تاوتوێكردنی ئەگەرەكانی ئایندەی عێراق و شرۆڤەكردنی زیاتری چەمكی یەكێتی دەوڵەتەكانی عێراق، كە (پاوڵینا بەیكەر) سەرۆكی فەخریی سندوقی ئاشتی پێشنیاری كردووە بۆ ئەوەی لە عێراقدا جێبەجێ بكرێت، هەروەها چەمكی بەدەستهێنانی سەروەری و سەروەریی هاوبەش و چەند پرسێكی گرنگی دیكە، تەوەری ئەم وتووێژە لەگەڵ خاتوو پاوڵینا بەیكەر پێكدەهێنن و بەمجۆرە بیروبۆچوونەكانی بۆ گوڵان خستەڕوو.

پاوڵینا بەیكەر
سەرۆكی فەخریی سندوقی ئاشتی بۆ گوڵان:
دەبێت دوای سەركەوتنی سەربازی بەسەر داعشدا پرۆسەی ئاشتەوایی سیاسی و ئاڵوگۆڕی سیاسی دەست پێبكات



* چۆن لە بارودۆخی ئێستای عێراق دەڕوانیت و پێتانوایە ئایندەی ئەم وڵاتە بە چ ئاقارێكدا دەڕوات؟
- ئەمە پرسیارێكی زۆر قورسە، لەبەر ئەوەی زۆرێك لە مەسەلەكان بەندن بە دەرئەنجامی چالاكی و كردەوە سەربازییەكان و ئاستی ئامادەیی لایەنە جیاوازەكانی نێو عێراق بۆ كاركردن لەگەڵ یەكتردا. بەڵام بە روانین لە ئەزموونی ئەو وڵاتانەی دیكە كە بە ناكۆكی و شەڕێكی چڕدا تێپەڕیون، ئەوا بەلای منەوە دەبێت لەئێستادا ئامادەكاری بكرێت بۆ پڕكردنەوەی كەلێنی نێوان ناكۆكیی توندوتیژو ئاشتەوایی دوای ناكۆكی و دەبێت كار لەسەر ئەوە بكرێت كە ئایا دەكرێت مۆدێلێكی حوكمڕانی دابتاشرێت كە لای گروپە سەرەكییەكانی عێراق مایەی قبوڵكردن بێت، بەڵام ئەوەندەی من بەدی دەكەم لەئێستادا ئەمە لەئارادا نییە.
* كەواتە ئایا دەكرێت جارێكی دیكە عێراق یەكبگرێتەوە و ببێتە وڵاتێكی یەكگرتوو؟
- دەكرێت جارێكی دیكە عێراق وەك وڵاتێكی یەكگرتووی لێبێتەوە، بەڵام دەبێت بەلای كەمەوە ئاستێكی بەرزی خۆبەڕێوەبەری –ئۆتۆنۆمی- بدرێت بە پێكهاتەكان، ئەویش لەسەر بنەمای بیرۆكەی ئەوەی خۆیان حوكمڕانیی خۆیان بكەن. دەكرێت دەسەڵاتی ناوەندی بەهێزبێت لە رووی كاروبارەكانی دەرەوە، هەروەها لە رووی ئیدارەدانی ئابووریی وڵاتەكەوە، بەڵام لە پێوەندی بە نوێنەرایەتیكردنەوە، ئەوا دەبێت مرونەتێكی زۆر هەبێت، بوار بە پێكهاتەكان بدرێت بۆ ئەوەی هەست بكەن كە بە راددەیەكی گەورە خۆیان حوكمڕانیی خۆیان دەكەن، نەك بەشێكی وڵاتەكە زاڵ و باڵادەست بێت بەسەریانەوە.
* ئێوە راپۆرتێكان نووسیوە بە ناوی «یەكێتی دەوڵەتەكانی عێراق». ئایا دەكرێ شیكردنەوەو روونكردنەوەی زیاتر لەسەر ئەم رێگاچارەیە بدەن؟ واتە دەقاودەق ئێوە پێشنیاری چی دەكەن بۆ ئەوەی لە عێراقدا جێبەجێ بكرێت؟
- چەمكی «یەكێتی دەوڵەتەكانی عێراق» بریتییە لە قەوارەیەكی نوێ كە عێراق بە یەكگرتوویی دەمێنێتەوە وەك یەك دەوڵەت، واتە وەك دەوڵەتێكی خاوەن سەروەری، بەڵام پێكهاتەكانی خاوەن ئاستێكی باڵای خۆبەڕێوەبەرین. كەواتە بریتییە لە فیدڕاڵیەتێك كە پێكهاتەكان بە راددەیەكی گەورە خۆیان بەڕێوە دەبەن و تێیدا بەرژەوەندی هاوبەش هەیە، لەوەی پێكهاتەكان لە رووی ئابوورییەوە پێكەوەگرێبدرێن، كە میكانیزمێكی پێشوەختیش هەبێت و لەسەری رێككەوتبێتن بۆ دابەشكردنی داهات لەسەر بنەمای چەند پێوەرێك، بەڵام ئەوەی روونە كە پرسی ناسنامە و پرسی ئاسایش رێگەدەگرن لە دروستبوون و سەرهەڵدانی حكومەتێكی بەهێزی مەركەزی. كەواتە دەبێت شێوازێكی فیدڕاڵی بگیرێتەبەر بۆ حوكمڕانی كە ئەویش لەسەر بنەمای گفتوگۆكردن بێت بۆ ئەوەی عێراق خۆی لەو حاڵەتە لابدات كە هەر یەكە لە پێكهاتەكان بە رێگای خۆیاندا بڕۆن. لەم جیهانەدا پێدەچێت زۆرێك لە حاڵەتەكانی هاوكاری ئابووری، وەك كۆمەڵەی ئابووری ئەوروپی، كەوتبێتنە ژێر فشارێكی زۆرەوە، بەڵام دەبێت لە عێراقدا لایەنەكان پێكەوە كاربكەن بۆ هێنانەدی هاوكاری ئابووریی دوولایەنە. بەڵام بەهۆی ناكۆكییەكانەوە، تەحەفوز دروست بووە لەبارەی مانای حوكمڕانیی ناوخۆیی. دووبارەی دەكەمەوە، دەبێت ئەمە پرۆسەیەك بێت كە لەسەر بنەمای گفتوگۆكردن بەڕێوەبچێت. لە ئەمەریكا، 13 كۆڵۆنیاڵی سەربەخۆ هەبوون، كە هەر یەكەیان ناسنامەی تایبەت بە خۆیان هەبوو، بەڵام لە كۆتاییدا دەستیان دایە پێكەوەكاركردن بۆ ئەوەی یەكێتییەكی هاوبەش دروست بكەن كە چەندین سەدە درێژەی كێشاوە.
* ئایا پێتوایە دەبێت چەمكی یەكێتی دەوڵەتەكانی عێراق بە سەرپەرشتی نێودەوڵەتی جێبەجێ بكرێت، كە تێیدا گەمەكارە نێودەوڵەتییەكان رۆڵی نێوبژیوان و زامنكار ببینن؟
- پێموایە كۆمەڵگەی نێودەوڵەتی دەتوانێت ببێتە سەرپەرشتیار، بەڵام نەك زامنكار. لەماوەی قۆناخی ئینیتقالی لە ئەفریقیای باشوور، نیگەرانی و دڵەڕاوكێ هەبوون كە ئایا ئەو رێككەوتنەی كە كراوە جێبەجێ دەكرێت، یان نا، كە دواتر هاتن دامەزراوەی نوێیان دروست كرد، كە بریتی بوو لە دادگای دەستووری، كە دەسەڵاتی ئەوەی هەبوو حوكم بدات لەسەر بنەمای رێككەوتنی ئاشتی. ئەمە هەندێ دڵنیایی دا بە كەمینەی سپی پێستەكان كە دادگاكان زامنی پیادەكردنی رێككەوتنی قۆناخی ئینتیقالین. لەبەر ئەوە دەبێت بیركردنەوەیەكی نوێ لە عێراقدا بێتەئاراوە بە روانین لە ئەزموونی وڵاتانی دیكە، بەڵام ئەمە تەنیا یەك نموونەیەو هێنانەئارای میكانیزمگەلێكی نوێ كە رۆڵی زامنكار ببینن بۆ جێبەجێكردنی رێككەوتنەكە. پێموایە كۆمەڵگەی نێودەوڵەتی دەتوانێت ببێتە نێوبژیوان و سەرپەرشتیاری ئەم رێككەوتنەو چەند نموونەیەك بخاتەڕوو لەبارەی ئەوەی دەتوانرێت چی بكرێت، بەڵام دەبێت لەلایەن دەوڵەت و خودی خەڵكەكەوە زامن بكرێت.
* چەمكێكی تا راددەیەك نوێ هاتۆتەئاراوە كە پێی دەوترێت بەدەستهێنانی سەروەری كە ئەم چەمكە سەروەریی هاوبەش و دروستكردنی دامەزراوەكان و بڕیاردان لە چارەنووس لەخۆدەگرێت، پرسیارەكە ئەوەیە ئایا دەكرێت ئەم رێگاچارەیە لە عێراقدا جیێبەجێ بكرێت؟
- پێموایە دەكرێت ئەم رێگاچارەیە جێبەجێ بكرێت، بەو مەرجەی هەموو لایەك پێی رازی بێت، هەروەها سەروەریی هاوبەش بە روونی پێناسەكرابێت. چەندین وڵات هەن، بۆ نموونە یەكێتی سۆڤیەتی جارانكە لە دەستوورەكەیدا بڕگەیەك هەبوو، رێگەی بە جیابوونەوە دەدا بە هەر بەشێكی وڵاتەكە، بەڵام لە واقیعدا جێبەجێ نەكراو بوار نەدرا بۆ ئەوەی مومارەسە بكرێت. كەواتە لە دۆخێكی ئاوادا تۆ ناتەوێت بڕگەیەك بچەسپێنێت كە ئومێدی ناڕاست و ساختە بە خەڵك بدات، لەبەر ئەوەی سەروەری مانای جیاوازی هەیە لای خەڵكانی جیاواز. كەواتە كاتێك چەمكی سەروەریی هاوبەش بەكار دەهێندرێت، ئەوا دەبێت روون بكرێتەوە كە كێ مافی ئەوەی هەیە چی بكات و لە سایەی چ هەل و مەرجێكدا، هەروەها لە حاڵەتی دروستبوونی ناكۆكیدا، ئایا چ میكانیزمێكی چارەسەركردنی ناكۆكی دەگیرێتەبەر. چ دادگایەك و چ كۆمیسیۆنێك، یاخود چ جۆرە مۆدێلێكی گفتوگۆكردن بەكار دەهێندرێت. بۆ نموونە یەكێك لە كێشەكان ئەوەیە چۆن سوپاكان یەك بخەیت. چونكە تۆ لە لایەك هێزی پێشمەرگەت هەیەو لەلایەكی دیكە سوپای عێراقی، لە دوای زۆربەی شەڕە ناوخۆییەكان سوپاكان یەكدەخرێن و هەمووان لە چوارچێوەی سوپایەكی نیشتیمانیدا ئاوێتە دەكرێن. بەڵام دەبێت ئەمە بەرئەنجامی گفتوگۆ بێت، كە پێویستە كێشە قورسەكانی تێدا یەكلا بكرێتەوە. واتە دەبێت تێگەیشتنێكی هاوبەش هەبێت لەبارەی ئەوەی سەروەریی هاوبەش چییەو مانای چییە، هەروەها پێویستە بە روونی لە رێككەوتنی ئاشتیدا گوزارشتی لێبكرێت. لەحاڵەتی لێكدانەوە و شرۆڤەكردنی ناكۆك بە یەكدا، دەبێت پارتە سەرەكییەكان رێككەوتن لەسەر چۆنیەتی چارەسەركردنیان بكەن. رەنگە ئەمە لایەنی نێودەوڵەتی لەخۆبگرێت، وەك بوونی كۆمیسیۆنێك كە شارەزای دەرەكی لەخۆ بگرێت – واتە ئەندام بن تێیدا-، كە وەك دادگایەك هەڵسووڕێت، یان میكانیزمێكی گفتوگۆكردن بۆ چارەسەركردنی ناكۆكییەكان دەستنیشان بكات.
* بەڕێز جۆ بایدن كاتێك سیناتۆر بوو، پێشنیاری دابەشكردنی نەرمی بۆ عێراق خستەڕوو، پرسیارەكە ئەوەیە ئایا ئەگەر هیلاری كلینتۆن ببێتە سەرۆكی ئەمەریكا، ئەو كارە تەواودەكات كە بایدن پێشنیاری كرد؟
- نەخێر، پێموایە هیلاری كلینتۆن رێچكەی خۆی دەگرێتەبەر.
* بەڵام ئایا پێتوایە هیلاری كلینتۆن لەحاڵەتی سەركەوتنیدا سیاسەتگەلێك بگرێتەبەر كە بە شێوەیەكی بنەڕەتی جیاواز بن لە سیاسەتەكانی ئیدارەی ئۆباما؟
- من لەو باوەڕەدا نیم كە رێگاچارەیەكی تەواو جیاواز بگرێتەبەر، بەڵام هەڵوێستی تایبەت بە خۆیشی دەبێت. كە ئەوەش بەندە بەوەی هەلومەرجی سەر ئەرزی واقیع بە چ ئاراستە و ئاقارێكدا دەڕوات. بەڵام هەروەك ئاماژەم پێكرد، بەم نزیكانە سیاسەتگەلێكی تەواو جیاواز ناگرێتەبەر، جگە لەو مەسەلانەی پێوەندیدارن بە دەستەبەركردنی هاوكاری و یارمەتیی مرۆییەوە.
* بە تێڕوانینی ئێوە ئاكام و دەرهاویشتەكانی شەڕی رزگاركردنەوەی موسڵ چی دەبن و ئایا ئایندەی ئەم وڵاتە دوای تێكشكاندن و لە ناوبردنی داعش لەو شارەدا چۆن دەبێت؟
- لە راستیدا ئەوە بەندە بەوەی حكومەتی مەركەزی چۆن مامەڵە لەگەڵ موسڵدا دەكات، لەبەر ئەوەی تێكشكاندنی سەربازیی داعش بەمانای ئەوە نایەت كە تۆ بەڕاستی ئاسایش و ئارامیی شارەكە و خەڵكەكەت دەستەبەر كردووە. فاكتەرە گەورەكە ئەوەیە كە هەستی سوننەكان چییە، ئایا هەست دەكەن رزگاركراون، یان هەست دەكەن كە رۆڵیان لە حكومەتی عێراقدا هەیە؟ ئایا پێیانوایە حكومەتی عێراقی بەرژەوەندییەكانی ئەوان لەبەرچاو دەگرێت؟ ئەمە مەسەلەیەكە لە هەر شتێكی دیكە زیاتر پەیوەستە بە حوكمڕانییەوە. لەبەر ئەوە باوەڕم وایە زۆرێك لە مەسەلەكان بەندن بەوەی حكومەتی عێراقی چ مامەڵەیەك دەكات لە دوای ئەم سەركەوتنە سەربازییەوە، ئەمە ئەگەر لە راستیدا ئەم سەركەوتنە بەدی بێت.
* كەواتە ئێوە پێتانوایە تاوەكو ئێستا رێكارەكانی بەرەنگاربوونەوەی تیرۆریزم تەنیا جەختی لەسەر تێكشكاندنی تیرۆریستان لە رووی سەربازییەوە كردۆتەوە، لەبری ئەوەی تەركیز لەسەر دووبارە بنیادنانە و پرۆسەی ئاشتەوایی نەتەوایەتی بكات؟
- من ناڵێم «لەبری ئەوەی»، لەبەر ئەوەی ئاشكرایە كە قەیرانێكی سەربازی هەیەو تێكشكاندنی داعشیش هەنگاوێكی گرنگە، بەڵام ئەوەی روونە ئەوەیە كە لەو ناوچانەی تێیدا سەركەوتنێكی سەربازی روون و ئاشكرا تۆماردەكرێن، ئەوا دەبێت پرۆسەی ئاشتەوایی سیاسی و ئاڵوگۆڕی سیاسی بەدوادا بێت. خۆ ئەگەر هاتوو ئەمە نەكرا، ئەوا بۆی هەیە دووبارە بارودۆخەكە لە كۆنتڕۆڵ دەربچێت و سەربكێشێت بۆ سەرهەڵدانەوەی ناكۆكییەكی سەربازی. كەواتە نابێت خەڵكی وا بیربكەنەوە كە سەركەوتنی سەربازی كۆتایی چیرۆكەكەیە، لەبەر ئەوەی رەنگە بتوانیت داعش دەرپەڕێنیت، لەگەڵ ئەوەشدا بەتەواوەتی تێكینەشكێنیت. دەتوانیت داعش لەموسڵ بكەیتە دەرەوە، بەڵام ئەگەر بتەوێت موسڵ بپارێزیت و بە راستی خوازیاری ئەوە بیت كە بەرەوپێشچوون لەشەڕی دژ بە داعشدا بەدی بێنیت، ئەوا دەبێت ئەوە بخەیتەڕوو كە ژیان لە سایەی حكومەتە نوێیەكەی عێراقدا باشترە.
* لە پێوەندی بە هەرێمی كوردستانی عێراقەوە، ئەوا ئاشكرایە كە ئەم هەرێمە لە رووی ئەمری واقیعەوە دەوڵەتێكی سەربەخۆیە، بەڵام پرسیارەكە ئەوەیە ئەگەر ئەم هەرێمە هەنگاوێك زیاتر هەڵبگرێت و تاكلایەنانە دەوڵەتێكی سەربەخۆ رابگەیەنێت، ئایا لەو باوەڕەدان كە لەسەر ئاستی نێودەوڵەتی دانپێدانان بەدەست دەهێنێت؟
- من گومان هەیە لەم رووەوە، لەبەر ئەوەی هەر تەنیا بە راگەیاندنی سەربەخۆیی دانپێدانانی راستەوخۆ بەدەست ناهێنن، ئێوە لە بیابانی رۆژئاوا «الصحراء الغربیە» بڕوانن، كە چەندین دەیەیە وێڵی بەدەستهێنانی دانپێدانانی سەربەخۆییە، لە فەلەستینییەكان بڕوانن، ماوەی چەندە لە هەوڵی بەدەستهێنانی دانپێدانانی نێودەوڵەتیدان، لە راستیدا دەبێت ئەم پرسە لە بنەڕەتدا لایەنەكانی نێو هەرێمەكە یەكلای بكەنەوە، نەك لایەن و هێزە دەرەكییەكان. بۆیە گومانم هەیە لەوەی كە ئەگەر كورد سەربەخۆیی رابگەیەنێت، ئەوا دەستبەجێ دانی پێدابنرێت. لەلایەكی دیكەوە پێموایە پشتیوانیەكی زۆر لە كورد دەكرێت بۆ ئەوەی گفتوگۆ لەبارەی پێوەندییەكی سیاسیی نوێیەوە بكات لەگەڵ حكومەتی عێراقدا، گفتوگۆیەك كە سوننەكانیش لەخۆبگرێت،. بەڵام هەروەك پێشتریش ئاماژەم پێكرد، دەبێت فۆرمێكی نوێی فیدڕاڵی پیادە بكرێت.
* ئایا هەڵوێستی هەر یەكە لە ئێران و توركیا چی دەبێت ئەگەر بێتو كوردستان سەربەخۆیی رابگەیەنێت؟
- بەدڵنیاییەوە توركیا و ئێران پشتیوانی لەدەوڵەتی كوردستان ناكەن و وەك كارێكی دوژمنكارانەو وەك سەرچاوەیەكی هەڕەشە لەسەر ئاسایشی خۆیان لێی دەڕوانن، بەتایبەتی لە پێوەندی بە كێشەی كوردی وڵاتەكەیانەوە. بەو پێیە، كورد دەكەوێتە دۆخێكی تەواو سەختەوە، لەبەر ئەوەی نابێتە دەوڵەتێكی نوێ كە لە سەر ئاستی ناوخۆی بتوانێت خۆی بنیاد بنێتەوە، بەڵكو دەبێتە ئامرازێكی نێو ململانێی هێزی نێودەوڵەتی لەسەر -باڵادەستبوون- بەسەر ناوچەكەدا. كە من دڵنیانیم لەوەی كورد خوازیاری ئەوە بێت كە بكەوێتە ئەو بارودۆخەوە. هەرچۆنێك بێت، نابێت كورد گریمانەی ئەوە بكات كە بە جاڕدانی سەربەخۆیی، ئەوا ئەو پشتیوانییە بەدەست دەهێنن كە دەیانەوێت.
* ئێوە بە چڕوپڕی كارتان لەسەر چەمكی دەوڵەتی شكستخواردوو، یان لەرزۆك كردووە، لە ئێستاشدا هەندێ كەس ئەم ناوچەیە وەك ناوچەی شكستخواردوو لە قەڵەم دەدەن، كەواتە ئایا باشترین رێگاچارە چییە بۆ ئەوەی كێشە و تەنگژەكانی ئەم ناوچەیەی پێ چارەسەر بكرێت؟
- ئەمە پرسیارێكی زۆر قورسە، من ناتوانم پێشبینی ئایندە بكەم. هەموو ئەوەی دەتوانم بیڵێم ئەوەیە كە بەئاسانی یان بەخێرایی سەقامگیری و ئارامی ناگەڕێتەوە بۆ ئەم ناوچەیە. من گومانم هەیە لەوەی سەرجەم سنوورەكان وەك خۆیان بمێننەوە، ئەگەری زیاترە سووریا دووچاری دابەشبوون و پارچەپارچەبوون ببێت. ئەگەر ئەمە رووبدات و ئەگەر لە عێراقیشدا ئەمە رووبدا، ئەوا ئەو كاتە ناوچەكە لە خراپترین دۆخدا دەبێت. ئەو كاتە رۆژگارێكی دوورودرێژی سەرلەنوێ رێكخستنەوەی سنوور و دەوڵەتەكان دێتەئاراوە. من بەگومانم لەوەی كە كۆمەڵگەی نێودەوڵەتی كارێكی زۆری پێ بكرێت، جگە لە دەستەبەركردنی پشتیوانی بۆ شەڕكردن لە دژی داعش و تیرۆریزم، لەگەڵ خستنەڕووی مۆدێلی جیاوازی حوكمڕانی و ئاشتەوایی، بەڵام لەبنەڕەتدا ئەمە پرسیارێكە دەبێت لەلایەن خودی لایەنە بەشداربووەكانەوە وەڵام بدرێتەوە، واتە لەلایەن ئەو خەڵكانەی كە لە ناوچەكەدا دەژین. واتە دەبێت پرسیاری ئەوە بكەن ئایا ئێمە لە چ دۆخێكداین؟ ئایا لە ئایندەدا دەمانەوێت چارەنووسمان بە كێوە گرێ بدرێتەوە؟ ئایا دەمانەوێت لە چ جۆرە وڵاتێكدا بژین؟ نابێت ئەم پرسیارانەش لەلایەن كۆمەڵگەی نێودەوڵەتییەوە وەڵام بدرێنەوە، بەڵكو دەبێت لەلایەن ئەو خەڵكانەوە وەڵام بدرێتەوە كە لەسەر ئەرزی واقیع شەڕ دەكەن و ئێش و ئازار دەچێژن.



پاوڵینا بەیكەر لە چەند دێڕێكدا

دكتۆرە پاوڵینا بەیكەر سەرۆكی فەخری و ئەندامی ئەنجومەنی ئەمینداری سندوقی ئاشتییە، كە بریتیە لە رێكخراوێكی پێوەندیدار بە توێژینەوەو پەروەردەو بارەگاكەی لە(واشنتۆن دی سی)یەو كار و كۆششەكانی تەرخان كردووە بۆ بەرگرتن لە شەڕ و باشتركردنی ئەو بارودۆخانەی كە دەبنەهۆی دروستبوونی ناكۆكیی توندوتیژ. خاتوو بەیكەر لە ساڵی 1996وە بۆ ساڵی 2010 سەرۆكی ئەم رێكخراوە بووە. هەروەها پڕۆفیسۆرە لە سكووڵی خزمەتگوزاری دەرەكی لە زانكۆی جۆرج تاوون، لە هەمان كاتدا وانەبێژە لە سكووڵی جۆنز هۆپكینز بۆ دیراساتی نێودەوڵەتیی پێشكەوتوو، بە هەمان شێوە وانەبێژە لە بەشی بزنس و دیراساتی كۆمەڵایەتی لە زانكۆی لاگۆس لە نەیجیریا.
خاتوو پاوڵینا زانایەكی سیاسییە كە بڕوامانەی دكتۆرای بە پلەی بەرز لەزانكۆی كالیفۆڕنیا (لۆس ئەنجەلوس) بەدەست هێناوە. بڕوانامەی بەكالۆرسیشی لە كۆلێژی دۆگڵاس لە زانكۆی روتگێرز وەرگرتووە. بۆ ماوەی 11 ساڵ لە نەیجیریا ژیاوەو كاری كردووە، لە ساڵانی 1999، 2003، 2007، 2011 و 2015دا چاودێر بووە لەسەر هەڵبژاردنەكانی نەیجیریا.
هەروەها لەناوەندو سەنتەرەكانی توێژینەوەو فیكردا بە چڕوپڕی نووسین و توێژینەوەی ئەنجام داوە لەبارەی كاروبارە نێودەوڵەتییەكانی دیكەوە. دكتۆرە بەیكەر ئەندامی ئەنجومەنی پێوەندییەكانی دەرەوەیە، هەروەها ئەندامی بۆردی دەستپێشخەری شەراكەتی دەلتای نەیجەرە – كە كۆمپانیای شیفرۆن پشتیوانی دەكات-، هەروەها ئەندامی بۆردی بیركردنەوەی داهێنانكارانەیە. نووسەری پتر لە 100 بڵاوكراوەیە، لە نێویاندا «لەبەریەك هەڵوەشانی ئەفغانستان» لە بەرژەوەندی ئەمەریكا كە لە مانگی كانونی یەكەم/ شوباتی ساڵی 2014دا بڵاوكراوەتەوە. هەروەها كار لەگەڵ «Creative Associates International» دەكات كە رێكخراوێكی نێودەوڵەتییەو بایەخ بەو كەسانە دەدات كە دەیانەوێت گۆڕانكارییە ئیجابییە خوازراوەكان بێننەدی، لەم رووەوە زنجیرەیەك توێژینەوەی ئەنجام داوە بە ناونیشانی «پێوەندیی نێوان گەشەی ئابووری و نایەكسانی لە هەلومەرجە پڕ لە ناكۆكییەكاندا: خاڵی ناكۆكی و رێگای رزگاربوون».