هەرێمی كوردستان لە بەردەم بارودۆخێكی هەستیار و ئاڵۆزدایە، لە هەمان كاتدا بەرەو سەربەخۆیی هەنگاو دەنێت، لەم واقیعە پڕ لە ئاڵۆزی و گۆڕاوەی رۆژهەڵاتی ناوەڕاست سەرۆك بارزانی هەموو هەوڵەكانی خۆی بۆ تێپەڕاندنی قەیرانی سیاسی و ئابووری خستۆتە گەڕ، جێگای نائومێدیشە پەكەكە و هەندێك لایەنی سیاسی لە ناوخۆی باشووری كوردستان و لەم قۆناغەدا هەوڵدەدەن هەرێمی كوردستان تووشی بارێكی ناسەقامگیری دژوار بكەن. بۆ قسەكردن لەسەر ئەم پرسە و چەند پرسێكی دیكە ئەم دیمانەیەمان لەگەڵ د.عومەر رەنگینی مامۆستای سكوڵی ئیسلامی لە زانكۆی سلێمانی ئەنجام دا و بەمجۆرە وەڵامی پرسیارەكانی داینەوە.

* كوردستان بەرەو سەربەخۆیی هەنگاو دەنێت و پرۆسەی سەربەخۆیی بەرەو پێشەوە دەچێت، ئایا چۆن ئەم بارودۆخە دەخوێنیتەوە و تا چەند كەشتی سەربەخۆیی لەسەر دەستی سەرۆك بارزانی دەگاتە كەناری ئارام؟
- بێگومان رۆژهەڵاتی ناوەڕاست بەگشتی و كوردستان و دەوروبەری بەتایبەتی بە ئاڵوگۆڕێكی ریشەییدا تێدەپەڕێت، تەنانەت دەتوانین بڵێین ناوچەكە گڕی گرتووە. لە ناو ئەم دۆخە پڕ لە كێشمەكێش و ئاڵۆزییەدا هەموو ئاماژەكان بەو ئاراستەیەدا دەچن كە رێككەوتننامەی سایكس پیكۆ بەرەو كۆتایی دەچێت و دوور نییە سنوورە كۆنەكان هەڵبوەشێتەوە، تەنانەت رەنگە زۆرێك لە وڵاتانی رۆژهەڵاتی ناوەڕاست بە سەر چەند ناوچەیەكدا دابەش بێت، -فیدڕاڵی بێت، یاخود سەربەخۆیی-، ئێمەی كوردیش كە سەدەیەكە بە دەست رێككەوتننامەی سایكس پیكۆوە دەناڵێنین، لە ئێستادا دەرفەتێكی مێژووییمان بۆ هەڵكەوتووە كە دەكرێت سوودی لێوەربگرین و بەرەو سەربەخۆییمان بەرێت، ئەمەش ئەركێكی قورس دەخاتە سەر هەموو هێزە سیاسییەكانی گۆڕەپانی خەباتی كوردایەتی، بەتایبەتیش لە باشووری كوردستاندا، هەر بۆیە زۆر گرنگە لەم قۆناخەدا هێزە سیاسییەكان بەرەو یەكگوتاری بڕۆن و هیچ نەبێت لە پێشدا لە باشووری كوردستان، كە من پێموایە یەكگوتاری و یەكڕیزیی ناوماڵی كورد لە كوردستانی باشوور دەبێتە بناغەیەكی پتەو بۆ ئەوەی پارچەكانی دیكەی كوردستانیش بەهەمان ئاراستەدا بڕۆن، بەڵام ئەوەی منی زۆر نیگەران كردووە و جێگای داخە ئەوەیە كە هێزە سیاسییەكانی كوردستان لە بری ئەوەی هەمووان لە دەوری حكومەتی هەرێمی كوردستان كۆببنەوەو بە ئاراستەی سەربەخۆیی بچن، كەوتوونەتە ململانێیەكی توند، لەكاتێكدا دەبووایە پاڵپشتی ئەو حكومەتەیان بكردایە كە موڵكی یەك حزب نییە و بەرهەمی دەریایەك خوێنی شەهید و سەدان ساڵ قوربانییە، بەرهەمی ئەو خەباتەیە كە لە سەردەمی شێخ مەحموود و ژەنەراڵ بارزانی تا ئێستا قوربانی داوە. ئەگەر ئەم حزبە سیاسییانەی كوردستان بەرژەوەندیی میللەتیان دەوێت، دەبێت لەسەر مێزی گفتوگۆ كۆببنەوە بۆ ئەوەی یەكگوتاریان هەبێت و بە ئاراستەی سەربەخۆیی بڕۆن، چونكە ئێمە ئەزموونێكی دوور و درێژمان هەیە لەگەڵ بەناو فیدڕاڵی و بەناو حوكمی زاتی كە لە هیچ كام لەم ئەزموونانە سەركەوتوو نەبووین، تاكە ئەزموونێك كە دەتوانێت بەرەو كەناری ئارامیمان بەرێت، سەربەخۆیی ئەم بەشەی كوردستانە. ئالێرەدا بۆمان دەردەكەوێت چەند گرنگە یەكڕیزی و یەكگوتاریی هێزە سیاسییەكان كە لەم قۆناغەدا پاڵپشتی لەو بانگەشەیەی سەرۆك بارزانی بكەین بۆ ئەوەی سەربەخۆیی بەدەست بهێنین و دواتر بتوانین پارێزگاریشی لێبكەین.


* ئێستا لە ناوچەی سلێمانی جۆرێك لە میدیا بە ئاشكرا دژی پرۆسەی سەربەخۆیی كوردستان دەنووسن، كۆمەڵێك هەرزەكار و گەنجی هاندراو هەن، دژایەتی ئەو كەسانە دەكەن كە بڕوایان بە سەربەخۆیی هەیە، ئەوەش لە كاتێكدایە كە ژینگەی سیاسیی سلێمانی ژینگەی قوربانیدان بووە بۆ سەربەخۆیی، ئایا دەركەوتنی ئەمجۆرە بۆچوونانە لە ژینگەیەكی قارەمانپەروەری وەك سلێمانی بۆچی دەگێڕیتەوە تاچەند دەستی دەرەكی لە پشتە؟


- من خۆم خەڵكی سلێمانیم و شایەتحاڵی ئەوە دەدەم كە سلێمانی هەمیشە مەڵبەندی كوردایەتی و قوربانیدان بووە، هەر بۆیە ئەو شارە بە (شاری هەڵمەت و قوربانی) ناوبانگیشی دەركردووە، تەنانەت پارتی دیموكراتی كوردستان و زۆربەی حزبە كوردستانییەكان و حزبەكانی پێشتریش وەكو حزبی هیوا و رزگاری سەرچاوەكەی لە سلێمانییەوە بووە، جێگای نیگەرانییە كەسانێك لەناو ئەم ژینگەیەدا بێن و لە میدیاكانەوە بانگەشەی ئەوە بكەن دژی سەربەخۆیی كوردستان بن، ئەگەر ئەو كەس و گرووپانەش كە پێشتر لەناو ئۆپۆزسیۆندا بوون، دەبێت ئەو راستییە بزانن كە ئۆپۆزسیێۆنیش بن، نابێ دژی سەربەخۆیی كوردستان بن، بەتایبەتی لە ئێستادا كە كیانێكی سەربەخۆمان نییە، هەر بۆیە ئۆپۆزسیۆن دەتوانێت رەخنەی هەبێت و بەرنامە و پرۆژەی بۆ گۆڕانكاری لە وڵاتدا هەبێت، نەك ئۆپۆزسیۆن یا حزبە سیاسییەكان لە هەوڵی یەكتر سڕینەوە و رەشكردنەوەی پارتێكی سیاسی دیكەدا بن، لە كاتێكدا ئەزموون دەریخستووە كەس ناتوانێت بەرامبەرەكەی بسڕێتەوە، رێزم هەیە بۆ ئەو كەسایەتییانەی كە پێشتر لە ناو ئۆپۆزسیۆندا بوون كە من لە نزیكەوە زۆریان دەناسم، بەڵام وەكو كەسێكی ئەكادیمی قسە دەكەم و دەبێت بزانین حیكمەتی حزبی سیاسی و ئۆپۆزسیۆن لە ناو پرۆسەی دیموكراتی و دەستاودەستكردنی دەسەڵاتدا سڕینەوەی بەرامبەر نییە و لە دنیای دیموكراتییەتدا ئۆپۆزسیۆن یارمەتیدەرە بۆ حكومەت، لەلایەكی ترەوە ئێمە لە كوردستان كیانێكمان هەیە كە دەوروپشتی ئاگرە و ئەم كیانە ئەگەر هەڵە و كەموكورتیشی لە پرۆسەی حوكمڕانیدا هەبێت، لەباربردنی كارەساتە بۆ نەتەوە، هەر بۆیە ئەمەی لە سلێمانی روودەدات بەتایبەتی لەناو هەندێك لە میدیاكانەوە بۆ ناكامڵبوونی سیاسی دەگەڕێتەوە، چۆن دەبێت لە دژی سەربەخۆیی كوردستان بین و لە هەوڵی رووخاندنی حكومەتدا بین، لە كاتێكدا دەبێت لە هەوڵی ئەنجامدانی چاكسازی لە حكومەت و دروستكردنی كیانی سەربەخۆ بین؟ دژایەتیكردنی سەربەخۆیی كوردستان دژایەتیكردنی خوێنی شەهیدان و بیروبۆچوونیانە، چۆن دەبێت دژی بیروبۆچوون و ئامانجی شەهیدەكانمان بووەستینەوە؟ بۆیە من داوا لە هەموو رۆشنبیران و مامۆستایانی زانكۆ و سیاسەتمەدار و حزب و هێزە سیاسییەكان و گشت چین و توێژەكانی ناو كۆمەڵگە دەكەم با كار بۆ خاڵی هاوبەش و یەكبوونمان بكەین، زۆر ئاساییە خاڵی جیاوازیشمان هەبێت، هەروەكو چۆن لە قورئانی پیرۆزدا هاتووە كە باس لەوە دەكات چۆن دیالۆگ لەگەڵ ئایینزاكانی تردا بكەین دەفەرموێت: (تعالوا إلی كلمة سواء بیننا و بینكم ) راستە ئێمە لە زۆر رووەوە جیاوازین، بەڵام با كۆ ببینەوە لەسەر خاڵە هاوبەشەكانمان كە خاڵی هاوبەشمان زۆرە، بەتایبەتی لە پرسی سەربەخۆیی كوردستاندا كە بڕوام وانییە كوردێك هەبێت لە هەر چوار پارچەی كوردستان كە ئاوات و ئامانجی سەربەخۆیی كوردستان نەبێت.


* لە ئێستادا هەست دەكرێت لایەنێكی وەكو پەكەكە بە پشتیوانی دەستی دەرەكی هەوڵدەدەن هەرێمی كوردستان تووشی بارێكی ناسەقامگیری و دژواری بكەن، ئایا پەكەكە بۆچی ئەم كارە دەكات و بۆچی حەزیان لێیە ئەزموونەكەی كوردستان تێكبچێت؟
- پەكەكە هێزێكی گەورەیە و رێزم هەیە بۆ هەموو گەریلایەك كە لە پێناو كوردستاندا چەكی لەشان كردووە، هیوادارم پەكەكە زۆر لەوە گەورەتر بێت كە هەوڵی لەباربردنی ئەزموونی كوردستان و دۆخی نائارامی و ناسەقامگیری بدات، ئەوەی دەمێنێتەوە سەركردایەتی پەكەكەیە لە قەندیل، پرسیار ئەوەیە: ئایا گەریلا، یا چەكدارەكانیان بە چ ئاراستەیەكدا دەبەن؟ ئومێدەوارم سەركردایەتی پەكەكە ژیرانەتر و بە كامڵبوونێكی سیاسییەوە بیر لەوە بكەنەوە كە شێواندنی هەرێمی كوردستان و زیانگەیاندن بە سەركردایەتی سیاسیی كوردستان لەم هەرێمە هەموومان زیانمان بەردەكەوێت بە پەكەكەشەوە لەپێشدا، چونكە كوردستانی باشوور چرایەكی رووناكە بۆ هەموو پارچەكانی تری كوردستان. ئەگەر شتێكی وا لە ئارادا بێت و هێزگەلێك لە كوردستانی باشوور بە قینی ئەستوور لە پێناو ململانێی خۆیان ئەو جۆرە بیركردنەوەیان هەبێت، ئەوا بە هەڵەدا دەچن و ئەوەش تەنیا لە بەرژەوەندی نەیاران و داگیركارانی كوردستاندایە لە هەر چوار پارچەی كوردستان.



* هاوشانی ئەو تەحەدییە سیاسییانەی رووبەڕوومان بۆتەوە، ئێستا قەیرانێكی دارایی گەورەش رووی تێكردووین، لەم قۆناغەدا زۆر پێویستە حزبە سیاسییەكان جیاوازییەكان بەلاوە بنێن و لەسەر ئەو تەحەددی و قەیرانە سیاسییە هاودەنگ و هاوهەڵوێست بن، بەڵام ئەوەی جێگەی داخە حزبەكان ئەم تەحەددی و قەیرانەیان بە جددی وەرنەگرتووە. ئایا بۆ ئێستا تا چەند گرنگە حزبەكانی كوردستان لانیكەم بۆ تێپەڕاندنی ئەم قەیرانە هاودەنگ و هاوهەڵوێست و یەكڕیز بن؟
- بە تەئكید قەیرانی سیاسی و ئابوری دروست بووە و دەستی عێراق و دەوروبەریشی تێدایە، پیلانێكیان داڕشتووە بۆ ئەوەی ئێمە بەم ئاستە بەرن، قەیرانی سیاسی و ئابووری لە كوردستان دەستی ئەو نەیارانەی تێدایە كە چاویان بەو گەشەیە هەڵنایەت كە لە كوردستان بەدیهاتووە، لە دوای راپەڕینی ساڵی 1991ـەوە گۆڕانكاریی گەورە لە ژێرخانی ئابووری و پەرەپێدانی سەرجەم سێكتەرەكان هاتۆتەدی، بۆ نموونە ئەو كات تەنیا یەك زانكۆمان هەبوو، ئێستا 7 بۆ 8 زانكۆی حكوومیمان هەیە و لە هەموو گوندێك قوتابخانەیەكمان هەیە. كەواتە لێرەوە رۆڵی نەتەوەویی و نیشتمانپەروەریی هەر تاكێك و گروپ و هێزێكی سیاسی دەردەكەوێت بەوەی كار بۆ یەكڕیزی و یەكگوتاری بكەن و لە هەوڵی یارمەتیدانی حكومەتەكەیان بن بۆ تێپەڕاندنی قەیرانەكە. پێم سەیرە لە حكومەتێكی بنكەفراواندا كە هەموو حزبە ئیسلامی و عیلمانییەكانی تێدا بێت، هێزە سیاسییەكان لە یەكتر نزیك نەبنەوە، دەبووایە سەران و سەركردەكانی حزب و هێزە سیاسییەكان لە دەوروبەری حكومەت كۆببوونایەتەوە و بە هەمووان كاریان بۆ چارەسەركردنی دۆخەكە بكردایە، چونكە ئابووری بناغەی دەوڵەتە و پارێزەری قەوارەی سیاسیمانە، چارەسەرنەكردنی قەیرانەكەش هیچ هیوا و ئومێدێكمان بۆ ناهێڵێتەوە. بەداخەوە لەناو حكومەت هەندێك هێز هەن لە بری ئەوەی هاوكار و یارمەتیدەر بن بۆ تێپەڕاندنی قەیرانی ئابووری، كەچی وەكو دەرفەتێكی حزبی ئەم نەهامەتییە دەقۆزنەوە تاوەكو چەند دەستكەوتێكی حزبییان دەست بكەوێت، لە دنیای سیاسەت و ناو گەلانی پێشكەوتوو لەكاتی قەیرانەكاندا هەمووان ناكۆكییەكانیان بەلاوە دەنێن و لەناو قەیرانی وا گەورەدا ململانێی تەسكی حزبایەتی ناكەن و بیر لە پۆست و بەدەستهێنانی دەستكەوتی تەسكی حزبایەتی و شەخسی ناكەنەوە، بەڵكو تەنیا بیر لەوە دەكەنەوە كە چۆن بە كۆدەنگی و هەماهەنگی قەیرانەكە تێدەپەڕێنن. ئەمڕۆ قەیرانی ئابووری لە سەر هەموو تاكێكی كورد زۆر سەختە، جا ئەو تاكە هاووڵاتییەك بێت كە لایەنگری ئۆپۆزسیۆن بێت، یان لایەنگری حزبەكانی ناو دەسەڵات بێت، یان كەسێكی فەرمانبەر و كاسب بێت. من لە گەشتێكمدا بۆ مەریوان كە بەشداری كۆنگرەیەكی ئایینیم كرد، لە كاتی بەسەركردنەوەم بۆ بازاڕی كاسبكارەكانی ئەو شارەی كوردستانی رۆژهەڵات، پێیان وتم قەیرانە ئابوورییەكەی كوردستانی باشوور بە دوو قات شوێنەواری لەسەر كوردانی رۆژهەڵات هەبووە، واتە ئەم قەیرانە بۆ كورد گشتگیرە، بۆیە بەو هێز و حزبە سیاسییانە دەڵێم با قەوارە و كیانی سەربەخۆی خۆمان هەبێت و بگەینە ئامانج و خەونە گەورەكە كە سەربەخۆیی كوردستانە، ئەو كات با ململانێ لە سەر دەسەڵات و پۆست لە ناو چوارچێوەی پرۆسەی دیموكراتی و مافی مرۆڤ و نیشتمانپەروەری بكرێت.


* لەم بارودۆخە حزبێكی سیاسی وەكو كۆمەڵی ئیسلامی لە بری ئەوەی هەوڵەكانی خۆی چڕ بكاتەوە بۆ رێكخستنەوەی نێوماڵی كوردستان، بەڵام بەداخەوە خەریكە دووسەنگەری دروست دەكات، ئایا تاچەند گرنگە ئەمڕۆ حزبەكان لە بری دروستكردنی دوو سەنگەری و لێكترازانی نێوماڵی كوردستان، هەوڵەكانیان بۆ ئاشتكردنەوەی هێزە سیاسییەكان یەكبخەن؟
- حزبە سیاسیەكانی كوردستان ئەركێكی نەتەوەیی و نیشتمانییان لەسەرە بۆ پشتگیریكردنی حكومەتی كوردستان تاوەكو ئەو قەیرانە سەختەی كە لەسەر هاووڵاتییانە تێپەڕێنێت. كۆمەڵی ئیسلامی كە پاشگری ئیسلامیشی بە خۆیەوە ناوە، وەكو هەموو حزبێكی دیكەی كوردستان جگە لە ئەركە نیشتمانی و نەتەوەییەكەی، ئەركێكی ئایینیشی لەسەر شانە، ئەویش پاراستنی یەكڕیزی و هەماهەنگی كردنە لەگەڵ حكومەت بۆ تێپەڕاندنی دۆخەكە، ئەگەر وا نەكەن یەكەمجار خوا لە خۆیان دەڕەنجێنن، چونكە دەبنە هۆكاری ئەوەی شیرازەی كۆمەڵگە تێكبدەن و لێكترازان لە نێو هێزە سیاسییەكانی كوردستان دروست بكەن، لەلایەكی ترەوە خەڵكی متمانەی بە حزبی ئیسلامی نامێنێت، چونكە ناكرێت حزبی ئیسلامی هۆكار بێت بۆ تێكدانی یەكێتی نێو ریزەكانی نەتەوەی كورد كە بۆ گەیشتن بە ئامانجی سەربەخۆیی كوردستان پێویستە، یاخود سەختی بار و گوزەرانی ژیانی خەڵك بكاتە دەرفەتێك بۆ ناوزڕاندنی نەیارەكانیان، واتا ئازار و ئەشكەنجەی هاووڵاتییان بكاتە كارت و دەرفەتێك بۆ كۆكردنەوەی دەنگی زیاتر. باشە ئەگەر مەبەست لە حزبی ئیسلامی خزمەتی ئوممەی موسڵمانانە، بۆچی ئەو ناكۆكییە لە نێوان حزبە ئیسلامییەكان هەیە و تەنانەت ناكۆكی و دووبەرەكی شۆڕ بۆتەوە ناو كۆمەڵگە و قوتابیانی زانكۆ و فەقێ و مامۆستایانی ئایینی و خەڵكی مزگەوت، لە كاتێكدا نانەوەی دووبەرەكی لە رووی ئایینییەوە شتێكی حەرام و زۆر خراپە؟


* كورد خۆی لە بنەڕەتدا گەلێكی موسڵمانە ئایا حزبی ئیسلامی و بانگخوازی پێویستە؟
- ئەمە لە دوو رووەوە باس دەكەم. كۆمەڵگەی كوردستان جگە لە كەمینەیەكی كریستیان و ئێزیدی زۆرینەی موسڵمانن، بەحزبیكردنی ئایینی پیرۆزی ئیسلام مەسەلەیەكی فقهییە و تەنانەت زۆرێك لە زانایانی ئایینی ئیسلامی بەحزبیكردنی ئایینیان رەتكردۆتەوە و پێیان باش نییە بە ناوی ئیسلامەوە حزب هەبێت، خودای گەورە و میهرەبان لە دەقی قورئانی پیرۆز باس لەوە دەكات موسڵمان برای موسڵمانانە، كاتێك حزبی ئیسلامیت دروست كرد، ململانێ دروست دەبێت و هەموومان دەزانین دەرئەنجامی خراپی دەبێت، بەهەر حاڵ ئەگەر بەحزبیكردنی ئیسلام لە پێناو یەكبوونی موسڵمانان بێت و ئاراستەیان بكات بەرەو یەكبوون و خۆشەویستی و برایەتی، ئەوا كارێكی باشە، بەڵام ئەگەر حزبێك كە ناوت نا حزبی ئیسلامی بووە هۆكارێك بۆ لێكترازان و دووبەرەكی ناو كۆمەڵگەی موسڵمان ئەوە، حەرام و قەدەغەیە لە ئیسلامدا، هەروەكو چۆن مامۆستا و گوتارخوێنی ئایینی دەبێت لە دەرەوەی ململانێی سیاسی و حزبی بێت، كەچی من هەندێك مامۆستا و وتارخوێنی رۆژی هەینی دەبینم مزگەوت و مینبەری مزگەوتیان كردۆتە بەشێك لە میدیای ئۆپۆزسیۆن و بە هەمان ئاراستەی میدیا حزبییەكە قسە دەكەن، ئەمە لە كاتێكدایە كە دەبێت ململانێی سیاسی لە دەرەوەی مزگەوت بێت و مامۆستای ئایینی كە پێشنوێژ و ئیمام و پێشەوایە بۆ هەموویان، دوور بێت لەو ناكۆكی و ململانێ حزبی و سیاسییە، ئایینی ئیسلام لەمەدا روونە چەندین فەرموودەی پێغەمبەرمان( د.خ) هەیە دژی لێكترازان و نانەوەی ناكۆكی و دووبەرەكییە، هەر كەسێكیش دروستی بكات كارێكی حەرامی ئەنجام داوە. سەبارەت بەبانگخوازیش من هیچ بانگخوازێكم قبووڵ نییە، كەسانێك ئەو ناوەیان هەڵگرتووە كە لە راستیدا بانگخواز نین، ئەوان كادیری حزبێكی سیاسین و خەڵكی بۆ یەكانگیری و یەكڕیزی بانگ ناكەن، بە قەد ئەوەی كار بۆ بەرژەوەندی حزبێكی دیاریكراو دەكەن و هۆكارێكن بۆ لێكترازان، بەگشتی بانگخوازەكان ئەوەندەی هۆكار بوون بۆ لێكترازان و جیاكردنەوەی موسڵمانان ئەوەندە خزمەت بە ئایینمان ناكەن، هەر بۆیە بوونی بانگخواز بەم شێوەیەی ئێستا كە هەر بانگخوازێك بۆ لایەنێك و گروپ و حزبێك بانگ دەكات ئەمە كادیری حزبە و خزمەت بە یەكڕیزی و ئایینمان ناكات. ئەمەش دەچێتە پاڵ گرفت و كێشەی توندڕۆیی كە جیهانی ئیسلامەتی بەرەو لێكترازان بردووە.


* وەك چاودێرێكی سیاسی و ئاگادار لە هەوڵ و تەقەڵاكانی جەنابی سەرۆك بارزانی لە رووی نەتەوایەتی و هەنگاونان بەرەو ئارامی و یەكبوون و یەكڕیزیی ناو ماڵی كورد، ئایا تا چەند ئەو هەوڵانە بە گرنگ دەزانی؟
- كەس ناتوانێت نكۆڵی لە هەوڵەكانی سەرۆكی هەرێمی كوردستان لەپێناو یەكبوون و یەكڕیزی ناو ماڵی كورد بكات، هەروەكو چۆن هیچ كەس و گروپ و تاقمێك ناتوانێت رۆڵی ئەو سەركردەیە لە ناوەندە نێودەوڵەتی و ئیقلیمییەكان بسڕێتەوە كە لەپێناو كورد و كوردستان هەنگاوی بۆ ناوە، تەنانەت نەیارانی كوردیش جگە لەوەی شاهیدییان بۆ ئەو رۆڵەی داوە، ناچاریش بوون رێزێكی تایبەتیان بۆ سەرۆك بارزانی هەبێت لەبەر ئەو پێگە ناوخۆیی و نێودەوڵەتییەی كە جەنابیان هەیەتی، لەمەدا دەبێت بە ویژدانەوە باس لە شتەكان بكەین، ئێستا لە كوردستان دەرفەتی باشمان بۆ رەخساوە هێزێكی گەورەی وەكو داعش كە لەسەر دەستی پێشمەرگە تێكشكێنرا، دیارە فاكتەری هاریكاری ئەم سەركەوتنە، لە رێگەی ئەو پێوەندییە نێودەوڵەتییە بووە كە بارزانی لەناو وڵاتانی زلهێزی دنیا هەیەتی كە وایكرد ئەو وڵاتانە یارمەتی و پشتیوانی سەربازی و كۆمەكی چەك و تەقەمەنی بگەیەننە پێشمەرگە، ئەمە لە كاتێكدا بەغدا و حكومەتی عێراق بەو قەبارە و هێزە سەربازییە گەورەیە و هاوكارییەكانی ئێران و بگرە هاوپەیمانەكانیش نەیانتوانیوە سەركەوتنی گەورەی هاوشێوەی سەركەوتنەكانی پێشمەرگە بەسەر داعش تۆمار بكەن. ئەمە پێمان دەڵێت كورد لە ئێستادا پێویستی بە كەسایەتی بارزانی هەیە، بارزانی كەسێكی بەئەزموون و سەرۆكێكی دیار و بەحیكمەتە و پێویستە هەموو هێزە سیاسییەكان سوود لە ئەزموون و تواناكانی وەربگرن لە پێناو خزمەتی بەرژەوەندی گشتی بۆ هەر چوار پارچەكەی كوردستان و پرسی كورد، من دڵنیاشم هەوڵەكانی لە پێناو بەدیهێنانی خەونی گەورەی كورد بۆ سەربەخۆیی بە رێگەیەكی راست و دروست دەچێت و لە داهاتوودا كوردستانی سەربەخۆ دەبینین.