەربەخۆیی كوردستان بۆ عەرەبێكی سوننە، یان شیعە بكەین، سڵ دەكاتەوە. ئەوان كەركووك و زوممار و ناوچە كوردستانییەكانی دیكە و تەنانەت خاكی پارێزگاكانی باشووری كوردستان بە خاكی خۆیان دەزانن. بۆیە دەبێت خۆمان ئەوە یەكلابكەینەوە كە كامە سنووری ئێمەیە و دەبێت خۆمان ئەمە بسەلمێنین. دواتر هەندێ جار پاساوی ئەوە دەهێنرایەوە كە گوایە ئێمە نە سنوورمان هەیە و نە ئاومان هەیە، ئیتر چۆن باسی سەربەخۆیی بكەین؟ من لەبیرمە ئەگەر تەنیا یەك رۆژنامەنووس لە شۆڕشی ئەیلوول سەردانی ناوچە ئازادكراوەكانی بكردایە و لەیەكێك لە رۆژنامەكان باسی كوردی بكردایە، زۆر بەگرنگ سەیر دەكرا، ئێستا فڕۆكەخانەمان هەیە و پەیوەندی دەرەكیمان هەیە و دنیامان لەگەڵدایە و ترس نەماوە، تەنیا ئیرادەی خۆمانی پێویستە كە هەیە، واتە بە ئیرادەی خۆمانە و سەربەخۆیی لە دەست خۆماندایە. بەداخەوە ئەو كەسانەی كە كورتبین و كەمتەرخەمن و ناتوانن ئاسۆی رووناكی كورد ببینن، ئەوا لە كاروانەكە بەجێ دەمێنن، لەبەر ئەوەی سەربەخۆیی مافی خۆمانە و كارمان بۆ كردووە و قوربانیمان بۆ داوە، كەسیش خێرمان پێناكات. ئەمڕۆ نەك تەنیا لەكوردستانی باشوور پێویستمان بە گیانی نیشتمانخوازی هەیە، بەڵكو لەهەر چوار پارچەكەدا پێویستمان بەوەیە بەگیانێكی نەتەوەخوازی هەڵسوكەوت بكەین، هەر حزبێكیش بە پێچەوانەوە رەفتار بكات، بیەوێت، یان نەیەوێت خزمەت بە ئەجێندەیەكی دیكە و خزمەت بە داگیركەرانی كورد دەكات، لە دەرئەنجامیشدا رەنگە ببێتەهۆی دواخستن و درەنگخستنی كاروانەكە، بەڵام پێموانییە بتوانێت رەوشەكە شكست پێبهێنێت. لەلایەكی دیكەوە تاوەكو ئێستا نەوت وەك چەكێك لە دژی ئێمە بەكار هاتووە،بەڵام ئێستا ئێمە نەوتەكەمان كردۆتە چەكێك بە دەستی خۆمانەوە و قەیرانە داراییەكەشی پێ تێدەپەڕێنین، لەلایەكی دیكەوە، پێموایە ئێمە دەبێت كار لەسەر یەكخستنەوەی هێزی پێشمەرگەی كوردستانیش بكرێت، كە پێشمەرگە خوێنێكی زۆری بەخشیوە، چونكە راستە لەشەڕی دژی تیرۆردا شكست و سەركەوتنی تێدا بوو، بەڵام ئێمە بە ئازایەتی هێزی پێشمەرگە توانیمان جەنگەكە ببەینەوە و كوردستان بە هێمنی و ئارامی بژی.

* باسی هزری نەتەوەیی كورد و نیشتمانپەروەریت كرد، ئایا ئەو هزرە لەكوێوە لەناو شاعیرو نووسەرو زانایانی ئیسلامی و چین و توێژەكانی كۆمەڵگەی كوردستانی سەرچاوەی گرتووە و چۆن بتوانین زیندووی بكەینەوە؟
لەساڵی 1959 كۆمەڵەی ئازادی و ژیانەوەی یەكێتی كورد دروست بوو كە تەواوكەری ئەو بیرە نەتەوەییە بووە كە لە (ژێ كاف) و (كۆمەڵی زەردەشتی) هاتووە، بەڵام بە گوتارێكی عەلمانیتر، پێشتر ئاماژەم پێكرد كە جەنابی مەلا مستەفا بارزانی رایگەیاند كە كوردستان لێكجیاكراوەتەوە و ئەو سنوورەی جیای دەكاتەوە، دەستكردە. لە سەروەختی شۆڕشی ئەیلوولدا و لە شەڕێكدا مام هەژار لەگەڵ جەنابی بارزانی دەبێت، دەڵێت: خۆزگە كورد لەسەر ئاو بووایە بارزانی ئاوڕ دەداتەوەو دەڵێت: ئێمە ئەگەر فێڵمان لێنەكرێت و ئەمەی ئێستا بگەیەنینە ئامانج، ئەوەش ئاسانە. جارێكیشیان كاتێك بارزانی بەرەو رانیە دەچێت لەو بەر كەنارەكەوە دوو ئەفەندی دەبینێت، بارزانی دەڵێت: ئەوانە كێن؟ پێی دەڵێن ئەوە مامۆستا ئەحمەد هەردی و ئەوی تریان مامۆستا عەلی سام ئاغایە و كاژیكن. بارزانی دەڵێت: حەز دەكەم بیانبینم. كاتێك شەو لەگەڵیدا دادەنیشن و قسە دەكەن و لەیەكتر تێدەگەن، بارزانی دەڵێت بۆ پەرەسەندنی بیر و فكری نەتەوەیی ئێوە لەسەرەوە خەریك بن، منیش لە خوارەوە، واتا هەستی نەتەوەیی و سەربەخۆیی لای بارزانی لە شتێكی هەمیشەیی بووە و كاری لەسەر كردووە. گوتاری نەتەوەیی لە گوتاری نەقەشبەندییەكان و شێخ تاجەددین و شێخ عەبدولسەلام بارزانی هەیە، كەواتە ئەگەر بپرسین بۆچی دوژمنایەتی بارزانی دەكرێت، ئەوا هەر بەهۆی ئەو بیرە نەتەوەییەوە بووە، هەموو ئەو دروشم و قسانەی لە دەڤەری سلێمانی بڵاودەكرایەوە وەكو جیاكردنەوەی سۆرانی و بادینی، بۆ لێدانی بیری نەتەوەیی بووە. جەنابی بارزانی یەكێتی خاكی زۆر لا پیرۆز بووە و جیاوازی لە نێوان بارزانی و سۆرانی نەكردووە. بارزانی دۆخە نێودەوڵەتییەكە و داگیركەرەكانیشی باش دەناسی، هەر بۆیە راستەوخۆ و بە ئاشكرا باسی سەربەخۆیی نەدەكرد، بەڵام بە كردەوە حوكمڕانیی كوردی ویستووە و بەشداری كۆماری كوردستانی كردووە لە مەهابادی رۆژهەڵاتی كوردستان، واتە دروشمی حوكمی زاتی و لامەركەزی سەرەتایەك بووە لە هەنگاوەكانی بەرەو سەربەخۆیی لەو سەردەمەشدا كۆمەڵگەی كوردستانی كۆمەڵگەیەكی كشتوكاڵی و هەژار بووە و رۆشنبیرییەكەشی زیاتر لەگەڵ ئایدیای چەپدا بووە و كەمتر خەمی نەتەوەیی هەبوو، تەنانەت ئێمە وەكو كاژیك دژایەتی دەكراین، كە دوو كەسی نەتەوەیی گەورەمان (شێخ محەمەی هەرسین و خاڵە حەمەی عەزیز) راستەوخۆ پەیوەندییان بە بارزانی-یەوە كردووە هەر لە 1961ـەوە تا كۆتایی شۆڕش، كەسە نەتەوەییەكان لەهێزەكانی خەبات و زمناكۆ و ئەزمەڕ سەرقاڵی پێگەیاندنی هزری نەتەوەیی بوون لە ناو گەنجان بەشێوەیەك چەندین گەنجی شۆڕشگێڕی نەتەوەیی لەناو ریزەكانی ئەو هێزانەدا بوون، بە راددەیەك گوتاری نەتەوەیی كورد زۆر بەرز بوو، ئێستاش جەنابی سەرۆك مسعود بارزانی شانی داوەتە بەر ئەركێك كە بەداخەوە قسەی زۆر لەسەر دەكرێت و غەدری لێدەكرێت، بەتایبەتی لەدەڤەرێكدا، تۆ بڕوانە ئێمە واژوو بۆ سەربەخۆیی كۆدەكەینەوە، پێمان دەڵێن قەڵەمەكانی سەرۆك، ئێ باشە سەرۆكێك كە ئاڵای كوردستان و گوتاری نەتەوەییم بەرز بكاتەوە و داوای سەربەخۆیی بكات من چۆن نابمە دەروێشی؟