كارل كریستیان خاوەنی بڕوانامەی دكتۆرایە لە بواری زانستی سیاسی كە لە زانكۆی سەینت لویس بەدەستی هێناوەو لەئێستاشدا مامۆستایە لەبەشی زانستی سیاسی لە زانكۆی ئاكرۆن، بۆ گفتوگۆكردن لەبارەی سەرەكیترینی ئەو تەنگژانەی كە رووبەڕووی ئەمەریكا دەبنەوە لە ناوچەی رۆژهەڵاتی ناوەڕاستداو پرسی چۆنییەتی مامەڵەكردنی ئیدارەی ئەمەریكا لەگەڵ كێشەكانی ئەم ناوچەیە و چەندین پرس و بابەتی پێوەندیداری دیكە، گوڵان دیمانەیەكی لەگەڵدا ئەنجامداو ئەویش بەم شێوەیە گوزارشتی لە بیروبۆچونەكانی كرد.

* ئایا سەرەكیترینی ئەو تەحەددییاتانە چین كە لە رۆژهەڵاتی ناوەڕاستدا رووبەڕووی ئەمەریكا دەبنەوە؟
- لە راستیدا چەند تەحەددییەكی سەرەكی هەن، ئاشكرایە گرنگترینیان بریتییە لە تەحەددی رووبەڕووبوونەوەی داعش لە عێراق و سووریادا، كە هەوڵەكان لەم رووەوە بە باشی بەڕێوەدەچێت لە عێراقدا، بەڵام لە سووریادا بە رەوتێكی خاوتر بەڕێوەدەچێت و دروستكردنەوەی سووریای دوای داعشیش ئەركێكی قورسترە، كە رەنگە ئەمەریكا بە قووڵی تێكەڵ بەم پرۆسەیە بێت، بەڵام ئەمەش زۆر زۆر زەحمەتە. ئەمە یەكێكە لە كێشەكان، كێشەیەكی دیكە بریتییە لە ناكۆكیی فەلەستین و ئیسرائیل، كە خراپتر بووەو باشتر نەبووە، خۆ ئەگەر ئەمەریكاش خۆی بەدوور بگرێت، ئەوا زەحمەتە بتوانێت ئەم كارە بكات، ئەویش بەهۆی ئەو پێوەندییەی ئەمەریكا هەیەتی لەگەڵ لایەنەكاندا، بە شێوەیەكی سەرەكی لەگەڵ ئیسرائیلدا. تەحەددییەكی دیكە كە رووبەڕووی ئەمەریكا دەبێتەوە بریتییە لە یەمەن، كە لە رەوشێكی خراپدایەو ئەمەریكای خستۆتە دۆخێكەوە كە ئاسوودە نییە پێی، چونكە هەوڵدەدات پشتیوانی سعودیە و هاوپەیمانەكانی بكات و ئەوەندەی دەكرێت ئێران لە هاوكێشەكە دووربخاتەوە، بەڵام ئەمەش زەحمەتە، چونكە ئەمەریكا كارێكی زۆری پێناكرێت و ئەو چەكانەشەی كە بۆ سعودیەی دەستەبەری دەكات، بەو شێوەیە بەكارناهێنرێن كە ئەمەریكا خوازیارە بەكاربهێنرێن، كەواتە ئەمەش كێشەیەكی دیكەیە. نیگەرانییەكی دیكە پەیوەستە بە رۆڵی رووسیاوە لە رۆژهەڵاتی ناوەڕاستدا، كە لە ماوەی دوو ساڵی رابردوودا بە شێوەیەكی بەرچاو هەڵكشاوە، كە دابەشبوونێكیش هەیە لە نێو حكومەتی ئەمەریكادا لەو بارەیەوە، چونكە كەسانێك هەن لە تیمەكەی ترەمپدا پێیانوایە ئەمە دەرفەتێكە، بەڵام كەسانێكیش هەن نیگەرانن لەو بارەیەوە، بەتایبەتی لە نێو سوپادا نیگەرانییەكی زۆر هەیە لە بارەی رۆڵی رووسیاوە لە رۆژهەڵاتی ناوەڕاستدا. كەواتە ئەمانە نیگەرانییە سەرەكییەكانن، هەروەها نیگەرانی دیكە هەن، وەك لقی ئەلقاعیدە لە سووریا، هەروەها لقی ئەلقاعیدە لە باكووری ئەفریقیا و نیگەرانیی ئەمنی هەیە لەو ناوچەیەدا. كەواتە رۆژهەڵاتی ناوەڕاست كێشەیەكی زۆر دژوارە بۆ ئەمەریكا و گرتنەبەری سیاسەتگەلێكی تۆكمە لەبارەی ئەو ناوچەیەوە زۆر زەحمەتە.

* كەواتە تا چ راددەیەك نەبوونی سیاسەتێكی روون و گەڵاڵەكراو لەلایەن ئیدارەی ترەمپەوە دەبێتەهۆی ئەوەی بۆشاییەك دروست بكات و ببێتەهۆی ئەوەی هێزەكانی دیكەی وەك ئێران و رووسیا هەڵبستن بە پڕكردنەوەی ئەو بۆشاییەو درێژەپێدانی دەستڕۆیشتوویی خۆیان، كە ئاشكرایە ئەمەش ئەوەندەی دیكە رەوشی دژواری ناوچەكە ئاڵۆزتر دەكات؟
- ئەمە مەسەلەیەكە من لە دۆستە عێراقییەكان و دۆستەكانی دیكەی ناوچەكەشەوە گوێبیستی دەبم كە باس لەوە دەكەن دڵنیانین لە نیازەكانی ئیدارەی ترەمپ لە ئاست ناوچەكەدا، واتە ئاماژەی تێكەڵی بەدی دەكەن، بۆ نموونە ئەنجومەنی ئاسایشی نیشتمانی لە ئەمەریكا لە بارێكی جێگیردا نییە، ژەنەڕاڵ مایكڵ فلین ناچار بەدەست لەكاركێشانەوە كراو ئێستاش كەسێكی دیكە كراوەتە راوێژكاری ئاسایشی نەتەوەیی، كە بەپێی لێكدانەوەی هەمووان، كەسێكە خاوەنی بیرۆكە و رێگاچارەی جیاوازە لە ئاست رۆژهەڵاتی ناوەڕاستدا بە بەراورد بە فلین. ئێستاش پرسیارەكە ئەوەیە ئایا بیرۆكەكانی ئەو دەبنە هەوێنی سیاسەتەكان یاخود بیرۆكەی كەسانی دیكە، ئەوەش پرسیارێكی قورسە. لەبەر ئەوە خودی ئەمەریكییەكانیش خۆیان دڵنیانین لەوەی سیاسەتەكانی وڵاتەكەیان لە ئاست رۆژهەڵاتی ناوەڕاست چی دەبێت. كە لە راستیدا زۆرینەی ئەمەریكییەكانیش ئاشنانین بەوەی لە رۆژهەڵاتی ناوەڕاستدا روودەدات و بایەخێكی زۆریشی پێنادەن، چونكە سەرقاڵن بە چەند پرسێكی ناوخۆییەوە، وەك دیپۆرتكردنەوەی كۆچبەران و پرسی دروستكردنی دیوار لەگەڵ وڵاتی مەكسیكدا، كەواتە ئیدارەی ئەمەریكا هەست بە فشارێكی زۆر ناكات لەلایەن خەڵكی ئەمەریكاوە بۆ داڕشتنی سیاسەتێكی تۆكمە لە ئاست رۆژهەڵاتی ناوەڕاستدا. كەواتە پرسیارەكە ئەوەیە ئایا هاوپەیمانەكان فشاری پێویست دەكەن بۆ ئەوەی ئیدارەی ئەمەریكا ئەم سیاسەتە لە ئاست رۆژهەڵاتی ناوەڕاستدا دابڕێژێت. بەڵام زۆر روونە كە ئیسرائیل خۆشحاڵە بەوەی تا ئێستا گوێبیستی بووە لە لێدوانەكانی ترەمپ، پرسیارەكە ئەوەیە ئایا تێڕوانینی سعودیە چییە؟ بەڵام تا ئێستا ئەگەرەكان بەو ئاڕاستەیەن كە ئەمەریكا پشتیوانی لە سعودیە دەكات. ئەوەی پێوەندی بە عێراقەوە هەبێت، ئەوا ئاماژەی تێكەڵ هەن، بۆ نموونە ترەمپ باس لە دەستبەسەرداگرتنی نەوتی عێراقی كرد، ئەگەرچی پێدەچێت لە ئێستادا ئەمە پرسێكی جددی نەبێت، هەرچەندە چەند جارێك ئەمەشی دووبارە كردەوە، بەڵام روون نییە كە ئایا عێراق لە كوێی سیاسەتەكانیدا جێی دەبێتەوە. هەروەها سیاسەتەكانی لە ئاست سووریاشدا روون نییە، جگە لەوەی كە باسی دروستكردنی ناوچەی ئارامی كردووە، بەڵام روون نییە چۆن ئەم كارە ئەنجام دەدات، چونكە ئەمە پرۆسەیەكی ئاڵۆزە و تێچوونێكی زۆری دەوێت و رەنگە مەترسیداریش بێت. كەواتە ئەگەر پوختی بكەینەوە ئەوا دەڵێین كە سیاسەتەكان زۆر روون نین، بەشێكی پەیوەستە بەوەی هێشتا كەسانێك هەن ئیدارەكە جێدەهێڵن و كەسانێكی دیكەش هەن دەستبەكار دەبن تێیدا و هێشتا روون نییە ئایا كێ جڵەوی دروستكردنی سیاسەتی دەرەوەی لە دەستە لە ئەمەریكا؟.
* باست لەوە كرد كە لە هەڵمەتەكانی بەرەنگاربوونەوەی داعش لە عێراقدا بەرەوپێشچوون بەدیهاتووە، كە ئاشكرایە لە ئێستادا پێشڕەوییەكی باش بەدەست هاتووە لەو رووەوە، بەڵام پرسیارەكە ئەوەیە ئایا چەند ئەمەریكا گرنگی و بایەخ بەو هۆكارە ریشەییانە دەدات كە لە بنەڕەتدا بوونەهۆی سەرهەڵدانی تیرۆریزم؟

- زەحمەتە بتوانین ئەمە بڵێین، لەبەشێكیدا لەبەر ئەوەی من گفتوگۆم لەگەڵ ئەو كەسانەدا كردووە كە بەشداربوون لە جێبەجێكردنی سیاسەتەكان لە ئیدارەی ئۆباما و ترەمپیشدا، بەڵام دیار نییە سیاسەتی ئەمەریكا بۆ دوای داعش چییە، كەواتە كەس نەیبیستووە كە ئەم سیاسەتە چۆن دەبێت، من لە پێگەیەكدا ئاگادار دەبووم ئەگەر سیاسەتێكی تۆكمە هەبووایە.
* بەڵام ئایا لە تێڕوانینی ئێوەدا پێویستە ئەم سیاسەتە چۆن بێت؟
- دەبێت عێراق هەوڵ و كۆششی زیاتر بدات بۆ هێنانەئارای ئاشتەوایی و دروستكردنی متمانە لە نێوان گروپە سەرەكییەكانی وڵاتەكەدا، راستە لەم رووەوە هەوڵدراوە، بەڵام دەبێت كاری زیاتر بكرێت، من نیگەرانم لەوەی كە لە ناوچە سوننەنشینەكانی عێراقدا روودەدات دوای نەمانی داعش لەو ناوچانەدا، ئیدی بە تەواوەتی بوونیان نەمێنێت، یاخود دووربخرێنەوە بۆ بیابان. نیگەرانی من ئەوەیە كە هەستی نادادپەروەری لای سوننەكان نەڕەوێتەوە، واتە هەستی ئەوەی كە هاوشێوەی زۆرینەی شیعە هەڵسوكەوتیان لەگەڵدا ناكرێت، كە ئەوەش لە ئایندەدا كێشەی زیاتر دروست دەكات و رەنگە ئەمە سەربكێشێت بۆ سەرهەڵدانەوەی داعش، یان هەندێ شێوەی دیكەی گروپی ئیسلامی توندڕەوەی سوننە كە پەنا بۆ توندوتیژی ببەن. هەروەها نیگەرانی هەیە لەلایەن سوننەكانەوە لەبارەی گروپەكانی حەشدی شەعبییەوە. من كارم لەسەر پرسی رای گشتی كردووە لە عێراقدا و پێدەچێت نیگەرانییەكی زۆر هەبێت لەلایەن سوننەكان لەبارەی هێزەكانی حەشدی شەعبییەوە، شیعەكان بەو شێوەیە نیگەران نین، بەڵكو نزیكەی لە سەدا 90ی شیعەكان متمانەیان بەم هێزانە هەیە، بەپێچەوانەوە تەنیا لە سەدا 10ی سوننەكان متمانەیان بەم هێزانە هەیە. كەواتە پێموایە ئاشتەوایی سیاسی لە نێوان شیعە و سوننەدا بەم شێوەیە نەهاتۆتەئاراوە كە پێویستە بۆ هاتنەدی ئایندەیەكی ئیجابی و پڕ لە تەبایی لە عێراقدا.

* كەواتە پێتانوایە بەبێ هاتنەئارای گۆڕانكاریی سیاسیی گەورە و گۆڕانكاری لە بونیادی حكومڕانی هەر سەركەوتنێكی سەربازی كورتخایەن دەبێت؟
- بەڵێ، ئەوە تێڕوانینی منە، واتە دەبێت خۆبەڕێوەبەرییەكی –ئۆتۆنۆمی- مەحەلی گەورە هەبێت لە ناوچە سوننەكاندا كە مەرج نییە چوارچێوەیەكی فیدڕاڵی یان كۆنفیدڕاڵی بێت و هاوشێوەی ئەو دۆخە بێت كە لە كوردستاندا هەیە، چونكە بەدەستهێنانی دۆخێكی لەم چەشنە لە ناوچە سوننەكاندا زەحمەتە. بەڵكو دەبێت پرسە ئیدارییەكان و كاری پۆلیس بە چەشنێك رێكبخرێنەوە كە خەڵكەكە لەسەر ئاستی مەحەلی خۆیان ئەم كاروبارانە هەڵبسووڕێنن، هەروەها دەبێت زیاتر جەخت لەسەر دروستكردنەوەی متمانە بكرێت، بە راشكاویش دەیڵێم دەبێت ئەوەندەی دەكرێت پرۆسەی ئاوەدانكردنەوە بە سیاسی نەكرێت لە دوای تێكشكاندنی داعشەوە. یەكێك لە رێگاچارەكان پەنابردنە بۆ خەڵكانی تەكنۆكرات، كەسانێك كە مەرج نییە سەر بە بۆچوونێكی سیاسی دیاریكراو بن، بەڵكو لەبەر توانا و لێهاتووییان خەڵكی رێزیان لێدەگرن، -واتە پێویستە ئەم كەسانە- بۆ ماوەیەك هەڵبستن بە هەڵسووڕاندنی كاروبارەكان بۆ ئەوەی كاروبارەكان بكەونەسەر سكەی خۆیان. یەكێك لە نیگەرانییەكانی من ئەوەیە ئەم پرۆسەیە بە سیاسی بكرێت، واتە سیاسییەكان سوود لە هەستی بێبەشی وەربگرن بۆ بەدەستهێنانی دەسەڵات كە ئەمەش دەرئەنجامی پێچەوانەی لێدەكەوێتەوە. واتە رەنگە وا دەربكەوێت كە ئەو كەسانەی نوێنەرایەتی خەڵكەكە دەكەن لەسەر ئاستی مەحەلی، بەڵام ئەگەر بە سیاسی بكرێت ئەوا رەنگە دۆخەكە خراپتر بكات. كەواتە من كەسێكم باوەڕم وایە –بە لای كەمەوە لە مەودای كورتدا- پێویستە پشت بە شارەزایی كەسانی تەكنۆكرات ببەسترێت بۆ دووبارە ئاوەدانكردنەوەی ئەو ناوچانەی لە ژێر كۆنتڕۆڵی داعشدا بوون.
* ئەگەر ببێنەسەر پرسی تایفەگەری، ئەوا ئاشكرایە كە ململانێیەكی قووڵی تایفەگەری لەم ناوچەیە لەئارادایەو لە ئێستادا ئەو میلیشیایانەی شەڕی داعش دەكەن لەعێراق و سووریادا لەلایەن ئێرانەوە پشتیوانی دەكرێن، پرسیارەكە ئەوەیە ئایا تا چەند تێكشكاندنی داعش دەبێتەهۆی بەهێزكردنی دەستڕۆیشتوویی ئێران لە ناوچەكەدا؟

- حاڵی حازر ئەمە روودەدات و ئەمەش دەرئەنجامێكی باش نییە، ئێرانیش بەرژەوەندییەكی زۆری هەیە لەوەی تایفەگەری لە نێو شیعەكاندا بچەسپێت، لەبەر ئەوەی شیعە تایفەگەرییەكان مەیلی پشتیوانیكردنی ئێرانیان هەیە، من لە كارەكانماندا لەبارەی رای گشتییەوە ئەم دەرەنجامەم بینیوە. عێراقییەكان سەرەتا خۆیان بە عێراقی دەزانن نەك بە شیعە و سوننە و كورد و دەیانەوێت خۆیان خاوەن سەروەری بن و ئەگەر گوزارشتەكە راست بێت دەیانەوێت خۆیان جڵەوی كەشتیەكەی خۆیان بكەن. جەختكردنەوەی ئێران لەسەر دروستكردنی شوناسێكی شیعە بۆ عێراق زیانێكی زۆر بەو وڵاتە دەگەیەنێت، لەبەر ئەوەی دابەشبوونی تایفەگەری و ئەگەرەكانی ناكۆكیی نێوان هەردوولای شیعە و سوننە زیاتر دەكات، هەروەها ئەگەر ئێران لە عێراقدا دەستڕۆیشتوو بێت، ئەوا ئەمە فشار لەسەر كوردیش دروست دەكات و ئەو كاتە كوردیش لە دۆخەكە دەڕوانن و دەڵێن بڕوانن ئەمە ئەو وڵاتە نەبوو كە ئێمە دەمانویست بێتەئاراوە و هەروەها بەگومانەوە لە ئێرانیش دەڕوانن. كە ئەمە مەسەلەیەكە بە راستی من نیگەرانم لەبارەیەوە. هەروەها یەكێك لەو دەرئەنجامانەی كە لە توێژینەوەكانمدا بۆم دەركەوتووە، ئەوەیە كە بە شێوەیەكی گشتی عێراقییەكان تا راددەیەكی دیاریكراو نائارام دەبن لە ئاست ئێراندا، كە ئەمە شیعەكانیش دەگرێتەوە، واتە متمانەكردن بە ئێران لە نێو شیعەكانیش بەرەو كەمبوونەوە دەچێت، بە راددەیەكی گەورە لە نێو سوننەكانیشدا متمانە بە ئێران نەماوە كە هەر لە بنەڕەتیشدا سوننەكان متمانەیەكی كەمیان بە ئێران هەبوو، ئەمە كوردیش دەگرێتەوە، هەروەها ئەمەریكاش. كەواتە تا راددەیەكی دیاریكراو بێزاری لە نێو عێراقییەكاندا دروست بووە لە ئاست هێزە دەرەكییەكاندا، چونكە نەبۆتەهۆی ئەوەی كە هیوایان دەكرد بێتەدی. كەواتە ئەگەر عێراق بتوانێت لەسەر پێی خۆی بوەستێت بەبێ ئەوەی دەستڕۆیشتووییەكی زۆری دەرەكی هەبێت لە وڵاتەكەدا و ئەگەر بتوانێت ئاشتەوایی لە نێوان شیعە و سوننەدا دروست بكات، ئەوا ئەمە هۆكارێكی باش دەبێت بۆ ئەوەی گەشبین بین بە ئایندەی وڵاتەكە.

* هەروەك ئاشكرایە هەرێمی كوردستان نەبۆتە بەشێك لە كێشەی سوننەو شیعە، هەروەها كوردستان توانیویەتی دۆخێكی لەبار و گونجاو دروست بكات بۆ فرەیی ئایینی و ئیتنی و بۆ پێكەوەژیانی ئاشتییانە، ئایا ئایندەی ئەم هەرێمە چۆن دەبینن؟
- من پێموایە هەندێ فاكتەر لەئارادان كە دەبنەهۆی ئەوەی گەشبین بین، ئەگەرچی ئەم هەرێمە لە ماوەی چەند ساڵی رابردوودا دووچاری دژواری ئابووری بۆتەوە كە ئەمەش بۆتە سەرچاوەی هەندێ نیگەرانی. ئەگەر كەسێكی ئەمەریكی ئاسایی لە دۆخی كورد بڕوانێت، ئەوا دەڵێت كورد یەكگرتووە، بەڵام مەرج نییە ئەمە راست بێت، چونكە دابەشبوونی قووڵ لە نێوان كوردان هەیە، هەرچەندە زۆربەیان دابەشبوونی سیاسین، بەڵام هەندێ هۆكاریش هەن كە وامان لێدەكەت تا راددەیەك نیگەران بین لەبارەی ئایندەی كوردستانەوە، دۆخە ئابوورییەكەش هاتەسەر ئەو دابەشبوون و ململانێیەی لەئارادا بوو. كەواتە گرنگە كوردستان بتوانێت لە رووی ئابوورییەوە لەسەر پێی خۆی رابوەستێت. كە بەشێكی زۆری ئەم مەسەلەیەش پێوەندی بەو كارەوە هەیە كە حكومەتی عێراقی دەیكات، لەبەر ئەوەی حكومەتی عێراقی بەهۆی كێشەی پەیوەست بە پێدانی داهاتی نەوتەوە، بەشێك بووە لە هۆكاری ئەوەی زەحمەت بێت كوردستان بتوانێت لە رووی ئابوورییەوە لەسەر پێی خۆی بوەستێت. هەروەها یەكێكی دیكە لەو مەسەلانەی كە سەرنجم داوە – كە من پێی ناڵێم سەرچاوەیەكی گەورەی نیگەرانی- ئەوەیە كە ژمارەیەكی كەم -بەڵام ناكرێت بڵێین بێبایەخ- هەن لە كوردستاندا كە هاوسۆزن لەگەڵ داعشدا، واتە مەسەلەكە ئەوەیە نییە كە خەڵكی پێیانوایە كورد لە سەدا سەد دژ بە داعشن، من نازانم ئایا ئەم رێژەیە زیاتر دەبێت یان دەبێتە فاكتەرێكی ئەمنی گرنگ، بەڵام دەتوانین بڵێین هێشتا ئەمە رووینەداوە، بەڵام ئەگەر دۆخە ئابوورییەكە بەردەوام بەرەو خراپبون بچێت، ئەوا دەبێت ئەم مەسەلەیەش لەبەرچاو بگرین، چونكە نابێت بوار بدرێت كە دۆخی ئابووری ببێتەهۆی هەڵكشانی توندڕۆیی سوننە لە كوردستانی عێراقدا.
* ئێوە باستان لەوەكرد كە كێشەی دابەشكردنی داهاتی نەوت هەیە لە نێوان كوردستان و عێراقدا، لە ئێستاشدا هەرێمی كوردستان پێیوایە مافە دەستوورییەكانی لەلایەن حكومەتی عێراقیەوە پێشێل كراون، بەو پێیە ئەو بۆچوونە دروست بووە كە چیتر پێویست ناكات كوردستان وەك بەشێك لە عێراق بمێنێتەوە، ئایا چۆن لە هەنگاونانی كورد بەرەو سەربەخۆیی دەڕوانن؟

- من ناڵێم ئەمە هەنگاوێكی باشە لەم ساتەوەختەدا، ئەویش بە لەبەرچاوگرتنی ئەو پێگە لاوازەی ئێستا عێراقی تێدایە، رەنگە لە داهاتوودا بیرۆكەیەكی باش بێت، بەڵام لە ئێستادا دۆخەكە لە عێراقدا ئەوەندە لەرزۆكە كە پێموایە هەنگاوهەڵگرتن بەرەو سەربەخۆیی كاریگەری لەسەرتاسەری عێراقدا لێدەكەوێتەوە و دەبێتەهۆی داڕووخانی رەوشەكە. رەنگە روانگەی هەرێمی كوردستان ئەوەبێت كە لە ئێستادا حكومەتی عێراقی لاوازە و پێویستە لەم كاتەدا كار بۆ سەربەخۆیی بكرێت. بەڵام ئەگەر عێراق كێشەی بۆ دروست بێت، بەهۆی سەربەخۆبوونی كوردستانەوە، ئەوا كوردستانیش بەهۆی ئەو سەربەخۆییەوە كێشەی بۆ دروست دەبێت، لەبەر ئەوە ئەوەندەی پەیوەستە بە عێراقەوە ئەوا كاركردن بە ئاڕاستەیەكدا كە ببێتەهۆی نغرۆبوونی كەشتیەكە دەرئەنجامێكی باشی نابێت. لە رووی سیاسییەوە من كەسێكی ئەنتی كورد كورد نیم و باوەڕم بە مافی بڕیاردانی چارەنووسە، بەڵام وەك كەسێك كە خوازیاری هاتنەئارای باشترین دەرئەنجامم بۆ سەرجەم عێراق، ئەوا رەنگە ئەمە كاتی گونجاو نەبێت بۆ ئەوەی رووبدات.