بەڕێز محەمەدی حاجی مەحمود سكرتێری حزبی سۆشیالیستی دیموكراتی كوردستان لەم دیمانە تایبەتەی گوڵاندا جەخت لەسەر ئەوە دەكاتەوە كە حزبی سیاسیی ئامڕازە نەك ئامانج، بۆیە لەم قۆناخە هەستیارەدا گرنگە هەموو حزبەكانی كوردستان ئامانجیان پاراستنی نیشتمان و ئەم ئەزموونەو بەرژەوەندی گشتی خەڵكی كوردستان بێت، هەروەها تەئكید لەسەر ئەوە دەكاتەوە ئەم بارودۆخەی ئەمڕۆی كوردستان بەرهەمی زنجیرەیەك شۆڕش و خەباتی بەردەوامی هەموو لایەنەكانە، ناكرێت بۆ هەڵبژاردن و كۆكردنەوەی دەنگ یاری پێ بكرێت، بۆیە باس لەوە دەكات گرنگە ئەم كیانە خاوەنی دەستووری خۆی بێت، لەبەر ئەوەی ئێمە هەموومان دەستوور وەك پێویستیەك سەیر دەكەین و ئێستاش دەستوور هەموو قۆناخەكانی بڕیوە و مافی خەڵكی كوردستانە بە بەڵێ یان نەخێر دەنگ لەسەر ئەو دەستوورە بدات، سەبارەت بە پەیوەندی نێوان هەرێم و بەغداش بەڕێزی راشكاوانە ئاماژەی بەوەكرد بەم شێوازەی ئێستا كێشەكان چارەسەر ناكرێن و دەبێت بیر لە شێوازێكی دیكەی پەیوەندی لەگەڵ بەغدا بكەینەوە، ئەو شێوازەش ئەو پێیوایە دەبێت كۆنفیدراڵی بێت نەك فیدراڵی، ئەمەش دەقی دیمانەكەی بەڕێز محەمەدی حاجی مەحمودە لەگەڵ گوڵاندا.

* هەرێمی كوردستان ئەمڕۆ لە قۆناغێكدایە بە بارودۆخێكی هەستەوەردا تێدەپەڕێت، لە سەرێكەوە مایەی گەشبینییە كە هەرێمی كوردستان وەك كیانێكی نیمچە سەربەخۆ سەقامگیرترین و ئارامترین شوێنە لە ناوچەكەدا، هاوكات هەڕەشەو مەترسیش لەسەر ئەوە هەیە ئەم هەرێمە لەناوببرێت، بەڕێزتان چۆن بارودۆخەكەی ئێستای هەرێمی كوردستان هەڵدەسەنگێنن؟
- بەشێوەیەكی گشتی لە ئێستادا پێگەی كورد لە ناوخۆ و ناوچەكەشدا بەهێزە، لە خۆرهەڵاتی ناوەڕاست كورد هێزێكی بەرچاوەو باڵانسی رووداوەكانە، لە هەرێمی كوردستانیش لە مێژووی نەتەوەكەماندا پێموایە ئەمە یەكەمینجار بێت كە كورد ئەم پێگەیەی ئێستای هەیە، رەنگە ئەو سیاسەتەی ئێستا لە هەرێمی كوردستان پیادە دەكرێت بەپێی یاسا سیاسەتی دەوڵەتێكی سەربەخۆی نەبێت، بەڵام شتێكی لە سەربەخۆیی كەمتریش نەبێت، خۆتان باش دەزانن ئەوەی لە كوردستان ئێمە پیادەی دەكەین، زیاترە لەو فیدراڵیەتەی باس دەكرێت تا ئاستێك رەنگە ئەمە پیادەكردنی كۆنفیدراڵیش بێت، بەڵام لەگەڵ هەموو ئەمانەشدا پێویستمان بەوەیە شتەكان بخەینە چوارچێوەی یاسایی خۆیەوە، هەلومەرجەكان یارمەتیدەرمانەو دۆخەكانیش لەبارترن بۆ ئەوەی ئێمە پێگەمان پتەوتر بكەین، هەلومەرجی ناوچەكە زیاتر یارمەتیدەرە بۆ دروستبوونی ئەم دۆخەی ئێستا لە كوردستان هەیە، لەناو ئەو رەوشەی كە پێی دەوترێت بەهار یان پاییزی عەرەبی، ئەوەی جێگەی دڵخۆشیە ئەوەیە، تەنیا كوردە كە ئێستا یەكڕیز و یەكدەنگ و یەكدەست و یەكهەڵوێست لە ناوچەكە مابێتەوە، بۆیە ئەمە دەرفەتێكە بۆ كورد تا ئەو دەسەڵاتەی كە هەیەتی هەنگاوێك بەرەو پێشتری بەرێت، یان بیر لە كۆنفیدراڵیەت بكاتەوە، رەنگە بۆ هەلومەرجی ئێستا كۆنفیدراڵیەت باش بێت، سەبارەت بە ئەگەری بوونی مەترسیش، بێگومان مەترسیش هەیە، بەڵام من وای دەبینم بە یەكڕیزی و یەكهەڵوێستی لە ناو ماڵی كورددا هەموو ئەو مەترسییانە دەڕەوێنێتەوە.
* بەڵام لەبەر ئەوەی هەرێمی كوردستان لە پرۆسەی هەڵبژاردن نزیكدەبێتەوە، ئەوا هەست دەكەین سیاسەتی رۆژانە بووەتە پڕوپاگەندەی هەڵبژاردن، ئەمە وایكردووە هەموو شتەكان لە روانگەی پرۆسەی هەڵبژاردنەوە تەماشا بكرێت، ئایا گرنگە لە پێناوی كۆكردنەوەی دەنگی زیاتردا بەرژەوەندییە گشتییەكان پێشێل بكرێن؟
- پێش هەموو شتێك، نیشتمان و نەتەوەو بەرژەوەندی گشتی كورد گرنگە، چونكە حزب و هێزە سیاسیەكان ئامرازن بۆ خزمەتگەیاندن بە نیشتمان و میللەتەكە، دەنگەكانیش كە بۆ حزب كۆدەكرێنەوە ئەویش ئامڕازێكە بۆ خزمەتی حزبەكە، حزبیش دەبێ خۆی تەرخان بكات بۆ خزمەتی نەتەوەكەی، پاراستنی دەسكەوتەكان و ئەو ئەزموونەی هەرێمی كوردستان كە لە ئاكامی زنجیرەیەك خەباتی دوور و درێژی میللەتەكەمان هاتۆتە دی، ئەوە ئەركێكی نەتەوەیی و نیشتمانییە بۆ هەموو لایەكمان.
* لە چەند رۆژی رابردوودا حكومەت رۆژی هەڵبژاردنەكانی پەرلەمان و سەرۆكایەتی هەرێمی كوردستانی دیاری كرد، ئێستا ئەو سێ لایەنە خەریكی ئەوەن كاندیدێك لەلایەن خۆیانەوە دەستنیشان بكەن، بۆ سەرۆكایەتی لە كاتێكدا لە دژی ئەوەن راستەوخۆ لەلایەن خەڵكەوە سەرۆك هەڵبژێردرێت كەچی خۆیان بەشداری دەكەن و كاندیدیشیان دەبێت، تۆ لەمبارەوە چی دەڵێیت؟
- من پارێزەری ئەوان نيم تا لە بری ئەوان قسە بكەم، باشتروایە ئەم پرسیارە رووبەڕووی ئەوان بكەنەوە، بەڵام وەك رای ئێمە ئەو یاسایەی بۆ كاندیدكردنی سەرۆكی هەرێم دەرچووە یاسایەكە ئازادەو هەموو كەسێك دەتوانێت خۆی كاندید بكات، هەر هاووڵاتیەك چۆن دەتوانێت خۆی بۆ پەرلەمان كاندید بكات بۆ سەرۆكایەتی هەرێمیش دەتوانێت خۆی كاندید بكات، چونكە ئێمە سەرەتاش لەگەڵ ئەوەدابووین لە یاسای سەرۆكایەتی هەرێم ئەوە بچەسپێنرێت كە هەر تاكێكی ئەم وڵاتە بۆی هەبێت خۆی كاندید بكات، یاساكەش ئازادەو رێگە بە هەموو كەسێك دەدات كاندیدی هەبێت یان خۆی كاندید بكات، ئەوەش مافێكی ئاسایی هەموو كەسێكە..
* ئێستا لەسەر پرۆژەی دەستووری هەرێمی كوردستان كێشمەكێشێكی زۆر هەیە و هەر لایەنە و قسەی خۆی هەیە، ئایا ئێوە وەك حزبی سۆشیالیستی دیموكراتی كوردستان هەڵوێستان لەسەر ئەم پڕۆژەی دەستوورە چییە؟
- كاتی خۆی پێش رووخانی رژێمی بەعس لە كۆیە لەسەر ئەو بابەتە 36 حزب كۆبووینەوە، ئەوەی لەبیرم بێت لەوێ ئەو پرسیارە كرا بەوەی ئایا هەرێمی كوردستان دەستووری هەبێت یان نە؟ لەو كۆبوونەوەیە هەموو پێكەوە بڕیارماندا كە پێویستە هەرێمی كوردستان دەستووری هەبێت، هەمووشمان لەسەر ئەوە كۆك بووین كە پایتەختی كوردستانیش كەركوك بێت، بەڵام دواتر هەموو لەسەر ئەوە پێكهاتین كە هەولێر پایتەخت بێت. ئەو پڕۆژە دەستوورەی كە لە پەرلەمان هێنرابووە ئەو كۆبوونەوەیە، لە پاش خوێندنەوەی هەموو لایەك پشتیوانیان لێكرد، پاشان چووەتە ناو پەرلەمان، ئینجا لە خولی دووەمی پەرلەمانیشدا لیژنەیەكیان دروست كرد، كە لە نزیكەی 15 كەس پێكهاتبوو وابزانم دووان سیانێكیان لە لیژنەی یاسایی ناو پەرلەمان بوون، نوێنەرایەتی پەرلەمانیان لەناو لیژنەكەدا دەكردو ئەوانی تر هەمووی پسپۆر و شارەزای یاسا بوون، لە دەرەوەی پەرلەمان خەڵكانی تر بوون كە پڕۆژەی دەستوورەكەیان رێكخست، ئەوەبوو دوایی هێنایانەوە ناو پەرلەمان، ئەمانە هەموو قۆناغە یاساییەكانی بڕیبوو، پاشان كە هاتەوە ناو پەرلەمان لەوێش گفتوگۆی لەسەر كرا، لیژنە یاساییەكان قسەیان لەسەر كرد، ئەوەبوو ماوەی پەرلەمان لە خولی دووەم كۆتایی هات، مانگێك تازە كرایەوە بەپێی یاسا چونكە ئەو كاتە بابەتی بودجە هاتبووە پێشەوە، ئەوكات بڕیار درا لە ماوەی ئەو مانگەدا بخرێتە دەنگدانەوە ئینجا بە زۆرینەی دەنگ دەستوورەكە پەسەند كرا، پێموایە تەنیا دكتۆر نووری تاڵەبانی دەنگی پێ نەدا، دواتر بە یاسایەك لە پەرلەمانەوە نێردرایە لای سەرۆكی هەرێم، سەرۆكی هەرێمیش رەزامەندی لەسەر نیشاندا، تا بنێردرێت بۆ ریفراندۆم، بڕیاردرا لە 25/7/2009 بخرێتە راپرسیەوە، بەڵام ئەوكاتە هەندێك لە ناحەزانی كورد لەناو حكومەتی عێراقی پێیان خۆش نەبوو كورد ببێتە خاوەن دەستووری خۆی، بۆیە حكومەتی عێراق هەوڵیدا لەگەڵ ئەمریكا تا دەستوورەكە نەخرێتە ریفراندۆمەوە، لەبەر ئەوە كۆمسیۆنی باڵای هەڵبژاردنەكان داوای كرد كە ناتوانێت دەستووری كوردستان بخاتە ریفراندۆمەوە، كەواتە ناحەزانی كورد لە عێراق لە هەوڵی بەردەوامدا بوون كە ئەو دەستوورە نەخرێتە ناو ریفراندۆمەوە، چونكە بە مەترسیداریان دەزانی لەسەر خۆیان بۆیە پێموایە دەستوور هەموو قۆناغەكانی خۆی بڕیوە، ئێمە ئەوساو ئێستاش جەختی لەسەر دەكەینەوە كە پێویستە دەستوور بخرێتە بەردەمی خەڵكی كوردستان، دوای ئەوەی خەڵكی كوردستان بە ئا یان بە نا رای خۆی لەسەر دا، ئیتر دوای ئەوە دەچێتەوە پەرلەمان، ئیتر لەوێ ئەو كاتە هەر بەندو خاڵێك كە نەگونجابێت لەگەڵ رای خەڵكی هەموار بكرێتەوە، جگە لەوەش من لە رووی یاساییەوە، چەندین جار پرسیارم لە یاساناسان كردووە، ئێستاش ناتوانرێت جارێكی دیكە بینێردرێتەوە پەرلەمان و تەنانەت سەرۆكی هەرێمیش ناتوانێت بینێرێتەوە پەرلەمان بە پێی یاسا، بەڵام دەتوانرێت بە پێكهاتن و سازانێك لە دەرەوەی پەرلەمان بڕیارێكی لەسەر بدرێت، خۆ هەر بڕیارێكیش لەم بارەیەوە بدرێت تۆ لە بایەخ و گرنگیی پەرلەمان كەم دەكەیتەوە، كە تۆ بە پێكهاتن لە دەرەوەی پەرلەمان هەموو شتەكان ببڕێنیتەوە كەواتە پەرلەمانت بۆچی داناوە، ئەمەی دەرەوەی پەرلەمان تەنیا دەتوانرێت بە تەوافوق هەندێ رێكەوتنی مەبدەئی بكرێت، بەڵام بە نایاسایی ئەمە دەكرێت، ئەگینا بەپێی یاسا ناتوانی نە بۆ پەرلەمانی بگێڕیتەوە و نە دەتوانیت رایبگریت.
* بەڵام لەم دەستوورە رێگە لە هەمواركردنەوە نەگیراوە، سەرۆكی هەرێمی كوردستانیش نامەی بۆ هەموو لایەنەكان ناردووە تا تێبینی خۆیان بنێرن بۆی، ئایا ئێوە تێبینیتان لەسەر دەستوورەكە هەیە؟
- هەرشتێك مرۆڤ داینابێت، خۆ هێندە پیرۆز نییە دەسكاری نەكرێت، ئێمە وەڵامی نامەكەی بەڕێز سەرۆكی هەرێمی كوردستانمان لەم رۆژانەدا داوەتەوە، كۆمەڵێك تێبینیشمان نووسیوە، كە ئەو سەرنجانەمان لەسەر خاڵەكانی دەستوور هەبووە. هەندێك تێكەڵبوونی دەسەڵاتەكانی نێوان سەرۆكی هەرێم و سەرۆكی ئەنجومەنی وەزیران هەیە پێویستیان بە جیاكردنەوە هەیە، هەندێك خاڵی تێدایە لە نێوان حكومەتی هەرێمی كوردستان و حكومەتی بەغدا، بە تایبەتی لەوانەی پێوەندیدارە بە دادگای تەمییزی عێراقییەوە، پێویستە ئەو تێبینیانە بە هەند وەربگیرێن، ئینجا دواتر هەر چوار ساڵ جارێك پەرلەمان هەڵبژاردنی بۆ ئەنجام دەدرێت دەتوانرێ لەو چوار ساڵەدا پێداچوونەوە بە دەستوور بكرێت و هەموار بكرێتەوە، تا ئەو خاڵانەی پێویست نین هەموار بكرێتەوە ئەوانەشی كە پێویستە زیاد بكرێت بۆی، كۆمەڵێك خاڵ هەن دەتوانیت بە كۆی دەنگ قسەیان لەسەر بكەیتەوە، دەستوور ئیتر دەبێتە حەكەمێك بۆ هەر بڕیارێك كە دەدرێت، ئێمە قسەمان لەسەر ئەوەیە ئێستا كورد دەستووری پێویستە یان پێویستی نییە، بەڵێ كورد پێویستی بەم دەستوورەیە، پرسیار لێرەدا ئەوەیە ئایا ئەوە باشە ئەم دەستوورە كە هەموو قۆناخەكانی بڕیوە جارێكی دیكە لە نێوان 111 پەرلەمانتار لە ناو پەرلەماندا حەسر بكرێت، تا خۆیان چۆنیان بوێت وای لێ بكەن، یان ئەوە باشترە تاك بە تاكی خەڵكی كوردستان دەنگی بۆ بدات؟، ئێمە راپرسی لەسەر دەستوور بە مافی هەموو تاكێكی خەڵكی كوردستان دەزانین كە دەنگ لەسەر ئەو دەستوورە بدەن و ئەو مافە لە خەڵكی كوردستان وەرنەگرنەوە، باشتروایە خەڵكی كوردستان بە ئا یان بە نا دەنگەكەی بۆ بدات، دواتر بابچێتەوە پەرلەمان و لەوێ كۆمەڵێك گۆڕانكاری تری تێدا بكرێت.
* زۆر باس لەدەسەڵاتەكانی سەرۆكی هەرێمی كوردستان دەكرێت، سەبارەت بەدەسەڵاتەكانی سەرۆكی هەرێم لەو دەستوورەدا رای ئێوە چیە؟
- ئەگەر ئەو دەستوورە پەسەندبكرێت و جێبەجێ بكرێت، بڕگەكانی ئەو دەستوورە دەسەڵاتەكانی سەرۆكی هەرێم لە دەسەڵاتەكانی ئێستای كە دەستوورمان نییە كەمتر دەكاتەوە، واتە سەرۆكی هەرێم ئێستا لە نەبوونی دەستووردا دەسەڵاتی زیاترە.
* ئۆپۆزسیۆن ئیدیعای ئەوە دەكات كە گوایە پارتی دەیەوێت بە زۆر دەستوور بچەسپێنێت گریمان ئەم ئیدیعایە راستە، باشە پارتی چۆن دەتوانێت بەبێ گەڕانەوە بۆ رای میللەت ئەم دەستوورە بچەسپێنێت، جەنابت وەك كەسایەتییەكی سیاسی ئەزمووندار لە خەباتی رزگاریخوازی كوردیدا، پێتوایە بۆچی حزبەكانی كوردستان لە گەڕانەوە بۆ دەنگی میللەت دەترسێن؟
- دەستوور پرسێكی نیشتمانییە، دەستوور نە موڵكی پارتییەو نە هی یەكێتییەو نە هی ئەم حزب و ئەو حزبە، ئەوە دۆخ و مەسەلەی میللەتێكە، ئەم دەستوورە با بكەوێتە دەنگدانەوە، ئەگەر خەڵك دەنگی بۆ نەدا با نەیدات، ئەگەر دەنگیشیان بۆ دا، ئەو كاتە دەنگ و رای میللەت دەچەسپێت، ناكرێت ئێمە هەموو شتێكمان لە بری میللەت بێت و ببینە وەكیلی خەڵك، بۆچی لە بری میللەت بیربكەینەوە لە باتی میللەت قسە بكەین و را دەرببڕین، بۆ هەموو شتێكمان دەڵێین با بكەوێتە بەردەستی میللەت، كەچی لە مەسەلەی دەستوور دەڵێین با تەوافوقی لەسەر بكەین، كاتێك دەڵێین با تەوافوق لەسەر دەستوور بكرێت، كەواتە تۆ دەڵێی با رای میللەت وەلا بنێین و لە جیاتی خەڵكی كوردستان قسەبكەین.
* لەگەڵ ئەوەی بەڕێز مسعود بارزانی هێشتا بە فەرمی راینەگەیاندووە كە نیازی بێت خۆی كاندید بكاتەوە بۆ سەرۆكی هەرێم، بەڵام زۆر كەس مانەوەی مسعود بارزانی لە پێگەی سەرۆكایەتی هەرێمی كوردستان بۆ ئەم قۆناغە بە پێویست دەزانن، ئایا بەڕێزتان چۆن سەیری مانەوەی بەڕێز مسعود بارزانی دەكەیت وەك سەرۆكی هەرێمی كوردستان؟
- گرنگە لەم قۆناخەی ئێستا واقعبینانە سەیری رووداوەكانی ناو هەرێمی كوردستان و عێراق و ناوچەكە بكەین، ئێستا پێویستمان بەوە هەیە هەموومان تەواوكاری یەكتری بین، لە ئێستادا بە داخەوە مام جەلال نەخۆشەو ئەو دۆخەی كە هەیە، ئەوە كەلێنێكی دروست كردووە، بە چۆڵبوونی پێگەی ئەو، گیروگرفتەكانی لە عێراق و ناوچەكە زیاتر كردووە، بۆ مەسەلەی سەرۆكی هەرێمیش لە كوردستان ئەم قۆناغەی كە هەیە قۆناغێكی هەستەوەرە، ئەو حزبانەی كە ئێستا لە فەرمانڕەواییدان تەنیا مەسەلە كەسایەتییەكان نییە، بەڵكو مەسەلەی ئاسایش و سەقامگیری وڵات و پاراستنی كوردەكانی هەر چوارپارچەی كوردستان پێكەوە گرێدراون، هەروەها لە بواری پێوەندییەكانی دنیا لەگەڵ كوردستان، رەنگە كۆمەڵێك خاڵی گرنگ هەبێت ئەوانە هەمووی زەروڕەتی ئەوەن كە ئەم قۆناغەش بوونی كاك مسعود بارزانی پێویست بێت بۆ ئەم هەلومەرجەی كە ئێستا هەیە لە كوردستان، ئەوانەی باسم كردن یەكێكە لەو خاڵانە، چونكە هەر كەسێك دەبێتە سەرۆكی هەرێمی كوردستان خۆ سەرۆك تەنیا بە قسە نابێت، ئایا سبەینێ كەسێكی دیكە بێت دەتوانێت باری ئاسایش و سەقامگیری وڵات وەك ئێستا بپارێزێت، یان دەتوانێت چارەسەری كێشەكان بە ئاسانی بكات. بۆیە پێموایە ئەمە كاتی پێویستە، هەرێمی كوردستان بە 20ــ 22 ساڵ گەیشتۆتە ئەم قۆناغە، رەنگە ماوەی زیاتری پێویست بێت بە ئاواتەكانی تری بگات، لەبەر ئەوە ئێمە پێمانوایە بۆ ئەم قۆناغەی ئێستا تا شتەكانمان دەچەسپێت، بەڕێز مسعود بارزانی زەروڕەتە، ئەمە لەگەڵ هەموو ئەوانەشدا دواتر خۆ خەڵكی كوردستان ئازادیشە كێی تریش خۆی كاندید دەكات كەس رێگەی لێ نەگرتووە.
* بۆ ئەمڕۆی كوردستان لەم قۆناغەدا یەكڕیزی و یەك گوتاری و یەكهەڵوێستی هەموو لایەنەكانی كوردستان بۆ بەدیهێنانی پاراستنی دەسەكەوتەكان چەند گرنگە؟
- ئێمە دۆزێكی رەوامان هەیە لە عێراقدا، خاوەنی ئەو دۆزەین بەڵام ئەوان لەگەڵ ئێمە كێشەیان هەیە، مەسەلەی دۆزی ئێمە لەگەڵ ئەوان و كێشەی ئەوان لەگەڵ ئێمەدا بە ئاسانی یەكلایی نابێتەوە، ئەوەی ئێمە مەبەستمانە ئەوان پێیان قبوڵ ناكرێت، بە پێچەوانەشەوە هەر راستە زۆرجار ئەوەمان پێ دەفرۆشنەوەو دەڵێن كوردی پارچەكانی تر هێندەی ئێوەیان بۆ نەكراوە، سەبارەت بە كێشەكان ئەگەر لەسەر مەسەلەی پێشمەرگە چارەسەر بكرێن ئەوە دواتر كێشە لەسەر نەوت و غاز تێكدەچێت، ئەگەر نا لەسەر سنوور تێكدەچێت، یان ئەوەش چاك بێت لەسەر بودجە تێكدەچێت، واتا ناگەیتە ئاكام تا ئەو كاتەی شێوازێكی لەمەی ئێستا باشتر نەدۆزینەوە، ئەویش كۆنفیدراڵیەتە. لەبەر ئەوە پێموایە دەبێت بیر لە شێوازی كۆنفیدراڵیەت بكرێتەوە، ئەو كاتە هەر لایەك ناوچەی خۆیان دەبێت، هەروەها دەتوانرێت هاوكاری یەكتریش بكەین، بۆ ئەمەش یەكڕیزی نێوماڵی كورد خاڵێكی گرنگە، بەڵام مەسەلەی یەكڕیزی و یەك گوتاری ئاسان نییە، بۆیە لانی كەم گرنگە لە چوارچێوەی زۆرینەی بۆچوونەكاندا یەكگرتوویی هەبێت و، هەنگاوی باشتری لەدوا دەنرێت، خۆ ئەگەر یەكڕیزی هەموو هێزەكان هەبێت، پێویستە دوولایەنە بێت، هەم لایەنی دەسەڵات رەچاوی بكات و هەم لایەنی بەرانبەریش كاری لەسەر بكات، ئەو كاتە كورد لە دەرەوەو ناوەوەش دەبێتە هێزێكی تۆكمەتر..
* ئێوە لەگەڵ ئیسلامیەكان بە یەك لیست بەشداری هەڵبژاردنتان كرد، ئەی ئەمجارەیان چۆن بەشداری هەڵبژاردن دەكەن؟
- ئێمە لە هەموو هەڵبژاردنەكاندا هەر لە ساڵی 1992 تا ئێستاش بەشداریمان كردووە، لە خولەكانی پەرلەمان بەشداریمان هەبووە، ئێستاش بەشداریبوونمان پێوەندی بە یاساكانەوە هەیە، ئێمە بە تەنیا خۆمان ئامادە دەكەین بۆ هەڵبژاردن، تێبینیمان هەبوو لەسەر ئەوەی یاسایەكە ببێتە یاسای نیمچەكراوە، رەنگە باشتر و دیموكراتیتر و ئازادانەتر بێت، كە لە ناو لیستێكدا كەسێك بیەوێت دەنگ بۆ كام كەسایەتی بدات، چاوەڕوانی ئەو یاسایانە دەكەین، ئەگینا تا ئێستا بەرنامەی وامان نییە لیستی هاوبەش پێكبهێنین، حزبی سۆشیالیست بە تەنیا دەچێتە ناو هەڵبژاردنەكانەوە..