بارودۆخی هەستیاری هەرێمی كوردستان وا دەخوازێت هەمووان بە هەستكردن بە لێپرسراوێتییەوە هەوڵی پاراستنی یەكڕیزیی گەلی كوردستان بدەین، تاوەكو بە ئاشتییانە و دوور لە دەمارگیری حزبایەتییەوە گەلی كوردستان لەو قەیرانانە دەرباز بكەین كە تێی كەوتووە، لەمەشدا رۆڵی مامۆستایانی ئایینی و ئیمام و خەتیبی مزگەوتەكان لەبەرچاون، كە بە پێچەوانەی زۆر لە پەرلەمانتارەكانەوە، هەوڵی پاراستنی ئەو ئاشتەوایی و یەكڕیزییە دەدەن، بۆ قسەكردن لەسەر ئەم بارودۆخەی ئێستا، ئەم دیمانەیەمان لەگەڵ مامۆستا ئومێد عومەر خاوەنی بڕوانامەی ماستەر لە شەریعەتی ئیسلامی و پێشنوێژ و وتارخوێنی مزگەوتی حاجی عوسمانی باوەمەردەیی سازكرد و بەمجۆرە وەڵامی پرسیارەكانی گوڵان-ی دایەوە.

مامۆستا ئومێد عومەر پێشنوێژ و وتارخوێنی مزگەوتی حاجی عوسمانی باوەمەردەیی بۆ گوڵان: ئەو قەیرانە سیاسییەی حزبەكان درووستیان كردووە لە شەڕی داعش ترسناكترە



* مێژووی موسڵمانێتیی كورد، مێژوویەكە لێبووردەیی و پێكەوەژیانی بەرهەمهێناوە، بەڵام كاتێك ئەم ئایینە پیرۆزە بۆ مەبەستی سیاسیی بەكاردەهێندرێت، هەستدەكەین ئەم دیوە جوانەی لێبووردەیی دەشێوێندرێت، یان دەگۆڕێت بۆ توندوتیژی و رەتكردنەوەی یەكتر، بۆ ئەوەی رێگری لەوە بكرێت، كە ئەم دیوە جوانەی لێبوردەیی نەگۆڕدرێت بۆ توندوتیژی، مامۆستایان و زانایانی ئایینی ئیسلام، ئەركێكی قورسیان كەوتۆتە سەرشان، ئایا ئێستا ئێوە وەكو مامۆستایانی ئیسلامی چۆن بەردەوامیی بە دیوە جوانەكەی لێبووردەیی ئایینی پیرۆزی ئیسلام دەدەن؟
- بە ناوی خوای گەورە و میهرەبان؛ لە هەرێمی كوردستان بە هیچ شێوەیەك كێشەی ئایینی و مەزهەبیمان نییە، بەڵكو كێشەی نەتەوایەتیمان هەیە. كورد لە رووی نەتەوە و نیشتمانەوە میللەتێكی مەزڵوومەو لە رووی ئایینەوە هیچ گرفتێكی نییە، بۆ نموونە تەنیا راپەڕین-ی پارێزگای سلێمانی زیاتر لە 16مزگەوتی تێدایە و هیچ كەسێك لە حكومەتی هەرێمی كوردستان رێگری لە دینداریمان نەكردووە، منیش لەگەڵ راوبۆچوونی ئێوەدام، ئەركی ئێمە وەكو مامۆستایانی ئایینی پیرۆزی ئیسلام قورسە، دەبێت بە بەردەوامی لە مینبەری مزگەوتەكان و گوتارەكانماندا هەوڵ بدەین هەموو لایەك بەرەو ئاشتی و برایەتی و پێكەوەژیان و لێبوردەیی ببەین، خودای گەورەو میهرەبان لە قورئانی پیرۆزدا دەفەرموێت: (والْكَاظِمِينَ الْغَيْظَ وَالْعَافِينَ عَنِ النَّاسِ) واتە ئەوانەی رك و كینە دەخۆنەوە و لە خەڵكیش خۆش دەبن، خودای گەورە چاكەكارانی خۆش دەوێت (إن الله يحب المحسنين). بەڵام جێبەجێكردنی ئەم ئەركە تەنیا بە مامۆستایانی ئایینی، یا لە وتارەكانی هەینیدا نابێت، دەبێت كەناڵەكانی راگەیاندن رۆڵی بەرچاویان هەبێت، دەكرێت ژمارەيەك لە مامۆستایانی پسپۆڕ و شارەزاو دڵسۆز بە خاك و نیشتمان لە كەناڵەكانی راگەیاندنەوە رۆڵیان پێ بدرێت بۆ ئەوەی ئاشتەوایی و تەبایی لە نێوان هەموو لایەنەكان دروست بكەنەوە، چونكە ئایينی پیرۆزی ئیسلام ئایینی پێكەوەژیان و برایەتی و خۆشەویستییە، كە جێی داخە زۆربەی كەناڵەكانی راگەیاندن سەركەوتوو نەبوون لە تەرخانكردنی بەرنامەیەكی ئایینی تایبەت بە دژایەتیكردنی فیكری توندڕەوی و داعشی، تەنانەت ئەگەر بیروبۆچوونێكی جیاوازیش هەبێت بە شێوەیەكی ئاشتییانە و برایانە هاووڵاتیان دەتوانن مومارەسەی فیكر و بیروبۆچوونی خۆیان بكەن. با لێرەدا سەرنجێكی بارودۆخەكەی ئەمڕۆی كوردستان بدەین، كە سوپاس بۆ خوا لە زۆر بواری وەكو سەقامگیری و ئاسایش و ئاوەدانكردنەوە قۆناغی باشمان بڕیوە و سەركەوتووین، ئەمەش بۆ رۆڵی هەموو ئەو ئاشتی و برایەتییەی نێوان حزبەكانی كوردستان و هەموو ئەو رۆشنبیر و رۆژنامەنووس و مامۆستایانی ئایینی و چین و توێژەكانی تری ناو كۆمەڵگە دەگەڕێتەوە، كە بە هەمووان رۆڵیان هەبووە و هەر بە هەموو لایەكیش ئەو قەیران و گرفتانەی هاتۆتە پێشمان چارەسەری دەكەین.
* لە ناو بزووتنەوەی رزگاریخوازیی كوردستاندا هەموو كاتێك مامۆستایانی ئایینی پیرۆزی ئیسلام رۆڵی گەورەیان لە رێكخستنی كۆمەڵگە بینیوە و هاوكاریی هێزی پێشمەرگەی كوردستانیان كردووە، بەڵام ئەو رۆڵەی مامۆستایانی ئایینی دوای دروستبوونی حزبە ئیسلامییەكان پاشەكشەی كردووە، لە دوای سەرهەڵدانی شەڕی تیرۆرستانی داعش ئێستا مامۆستایانی ئایینی خەریكە هەمان رۆڵی پێشوویان دەگێڕنەوە، ئایا تا چەند گرنگە مامۆستایان و زانایانی ئایینی لەم قۆناغەشدا هەر پێشەنگ بن بۆ كوردایەتی و هاوكاریی هێزی پێشمەرگە بكەن؟
- ئێمە وەكو مامۆستایانی ئایینی چ لە رێگەی وەزارەتی ئەوقافەوە بێت، یا لە رێگەی یەكێتی زانایانەوە، چەندین وتارمان تەرخان كردووە لە دژی فیكرەی داعش و توندڕەوی و توندوتیژی ئایینی و دڵسۆزیمان بۆ خاك و نەتەوە و پێشمەرگە هەیە كە پلەی شەهادەتیان هەیە، هەر بۆیە ئەركی ئایینی و نیشتمانیمانە كە بەرگری لەم نەتەوە مەزڵوومە و خاكە پیرۆزەی كوردستان بكەین. ئەم رۆڵگێڕانەی مامۆستایانی ئایینی پیرۆزی ئیسلام بە درێژایی هەموو شۆڕش و خەباتەكانی میللەتی كورد دیارو لەبەرچاو بووە، تەنانەت هەموو رابەر و سەركردەكانمان دەرچووی قوتابخانەی ئایینی بوون، شێخ و مەلا و زانایانی گەورە بوون، جێی داخە ئەمڕۆ حزبایەتی لە هەرێمی كوردستان ئەو رۆڵەی كەم كردووەتەوە. دژایەتیكردنی داعش پێویستی بە پسپۆڕ و شارەزایانی بەرزی ئایینی و زانایان هەیە، چونكە گرووپی تیرۆریستی داعش فیكری توندڕەویی بڵاوكردۆتەوه و هەر دەبێت بە فیكر لەناو ببرێت. گەرچی مامۆستایانی ئایینی لە هاوكاریكردنی پێشمەرگە و رووبەڕووبوونەوەی داعش رۆڵی بەرچاویان گێڕاوە و كۆنتڕۆڵی ئەوەیان كردووە، گەنجان هەڵنەخەڵەتێن و نەچنە ناو ئەو تاقمە تیرۆریستەوە، بەڵام گەڕانەوەی رۆڵی زیاتری زانایان و مامۆستایانی ئایینی پیرۆزی ئیسلامی لەناو كورد زۆر پێویستە.
* بۆ ئێستا گرنگە فیتنەو ئاژاوە لە كوردستان دوور بخەینەوە، لەبەر ئەوەی لەم بارودۆخە كە لە شەڕێكی گەورەداین یەكڕیزی و یەكدەنگی بۆ نەتەوەكەمان زۆر گرنگە، بەڵام ئەوەی جێگەی داخە، ئێستا حزبەكان خەریكە ئەم یەكڕیزی و یەكدەنگییە تێكبدەن، دیارە لەم قۆناغە ناسكەدا هێزی پێشمەرگە خۆی تێكەڵی ئەم ئاژاوەیە نەكردووە، تا چەند گرنگە مامۆستایانی ئایینی خۆیان تێكەڵی ئەم ئاژاوەیە نەكەن و ببن بە پەرژینێك بۆ یەكڕیزی و یەكهەڵوێستی كوردستان؟
- ئەركمانە لە ڕێگەی مینبەری مزگەوتەكان و كەناڵەكانی راگەیاندن و سەردانەكانماندا بۆ لای گشت پارت و لایەنە سیاسییەكان كە هەموو لایەك ئاگادار بكەین كە ئەم كوردستانە شیرین و ڕازاوەیە بەرهەمی خوێنی شەهیدانە و بەری ڕەنجی ماندووبوونی هەموو نیشتمانپەروەر و پێشمەرگەیەكە، دەبێت بیپارێزین، ئەگەر شتێكیشمان بەدڵ نەبێت، كوردستان چەترێكە نابێت تووڕی بدەین، بەڵكو پێویستە بە هەموومان چاكتری بكەین، ئەركی هەموو چین و توێژەكانە، بە مامۆستایانی ئایینیشەوە، كە رۆڵی زیاتر ببینن، پێغەمبەر(د.خ) فەرموویەتی:(على المرء المسلم السمع والطاعة فيما أحب وكره، إلا أن يؤمر بمعصية، فإن أمر بمعصية فلا سمع ولا طاعة) واتا لەسەر هەموو هاونیشتمانێكی موسڵمان پێویستە گوێڕایەڵیی بكات بۆ كاربەدەستانی وڵات، ئەگەر ئەمر بە گوناح و تاوان نەكات، ئەگەر ئەمری بە گوناح و تاوان كرد، ئەوا نابێت گوێرایەڵی بكات. لێرەدا نابێت كەسی موسڵمان بهێڵێت فیتنە و ئاژاوە و شەڕ و كوشتن لە كوردستان سەرهەڵبدات، بەپێچەوانەوە هەموومان گوناحبار دەبین و بەرپرسیارێتی دنیایی و قیامەت دەكەوێتە ئەستۆمان، لە كوردستان سوپاس بۆ خودا دینداری و خواپەرستیيەكی باش هەیە و رێز و تەقدیرێكی هەموو لایەنەكان هەیە و مامۆستا و زانایانی ئایینی ئیسلام و كەسایەتیيەكان ئازادانە مومارەسەی دینداری دەكەن و ئەو هەموو مزگەوت و تەكیەو خانەقا و قوتابخانەی ئایینییە هەیە كە نييەتپاكیی و باشی حكومەتی كوردستان نیشان دەدات، من ناڵێم حكومەت بێ كەموكوڕی و بێ هەڵەیە، بەڵام لێرەدا ئەركی سەرشانی هەمووانە بە گفتوگۆ و دانوستان و چاودێریكردن و لێپرسینەوە و كردەوەی باش چارەسەری بكەین نەك بەوەی بە هاوشێوەی دوژمنان، حكومەتەكەی كوردستان كە حكومەتی خەڵكە بیڕووخێنین. ههر بۆیه دوعای بەخێر و دەستخۆشی لە سەرجەم برایانی پێشمەرگە دەكەم كە رۆح و گیانی خۆیان فیدادەكەن بۆ خەڵكی كوردستان و كارێكی چاك و باشیش دەكەن كە بەشداری ئەم ململانێ سیاسییە ناكەن، لەم روانگەیەوە داوام لە سەرجەم سەركردە و لێپرسراوی حزبەكانی كوردستان هەیە واز بێنن لە لێدوانی ئاگرین و زمانی هەڕەشە و یەكتر برینداركردن، چارەسەری بارودۆخی كوردستان و دەربازبوون لەم هەموو نەهامەتی و قەیرانە، تەنیا بە یەكڕیزی و گفتوگۆو دانیشتن و نزیكبوونەوە دەبێت. زمانی ئەقڵ و مێژوو، ئەزموونی گەلانی پێشكەوتوو پێمان دەڵێت كە جگە لە ئاشتی و گفتوگۆ ڕێگەچارەی تر نییە، زمانی رك و كینەو توندوتیژی هەر هەمان شتی لێدەكەوێتەوە و ناگەینە ئەنجام، مادام هەموومان خۆمان بەدڵسۆزی كوردستان دەزانین كەواتە لێشی بەرپرسیارین و نابێت فیتنە دروست بكەین، خودای گەورەو میهرەبان لە دوو ئایەتدا باسی فیتنە دەكات(الفیتنە اكبر من قتل) واتا فیتنەیی لە كوشتن گەورەترە، چونكە ئەم فیتنەیەی ئەمڕۆ لە كوردستان دروست بووە رەنگە سەدان كوشتنی لێبكەوێتەوە، هەروەها لە شوێنێكی تردا خودای گەورە و میهرەبان دەفەرمووێت(الفتنة اشد من القتل)، ئێمەی موسڵمانی كورد خاڵی ئیجابی زۆرمان هەیە لێكمان نزیك دەكاتەوە و بەرژەوەندیمان یەكە و هاوزمان و هاوخاك و هاونیشتمان و هاوئامانجین، هەربۆیە تەباو برا بین سەركەوتوو دەبین، ئەمڕۆ ئەرك و بەرپرسیارێتی زۆر گەورە و گرنگە، حەرام و گوناهبارە هەر كەسێك لەم كوردستانە ببێتە هۆكاری نانەوەی ئاژاوە و شەڕ و فیتنە، بەڵكو هەموو لایەنەكان پێویستە دابنیشن و بە گفتوگۆ چارەسەری كێشەكانیان بكەن.
* كوردستان بەرەو دەوڵەت هەنگاو دەنێت، ئەم هەنگاوە دوای پشتیوانی خوا پێویستی بە ئیرادەی خێر و پشتگیری هەموو لایەك بۆ سەرۆكی كوردستان هەیە، ئایا چەندە گرنگە لەم قۆناخە و بۆ جێبەجێكردنی ئەم هەنگاوە هەموو نەتەوە پشتگیری سەرۆكی خۆی بكات؟
- بەڕێز مسعود بارزانی وەكو سەرۆكی هەرێمی كوردستان و خاوەن كەسایەتییەكی چاك و بەناوبانگ رۆڵی كاریگەری بینیوە بۆ پاراستنی گەلی كوردستان لەم ئاژاوە و نائارامیەی عێراق و ناوچەكە تێیكەوتووە، بەهێزی ئەم سەرۆكە لەرووی دیبلۆماسی و پێوەندییە نێودەوڵەتیەكانەوە پاڵپشتی و هاوكارییەكی باش بوو بۆ گەلەكەمان و هێزی پێشمەرگە بۆ ئەوەی ئەم سەركەوتنانە تۆمار بكەن، ئەم كەسایەتییە لەسەرخۆ و نەرمە، دەكرێت وەكو باوكێك ببێتە ئارامی بۆ هاونیشتمانییان. ئەو قەیران و گرفت و كێشانەی ئەمڕۆ بەرۆكی كوردستانیان گرتووە، پێوەندی بە سەرۆكی هەرێمی كوردستانەوە نییە، بەڵكو ئەوە گرفت و كێشەی ئەدای حكومەتێكی بنكەفراوان و هاوبەشە كە هەموو حزب و لایەنە سیاسیەكان تێیدا بەشدارن، هەموو وەزارەتەكان نەیانتوانیوە وەكو پێویست چاكسازی بكەن و مووچە و كۆمەڵێك خزمەتگوزاری كارەبا و ئاو و پێشكەوتنی بواری تەندروستی و پەروەردە پێشكەش بە هاووڵاتیان بكەن. خۆزگە هەمو حزبەكانی كوردستان و ئەو پێنج لایەنە كۆبوونەوەیان لەسەر ئەوە بكردایە بۆ گەنجان چی بكەن، كارگە و كارخانەیان لەكوردستان دروست بكردایەو گەنجانیان تێدا دابمەزراندایەو رێگە نەدەن بە دەست قاچاخچیەوە گیانیان لە دەریای ئیجەو ناو بارهەڵگرەكان لەدەست بدەن، با كۆبوونەوە لەسەر ئەوە بكەن چۆن كەرتی كشتوكاڵی ببووژێننەوە، من نازانم كوردستان لە دوو قەیرانی ترسناكدایە شەڕی داعش و قەیرانی ئابووری، ئیتر بۆ قەیرانی سێیەمیشیان تێدا دروستكرد كە قەیرانی ململانێی حزبی ناوخۆی كوردستانە كە زۆر لەو دوو قەیرانەی دیكە ترسناكترە، دار دەڵێت: ئەگەر تەور كلكی لەخۆم نەبێت نامبڕێتەوە. ئەگەر ماڵمان یەك بێت و تەبا بین، سەد ئەوەندە دوژمنمان هەبێت، ناحەزانی ئەم وڵاتە ناتوانن زەڕەیەك ئازارمان بدەن، بە درێژایی مێژوو هۆكاری شكستی ئیمارات و هەموو شۆڕشەكانمان كێشەی ناوخۆیی بووە كە وایكردووە دۆزە گەورەكەمان لەدەست داوە هەربۆیە میللەتێكی 40 ملیۆنی بێ خاوەن وڵات و كەیانی خۆیەتی لەكاتێكدا دەكرا وڵاتێك یا چەند كوردستانی هەبێت. هەر بۆیە من پێم باشە پاڵپشتی و پشتگیری سەرۆكی هەرێمی كوردستان بكرێت و كەسێكی بەدیلی جەنابی كاك مسعود بارزانیشمان نییە، كاتێك سەفەری وڵاتان دەكات لە ئاستی سەرۆكی كۆمار و سەرۆكی ئەنجومەنی وەزیرەكانەوە پێشوازی لێ دەكرێت، لە ناوخۆشدا كە خۆی بە پێشمەرگە دەزانێت و لە نزیكەوە لە بەرەكانی پێشەوەی شەڕ بەشداری كارای هەیە، مەعنەوییاتی پێشمەرگەی بەرز كردۆتەوە و رۆڵی گەورەی هەیە، هەر بۆیە دەبێت گەورەش بیر بكاتەوە. كاتێك جەنابی مام جەلال خوا شیفای بدات، سەرۆكی عێراق بوو بۆ هەموو كورد جێگەی شانازی بوو، ئێمە بۆ دەبێت زیان بە كەسایەتییە كاریزماكانمان بگەیەنین لە كاتێكدا لە ئاستی نێودەوڵەتی و لەناوخۆشدا زۆرترین كەس رێز و گوێی لێ دەگرن و كۆمەڵێك كاری گرنگی پێ دەكرێت. هەربۆیە من وای دەبینم جەنابی سەرۆكی هەرێمی كوردستان سەرۆكێكی چاك و باشە و زەڕوورە بۆ ئەمڕۆی كوردستان و دوای ساڵ و نیوێكی تر هەڵبژاردن دەكرێت، ئەوكات كێ دەیەوێت ببێتە سەرۆكی كوردستان با لە ڕێگەی خەڵكەوە دەنگ بەدەست بهێنێت، دەنگدان لەناو گەل و خەڵكەوە بۆ دەبێت لێی بترسین، ئەی ئێمە باسی دیموكراسی و خەڵك ناكەین، كاتێك جەماوەر دەنگ بە كەسێك بدات هەمووان پێی رازی دەبن و رێگە لە فیتنە و ئاژاوەگێڕییش دەگیرێت، خۆ ئەگەر ترسی تەزویر لە هەڵبژاردن هەیە، با لە ئاستی نێودەوڵەتی و رێكخراوە جیهانییەكانەوە چاودێری هەڵبژاردنەكە بكرێت.
* ئایا دوای ئەوەی سەرۆكایەتی پەرلەمانی كوردستان نەیتوانی كێشەی سەرۆكایەتی هەرێمی كوردستان یەكلایی بكاتەوە و خودی پەرلەمان بووە هۆكارێك بۆ پەرتبوون و دابەشكردن و نانەوەی ناسەقامگیری و ئارامی، دەبێت لەمەودوا چۆن ئەو رۆڵەی بۆ بگێڕدرێتەوە؟
- ئێمەی موسڵمان و ئیماندار پێویستە حەكیمانە و عەقڵانییانە بیر بكەینەوەو زیان بە هیچ لایەك و كەسایەتی و حزبێك نەگەیەنین و لە خزمەتی بەرژەوەندی گشتیدا بین، بەداخەوە لە كاتێكدا خەڵكی كوردستان لە دژی تیرۆریستانی داعش لە شەڕدا بوون و لە بەغداوە گەمارۆی ئابووریمان لەسەرە و زیانی بە بژێوی ژیان و خزمەتگوزارییەكان گەیاندووە، كەچی پەرلەمان خۆی سەرقاڵی پرسێك كردبوو كە هەمووان دەزانن هەموو پۆست و پرسە سیاسییەكانی بەغدا و كوردستان و حكومەت و بە خودی پەرلەمانیشەوە بەرهەمی عەقڵانی گفتوگۆ و دانیشتنی نێوان لایەنەكان بووە، كاتێكیش سەرۆكایەتی پەرلەمان دۆخەكەی بەو ئاقارە گەیاند و پرسەكەی بۆ یەكلا نەكرایەوە، بووە هۆكارێك بۆ پەرتبوون و ئاڵۆزبوونی پرسەكە، ئەمڕۆ نابێت لە پەرلەمانی كوردستان گەلەكۆمەكی لە هیچ پارت و لایەنێكی سیاسی بكرێت و خوانەخواستە چاڵ بۆ یەكتری هەڵبكەنین، ئەم كێشەو گرفتانە بەلێكگەیشتن و گفتوگۆ چارەسەر بكرێت باشترە، نەك وەكو ئەوەی پەرلەمان كردی خەڵكی ترسان و نائارامی و ناسەقامگیری خستەوە ناو فكری گەنجەكانمان كە روو لە هەندەران دەكەن، چارەسەری ئەم دۆخە تازە لە پەرلەمان نییە، چونكە سەرۆكی پەرلەمان و پەرلەمانتارەكان بە ئیعازی سەركردەكانیان جووڵاونەتەوە، هەربۆیە دەبێت سەركردەكان دابنیشن و چارەسەری دۆخەكە بكەن و دواتریش خۆمان بۆ هەڵبژاردن ئامادە بكەین با ئەو سەركردەی حزبانەی ناڕازین لە دۆخەكە لە ئێستاوە خۆیان بۆ هەڵبژاردن ئامادە بكەن، جارەكەی تر سێ كەس خۆی هەڵبژاردبوو با ئەمجارە سكرتێری هەموو حزبەكان خۆیان هەڵبژێرن و ئەگەر میللەت دەنگی پێدان پیرۆزیان بێت، بەڵام ئەگەر بە پێچەوانەوە خەڵك دەنگت نەداتێ و بتەوێت بە ڕێگەیەكی تر رێگە بگرێت لە ئیرادەی گەل و میللەت زیانت پێ دەگات و دەبێتە هۆی فیتنە و ئاژاوە، ئەوەش لە شەڕی داعش مەترسیدارترە و ئایینی ئیسلام حەرامی كردووە.
* ئەو رۆڵی چاككردن و ناوبژیوانییەی ئاماژەی پێ دەكەیت كە دەبێت موسڵمان وابێت، كەچی لەناو پەرلەمان حزبی سیاسی ئیسلامی هەبوو ئەو رۆڵەی نەگێڕا، بەڵكو زۆر توندوتیژ مامەڵەی كرد، ئایا ئەمە بۆچی دەگێڕیتەوە؟
ئێمە لە ناو پەرلەمان چەند حزبێكی ئیسلامیمان هەیە، هەندێكیان رۆڵی باشیان گێڕا و لە هەوڵی ئەوەدان ئەم فیتنەیە تەشەنە نەكات، هەشبوو بە پێچەوانەی دەقەكانی قورئانی پیرۆز و فەرموودەكان كاریان كردووە، لە ژێر كاریگەریی دەرەكی و لایەنی سیاسی تردا بوون، پێغەمبەرەكەشمان(د.خ) دەفەرموێت سوڵح خێری لە نوێژ و رۆژوو زیاترە، بەڵام سوڵحی نێوان دوو لایەن زۆر زیاترە. كەواتە خودای گەورەو میهرەبان ئەركی گەورەی لەسەر شانمان داناوە كە سوڵحە، نەك رۆڵێكی سلبی بگێڕین، پێغەمبەر(د.خ) دەفەرموێت: (اسمعوا وأطيعوا وإن استعمل عليكم عبد حبشي كأن رأسه زبيبة)، گەلی كوردستانيش زۆر مەینەتی و نەهامەتی بینیوە و دەبێت ئارام و هێمن بین و پاڵپشتی چاكسازی و كارەكانی سەرۆكەكەمان بین لە پاراستنی كوردستان و ئاشتەوایی و یەكڕیزی نەتەوەكەمان.