سەركەوتنەكانی هێزی پێشمەرگە بەسەرپەرشتی مسعود بارزانی سەرۆكی هەرێمی كوردستان لە هەردوو میحوەری خازر و گوێڕ بۆ یەكجاری مەترسیی داعشی لەهەرێمی كوردستان دوورخستەوە و هێزی پێشمەرگەی بە دووری 14 كیلۆمەتر لە سەنتەری شاری موسڵ نزیك كردەوە و فەرماندە سەربازییەكانیش بە كلیلی ئازادكردنی موسڵ وەسفیان كرد. لەلایەكی دیكەوە پابەندبوونی پێشمەرگە بە ئەخلاق و میهنیەتی سەربازی و رێزگرتن لە بنەماكانی مافی مرۆڤ و دابونەریتی نەتەوەكان و ئایین و ئایینزاكانی پارێزگای موسڵ بووە جێگای رێز و تێڕوانینی سیاسەتمەداران و وڵاتانی هاوپەیمانان. بە رادەیەك جارێكی دی هێزی پێشمەرگە سەلماندییەوە كە تاكە هێزێكە لە ناوچەكەدا كە هەموو نەتەوەكان بێ جیاوازی پشتی بێ دەبەستن و دوورە لە رق و كینە و تۆڵە و مەرامی تائیفی و ئیتنی.سەبارەت بە گرنگی ئەم سەركەوتنانە كە وەرچەرخانێكە لە شەڕی ئازادكردنەوەی موسڵ ئەم دیمانەیەمان لەگەڵ لیوا عەزیز وەیسی فەرماندەی گشتی هێزی زێرەڤانی كوردستان ئەنجامدا وبەمجۆرە وەڵامی پرسیارەكانی گوڵان-ی دایەوە.

لیوا عەزیز وەیسی فەرماندەی گشتی هێزی زێرەڤانی كوردستان:

لە رووی سەربازییەوە مومكین نییە موسڵ بەبێ هێزی پێشمەرگە رزگار بكرێت




* بە فەرماندەیی سەرۆك بارزانی جارێكی دی هێزی پێشمەرگە سەركەوتنێكی بێ وێنەیان تۆماركرد، سەركەوتنەكانی ئەمجارەی پێشمەرگە لە گوێڕ و خازر، لە ناوەندە ناوخۆیی و جیهانییەكاندا دەنگدانەوەیەكی گەورەی هەبوو. ئایا لە رووی مەیدانیەوە تاچەند گرنگ بوو ئەو ناوچانە ئازاد بكرێن؟
- لە كاتژمێر 3ی بەرەبەیانی 14ی ئاب ئۆپەراسیۆنێكی گەورە بۆ ئازادكردنی چەندین گوند و رووبەرێكی فراوانی دەوروبەری خازر و گوێڕ دەستی پێكرد، سەرەتا بە تۆپ و هاوەن و چەكی تر لەلایەن هێزی پێشمەرگە و هێزی پێشمەرگەی زێرەڤانی بۆردومانی بنكە و بارەگاكانی داعش كرا، دواتر كاتژمێر 5ی بەیانی، بە سەرپەرشتی راستەوخۆی سەرۆك بارزانی لەچەند میحوەرێكەوە هێزی پێشمەرگە هێرشی كردە سەر گوند و موڵگەكانی تیرۆریستانی داعش، كە پلان و بەرنامەی هێرشەكەش هەر لەلایەن جەنابی سەرۆك بارزانی داڕێژرابوو. تەنانەت جەنابی سەرۆك بارزانی پێیوابوو كە چەند پانتایی و رووبەڕێكی گرنگ لەم ناوچەیەدا هەن، كە پێویست بوو لەژێر دەستی داعشەكان رزگار بكرێن، چونكە تێڕوانینی بەڕێزیان ئەوە بوو كە ئەم ناوچە و گوندانە لە قەزای خەبات و تەنانەت لە شاری هەولێرەوە نزیكن و بە رزگاركردنیان بە یەكجاری مەترسی لەسەر خەڵكی كەڵەك و هەولێری پایتەختی كوردستان نامێنێت. كەواتە ئەم ئۆپەراسیۆنە هەڵگری مژدە و پەیامی دڵنیاییكردنەوە بوو بۆ خەڵك. ئەوەی پێوەندی بە میحوەری گوێڕیشەوە هەبێت، كە دەكەوێتە باشووری شاری هەولێرەوە، ئەوا لە رابردوودا تیرۆریستان چەندینجار هێرشیان دەكردە سەر ئەم ناوچەیە و لە میانەی رووبەڕووبوونەوەشیاندا، چەندین كەس لە نێو هێزی پێشمەرگەی كوردستاندا شەهید و بریندار بوون. لەم ناوچەیەش بەپێی ئەو نەخشەو پلانەی كە جەنابی سەرۆك بارزانی دایڕشتبوو ئۆپەراسیۆنەكە جێبەجێ كرا و تەواوی داعشەكان لەم ناوچەیەش دوورخرانەوە. لە دەرئەنجامی ئەو ئۆپەراسیۆنەشدا، لەلایەك پاڵەپەستۆیەكی قورس كەوتە سەر داعشەكان لە موسڵ، لەلایەكی دیكەوە هاوكاری و یارمەتییەكی كاریگەریش بوو بۆ سوپای عێراق كە لە پلانیاندایە لەم ناوچانەوە لە شاری موسڵ نزیك ببنەوە، بەو پێیە ئەمە كارئاسانی بۆ سوپای عێراق دروست كرد و ئەركی ئاسان كردن بۆ ئەوەی گەیارە رزگار بكەن، بەڵام لەگەڵ ئەمەشدا تا ئێستا سوپای عێراق و حەشدی شەعبی نەیانتوانیوە بچنە ناو گەیارەوە. هەرچۆنێك بێت، سەركەوتنەكانی پێشمەرگە لە دەوروبەری موسڵ مایەی گەمارۆدانی زیاتری داعشە لە موسڵ و لە هەمان كاتدا یارمەتیدەر و هاوكارە بۆ هەموو ئەو هێزانەی كە لە دژی داعش شەڕ دەكەن.
* سەرپەرشتیی ئەم ئۆپەراسیۆنە لەلایەن سەرۆك بارزانی فەرماندەی گشتی هێزە چەكدارەكان بۆ ئێوە تا چەند گرنگ بوو، بەتایبەتی لە ئاراستەكردنی هێزەكان و بەرزكردنەوەی ورەی پێشمەرگە؟
- بوونی سەرۆك بارزانی نەك تەنیا بۆ ئەم ئۆپەراسیۆنە سەربازییە گرنگ بوو، بەڵكو بۆ سەرجەم ئۆپەراسیۆنەكانی بەرەنگاربوونەوەی داعش و رزگاركردنی ناوچە كوردستانییەكان كە كەوتبوونە ژێر داگیركاری داعشەوە، گرنگی خۆی هەبووە. جەنابی سەرۆك بارزانی پلان و نەخشەی جەنگی دادەڕێژێت و سەرپەرشتی راستەوخۆی ئۆپەراسیۆنەكانی رزگاركردنی ناوچە كوردستانییەكان دەكات، لە زۆربەی شەڕ و ئۆپەراسیۆنەكاندا شان بە شانی پێشمەرگە لەبەرەكانی شەڕدا بووە، هەموو پلان و نەخشەكان كە جەنابیان دایدەڕێژن، لەلایەن فەرماندەكانی هێزی پێشمەرگەوە گفتوگۆی لەسەر دەكرێت و تێبینی دەردەبڕێت و جارێكی تر سەیری پلانەكە دەكاتەوە، تا دەگاتە ئەو قەناعەتەی كە سەركەوتنی پێشمەرگە بە كەمترین زیان تەواو دەبێت، ئەو كات ئۆپەراسیۆنەكە دەكاتە بڕیار و راستەوخۆ لەلایەن فەرماندە سەربازییەكانیەوە جێبەجێ دەكرێت، تەنانەت لەهەموو ئەو ئۆپەراسیۆنانەی كە من تێیدا بەشدار بووم، جەنابی بارزانی بە وردی چاودێری هێزی پێشمەرگە و چەك و جۆری پێداویستییەكانی پێشمەرگەی كردووە و ئامادەكاری تەواوی بۆ ئۆپەراسیۆنەكە كردووە، پاشان دەست بە رزگاركردنی ناوچە و شوێنەكان دەكەین، لە شەڕەكەشدا چركە بە چركە جەنابیان پێوەندی لەگەڵ فەرماندەكان هەیە و ئاگاداریان دەكاتەوە و هەموو ئەو هەواڵ و ئاگادارییانەی كە لەلایەن هەواڵگری سەربازی و زانیاری ئاسمانی پەیدا دەبێت، وەریاندەگرێت و لەسەر بنەمای ئەو زانیاری و وردەكارییانەی دەستی دەكەوێت، دەستنیشانی ئەوە دەكرێت ئێمە چی بكەین و بڕیار لەسەر شوێن و ئاراستەكان و خاڵەكان و كاتژمێری سفر بۆ ئۆپەراسیۆنەكە دەدرێت. لە راستیدا رۆڵی سەرۆك بارزانی وەكو كەسایەتییەكی سیاسی و دیپلۆماسیی بەتوانا دیار و لەبەر چاوە، لە هەمان كاتدا جەنابیان رۆڵێكی نیشتمانپەروەری و فیداكاری و دڵسۆزانە دەگێڕێت، من باسكردنی ئەم لایەنە بۆ سیاسەتمەدارێكی بە جێ دەهێڵم. بەڵام وەكو فەرماندەیەكی سەربازی باسی رۆڵی جەنابیان دەكەم كە لەسەر ئاستی دنیادا كەم كەس هەیە وەكو جەنابیان لەسەرخۆ بیربكاتەوە و زهنییەتێكی فراوانی هەبێت و لە توانایدا بێت پلان و نەخشەی سەربازی وا سەركەوتوو دابڕێژێت، لەشەڕەكاندا دڵسۆزی و جەسارەتێكی گەلێك مەزن و گەورەم لە جەنابی سەرۆك بارزانی بینیوە، هەر بۆ نموونە كاتێك لەسەر چیای شنگال بوو، داعش هێرشی گەورەیان دەهێنا، بۆ ئەوەی بارودۆخی پێشمەرگە و ئاستی مقاوەمەت بزانێت، سێ جار چووە خاڵی یەكەمی شەڕەكە. تەنانەت لەچەندین شوێن كە پێشمەرگە شەهیدو بریندار دەبوون، جەنابیان دەچووە لایان، ئەمە بوو وایكرد داعش بە هاوشێوەی سوپای عێراق نەتوانێت هێرش بەرێتە سەر پێشمەرگە و بەرەنگاربوونەوەی هێزی پێشمەرگە بووە داستان و پێشمەرگەش تا دێت بەهێزتر دەبێت و تەواوی خاكی كوردستانی ئازاددەكات. هەروەك بینیمان لەم ئۆپەراسیۆنەدا پێشمەرگە بەبێ پشوودان هەڵمەتی ئۆپەراسیۆنەكەی رانەوەستاند تا كاتژمێر 11ی پێش نیوەڕۆ دواخاڵ و پلانی ئۆپەراسیۆنەكەی جێبەجێ كرد، لەكاتێكدا دەبوو تا كاتژمێر 11:30 ئەو ناوچانە رزگاربكرایە. لەبەر ئەوە ئۆپەراسیۆنی خازر و گوێڕ بە سەرپەرشتی بارزانی سەركەوتنی گەورەی بۆ هێزی پێشمەرگە و زێرەڤانی تۆماركرد، جارێكی دی سەلماندمانەوە كە داعش و هیچ هێزێكی دیكە ناتوانن لە بەردەم قارەمانێتی پێشمەرگە خۆیان رابگرن، ئەوەتا بەدەیان لاشەی داعش لەبەرەكانی شەڕدا بەجێماون، ئەم سەركەوتنانەی پێشمەرگە بووەتە مایەی سەرسوڕمانی هێزەكانی هاوپەیمانان و ئەوان زۆر بە گرنگی و شكۆوە باسی دەكەن.
* ئایا پابەندبوونی هێزی پێشمەرگە بە شەرەف و میهنیەتی سەربازییەوە لە چییەوە سەرچاوەی گرتووە، بەڕادەیەك وای لێهاتووە ئەم ئاستە بەرزە نیشان بدات كە بووەتە جێگای سەرسوڕمانی هێزەكانی هاوپەیمانان و جیهان؟
- پەروەردەكردنی هێز و لەشكر گەورەترین بنەمایە بۆ ئەوەی میهنیەتی سەربازی و ئەخلاقی بپارێزێت و هێزی پێشمەرگەی كوردستان لە قوتابخانەیەكی باش و بەئەخلاق پەروەردە كراوە و بۆ هیچ كەس و پێشمەرگەیەك نەهاتووە بە شێوازی هەڵە و تاكڕەویی هەڵسوكەوت بكات، ئەو تەوجیهات و ئامۆژگاری و رێنماییانەی لە میانەی هێرش و ئۆپەراسیۆنەكاندا لەلایەن جەنابی سەرۆك بارزانی بۆ هێزی پێشمەرگە دەردەچێت، هەرهەمووی پڕاوپڕ باس لە رەوشتی بەرز و پاراستنی سەروماڵی خەڵك و پاراستنی مافی مرۆڤ دەكات، هەر بۆ نموونە كە دەچینە گوندێك و رزگاری دەكەین، كەس لە پێشمەرگەكانمان بۆیان نییە بچنە ناو ماڵ و خانووەكان و دەستكاری بچووكترین كەلوپەلی خەڵك بكەن، تەنانەت لە كاتێكدا كە گوندێك، یان شوێنێك رزگار دەكەین نەك تەنیا گیانی خەڵكەكە دەپارێزرێت، بەڵكو رێز لە شەرەف و كەرامەتی دانیشتووانەكەش دەگیرێت و هاوكاری و یارمەتی مرۆیی و تەندروستی و گواستنەوەشیان بۆ شوێنی پارێزراو جێبەجێ دەكەین، تا تەسلیمی دامودەزگاكانی حكومەتیان دەكەین و شوێنی حەوانەوە و خزمەتگوزارییان بۆ دابین دەكەین، دیل و بریندارەكان بە جوانترین رەفتار مامەڵەیان لەگەڵ دەكەین، هەمووی بەپێی بنەما و بەندەكانی مافی مرۆڤ و یاسا نێودەوڵەتییەكان مامەڵەیان لەگەڵ دەكەین و پارێزگاریان لێ دەكەین، بەرامبەر لاشەی كوژراوەكانیش مامەڵەیەكی ئایینییانە و دابونەریتی بەرزیان لەگەڵ دەكەین، ئەمە هەمووی بۆ ئەو خەباتە دروور و درێژەی بزووتنەوەی رزگاریخوازی كوردستان دەگەڕێتەوە كە پێشمەرگە لەسەر رێبازی بارزانی و قوتابخانەیەكی بەرزی مرۆڤایەتی پەروەردە كراوە. ئەوەی لەسەر ئەم رێبازە پەروەردە كرابێت، پابەندی بنەماكانی مافی مرۆڤ و دابونەریتەكانی جەنگ دەبێت، لەهەموو هێرش و ئۆپەراسیۆنەكاندا جەنابی بارزانی داوامان لێدەكات پابەندی بنەماكانی ئەخلاق و مرۆڤایەتی بین، تۆ بڕوانە برا و باوك و كەسی خۆشەویستی نزیك و هەڤاڵانمان شەهید دەبن، بەڵام رێنمایی و بنەماكانی قوتابخانەی بارزانی دەپارێزین و لەبەرامبەردا هەڵە ناكەین و تۆڵە لە دیل و بریندار ناكەینەوە و رێز لە هاووڵاتیان و خەڵكی سڤیل دەگرین. جەنابی بارزانی قبووڵ ناكات بەپێچەوانەی ئەخلاقی شەڕ و میهنیەتی عەسكەرییەوە مامەڵە بكەین. جەنابی سەرۆك دەفەرموێت: ئەخلاق بۆ هەموو شتێك پێویستە، بۆ سیاسەت و شەڕ و ئابووری و بازرگانی هەر كار و كردەوەیەك ئەخلاقی تێدا نەبوو، لە كۆتاییدا دەبێتە سفر و ئامانجی نابێت و داهاتوویەكی خراپی لێ دێتەدی. بەپێچەوانەی ئەوەی لە سوپای عێراق و حەشدی شەعبی دەیبینین ئەوەیە كە شەڕەكەیان كردووەتە تۆڵەسەندنەوە و بنەمای تائیفی و توندڕەوی، لە مێژوودا گەلێك سەركردە هەبووە كە مەترسی لەسەر خێزانی هەبووە و هەوڵی پاراستنی داوە، بەڵام جەنابی سەرۆك بارزانی بە كوڕ و برازا و كەسوكار و بنەماڵەكەیەوە سەرقاڵی پاراستنی كوردستانن و لە پێشەوەی شەڕەكاندان و لە هەردوو میحوەر كاك مەنسوور و كاك وەیسی و شێخ سیروان و شێخ بەهزاد لەگەڵ هەڤاڵانی كاك نەجات عەلی و چەندین فەرماندە و پێشمەرگەی قارەمان لە ئۆپەراسیۆنەكەدا بەشداربوون، من زۆر هەوڵم دا بە پاساوی جۆراوجۆر كاك مەنسوور بارزانی لە بەرەكانی پێشەوەی رووبەڕووبوونەوەی داعش دووربكەوێتەوە، بەتایبەتی كە دەیان ئۆتۆمبێلی خۆكوژ هێرشیان دەهێنا، كەچی قبووڵی نەدەكرد، لەم گوندەی كە ئێستا ئازادمان كردووە، شەش ئۆتۆمبێلی خۆكوژ هێرشیان دەهێنا، تەنیا یەك كیلۆمەتر لە ئێمەوە دوور بوون، باشە فەرماندەیەك كە كوڕی سەرۆك بارزانی بێت و بەو شێوەیە لەپێناو پاراستنی خەڵكی كوردستان لە بەرەی پێشەوەی شەڕ بێت، ئیتر چۆن پێشمەرگە جەسارەت و باوەڕو ورەی بەرز نابێتەوە؟ ئەوان قەناعەتیان بە پارێزگاریكردنی شەرەف و كەرامەتی میللەتەكەیان هەیە، بۆیە ئامادەن لەم پێناوەدا قوربانی بدەن.
* پێشمەرگە نەك تەنیا بۆ كوردستان، بەڵكو لەپێناو مرۆڤایەتیدا شەڕ لەگەڵ دەوڵەتێكی تیرۆریستی دەكات، هەربۆیە بووەتە هێزێكی نێودەوڵەتی و وڵاتانی پێشكەوتوو بە سەرسوڕمانەوە دەڕواننە ئازایەتی و قارەمانێتی ئەم هێزە، تەنانەت پێنتاگۆنی ئەمەریكا یادداشتنامەی لێكتێگەیشتنیان لەگەڵ وەزارەتی پێشمەرگە واژوو كرد، ئایا ئەمە تاچەند شانسێكە بۆ دامەزراندنی دەوڵەتی كوردستان؟
- بۆ كورد شانس و هەلێكی مەزن هاتۆتەپێشەوە، بۆ یەكەمینجارە لە مێژوودا سەركردەیەكی كورد رێككەوتنی سەربازی لەگەڵ وەزارەتی بەرگری مەزنترین وڵاتی جیهان لە بواری سەربازی واژوو بكات، ئەمەش بۆ ئەو سەركەوتنانە دەگەڕێتەوە كە هێزی پێشمەرگە بەسەرپەرشتی جەنابی سەرۆك بارزانی بۆ میللەتی كوردو گەلانی ناوچەكەو هەموو مرۆڤایەتی بەدەستی هێناوە، بەڵام بۆ ئێمەی پێشمەرگە جێگای داخە كێشەیان لەناو ماڵی كوردان دروست كردووە، لە كاتێكدا سەرۆك بارزانی و كوڕ و بنەماڵەكەی و ئەو هەموو فەرماندە و پێشمەرگەیەی لە كوردستاندا هەیە، ئامادەن گیانی خۆیان لەپێناو كوردستان بەخت بكەن، لەم پێناوەشدا گەلێك قوربانیی مەزنیان داوە، كەچی هەندێك بەناو سیاسەتمەدار پیلان و مەرامی خراپیان بەرامبەر یەكتر هەیە و دەچنە وڵاتانی ئیقلیمی بۆ لاوازكردنی پێگەی كورد كاردەكەن، خۆیان هەڵدەواسن بەم تائیفە و ئەو لایەن و هەواڵگری عێراق و وڵاتانی دەوروبەر، تەنیا لەپێناو هەندێك پۆستی شەخسی، یا بۆ دامركانەوەی رك و كینە و ئیرەیی و لە دڵڕەشیدا چاویان بە سەركەوتنەكان و قوربانی و گیانفیداییەكانیشدا هەڵنایەت، سەركەوتنی لایەك بەرامبەر لایەكی تر بە بێ هێزی خۆیان دەزانن، ئێمە لە بەرەكانی شەڕ زۆر دڵگران و تووڕەین لەو سیاسەتمەدارانەی كە رۆژێك لە رۆژان پێشمەرگە بوون و خەباتیان كردووە، كەچی ئەمڕۆ لە پێناو دەستكەوتێكی شەخسی، یا حزبی چاویان بە سەركەوتنی هێزەكانی پێشمەرگە هەڵنایەت و دژی ریفراندۆم و ئەو ئامانجە هەڵسوكەوت دەكەن كە لە پێناوی میللەتەكەدا پێشمەرگە چەندین ساڵە خەباتی بۆ دەكات. من ئەوەی لێی تێگەیشتووم باشترین حزبی سیاسی كە لەدنیادا خەبات دەكات، ئەوەیە كە بۆ میللەتەكەی هەوڵ دەدات. شتێكی ئاساییە كێبڕكێ لەنێوان حزبە سیاسییەكاندا هەبێت، بەڵام لەسەر بنەمای خزمەتكردن و پێشكەشكردنی شتی باش، نەك ناوزڕاندن و پیلاندانان و دەستخستنە ناو دەستی ئەو وڵاتە ئیقلیمیانەی كە دژی خەبات و ئامانجی پێشمەرگە و گەلی كوردستانن، جارێ ئێمە لەناو شەڕداین و شەهید و قوربانی دەدەین، ئیتر چۆن ئەمە جێگای قبووڵكردنە كەسانێك لە بەیانی تا ئێوارە سەرقاڵی كەیف و خۆشی خۆی بێت، شەوێش بچێتە سەر شاشەی تەلەفزیۆنەكان قسە بۆ ساردكردنەوەی خەڵك و لەخشتەبردنیان بكات؟ من نازانم چۆن لەسەر شاشەی تەلەفزیۆنەكان قبووڵ دەكرێت كەسانێك تەشهیر و قسەی سووك بە كەسانێك بڵێن كە رۆژانە لەپێناو پاراستنی خەڵكی كوردستان و خێزانی ئەودا، تەرمی ئازیزانی بنێژێت؟ ئەمە پەروەردەی چ قوتابخانەیەكە كە وا لە ئەخلاق و دابونەریتی جوانی كوردایەتی دووركەوتووەتەوە؟ ئەم هەلە مێژووییەی بۆ كورد هاتۆتەپێشەوە پێویستی بە یەكگرتن و یەكڕیزییە، نەك شەڕە كورسی و قسەكردن لەسەر دەستكەوت و پۆست، كورد پێویستی بە رێككەوتنێكی جددی و رێبەرێك هەیە رێبەرایەتی هەموو میللەتی كورد بكات و بمانگەیەنێتە كەنارێكی ئارام، چۆن دەبێت لە كەشتییەكدا 10 كابتن هەبن، بەبێ ئەوەی گوێ بدرێتە ئەوەی ئەگەر كەشتیەكەمان نغرۆ بێت، هەموو نغرۆ دەبین؟ لە شەمەندەفەڕ و ئۆتۆمبێل و كەشتی یەك كابتن پێویستە و ئەوانی تر دەبێت لە خزمەت و هاریكاری رێبەرایەتی ئەودا بن، و كابتنەكەش لەپێناو هەموواندا ئاراستەمان دەكات، با رەخنەو پێشنیار و بۆچوونی جیاواز هەبێت، بەڵام هیچ گەلێك نییە بچن دوژمنایەتی خەبات و گیانفیداكاری خۆی بێت و ئاستەنگ لەبەردەم سەرۆكەكەی لەشەڕدا دابنێت. بەڵام خۆشبەختانە ئەمڕۆ لە قۆناغێكی هەستیاردا رابەرێكمان هەیە كە بەدیلێك نییە ئەو تایبەتمەندێتیەی ئەوی تێدا بێت و هەموو میللەتی كورد قبووڵی بكات، ئەو سەرۆكە پێویستە نەك تەنیا بۆ ئەم پارچەیەی كوردستان، بەڵكو بۆ كوردستانییەكانی هەرچوار پارچەی كوردستان، فەرموون لە باشوور و رۆژهەڵات و رۆژئاوا و باكوور چی سەركردەیەك هەیە، بەقەد ئەو جێگای ئومێد و دڵنەوایی میللەت بێت؟ ئەوەتا لە كوردستانی باكوور بەڕێز عەبدوڵا ئۆجەلان لە زیندانە و لە كوردستانی رۆژهەڵاتیش لە دوای بەڕێزان د.قاسملوو و د. شەرەفكەندی چ سەركردەیەك هەیە هەموو میللەتی كورد لەسەری كۆك بن و یەكگرتوو بن؟ لە كوردستانی عێراقیش دۆخی تەندروستی بەڕێز مام جەلال سەقامگیر نییە، ئەمڕۆ ئومێدی كورد و كوردستانییەكان لەسەر جەنابی سەرۆكە، ئیتر بۆ دەبێت كەسان و گروپی وا هەبێت كار لەسەر شكاندنی ئەو بكەن و درۆ و دەلەسەی دنیای بۆ هەلبەستن، بۆ ئەوەی دڵی خەڵكی بەرامبەر سەرۆكەكەیان رەش بكرێت؟ ئەمەی ئەمڕۆ لە گۆڕەپانی سیاسەت و حزبایەتیدا دەكرێت، ناڕاست و نادروستە، لەبەر ئەوە دووپاتی دەكەینەوە كە پێویستە رێگە لەبەردەم داواكاریی میللەتی كورد نەگیرێت و هەمووان پێكەوە گرێدراوین و بەرژەوەندی هاوبەشمان هەیە و پێویست ناكات دوای بەرژەوەندی و مەرام و ویستی وڵاتانی بیانی بكەوین. چ كەسێك هەیە دەستبەرداری میللەتی خۆی بێت و بڵێت ئیتر دەوڵەتم ناوێت، یان دەست لە جەژنی نەتەوایەتی خۆی بەربدات و بڵێت ئیتر نەتەوەیی نیم؟ من پێموایە لە ئێستادا پیلانێك لە دژی كورد دادەڕێژرێت لەلایەن ئەو وڵات و نەتەوانەی دژی دەوڵەتی سەربەخۆی كوردستانن.
* لەشەڕی داعشدا زۆر هێز و سوپا هەبوو، بەڵام لەناو هەموویاندا ئەمەریكا و هاوپەیمانەكان هێزی پێشمەرگە و جەنابی بارزانی-یان هەڵبژارد بۆ رووبەڕووبوونەوەی تیرۆریستان؛ ئایا خوێندنەوەت بۆ ئەمە چییە؟
- لەسەر خاك هیچ هێزێكی دیكە نییە لە رۆژهەڵاتی ناوەڕاست و جیهان وەكو پێشمەرگە شەڕی داعش بكات، لەكاتێكدا بوونی ئەو دەوڵەتە تیرۆریستیە هەڕەشەیە بۆ هەموو جیهان. پێشمەرگە بە جەسارەتێكی مەزنەوە شەڕدەكات و فیداكارییەكانی هەژمار ناكرێت، ئەمەش بێ سەركردە و رێبەرایەتی دروست نەبووە و هەمووی لەژێر فەرماندەیی و سەرپەرشتی راستەوخۆی جەنابی بارزانی بووە، دیپلۆماسیەت و پێوەندی و رابەرایەتی جەنابیان بووە كە وایكرد گرنگی بە هێزی پێشمەرگە بدرێت. سیاسەتی واقیعبینانەی پارتی دیموكراتی كوردستان كە لەسەر بنەمای پاراستنی مافی نەتەوەی كوردە، وایكردووە دوور بین لە سیاسەتی هەڵدێر و كورتبینانە و تەسلیم بوون، سیاسەت لەسەر راستی و دروستی میللەتی كورد بووە، هەروەكو چۆن جەنابیان پێداگیری لەسەر ئەوە دەكات كە نابێت پێشێلكاری بەرامبەر هیچ نەتەوە و گەلێكی دیكە بكرێت، هەرواش سازش لەسەر دۆزی كورد ناكات، ئەم سیاسەت و بیروباوەڕانەیە وایكردووە خەڵكی و دەوڵەتان رێز لەهێزی پێشمەرگەو فەرماندەكەی بگرن و زیاتر گرنگیمان پێ بدەن.
* قسەوباسێكی زۆر لەسەر ئۆپەراسیۆنی ئازادكردنی شاری موسڵ دەكرێت. هەموو بۆچوونەكان بەو ئاراستەیە دەچن بەبێ هێزی پێشمەرگە زەحمەتە ئەو شارە ئازاد بكرێت. ئایا خۆئامادەكردن بۆ ئەو ئۆپەراسیۆنە چۆنە و رزگاركردنی ئەم ناوچانە چ كاریگەرییەكی لەسەر خێراكردنی ئۆپەراسیۆنەكە هەیە؟
- ئەو جێگایەی پێشمەرگە لە دوائۆپەراسیۆنیدا ئازادی كرد، زۆر نزیكی دەكاتەوە لە شاری موسڵ، بە رادەیەك لە رووی سەربازییەوە ئازادكردنی گوندەكانی هەردوو میحوەری خازر و گوێڕ بە دەستی پێشمەرگە كلیلی ئازادكردنی شاری موسڵە، لە رووی سیاسیشەوە كورد میللەتێكی قاچاخ نییە لەناو شاری موسڵ و دەشتی نەینەوا، كورد و كوردستانییەكان هاووڵاتی رەسەنی ئەو شارەن، هەموو پلانەكانی حكومەتی بەغدا لەساڵی 1925ـەوە تا ئێستا بۆ كەمكردنەوەی كورد و لاوازكردنی ئەم پێكهاتە سەرەكیەی موسڵ لەو شارەدا سەركەوتوو نەبووە، هەروەكو چۆن لە سووریا پشتێنەی عەرەب نەیتوانیوە ناسنامەی ئەم میللەتە بسڕێتەوە. حكومەتی عێراق هەر لە زووەوە هۆزە عەرەبیەكانی هێناوەتە ئەم ناوچەیە و نیشتەجێی كردوون و لە بەرامبەردا گەلی رەسەنی ناوچەكە كە گەلی كورد بووە دوورخراونەتەوە. كورد میوان نییە لە موسڵ تاوەكو چاوەڕوانی (بەڵێ)ی حكومەتێكی دیاریكراو بكات، موسڵ شاری پێكەوەژیانی عەرەب و كورد و توركمان و مەسیحییە بەهەموو تائیفەی سوننە و شیعە و كلدو ئاشوری و سریان و ئەرمەن و ئێزیدی و شەبەك و كاكەیی، لەمێژوودا لەهەموو سەرژمێری و داتاو ئامارەكان هەر لەدەوڵەتی عوسمانییەوە تا ئێستا دەركەوتووە كە ژمارەی كوردو خێزانەكان لە شاری موسڵ بەرامبەر هەموو پێكهاتەكانی تری بووە. لە هەڵبژاردنەكاندا روون و لەبەرچاو بوو كە ئەگەر كورد بیویستایە پارێزگاری موسڵ كورد دەبوو، ئێستاش رێژەی هەرە زۆری كورسییەكانی ئەنجومەنی پارێزگای موسڵ كوردە. لە رووی سەربازییەوە مومكین نییە عێراق بەبێ هاوكاری پێشمەرگە بەو سوپا تائیفییەوە بتوانێت شاری موسڵ ئازاد و كۆنتڕۆڵی بكاتەوە. بەپێچەوانەوە پێویستە پێشمەرگە هاوكاری ئەو سوپایە بكات، چونكە داعش هەڕەشەیە بۆ هەمووان، تەنانەت ملیۆن و نیوێك خەڵك ئاوارە بووە و روویان لەكوردستان كردووە و خەرجی و بارگرانییەكی زۆریان لەسەر پرۆژە خزمەتگوزاری و هەردوو كەرتی تەندروستی و پەروەردەیی هەیە، لەمانەش نیوەی ئەو ئاوارانەن كە لە موسڵەوە روویان لەم هەرێمە كردووە، كە پێویستە كار بكرێت بۆ ئەوەی بگەڕێنەوە سەر ماڵ و حاڵی خۆیان.
* ئەگەر باسی ئۆپەراسیۆنەكە و واقیعی شەڕەكە بكەین، كە داعشەكان پەنا دەبەنە بەر بۆمبی دانراو و دەیان فێڵی سەربازی و دانانەوەی تەقەمەنی، ئایا تاچەند پێشمەرگە فێری تەكنیكی ئەو رێكخراوە تیرۆریستییە بووە؟
- شەڕی داعش و لەناوبردنی ئاسان نییە، چونكە هێزێكی تیرۆریستی جیهانییە و چەندین وڵات بۆ یەكلاكردنەوەی مەرام و مەبەستی خۆی بەكاریان دەهێنێت، سەدان ئەفسەری سەربازی و دەرەجەداری سیخوڕی و هەواڵگری و (قوة خاصة) و ئەمن و ئەمنی تایبەت و دەیان گروپ و دەرەجەداری سەربازی سەردەمی رژێمی بەعسیش لەناو ئەو گروپە چەكدارەدان، ئەمە جگە لەدەیان هەمەری سەربازی و چەك و تەقەمەنی پێشكەوتووی سوپای عێراق كە كەوتبووە ژێر دەستیان و بەباشترین و مەترسیدارترین چەكەكانی ئەم سەردەمە دادەنرێت، بگرە بوونی ئەو رێكخراوە تیرۆریستییە بۆ ماوەی دوو ساڵ لەو شارەدا وایكردووە خەڵكێكی زۆری عەرەبی سوننە دوای ئەو تیرۆرستانە بكەوێت، بەڵام پێشمەرگە سەلماندی كە دەركردن و لەناوبردنی ئەو تیرۆریستانە ئاستەم نییە. ئێمەش لەو ماوەیەدا شارەزاییەكی باشمان پەیدا كردووە لەسەر تەقاندنەوەی بۆمب و ئەو تەقەمەنییانەی بۆ لێدانی پێشڕەوی پێشمەرگە و سوپای عێراق دانراوە، بۆ هەڵوەشاندنەوەی ئەم پلانە سەربازییەش ئێمە پەنامان بردۆتە بەر هێزەكانی ئەندازیاری سەربازی كە لەلای هێزی پێشمەرگە و زێرەڤانی و هێزەكانی پشتیوانی بوونیان هەیە و خاوەنی شارەزاییەكی مەیدانی زۆر پێشكەوتوون، سەبارەت بە هەموو یەكە و هێزەكانی تریش بەهەمان شێوە پێشمەرگە خاوەنی مەشق و راهێنانی سەربازییە و توانای گەورەی هەیە.
* ئایا لە دوای داعش و راگەیاندنی دەوڵەتی كوردستان دەتوانرێت بوترێت كە كورد خاوەنی هێزێكی سەربازی پێشكەوتووە و دەكرێت ببێتە بنەمایەك بۆ دەوڵەتی داهاتووی كوردستان؟
- هەموو دەوڵەتانی دنیا بۆ بەرگریكردن لە خۆیان و هێرشكردن سوودیان لەهێزی سوپای خۆیان وەرگرتووە، تەنانەت هیچ دەوڵەتێكی سەقامگیر نییە بێ هێزێكی گەورەی سوپا بتوانێت كۆنتڕۆڵی ئارامی و سەقامگیری وڵاتەكەی بكات، ئێمەی كوردیش پێویستە لە ئاشتی و شەڕدا بە بەردەوام هێزەكانمان بەهێزتر و بەتواناتر بكەین. چونكە هیچ وڵات و هەرێمێك نییە بێ بوونی هێز و سوپا بتوانن ئاسایشی خۆیان و بواری ئابووری خ خۆیان بپارێزن، هێزی كوردی بۆ دەستدرێژیكردنە سەر نەتەوە و دراوسێكانمان نییە، بەڵكو بۆ پارێزگاریكردنە لە میللەتێكی مەزڵووم كە كۆمەڵكوژی بەرامبەری ئەنجامدراوە، لەگەڵ ئەمەشدا هەر كەسێك ستەم لە میللەتی كورد بكات، بەتوندی رووبەڕووی دەبینەوە.
* حەشدی شەعبی پێداگیری دەكات بەوەی لە شەڕی ئازادكردنی موسڵ بەشدار بێت، لەمەشدا مەترسی زۆرە كاری تۆڵەسەندنەوە و رفاندن و پێشێلكردنی بنەماكانی مافی مرۆڤ بكات، ئایا ئێوە چۆن مامەڵە لەگەڵ ئەم واقیعەدا دەكەن؟
- ئەو هەڵسوكەوت و زانیارییەی هەمانە لەسەر كاروكردەوەی هێزەكانی حەشدی شەعبی لە رفاندن و كوشتن و سووتاندن و وێرانكردنی ماڵەكان و تۆڵەسەندنەوەی تائیفی بەرامبەر سوننەی عەرەب، هیچ ئومێدێك بۆ ئێمە ناهێڵێتەوە، تەنانەت لێدوانەكانی فەرماندەكانیان جێگای دڵخۆشی نییە، ئومێدەوارین ئەمە بیروبۆچوونی سەركردەكانیان نەبێت، هەر بۆیە سەركردایەتی ئێمە لە هەموو كۆبوونەوە و گفتوگۆیەكدا لەگەڵ هاوپەیمانەكان و سوپای عێراق مەسەلەی بەڕێوەبردنی شاری موسڵ و رێككەوتن باس دەكات و بە ستراتیژیەتی گرنگی دادەنێت، داعشیش دوژمنی مرۆڤایەتییە و سەركردایەتی كوردستان چ بڕیارێك بدات راستەوخۆ لەلایەن ئێمەوە جێبەجێ دەكرێت.