لە دوای 23ی حوزەیرانی 2015 و پاش ئەوەی پەرلەمانی كوردستان پشتی لە سازانی نیشتمانی كرد و بە رێژەی زۆرینە و كەمینە خوێندنەوەی یەكەمی بۆ هەمواركردنەوەی یاسای سەرۆكایەتیی هەرێمی كوردستان كرد، ژینگەی سیاسیی هەرێمی كوردستان ئاڕاستەیەكی دیكەی وەرگرتووە و خەریكە جۆرێك لە شڵەژانی سیاسی دروست دەبێت كە ببێتە مەترسی و هەڕەشە لەسەر ئاسایش و سەقامگیری سیاسی و حوكمڕانی لە هەرێمی كوردستاندا. لە ئێستا كە هەست بەوە دەكرێت، پەرلەمانی كوردستان چ هەڵەیەكی گەورەی كردووە، رای گشتی خەڵك بۆتە گوشار بۆ سەر لایەنە سیاسییەكان و داوا دەكرێت ئەم پرسە لە میانەی كۆبوونەوەی لایەنە سیاسیەكان و لە دەرەوەی پەرلەمان سازانی سیاسی لەسەر بكرێت. پارتی دیموكراتی كوردستان كە لایەنێكی سەرەكییە لەم هاوكێشەیەدا و پێداگیری لە سەر سازانی سیاسی و نیشتمانی دەكات، ئامادەباشی خۆی پیشانداوە لەگەڵ لایەنە سیاسییەكانی كوردستان جارێكی دیكە وتووێژ و كۆبوونەوە بكات. گوڵان بۆ قسەكردن لەسەر ئەم بارودۆخە سیاسییە هەستیارە دیمانەیەكی تایبەتی لەگەڵ بەڕێز فازڵ میرانی سكرتێری مەكتەبی سیاسی پارتی دیموكراتی كوردستان ئەنجامداوە و ئەمەش دەقی دیمانەكەیە.

فازڵ میرانی سكرتێری مەكتەبی سیاسی پارتی دیموكراتی كوردستان بۆ گوڵان:كاتی ئەوە نییە پشت لە سازان بكەین


* لە دەستپێكی كابینەی هەشتەمی حكومەتی هەرێمی كوردستان، ئێوە وەك ئەندامی شاندی دانوستاندنی پارتی بە سەرۆكایەتی نێچیرڤان بارزانی، هەموو قوربانییەكتان بە مافی هەڵبژاردنی پارتی دا، بۆ ئەوەی لەگەڵ هەموو لایەنەكان بگەنە رێككەوتن و حكومەتێك لەسەر بنەمای سازان دروست بكەن. ئایا دەكرێت لۆژیكی ئەم بیركردنەوەی پارتی دیموكراتی كوردستان لەسەر ئەم پرسە بۆ خوێنەرانی گوڵان روون بكەنەوە؟ ئایا نەتاندەتوانی لەگەڵ لایەنێك رێكبكەون و حكومەتی زۆرینە پێكبهێنن؟ ئەگەر دەتانتوانی حكومەتی زۆرینە پێكبهێنن، بۆ نەتانكرد؟
- پێش هەموو شت بە بۆنەی هاتنی مانگی رەمەزانی پیرۆز، پیرۆزبایی خۆم ئاراستەی هەموو خوشك و برایانی موسڵمان بەگشتی و خوشك و برایانی موسڵمانی هەرێمی كوردستان بەتایبەتی دەكەم، هەروەها زۆر بەخێرهاتنی گۆڤاری گوڵانیش دەكەم و دەستخۆشی لەو هەموو كارە باشانەتان دەكەم. سەبارەت بەوەڵامی ئەم پرسیارەش، هەروەك لای هەموو كوردستانییان روون و ئاشكرایە، ئەولەوییەتی سەرەكیی سیاسەتی پارتی دیموكراتی كوردستان لە یەك خاڵی گەوهەریدا خۆی بەرجەستە دەكات، ئەویش پاراستنی ئاسایش و سەقامگیری خەڵكی كوردستان و بەردەوامی ئەو ئارامی و تەناهییە بووە كە لە كوردستاندا بەرقەرار بووە، دیارە پێش هەڵبژاردنەكانی 21ی ئەیلوولی 2013، پارتی و یەكێتی و هەندێك پێكهاتەی دیكەی سیاسی و نەتەوەیی لە كابینەی حەوتەمی حكومەت بەشداربوون، هەروەها سێ لایەنی دیكەش ئۆپۆزسیۆن بوون، كە هەمیشە بە شێوەیەكی نیگەرانییانە و رادیكاڵییانە لە شێوازی ئۆپۆزسیۆن بوون مامەڵەیان لەگەڵ حكومەت دەكرد. لە هەڵبژاردنەكانی ئەیلوولی 2013 بارودۆخەكە هەندێك گۆڕانكاری بەسەردا هات، بەتایبەتی كە برایانی یەكێتی نیشتمانی كوردستان ئەمجارەیان بڕیاریان دا بە لیستی سەربەخۆ لە هەڵبژاردنەكە دابەزن، هەر بۆیە پاش ئەوەی هەڵبژاردنەكە ئەنجامدرا، بەپێی ئاكامی هەڵبژاردنەكە، دیسان پارتی بوو بە حزبی یەكەم، بەپێی پرەنسیپەكانی دیموكراتیش حزبی یەكەم دەبێت هەوڵەكانی بخاتە گەڕ بۆ ئەوەی حكومەت پێكبهێنێت، لەم پرۆسەیەدا یەكەم پرس كە بیرمان لێكردەوە، ئەوەمان بە راشكاوی لەبەر چاو گرت كە بۆ ئەم قۆناخە پێویستمان بە حكومەتێكە هەموو لایەنە براوەكانی هەڵبژاردن بەشداری تێدا بكەن، بۆ ئەمەش بەرنامەمان بۆ پێكهێنانی ئەم حكومەتە ئەوە بوو كە پێوەندی بە هەموو لایەنە سیاسییەكانەوە بكەین، بەڵام لە سەرەتادا دوودڵ بووین لەوەی ئایا یەكێتی نیشتمانی كوردستان كە شەریكی سەرەكیی ئێمەیە بەم بەرنامەی ئێمە رازی دەبێت، یان نە؟ بۆیە ئێمە یەكەمین لایەنی سیاسی كە لەگەڵیان كۆبووینەوە، یەكێتی نیشتمانی كوردستان بوو، ئەمە بێجگە لەو هاوبەشییانەی پێشتر لە نێوانماندا بوو. لەسەر ئەوەش رێككەوتین حكومەتی كابینەی هەشتەم، حكومەتێكی بنكەفراون بێت. دوای ئەمە یەكسەر لەگەڵ سێ لایەنەكەی ئۆپۆزسیۆن (بزووتنەوەی گۆران، یەكگرتووی ئیسلامی كوردستان و كۆمەڵی ئیسلامی كوردستان) كەوتینە دانوستاندن و كابینەی هەشتەمی حكومەتی هەرێمی كوردستان پێكهات. بنەمای سەرەكیش كە ئەم حكومەتەی لەسەر پێكهات، سازانی نێوان لایەنە سیاسییەكان بوو بە سەرۆكایەتی پەرلەمان و سەرۆكایەتی حكومەتی هەرێمی كوردستانیشەوە، دواتر ئەم سازانە باڵی كێشا بەسەر ئەو پۆستانەی حكومەتی بەغدا كە بەر كورد كەوتبوون، هەر بۆ نموونە كە پۆستی سەرۆك كۆمار بەر یەكێتی نیشتمانی كوردستان كەوت، ئەمە بەپێی رێككەوتنی نێوان پارتی و یەكێتی بوو، بەو حیسابەی پۆستی سەرۆك كۆماری عێراق بەرامبەر پۆستی سەرۆكی هەرێمی كوردستانە، هەر لەسەر بنەمای سازانیش پۆستی جێگری سەرۆكی پەرلەمانی عێراق بەر برایانی گۆڕان كەوت، بە تێڕوانینی بەندە ئەم سازانە هەمووی لە بەرژەوەندی كورد و كوردستان بووە، ئەمە سەرەڕای گلەیی و گازندەكانی ئەم و ئەو، كە بە تێڕوانینی من هەندێك لایەن هەقی خۆیان بووە گلەیی بكەن، بۆ نموونە وەك حزبی سۆسیالیست دیموكراتی كوردستان، سەبارەت بەو بەشەی دیكەی پرسیارەكەشتان بەوەی، ئایا نەماندەتوانی حكومەتی زۆرینە پێكبهێنین، بێگومان دەكرا لەگەڵ تەنها یەك لایەن رێكبكەوین، كە ئەویش یەكێتی نیشتمانی كوردستان بوو، دەمانتوانی ئەمجارەش حكومەتی كابینەی هەشتەم پێكبهێنین، بەڵام وەك لە سەرەتا ئاماژەم پێكرد، ئامانجی سەرەكیی پارتی ئەوە بوو كە ئاسایش و سەقامگیری هەرێمی كوردستان بەردەوام بیت، بۆیە ئەگەر حكومەتمان تەنها لەگەڵ یەكێتی پێكبهێنابایە، بە دیدی ئێمە روون نەبوو ئاكامەكەی چۆن دەبێت، بۆیە پێكهێنانی حكومەتی كابینەی هەشتەم لەسەر بنەمای سازانی هەموو لایەنەكان بە پەسەندتر زانرا.
* لەگەڵ ئەوەی هەندێك ئاماژەتان بە پۆستەكانی بەغداش كرد، بەڵام دیسان دێمەوە سەر ئاكامی هەڵبژاردنەكانی عێراق لە 30ی حوزەیرانی 2014، لەم هەڵبژاردنەشدا دیسان پارتی لە ناو فراكسیۆنی حزبە كوردستانییەكاندا بە تەنیا 25 كورسیی پەرلەمانی عێراقی بەدەست هێنا، بەڵام ئەو پۆستانەی كە یەكێتی بە 20 كورسی و گۆڕان بە 8 كورسی بەریان كەتووە، لە هی پارتی باشترن، پرسیاری ئێمە ئەوەیە، بۆچی پارتی دیموكراتی كوردستان لێرەش ئیستحقاقی هەڵبژاردنی خۆی وەرنەگرتووە؟
_ پێموایە بەشی زۆری وەڵامی ئەم پرسیارەم لە پرسیاری پێشوو وەڵام داوەتەوە، بەڵام دیسان جەخت لە سەر ئەوە دەكەمەوە كە ئەولەوییەتی سیاسەت و ستراتیژیەتی پارتی بۆ ئەو كات و ئێستاش پاراستنی ئاسایش و سەقامگیری كوردستانە، بۆ ئەم ئامانجەش سازان و یەكهەڵوێستی و یەكڕیزیی لایەنە سیاسییەكان، هۆكاری سەرەكییە بۆ پاراستن و زامنكردنی ئاسایش و سەقامگیری كوردستان و پێشكەشكردنی خزمەتگوزاری بۆ هاووڵاتیان و رووبەڕووبوونەوەی ئەو گرفتانەی هەیە، یان پێشهاتە تازەكان كە لە هەموویان گرنگتر، گرفتەكانی هەرێمی كوردستانە لەگەڵ حكومەتی عێراق، كە شەڕی داسەپاوی تیرۆریستانی داعش -یشی بەسەردا هات، ئەگەر نا بە پێی ئیستحقاقی هەڵبژاردن بێت لەسەر ئاستی عێراق، نە پۆستی سەرۆك كۆمار و نە پۆستی جێگری سەرۆكی پەرلەمان بەر كورد ناكەوێت، لە هەرێمی كوردستانیش هەر بەو جۆرەیە، ئەگەر سازان لەبەر چاو نەگرین و بەپێی ئیستحقاقی هەڵبژاردن سەیری بكەین، دیسان بارودۆخەكە بە هەمان شێوەیە، بەڵام ئەو كات و ئێستاش و لە ئایندەشدا، پارتی دیموكراتی كوردستان بەرژەوەندیی گشتی خەڵكی كوردستان لە سەرووی پۆستی وەزیرێك، یان كورسیەكی پەرلەمانیەوە دادەنێت.
* دوای ئەم هەموو نەرمی نواندنەی پارتی دیموكراتی كوردستان بۆ پاراستنی یەكڕیزی و بەڕێكردنی چوار ساڵی ئارامی، لە 23ی حوزەیران لە پەرلەمان بینیمان بە چەپڵەڕێزان سازانی نیشتمانی پێشێل كرا و، پارتی بە تەنها لە بازنەی سازانی نیشتمانی مایەوە. ئەگەر راشكاوانە بپرسم، ئایا ئەم هەڵوێستە بۆ ئێوە چەند كتوپڕ بوو؟ ئایا قەت مەزندەی ئەوەتان كردبوو بە جارێك چوار لایەنی سیاسی پێكەوە سازان پێشێل بكەن و رووبكەنە زۆرینەی پەرلەمانی؟
- پارتی دیموكراتی كوردستان لە تێڕوانینی دووربینانەی خۆیەوە بۆ ئەم قۆناخە هەستیار و چارەنووسسازە و روانینی بۆ ئایندەیەكی گەشتر، لەو نەرمی نواندنەی كە پێشتر نواندوویەتی و وەك ئێوە ئاماژەتان پێكردووە، پەشیمان نییە، لە ئایندەشدا لە نەرمی نواندن پەشیمان نابێتەوە، ئەمەش لەسەر ئەو پرەنسیپە هاتووە، كە پارتی بڕوای بە زمانی توندی و زۆری لەگەڵ هیچ لایەك لە كوردستان نییە. پارتی وای دەبینێت زمانی توند و زۆری لەگەڵ دوژمنانی كوردستان پێویستە بەكار بهێنیت و بە درێژایی مێژووش پارتی لە كەسی قبووڵ نەكردووە و قبووڵیشی ناكات. بێگومان لای هەموو لایەك ئاشكرایە لە دوای ساڵی 2003 ـەوە لە سەر ئاستی عێراق و هەرێمی كوردستان پرەنسیپی سازان (تەوافوق) رەچاوكراوە، تەنانەت بە دوو سێ هەفتەش بەر لە 23ی حوزەیرانی ئەمساڵ، لوتكەی پێكهاتەكان لە كۆبوونەوەیان لەگەڵ سەرۆكی هەرێمی كوردستان، بڕیاریان دابوو لەسەر ئاستی هەرێمی كوردستان هەر دوو پرسی سەرۆكایەتی هەرێم و دەستووری هەرێم سازانی لەسەر بكرێت، لەسەر ئاستی عێراقیش بۆ چارەسەری گرفتەكان باس لە پێكهێنانی ژووری عەمەلیات، یان (مبطخي) سیاسی كرابوو، بەڵام بەداخەوە لە 23ی حوزەیران وەك بینیمان هەرچی پێشتر كرابوو، وەلانرا و پەنا برایە بەر زۆرینە و كەمینە. دیارە بۆ وڵاتێك و پێداویستی و میكانیزمەكان بۆ زەمینەی ئەم پرۆسەیە لەبار بێت، ئەوا لە رووی پەرلەمانییەوە پەنابردنە بەر زۆرینە و كەمینە بە نادروستی نازانم، بەڵام كە ئەم زەمینە لەبار نەبوو، ئەوا دەبێت وریابین و خۆمان لەسازان نادیدە نەگرین. لێرەدا دەبێت ئەو پرسیارە لە خۆمان بكەین، ئایا ئەگەر سبەی لە پەرلەمانی عێراقدا زۆرینە و كەمینە پێڕەو بكرێت، دروستە؟ پرسیارێكی دیكە بۆ پارێزگای سلێمانییە، خۆ برایانی گۆڕان لە هەڵبژاردنی پارێزگاكان لە سلێمانی زۆرینە بوون، بینیمان ئەم زۆرینەیە ماوەی ساڵ و نیوێك سڕكرا و لە دواییشدا هیچ رێزێك بۆ ئەو هەموو زۆرینەی شاری سلێمانی دانەنرا، بۆچی لە سلێمانی نەتوانرا بە زۆرینە و كەمینە پارێزگار دابنرێت؟ هەروەها لە دوای رووداوەكانی 17ی شوبات، دەگوترێ پەرلەمان خۆی بڕیارێكی دەركردووە بەوەی هەر پرسێك رەهەندی نیشتمانی هەبێت، دەبێت سازانی لەسەر بكرێت. كەواتە ئەگەر وابێ پەرلەمان خۆی بڕیارەكەی خۆی پێشێل كردووە. من لێرەدا پرسیارێك دەكەم و دەخوازم خوێنەرانی گوڵان بیری لێ بكەنەوە، ئایا ئامانج لەم هەنگاوەی پەرلەمان پێكەوە كاركردنە؟ یان ئەمە هەلێكە قۆستراوەتەوە بۆ تۆڵەسەندنەوە؟ یان خوانەخواستە ئەگەر پێكچوواندن نەبێت (ان هو الا وحي یوحی)؟ لە وەڵامی ئەم پرسیارانەدا دەڵێم: ئەگەر ئامانج پێكەوە كاركردنە وەك پێشان، ئەوا دەبێت سازان پەیڕەو بكرێت. ئەگەر بۆ تۆڵەسەندنەوەیە، ئەوا دەبێت میللەتەكەمان باجەكەی بدات، ئەمەش سەرناگرێت لەبەر ئەوەی لەمبارەوە ئەزموونێكی تاڵمان هەیە، خۆ ئەگەر خوانەخواستە بمانەوێت، یان نەمانەوێت دەبوو ئەمە هەر بكرێت (وتلك هی الطامة الكبری).
* دوای ئەوەی لە كوردستان بنەمای گەمەی سیاسییان لە سازانی نیشتمانییەوە گۆڕی بۆ زۆرینەی پەرلەمانی و وەلاخستنی پارتی، دوای ئەوەی خەریكە بۆیان دەردەكەوێت، بەبێ پارتی دیموكراتی كوردستان هیچ هەنگاوێك سەركەوتوو نابێت، ئێستا گەڕاونەتەوە باسی سازانی نیشتمانی دەكەن، ئایا دوای چی باسی سازانی نیشتمانی دەكەن؟ ئایا بنەمایەك ماوە بۆ سازانی نیشتمانی هەتا لەسەری رێكبكەون؟
- بە دیدی من هەر هەموومان لە ناخی راستگۆیی خۆماندا ئەو راستییە دەزانین، كە سازان باشترین هەڵبژاردەمانە بۆ پێكەوە كاركردن و پاراستنی دەستكەوتەكانمان، هۆكاری سادە بۆ ئەمە ئەوەیە هیچ لایەكمان زۆرینەی رەهای نییە، قەناعەتی من بەو جۆرەیە هەتا ئەگەر لایەكمان زۆرینەی رەهاشی هەبێت، وا باشترە شەراكەت لەگەڵ لایەنەكانی دیكە بكات، چونكە ئەگەر خوانەكات یەكێك بیر لە شموولییەت بكاتەوە، پاشان ئەگەر ئەم برا و هاوبەشانە پارتییان بەجێهێشت، ئەوا خەڵكی دیكەش هەیە لەگەڵ پارتی راوەستاون، پارتی لەم قۆناخە هەستیار و ناسكەدا، نە ئەوان و نە ئەمانیش بە ئاسانی بەجێ ناهێڵێت، لەبەر ئەوەی بارودۆخی ناوچەكەمان و ئەو تەحەدییانەی رووبەڕووی هەرێم بوونەتەوە، زۆرن. وەك: كێشەكانمان لەگەڵ عێراق، تەنگژەی بودجە و مووچە و سووتەمەنی، قەیرانی شەڕی داعش و مەترسیی درێژخایەنی ئەم شەڕە، دەستێوەردانی ئەم لاو ئەولا لە ناوچەكە و لە هەرێمیشدا، بۆیە بە دیدی من، ورووژاندنی ئەم پرسە لەم كاتەدا، واتە بارێكی قورسی دیكە دەخەینە سەر بارە گرانەكەی سەرشانی هەرێمی كوردستان.
* لە پەیامەكەی جەنابی سەرۆكی هەرێمی كوردستان كە داوای سازانی نیشتمانی دەكات، ئەگەر بە وردی دێڕەكان بخوێنینەوە، لەو كاتەی جەنابیان داوا لە هەر پێنج لایەنەكە دەكات كە تا 20ی ئاب سازان بكەن، لە هەمان كاتدا دەشڵێت ئەگەر نەگەیشتنە سازان، ئەوا ئەو كات من هەڵوێستی خۆم رادەگەیەنم. لەم پەیامە ئەوە دەخوێندرێتەوە كە سازان ئاسان نەبێت. ئایا ئەو هۆكارانەی وایكردووە سازانی نیشتمانی قورس بێت، بۆچی دەگەڕێتەوە؟
- پەیامی جەنابی سەرۆكی هەرێمی كوردستان روون و ئاشكرایە. بەر لەوەی بزانین هەڵوێستی بەڕێزیان چی دەبێت، هەر بۆیە ئەگەر نییەت باش بێت، ئەوا زۆر بە ئاسانی دەتوانین ئەم بارودۆخە هەتا هەڵبژاردنی داهاتووی خولی پێنجەمی پەرلەمانی كوردستان پێكەوە رابگرین، تا ئەو كاتەش پشتیوان بە خوا، كوردستان لە ئاسایش و سەقامگیری دابێت و دەبینە خاوەنی دەستووری خۆمان و هەمووشمان ملكەچی ئەو دەستوورە دەبین، پەرلەمانی كوردستانیش ناتوانێت هیچ یاسایەك، یان بڕیارێك بەدەر لە چوارچێوەی ئەو دەستوورە دەربكات. هەر بۆیە ئەگەر بە راستی نیازپاكی هەبێت، ئەوا دەبێت بزانین سەرۆكێك كە ماوەی ساڵێكە هاوشانی پێشمەرگە لە بەرەكانی شەڕە لە دژی تیرۆریستانی داعش و لەناو چادر و كابینە دەخەوێت و تائێستاش لە كۆی 1280 شەهید، نزیكەی 738 شەهید لە حزبەكەی پێشكەش كردووە و باقیەكەشی لە برایانی یەكێتی نیشتمانی كوردستان و سۆسیالیست و....، سەرۆكێك كە لەسەر ئاستی جیهان پێگەو شكۆیەكی دیاری بۆ ئەم هەرێمە دروست كردووە، ناكرێت نادیدە بگیرێت، بۆیە لەم بارودۆخەدا كە پەرلەمانی كوردستان، ئەم پرسەی بەمجۆرە ورووژاندووە، پێویستە بە شێوەیەكی ئەقڵانیتر بیری لێبكرێتەوە، دەبێت هەموو لایەك بزانن ئەم پرسە وا ئاسان نییە.
* خاڵێكی دیكەی زۆر گرنگ، بوونی دوو ژینگەی سیاسییە لە كوردستان، یەكەمیان ژینگەی كۆبوونەوە هاوبەشەكانی نێوان لایەنە سیاسییەكان و كۆبوونەوەی لایەنە سیاسییەكانە لەگەڵ هەرێمی كوردستان، لەم ژینگەیەدا لەگەڵ ئەوەی جیاوازیش هەیە، بەڵام جۆرێك لێكتێگەیشتن هەیە، بەڵام لە ژینگەی دووەمدا كە بریتییە لە لێدوان و خۆدەرخستنی سەر شاشەی تەلەفزێۆنەكان، هەست دەكەین بە جۆرێك لە نمایشی حزبی و ناپەرپرسیارانە مامەڵە لەگەڵ بارودۆخەكە دەكرێت. ئایا هاودژی نێوان ئەم دوو ژینگەیە تاچەند رای گشتی لەم وڵاتەدا شێواندووە؟
- دیارە كوردستان لە دەرەنجامی ئەو هەموو زوڵم و زۆرەی رابردوو بینیویەتی، لە ئێستادا جۆرێك لە ئازادی رادەربڕینی رەها هەیە، بەڵام ئەوەی پێویستە حیسابی لەسەر بكرێت، ئەو ژینگە سیاسییەیە كە هێزە سیاسییەكان تێدا كۆدەبنەوە و تاوتوێی پرسە گرنگ و چارەنووسسازەكان دەكەن، هەتا ئێستاش هێزە سیاسییەكانی كوردستان رۆڵی سەركردایەتیكردن و ئاراستەكردنی جەماوەری خۆیان لەدەست نەداوە، لە باری واقیعیشدا نابێت ئەم رۆڵە لە دەست بدەین، چونكە مەترسیی گەورە لەوێدایە.
* لە دوماهی پرسیارەكانماندا، ئەگەر بتوانیت پەیامی پارتی دیموكراتی كوردستان لە سەر ئەم قۆناخە و هەوڵەكانی بۆ چارەسەركردنی گرفتەكان و هەنگاو هەڵگرتنی بۆ ئایندەیەكی گەش، بۆ خوێنەرانی گوڵان باس بكەیت؟
- پەیامی ئێمە بە راشكاوی ئەوەیە كە دیموكراتییەت تەنها زۆرینە و كەمینە نییە، هەروەك چۆن دیموكراتییەت تەنها هەڵبژاردن نییە، زۆرینە و كەمینە پرەنسیپێكی پەرلەمانی و حزبی باشە، بەڵام ناكرێت بە شێوەیەكی دڵخواهی (ئینتقائی) سەیر بكرێت، هەموو عێراق بە كوردستانیشەوە لەسەر بنەمای سازان (تەوافوق) بونیاد نراوەتەوە و بەڕێوەچووە، هێشتا كاتی ئەوە نەهاتووە لە بنەمای سازان پاشەكشە بكەین، بە هەر بیانوویەك ئەمە بكرێت، هەڵەیەكی مێژووییە و حیساباتێكی نادروستە، با هەموومان سەبر بكەین لە پێناوی بەدیهێنانی خەونە تاكەكەسی و حزبیەكان، دان بەخۆماندا بگرین، لەم بارودۆخەدا با هەموو توانا و وزەی خۆمان پێكەوە بەگەڕ بخەین بۆ ئەوەی هەرێمی كوردستان لەو كێشانە دەرباز بكەین كە لە ئێستا رووبەڕووی بۆتەوە و بریتین لە شەڕی داسەپاوی تیرۆریستانی داعش، گرفتەكانمان لەگەڵ عێراق، قەیرانی دارایی هەرێمی كوردستان و دەرەنجامەكان، خۆپاراستن لەو قەیرانانەی لە دەوروبەرمانن، ئێستا كاتی ئەوەیە هەموومان بیر لەم كێشانە بكەینەوە، گرنگە ئەوەشمان لەبیر نەچێت بە درێژایی مێژوو، خودی كورد هێندەی دوژمنەكانی زیانی لە خۆی داوە.