عارف تەیفور بێجگە لەوەی ئێستا بەرپرسی میحوەری خازری هێزی پێشمەرگەی كوردستانە، لە هەمانكاتدا ئەندامی مەكتەبی سیاسی پارتی دیموكراتی كوردستانە و لە دوو خولی پێشتری پەرلەمانی عێراقدا، جێگری سەرۆكی پەرلەمانی عێراق بووە، ئەمەش مانای ئەوەیە چۆن وەك پێشمەرگەیەكی كوردستان لە ئێستا لەناو هێزی پێشمەرگەدایە، لە هەمانكاتدا ئەزموونێكی گەورەی سیاسی و ژیانی پەرلەمانیشی هەیە، ئەم دوولایەنەش هەردووكیان پێوەندیان بەو هەڕەشانەوە هەیە كە ئەمڕۆ هەرێمی كوردستان رووبەڕووی دەبێتەوە، ئەوجا ئەو هەڕەشانە هەڕەشەی تیرۆریستانی داعش بێت كە راستەوخۆ لە بەرەكانی شەڕ رووبەڕوومان دەبنەوە، یان ئەو فەوزا و ئاژاوەگێڕییە بێ كە لە ناوخۆوە و لە ئاكامی تەنگژەی پەرلەمانی كوردستان هاتۆتەئاراوە. بۆ قسەكردن لەسەر هەردوو لایەنی هەڕەشەكانی تیرۆریستانی داعش و ئەو تەنگژە پەرلەمانییەی بۆتە هۆكاری ئەم ئاژاوەیە لە كوردستان، سەردانی میحوەری خازری هێزی پشمەرگەی كوردستانمان كرد و لەناو سەنگەرەكانی بەرگری ئەم دیمانەیەمان لەگەڵ عارف تەیفور ئەنجامداو بەمجۆرە وەڵامی پرسیارەكانی گوڵانی دایەوە.

عارف تەیفور بەرپرسی میحوەری خازری هێزی پێشمەرگەی كوردستان بۆ گوڵان:پێشمەرگە لە سەنگەرەكانی پێشەوە بەرەنگاری داعش دەبوونەوە و لە قەڵادزێ و سەیدسادق و كەلار بە فیتی گۆڕان كەسوكاریان شەهید و بریندار دەكران



* ئەگەر لە دەستپێكدا سەبارەت بە میحوەری خازری هێزی پێشمەرگەی كوردستان قسە بكەین، گرنگیی ئەم میحوەرە وەك پشتێنەیەكی بەرگری بۆ پایتەختی كوردستان چییە؟
- راستە ئەم میحوەرەی هێزی پێشمەرگەی كوردستان وەك پشتێنەیەكی بەرگری لە رۆژئاواوە بایەخێكی زۆر گرنگی بۆ پاراستنی هەولێری پایتەخت هەیە، بەڵام ئەم میحوەرە كە بە درێژی 38 كیلۆمەترە، پشتێنەی بەرگریشە بۆ ئاكرێ و خەبات و باشیك، لەمەش زیاتر ئەم میحوەرە كاریگەریی گەورەی هەیە لەسەر بارودۆخی موسڵ، لەبەر ئەوەی ئەگەر لە بەرزاییەكانی حەسەن شام و زەرتك بچینە خوارەوە، دەچینە ئەو ناوچانەی كە ناوچەی كوردانی شەبەك و كریستیانەكانە، ئەم ناوچانە بەهۆی هێرشەكانی تیرۆریستانی داعشەوە چۆڵكراون و خەڵكەكەی ئاوارەكراون، بۆیە ئێستا چاوەڕێی ئەوە دەكرێت هێزی پێشمەرگە ئەو ناوچانە كۆنتڕۆڵ بكاتەوە و ئەو خەڵكانە بگەڕێنەوە بۆ سەر ماڵ و حاڵی خۆیان. دوورترین خاڵی ئەم بەرەیەی پێشمەرگە 28 كیلۆمەتر لە موسڵ دوورە لە هەندێك شوێن تەنیا 18 كیلۆمەتر لە ناو شاری موسڵ دوورە، لەلایەكی دیكەوە ئەو پێشمەرگە قارەمانانەی لەم بەرەیەوە شەڕ لەگەڵ تیرۆریستانی داعش دەكەن، خەڵكی هەموو شارەكانی كوردستانن و بەشی زۆریان پێشمەرگەكانی هێزی رزگاری پێشوون كە خەڵكی سلێمانی و گەرمیان و كەلار و هەڵەبجە و قەڵادزێن، بەشێكی دیكەیان پێشمەرگە قارەمانەكانی فەرماندەیی هەولێرن، هەموو پێكەوە بەرگرییەكی قارەمانانە لەم میحوەرە دەكەن.
* ئاماژەت بەوەكرد بەشێكی زۆری پێشمەرگەكانی ئەم میحوەرە، پێشمەرگەكانی هێزی رزگاری پێشوون، ئاشكراشە هێزی رزگاری، هێزێك بوو بۆ پێشمەرگەكانی پارتی لە ناوچەی سلێمانی و گەرمیان پێكهاتبوو، ئەم پێشمەرگانە لەچەند رۆژی رابردوو لەو كاتەی لە سەنگەرەكانی پێشەوە سنگی خۆیان كردبووە قەڵغان دژی تیرۆریستانی داعش، بەڵام لە ناوچەكانی قەڵادزێ و سەیدسادق و كەلار، كەسوكاریان لەناو ناوچە و لقەكانی پارتی بوون و لەلایەن ئاژاوەگێڕ و تێكدەرانەوە بەردباران دەكران و بارەگاكانیان دەسووتێندران و كەسوكاریان شەهید و بریندار دەكران، ئایا ئەو ئاژاوەیە تاچەند كاریگەری لەسەر ئەو پێشمەرگانە هەبووە؟
- وەك لە پرسیاری پێشووش ئاماژەم پێكرد، بەشێكی زۆری پێشمەرگەی ئەم میحوەرە، پێشمەرگەكانی هێزی رزگاری پێشوون، ئەو پێشمەرگانەش خەڵكی كەركووك و گەرمیان و هەڵەبجە و قەلادزێ و سلێمانین، بۆیە كاتێك ئەو ئاژاوەیە دروستكرا و گرووپێك لە خەڵكانی تێكدەر بە دەست لە پشدانی لایەنێك، هەڵیانكوتایە سەر بارەگاكانی ناوچەكانی پارتی لە قەڵادزێ و چەمچەماڵ و سەیدسادق، هەروەها هەڵكوتانیان بۆ سەر لقی كەلاری پارتی، پێشمەرگەكانی ئەم میحوەرە زۆر زۆر لەوە نیگەران بوون، كە لە یەك كاتدا تیرۆریستانی داعش هێرشیان دەكەنە سەر و لە هەمانكاتدا بە پیلان و دەست لەپشتدانی لایەنیكی سیاسی هاوپەیمان و بەشدار لە پەرلەمان و حكومەتی هەرێمی كوردستان، هێرش دەكرێتە سەر بارەگاكانی پارتی و هێرش دەكرێتە سەر كەسوكاریان و بە هەمان نەفەسی تیرۆریستانەی داعش مامەڵەیان لەگەڵ دەكەن و لەناو بارەگاكانی خۆیان شەهید و برینداریان دەكەن. بۆیە لە رووی دەروونییەوە زۆر ناڕەحەت بوون كە دەیانبینی رق و كینەی لایەنێكی سیاسی بەرامبەر بە كەسوكاری ئەو پێشمەرگانەی لە بەرەی پێشەوەی شەڕی تیرۆریستانی داعش، گەیشتبێتە ئەو ئاستەی كە بە هەمان رەفتاری داعشییانە مامەڵە لەگەڵ كەسوكار و هەڤاڵەكانیان بكەن، بەڵام وێڕای ئەو گوشارە دەروونییەی لەسەریان بوو، زۆر جێگەی شانازییە ئەم پێشمەرگە قارەمانانە بە ورەیەكی بەرز و قارەمانانە سەنگەرەكانی خۆیان چۆڵ نەكرد و باشتر لە جاران ئامادەی بەرگری بوون، بۆ ئەوەی ئەم بارودۆخە نەبێتە فرسەتێك بۆ دوژمن و سوودی لێوەر بگرێت. بەڵام لەو ئاژاوەیەدا، ئەوەی منی نیگەران كرد، كەمتەرخەمیی هێزەكانی پۆلیس و ئاسایش و چالاكییە مەدەنییەكانی ئەو ناوچانە بوو، كە هەوڵێكی ئەوتۆیان نەدا ئەو تاقمە تێكدەر و ئاژاوەگێرە دووربخەنەوە، كە زۆر دڕندانە و نامرۆڤانە بارەگاكانی پارتییان بەردباران دەكرد و دەیانسووتاندن، بەڵام لە هەولێر لەگەڵ ئەوەی هەوادارنی پارتی زۆر زۆر تووڕەبوون، كەچی هێزەكانی پۆلیس و ئاسایش توانییان كۆنتڕۆلی بارودۆخە بكەن و نەیانهێشت بارەگای هیچ حزبێك، بەبارەگاكانی بزووتنەوەی گۆڕانیشەوە كە هاندەری ئاژاوەگێڕانەكەش بوون، هیچ زیانی پێبكەوێت.
* لە قسەكانت سەبارەت بەو تاقمە ئاژاوەگێڕ و تێكدەرە، ئاماژەت بەوە كرد كە رەفتاریان داعشیانە بووە، ئایا ئەم بەراوردەت، تۆزێك هەڵچوونی پێوە دیار نییە؟
- نەخێر، نە هەڵچوونە، نە تووڕەبوونیشە. لەبەر ئەوەی ئەگەر سەیری ئەو ناوچانە بكەین كە تیرۆریستانی داعش داگیریان كردووە و بەبیرخۆمانی بهێنینەوە چۆن رەفتاریان كردووە، ئەوجا سەیری ئەو رەفتارە نامرۆڤانەیە بكەین كە بەرامبەر ناوچەی پارتی لە قەڵادزێ كراوە، هەست دەكەین هیچ جیاوازییەكیان نییە، هەست دەكەین ئەو رق و كینە و حیقدەی داعشەكان بەرامبەر خەڵكی ئەو ناوچانە هەیانە، ئەو تاقمە ئاژاوەگێڕ و تێكدەرەش هەمان رق و كینە و حیقدیان بەرامبەر پارتی هەبووە. ئێمە وەك هێزی پێشمەرگە ئەركمان ئەوە بوو سەنگەرەكانی دژی تیرۆریستانی داعش قایمتر بكەین، چارەسەركردنی ئەو ئاژاوەگێڕییە تێكدەرییانەشمان بۆ لۆژیك و حیكمەتی سەرۆك و سەكردایەتی پارتی بەجێهێشتبوو، دەریشكەوت سەرۆك و سەركردایەتی پارتی بە بڕیارێكی حەكیمانە ئەو بارودۆخەیان هێور كردەوە. ئەو كارە تێكدەرانە نەدەبوو روو بدات، لەبەر ئەوەی ئێمە هەموومان ئێستا لە شەڕێكی گەورەی دژی تیرۆریستانی داعشداین، ئەم دوژمنە هەموومان وەك یەك سەیر دەكات، ئەمە لەگەڵ ئەوەی تیرۆریستانی داعش پەیامی پیرۆزباییان بۆ ئەو گێڕەشێوییانە نارد و پیرۆزباییان لێكردن، بەڵام ئەوەی ئەو بارودۆخەی لە كوردستان دروستكرد، دەبێت باش بزانێت، چارەنووسی كوردستان هەمووی یەكە و دەبێت هەموو پێكەوە بیر لە ئایندەی كورد و كوردستان بكەینەوە.
* لایەنیكی سەرەكی وەك پارتی كە ئێستا بەرەیەكی فراوانی شەڕی دژی تیرۆریستانی داعش بەڕێوەدەبات، كاتێك لە ناوخۆەوە لایەنێكی سیاسی خەڵك هان بدات بارەگاكانی بسووتێنن، ئایا ئەمە ناو دەنێیت چی؟
- ئەمە لە زانست و مێژووی سەربازی و شەڕدا، ناوی لێنراوە تابوری پێنجەم، بۆیە هەرچۆنێك سەیری بكەیت، ئەوجا بە ئەنقەست كرابێت، یان بە بەرنامە، ئەو ئاژاوەگێڕییە رۆڵی تابوری پێنجەمی گێڕاوە، من نازانم هەماهەنگییەك لە نێوان تیرۆریستانی داعش و ئەو لایەنە هەبووە كە بووە هۆكاری ئەو ئاژاوەگێڕییە بوون، یان نا، بەڵام ئاكامی ئەو رەفتارە تێكدەرانە و ئاژاوەگێڕییانە، بەوجۆرە شكاوەتەوە و وەك ئەوە وایە تیرۆریستانی داعش ئەو خەڵكانەیان هاندابێت لە ناوەوە ئاژاوە دروست بكەن و بارەگاكانی پارتی بسووتێنن، بۆ ئەوەی ئەم هێزە سەرەكییە بشڵەژێت و ئەوانیش هێرشی خۆیان بكەن و سەربكەون، بێگومان داعش هەر واشی كرد، لەو كاتەی هێرش دەكرایە سەر بارەگاكانی پارتی لە ناوچەكانی سلێمانی و گەرمیان، لە هەمانكات هێرشیان كردە سەر میحوەری گوێڕ و مەخموور و لەو میحوەرانە پێشمەرگە توانی تیرۆریستان تێكبشكێنن، بەڵام شەهید و برینداریشمان هەبوو، لە میحوەری خازر بە كاتیوشا و تۆپ و هاون بۆمبارانیان دەكردین، لە میحوەری كەركووك هێرشیان هێنا و تێكشكێندران. دیارە تیرۆریستانی داعش زۆر مەبەستیانە پارتی بشڵەژێت، لەبەر ئەوەی ئێستا لە بەرەی دژی تیرۆریستانی داعش، فراوانترین بەرەی دژی تیرۆریستان بەدەستی پارتییەوەیە. پێشمەرگە قارەمانەكانی یەكێتی نیشتمانی كوردستان ناوچەیەكی فراوانیان بەدەستەوەیە لەشەڕی دژی داعشییەكان، بەڵام جیاوازی بەرەی پارتی كە لە سنووری سووریا تا دەگاتە كەركووك دەگرێتەوە، لەگەڵ بەرەی جەلاولا و ئەو ناوچانە ئەوەیە، لە بەشێكیان حەشدی شەعبی هاتوونەتە بەرامبەر تیرۆریستانی داعش، واتە حەشدی شەعبی هەندێك ناوچەی گرتۆتەوە و پێشمەرگە لەو ناوچانە حەشدی شەعبییان لە نێواندایە، ئەمەش كارێكی باشە لەبەر ئەوەی بواری بۆ پێشمەرگە دروستكردووە، كە گوشاری خۆی كۆبكاتەوە بۆ پاراستنی كەركووك، ئێستا لە بەرەی باشووری كەركووك بەرەو حەویجە تیرۆریستان كۆبوونەتەوە، تیرۆریستانی داعشیش باش دەزانن، ئێستا گەورەترین ئاستەنگ لەبەردەمی ئەم شەڕەدا، پارتی دیموكراتی كوردستانە، بۆیە زۆر بە چڕی پیرۆزباییان لەو تێكدەرانە كرد كە پەلاماری بارەگاكانی پارتییان دەدا، چونكە ئەگەر پارتی بشڵەژێت، كاری تیرۆریستانی داعش ئاسان دەبێت.
* ئایا تاچەند ئەم ئاژاوەگێڕی و تێكدەرییە، بێجگە لەلایەنی ناوخۆی، دەستی دەرەكیشی تێدابووە؟
- ئەو ئاژاوەگێڕییانە لە دژی پارتی، نەك هەر تەنیا دەستی لایەنێكی دەرەكی، بەڵكو دەستی چەند لایەنێكی دەرەكی تێدابوو، پێش هەر لایەنێك دەستی بەشێك لە لایەنە سیاسییەكانی بەغدای لە پشت بوو، هەروەها شاراوە نییە ئێرانیش مەبەستێتی هەرێمی كوردستان ببێتە ناوچەی نفووزی خۆی و كۆنتڕۆلی تەواوی بەسەریدا هەبێت. ئێستا هەرێمی كوردستان لە چەند روویەكەوە بۆ ئێران گرنگە، بەتایبەتی لە بەرامبەر توركیا، بۆ گەیشتن بە سووریا بە شێوەیەكی راستەوخۆ، هەروەها بۆ ئەوەی هەموو عێراق بكەوێتە ژێر نفووزی خۆی، ئێرانیش ئەم كارە لە رێگەی ئەو لایەنە ناوخۆییانەی كوردستانەوە دەكات، كە دەتوانێت بۆ بەرژەوەندیی خۆی بەكاریان بهێنێت.
* ئایا لایەنی دیكەی ناوخۆیی كوردستان لەم ئاژاوەیە بەشداربوون؟
- ئێمە بە ئاشكرا لە ئاژاوەكەی قەڵادزێ و كەلار رۆڵی پەكەكەمان بینی كە رۆڵێكی تێكدەرانە بوو، كاتێك بە دروشمی بژی سەرۆك ئاپۆ، پەلاماری بنكەكانی پارتییان دەدا، بۆیە پەكەكەش بەشێك بوو لەم پیلانە سێ قۆڵییەی ئێران، گۆڕان و پەكەكە، هەموو گوشاریشیان بۆ سەر شەخسی سەرۆك بارزانی و ئامانجەكانی بوو كە دامەزراندنی دەوڵەتی كوردستانە.
* ئەم سێ لایەنە بۆچی بە شێوەیەكی راستەوخۆ دژایەتی سەرۆك بارزانی دەكەن؟ ئایا دژی شەخسی سەرۆكن، یان دژی ئامانجەكانی سەرۆكی كوردستانن؟
- دژایەتیكردنی ئەو بەرنامە و پلانەی سەرۆك بارزانی بۆ دامەزراندنی دەوڵەتی كوردستان دایڕشتووە، ئامانجی سەرەكی هەر سێ لایەنەكە. ئەم پیلانەی دژی ئامانجەكانی سەرۆك بارزانی چنراوە، لەو كاتەوە دەستی پێكردووە كە سەرۆك بارزانی پرۆسەی دامەزراندنی دەوڵەتی كوردستانی كرد بە هەنگاوی كردەیی، بۆیە ئەو لایەنە دەرەكییانەی وەك ئێران نایانەوێت سووریا و عێراق دابەش بێت و دەوڵەتی كوردستان دروست بێت، ئەو لایەنەی گوێڕایەڵی خۆیانە ئاراستەی دەكەن، تاوەكو پرۆژەی سەرۆك مسعود بارزانی بۆ دامەزراندنی دەوڵەت پەك بخات، یان لانیكەم بۆ ماوەیەك رایبگرێت، لەلایەكی دیكەوە هەوڵەكان بۆ ئەوەیە پشتیوانیی دۆستەكانمان بۆ كوردستان ساردبكەنەوە و بەو جۆرە ئەو شكۆ و پێگەی ئێستا لە سایەی سەرۆك بارزانی بۆ كوردستان دروست بووە، بیگۆڕن بۆ ئەوەی دۆستەكانمان بڵێن: كورد ناتوانێت حوكمڕانیی خۆی بكات، یان بڵێن: كورد یەكڕیز و یەكگرتوو نییە و خۆیان لە ناوخۆدا بەردەوام شەڕی یەكتری دەكەن و شایستەی ئەوە نین پشتگیرییان بكەین و ببنە خاوەنی دەوڵەتی خۆیان، بەڵام ئێمە قەناعەتمان بە سەرۆكی خۆمان هەیە و دڵنیاین بە شێوەیەكی زۆر حەكیمانە چارەسەری ئەم بارودۆخە دەكات، ئەگەر ئەم هەوڵە تێكدەرانەش بۆ ماوەیەكی زۆر كورت ئامانجە نەتەوەییەكە خاو بكاتەوە، بەڵام دەوڵەتی كوردستان لە ئایندەیەكی نزیك دەبینین و ئەم دەوڵەتەش هەر لەسەر دەستی سەرۆك بارزانی دادەمەزرێت و رادەگەیەندرێت.
* ئەگەر لێرەوە سەبارەت بە پەرلەمانی كوردستان پرسیارت لێ بكەین، بەو سیفەتەی لە دوو خولی پێشتری پەرلەمانی عێراقدا جێگری سەرۆكی پەرلەمان بوویت، لە كاتێكدا كوردستان لە شەڕێكی گەورەدایە دژی تیرۆریستانی داعش، زیاتر لە 1700 شەهید و 6000 برینداری پێشمەرگەمان هەیە، لەمەش زیاتر پشكی شێری ئەم شەهید و بریندارانە پێشمەرگەكانی پارتی دیموكراتی كوردستانن، ئایا لە بارودۆخێكی لەم جۆرە دروستكردنی قەیرانی پەرلەمانی چ مانایەكی هەیە؟ ئایا ئەو رۆڵەی سەرۆكی پەرلەمان لەم ئاژاوەیە گێڕای چۆن دەخوێنیتەوە؟
- من وەك كەسێك كە دەكرێت بڵێم، ئەزموونێكی ژیانی پەرلەمانیم هەیە، ئەزموونەكەشم لەناو پەرلەمانێكی پڕكێشە بووە، بۆیە هەر لە سەرەتای ئەم خولەی پەرلەمانی كوردستانەوە، بۆچوونی من بەو جۆرە بوو كە ئەم پەرلەمانە سەركەوتوو نابێت. لەبەر ئەوەی بەشێك لەو كەسانەی هەڵبژێردران بۆ ئەم خولەی پەرلەمانی كوردستان، خەڵكانێك بوون خاوەنی هیچ ئەزموونێكی سیاسی و پەرلەمانی نەبوون. بۆیە نەیانتوانی ئیدارەی جیاوازی و كێشەكانی ناو پەرلەمان بكەن، ئەویش نەك وەك پەرلەمانەكانی وڵاتانی پێشكەوتووی جیهان، بگرە وەك پەرلەمانی عێراقیش نەیانتوانی بارودۆخەكە بەڕێوە ببەن. لەمەش خراپتر سەرۆكی پەرلەمان گەنجێكی كەم ئەزموون بوو، كە بەردەوام ئاراستە دەكرا، لەلایەك لەلایەن حزبەكەی خۆیەوە كە بزووتنەوەی گۆڕانە، لەلایەكی دیكەوە خۆی لە رووی بیروبۆچوونی سیاسییەوە هەڵگری فیكری ئیخوان موسلمین بووە، كەواتە بە دوو جۆر ئاراستە دەكرا، لەلایەك بزووتنەوەی گۆڕان كە بڕوای بە ناسەقامگیری و توندوتیژی هەیە، لە لایەكی دیكەوە خۆیشی وەك كەسێك كە بڕوای بە فیكری ئیخوان موسلمین هەیە، ئەو ئامادەباشییەی تێدابوو زیاتر ئاژاوەكە گەرمتر بكات. هەر بۆ زانیاری خوێنەرانتان ئەوانەی بڕوایان بە فیكری ئیخوان موسلمین هەیە، هەر لە باكووری ئەفریقیاوە تا دەگاتە تەواوی رۆژهەڵاتی ناوەڕاست، بەو جۆرە ئاراستە دەكرین كە لە هیچ شوێنێكی رۆژهەڵاتی ناوەڕاستدا سەقامگیری بوونی نەبێت، بۆ ئەمەش رۆڵی ئیخوانەكان لە تونس و لیبیا و میسر و تەواوی وڵاتانی دیكەی ناوچەكە ئاشكرایە. یەكگرتنەوەی ئەم دوو هاندەرە لە رەفتارەكانی سەرۆكی پەرلەمانی كوردستاندا، وای لێكرد نەتوانێت بە شێوەیەكی بێلایەنانە سەرۆكایەتی پەرلەمان بكات، هەر زوو خۆی بە لای توندوتیژی و ئاژاوەگێڕیدا ساخكردەوە، كە هەم بە دڵی بزووتنەوەی گۆڕان و هەمیش جێی پەسەندی فیكری ئیخوان موسلمینەكان بوو. من لە سەر رۆڵی خراپی سەرۆكی پەرلەمانی كوردستان، دەمەوێت رووداوێكی ئوسامە نوجیفی سەرۆكی پەرلەمانی عێراق بگێرمەوە كە بەمجۆرە بوو: «لە یەكێك لە دانیشتنەكانی پەرلەمانی عێراق كێشەیەكی سیاسی لە نێوان پەرلەمانتارانی كوتلەی سوننە و كوتلەی شیعە هاتەئاراوە، لە ئاكامی ئەم كێشەیە پەرلەمانتارانی كوتلەی سوننە بڕیاریان دا بایكۆتی پەرلەمان بكەن، ئێمەش لە سەكۆی سەرۆكایەتی پەرلەمان سەیرمان دەكرد، دوای ئەوەی كوتلەی سوننە چوونە دەرەوە، دوای كەمێك دوو پەرلەمانتاری كوتلەی سوننە هاتن بە ئوسامە نوجیفی-یان گوت: تۆ سەرۆكی كوتلەی سوننەیت و دەبێت تۆش بێیتە دەرەوە. ئوسامە نوجیفی بە دوو پەرلەمانتارە سوننەكەی وت: من ئێستا سەرۆكی پەرلەمانی عێراقم و سەرۆكی كوتلەی سوننە نیم، لەبەر ئەوە هۆڵی پەرلەمان چۆڵ ناكەم.» ئەم نموونەیەم بۆ ئەوەیە، یوسف محەمەد دەبوو بە راستی بیسەلماندایە كە سەرۆكی پەرلەمانی كوردستانە و هەڵسووڕاوێكی بزووتنەوەی گۆران نییە، بەڵام بەداخەوە ئەو وەك هەڵسووڕاوێكی گۆڕان رەفتاری كرد و بێلایەنیی خۆی لەدەستداو بووە هۆكاری دروستبوونی قەیرانی پەرلەمانی و دروستبوونی ئەم ئاژاوەیە.
* وەك یەكێك لە سەركردەكانی پارتی دیموكراتی كوردستان چۆن سەیری ئەو هاوپەیمانییەی پارتی و بزووتنەوەی گۆڕانت كرد، كە بۆ پێكهێنانی كابینەی هەشتەم گرێیان دا؟
- لەگەڵ ئەوەی یەكێتی نیشتمانی كوردستان بە لیستی سەربەخۆ بەشداری هەڵبژاردنی كرد، بەمەش تۆزێك ساردی كەوتە ناو رێككەوتنی ستراتیژیی پارتی و یەكێتی، بەڵام من پێموابوو، پێویستە پارتی و یەكێتی پێش هەر لایەك بگەنە رێككەوتن لەسەر پێكهێنانی حكومەت و لەبەر رۆشنایی رێككەوتنی پارتی و یەكێتی هەنگاو بۆ پێكهێنانی كابینەی بنكەفراوان هەڵبگیرایە، بەمەش پارتی و یەكێتی وەك یەك كوتلە لەگەڵ ئەو لایەنانە وتووێژیان دەكرد كە لەو حكومەتە بەشدار دەبوون، بەمەش حكومەتێك پێكدەهات كە بتوانێت ئەم قۆناخە هەستیارە بەڕێوە بەرێت، ئێمە لەگەڵ یەكێتی ئەزموونێكی گەورەمان هەیە، ئەزموونی خۆشی و ناخۆشی و پێكەوە كاركردن و پێكەوە حوكمڕانی و راگرتنی سەقامگیری و ئاسایشی كوردستانمان هەیە، بۆیە پارتی و یەكێتی لەبەر هەر هۆكارێك كە نەیانتوانی رێكبكەون، غەدریان لە میللەت و لە خۆیان كرد، چونكە هاوكێشەكەیان بە ئاراستەیەكی خراپ گۆڕی. هەر بۆیە لەم روانگەیەوە رێككەوتنی پارتی و بزووتنەوەی گۆڕانم بۆ پێكهێنانی كابینەی هەشتەم هەر لەسەرەتاوە بە رێككەوتنێكی كاتی و سەرنەكەوتوو دەبینی، هۆكاری ئەم رەشبینییەشم ئەوە بوو، هیچ خاڵێكی هاوبەش بۆ پێكەوەكاركردن و پێكەوە حوكمڕانی لە نێوان پارتی و گۆڕان بوونی نییە، راستە گۆڕان بانگەشە بۆ چاكسازی دەكات، بەڵام بڕوای بە چاكسازی لە چوارچێوەی دامەزراوەیی نییە، ئەو بزووتنەوەیەكی رادیكاڵە و بڕوای بە توندوتیژی هەیە، لە بەرامبەردا پارتی دەیەوێت بە شێوەیەكی دامەزراوەیی و بە رێگەی پەنابردن بۆ خەڵكانی پسپۆڕ و شارەزا چاكسازی بكات، ئەمە دوو ئاراستەیە قەت یەكدی ناگرنەوە، بۆیە دیسان جەخت لەوە دەكەمەوە، رێككەوتنی ستراتیژی نێوان پارتی و یەكێتی زۆر گرنگە، تەنیا ئەم دوولایەنەش پێكەوە دەتوانن ئەم بارودۆخە هەستیار و ناسكە تێپەڕێنن.