لەگەڵ ئاڵۆزبوونی بارودۆخەكە لەسوریاو نائومێدبوونی كۆمەڵگای نێودەوڵەتی لەكەمبوونەوەی توندوتیژی و قوربانیەكان، كە هاوكاتە لەگەڵ دووری ئەگەری دەستێوەردانی سەربازی و بەكارهێنانی هێز دژی ڕژێمەكەی بەشار، هەموو سەرنجەكان بەرەو هێزەكانی ئۆپۆزسیۆن و ئەنجومەنی نیشتمانی كورد لەسوریا دەچێت، كەدەتوانرێت لەئێستاوە زامنی پاراستنی مافەكانی گەلی كورد لەسوریا بكەن، لەم چاوپێكەوتنەدا دكتۆر عەبدولحەكیم بەشار سكرتێری پارتی دیموكراتی كورد لە سوریا باس لەدوا پێشهاتەكانی بارودۆخەكەو ئۆپۆزسیۆنی كوردو ڕۆڵی ئەنجومەنی نیشتمانی كورد لەسوریا دەكات و هەوڵەكانی بارزانیش بۆ هاریكاری و پشتیوانیكردنی هاتنەدی مافی گەلی كورد لەسوریا بەرز هەڵدەسەنگێنێت.

دەبێت پێش رووخانی رژێمی ئەسەد، ئۆپۆزسیۆنی سوریا مافەكانی كورد بسەلمێنیت پاشانیش لەدەستوردا بچەسپێنریت

• لەم دواییەدا سەردانی چەند وڵاتێكی ئیقلیمی و عەرەبیتان كرد؛ ئایا ئەجیندای سەردانەكانتان بۆ (توركیاو قەتەرو میسر) چی بوو، هەروەها تێڕوانین و هەڵوێستی ئەو وڵاتانە بەرانبەر بە ئۆپۆزسیۆن و ڕووخانی ڕژێمی ئەسەد چۆنە؟
- پێش چون بۆ توركیا و قەتەر سەردانی ئەمریكامان كرد و چەند دانیشتن و گفتوگۆیەك لەگەڵ وەزارەتی دەرەوەو كۆشكی سپی و كۆنگرسمانەكان و لایەنی تری حكومەتی ئەمریكی سازكرا لە هەموو كۆبوونەوەو دانیشتنەكاندا دیدو ڕاوبۆچووونی ئەنجومەنی نیشتمانی كورد لە سوریامان بۆیان ڕوونكردنەوە و لە15 و 16ی ئەم مانگەدا ئۆپۆزسیۆنی سوریا بەگشتی كۆبوونەوە كە تیدا ئێمە وەكو ئەنجومەنی نیشتمانی كورد بەشداربووین و وەكو یەك هێز بڕیاردرا لەسەر ڕووخانی ڕژێمی بەشار كە ئەو بڕیارو هەندێ لە ڕاسپاردەی تر داواكاری و داخوازی ئێمە بوو یەكێك لەو داواكاریانەمان كە بڕیاری لەسەردرا كە كۆنگرەیەك لە قاهیرە ببەستین و بۆ ئەو كۆنگرەیەش چەند كارو ئیش و پێداویستیەك دەبێت ئامادەبكرێت، لەوانە نووسینەوەی ڕەشنووسی پڕۆژە سیاسیەكە كە پێشتر ئاماژەم پێدا بۆ ئەوەی لە كۆنگرەكە پێشكەش بكرێت و گفتوگۆو بڕیاری لەسەر بدرێت، هەروەها دەستنیشانكردنی ئەو دەستەو كەس و لایەنانەی كە بەشدار دەبن لە كۆنگرەكەدا، هەروەها لە 17و 18 ئەو مانگەدا سەردانی قەتەرمان كردو لەلایەن پەیمانگای برۆكینگزی ئەمریكی داوەتنامەیەكمان بۆ هاتبوو بۆ بەشداری كردن لە گفتوگۆو سیمینارێكدا ئەو پەیمانگایە كار لەسەر توێژینەوەی سیاسی و ستراتیژیەت دەكات و ڕاوبۆچوونی ئەم پەیمانگایە لەلایەن حكومەتی ئەمریكا زۆر گرنگەو ئیعتیباری بۆ دادەنێت و ئەو گفتوگۆو توێژینەوانەی لەم پەیمانگەیە ئەنجام دەدرێت لەپاشان دەكرێت بە ڕاپۆرتێك و بۆ وەزارەتی دەرەوەی ئەمریكا بەرزدەكرێتەوە، هەروەها سەردانی قاهیرە دەكەین كە لەوێش چەندین باس و توێژینەوە لەسەر بارودۆخی سوریاو گۆڕانكارییەكان گفتوگۆی لەسەر دەكرێت و لەپاشان بەرنامەیەك هەیە بۆ سەردانی پاریس، ئەوە هەڵوێستەی تا ئێستا لە ئەمریكاو بەریتانیا و فەرەنساو وڵاتانی تری دۆست و هاریكاری ئۆپۆزسیۆن و ئێمە هەیە و دیتومانە هاریكاری و پشتیوانیەكی باش و بەهێزە و هەرهەموویان لەسەر ئەوە كۆكن كە بە هەر ڕێگا و سیناریۆیەك بێت ڕژێمی بەشارو سوریا نەمێنێت و بڕووخێت، بەڵام ئەمە كەی دەبێت و ڕوودەدات ئەوە نازانین و هەڵوێست و پشتیوانی ئەمریكا و وڵاتانی دۆست كاریگەری لەسەر ڕووخانی ڕژێمی بەشار هەیە، چونكە هەموو ئەو وڵاتانە دەیانەوێت بە هەر جۆرێك بێت سیستەمی سوریا بگۆڕێت و ببێتە وڵاتێكی دیموكرات و ئازادیخواز و مافی هەموو پێكهاتەكانی تێدا دەستەبەربێت، لەلایەكی تر ئەمریكاو وڵاتانی تری دۆست ڕاوسەرنجی باشیان لەسەر كارو ئیش و هەڵوێستی ئۆپۆزسیۆن و ئەنجومەنی نیشتمانی كورد لە سوریا هەیە و متمانەو باوەڕیان بەكارەكانمان هەیە بەتایبەتی وەزارەتی دەرەوەو كۆشكی سپی ئەمریكا پشتیوانی خۆیان بۆ ئۆپۆزسیۆن و ئێمە لەبەرامبەر ڕووخانی ڕژێمی بەشار دەربڕیووە.

• بەڵام ئێستا بارودۆخەكە لە سوریا كەوتۆتە قۆناخێكی ئاڵۆزترەوە؛ نە بەشار ئەسەد بەكەڵكی ئەوە دێت كە وتووێژی لەگەڵدا بكرێت نە ئۆپۆزسیۆنیش قبوڵی وتووێژ لەگەڵ ئەو ڕژێمەدا دەكات، بەڕای بەڕێزت چارەسەر بۆ ئەم بارودۆخە چییە؟
- ڕاپەڕینە جەماوەری و شۆڕشگێڕییەكەی سوریا گەیشتۆتە قۆناخێك كە میللەت و شۆڕشگێڕان ناتوانن لەگەڵ ڕژێمەكەی بەشار ئەسەد بژین، هەربۆیە ئەگەری وتووێژو دانوستاندن نەماوە، لەبەرامبەریشدا هەر ڕۆژێك بەشار ئەسەد لەسەر حوكم بمێنێتەوە، توندوتیژییەكان زیاتر پەرەدەسێنێت و كوشتن و ترس و تۆقاندن زیاتر دەبێت و میللەت و وڵاتەكە بەرەو كارەسات و ماڵوێرانی زیاتر دەچێت، هیچ دەسەڵاتدارێكیش ناتوانێت تاسەر لەدژی ئیرادەو ویستی میللەت بێت، بەتایبەتی میللەتێك كە ئامادەیی ئەو هەموو قوربانییەی تێدا بێت، بەڵام بەمانەوەی زیاتری بەشار ئەسەد ئەگەری هەڵگیرسانی شەڕی ناوخۆیی مەزهەبی گەورە لەسوریا هەیە بەتایبەتی لەنێوان عەلەویی و سوننەكان، ئەمەش مەترسییەكی گەورەیە، چونكە گەربێتوو ئەم شەڕە ناوخۆییە لەسوریا هەڵگیرسێت ماوەیەكی دوورو درێژ دەخایەنێت و میللەت و وڵاتەكە رووبەڕووی مەترسییەكی گەورە دەبنەوە، بەڵام بەدەست لەكاركێشانەوەی بەشارو دەستبەرداربوونی لەفەرمانڕەوایەتی ئەوا میللەتی سوریاو عەلەوییەكانیش دەپارێزرێت و چیتر سیناریۆكانی خوێنڕشتن و كوشتن بەردەوام نابێت.
* هەست ناكەی خەریكە كۆمەڵگای نێودەوڵەتی لەبارودۆخی سوریا نائومێد دەبن، هاوكات دەستێوەردانی سەربازی و هێز لەبەرامبەری بەكارناهێنرێت، واتا هەموو ئومێدەكە ئۆپۆزسیۆنە ئایا ئەوان چییان كردووە؟
- ئۆپۆزسیۆن تا ڕادەیەك جێگای ئومێدی میللەتی سوریایە، بەڵام هەموو پێكهاتەكانیشی لەخۆ نەگرتووە، ئێمە وەكو میللەتی كورد لەسوریا ئەنجومەنی نیشتمانی كوردمان هەیە، بۆیە ڕاوبۆچوونمان وایە كە پڕۆژەیەكی سیاسی لەسوریا لە نێوان هێزەكانی ئۆپۆزسیۆن دابنرێت كە بەرژەوەندی هەموو لایەنەكان و میللەتی عەرەب و كورد و مەزهەبەكانی تێیدا پارێزراو و مسۆگەر و ڕەچاوكرابێت و ئەم پڕۆژە سیاسیە كە هەموو لایەنەكانی ئۆپۆزسیۆنە جیاجیاكانی سوریا لەسەری كۆك بن و لەپاش تاوتوێكردنی پڕۆژەكە بە ڕەزامەندی خۆیان هەموویان واژووی لەسەر بكەن، ئەو پڕۆژەیە ببێتە دیكۆمێنتێكی باوەڕپێكراو كە مافی هەموو لایەن و میللەتی سوریای تێدا دیاریكراو و پارێزراو بێت، بۆ ئەوەی لەدوا ڕۆژدا هەموو لایەنەكان پابەندی بنەماو خاڵەكانی ئەو پڕۆژەیە بن و هیچ كەلێن و پێشێلكارییەكی دوور لەم دیكۆمێنتە نەیەتە دی لەبەرئەوەی هەر بۆ نموونە عەلەوی و كریستیان و دروزی ئێستاكە بارودۆخی ئەوان باشەو هیچ زەحمەتییەكیان نەهاتۆتە پێش، لەبەرامبەردا كوردەكان كە پێشتریش بارودۆخیان خراپ بوو دووچاری ئازارو ئەشكەنجەی زۆر بوونەتەوە، لەماوەی 16 مانگی ڕابردوو كەشۆڕش بەردەوام بووە و ڕژێمی بەشار زوڵم لەخەڵك دەكات، تەنیا ڕوسیاو هەندێك وڵات نییە كە هاوكاری ڕژێمەكە دەكەن، بەڵكو لەناوخۆش دا هەندێك گروپ و لایەن لە سوریا هەیە هاریكارو پاڵپشتی ڕژێمن و لەناو دەزگا ئەمنی و ناوخۆییەكاندا كار دەكەن، پاڵپشتی و پشتگیری ئەم تاقم و لایەنانەش بۆ ڕژێمەكەی سوریا بۆ ئەوەیە كە پێشتر سوودیان لە ڕژێمەكە وەرگرتووە، لەلایەكی ترەوە ئەو كەس و گروپ و لایەنانە دوا ڕۆژیان دیارو ڕوون نییە و لەوە دەترسن كە ڕژێمی بەشار نەمێنێت لە بەرژەوەندییەكانیان بدرێت، بەڵام لەكاتێكدا ئەو پڕۆژە سیاسیەی ئاماژەم پێكرد وەكو دیكۆمێنتێت جێبەجێ بكرێت و ئۆپۆزسیۆن لەدوای نەمانی بەشار لەسەری بڕۆن و پابەندی بن و ماف و ئازادییەكانی تاك و لایەن و هەموو میللەت بپارێزن بەو كەسانەشەوە كە لەگەڵ بەشار و ڕژێمەكەن و لەخۆیان و بەرژەوەندیەكانیان دەترسن، ئەوكات ئەو پاڵپشتی و هاریكارییەی ڕژێمەكەی ئەسەدیش نامێنێت، ئێمە بەئۆپۆزسیۆنمان وت پێویستە لەم پڕۆژە سیاسییەدا پەیمانێك بدەن بەهەموو لایەنەكان بەتایبەتی بەعەلەوی و دروزی و كریستانەكان و میللەتی كوردیش، ناكرێت ئۆپۆزسیۆن داوای هاوكاری و پاڵپشتی و بەشداری زیاتری جەماوەری لە شۆڕشەكە بكات لەكاتێكدا ئەو پڕۆژە سیاسییە كە دواڕۆژو چارەنووس و بەرژەوەندییان ڕوون دەكات بوونی نەبێت، لەلایەكی تر دەبێت ئۆپۆزسیۆن هەنگاوو كارەكانیان لەناوخۆی وڵات و لەگەڵ خەڵكدا بێت ناكرێت وەكو ئێستا ئۆپۆزسیۆن زیاتر لە دەرەوەی وڵات بێت و دوور لەخەڵك و ئازارەكانیان، بەتایبەتی لەوڵاتانێك كە وڵاتی گەورەو خاوەن قورسایی نین لەسەر ئاستی نێودەوڵەتی یا لە وڵاتانێكی عەرەبین تا ئێستا بەتەواوی پشتگیری و پاڵپشتی و بەشداری شۆڕشی سوریایان نەكردووە، تەنیا ئەوەی كە لەم شۆڕشەدا بەشدارەو خوێنی دەڕێژێت و داوای ئازادی و دیموكراتی دەكات میللەتەكەیە كە ئەویش زیاتر میللەتی عەرەب و میللەتی كوردە، واچاوەڕوانیش دەكرێت لەدوای شۆڕش زۆرلە وڵاتانی دەرەوەو عەرەبی زەحمەتی و بەربەست لەبەردەم ماف و خواستەكانی میللەتی كورد دابنێن.
• كورد پێكهاتەیەكی گرنگی سوریایەو لەناو شۆڕشەكەش دا قوربانی و شەهیدێكی زۆری بەخشیوە، ئایا لەناو كۆبوونەوەكانی ئۆپۆزسیۆندا چۆن باسی مافی گەلی كورد دەكرێت؟
- بۆ ئێمەی میللەتی كورد سێ خاڵی ستراتیژی و گرنگ هەیە دەبێت مساوەمەی لەسەر نەكرێت: یەكەمیان دەبێت ئۆپۆزسیۆن بوونی كورد وەكو میللەتێك كە لەسەر خاكی خۆی دەژی قبووڵ بكەن، ئەمەش لەدەستووری سوریادا وەكو میللەت و مافەكەی جێگیربكرێت. خاڵی دووەم دەبێت ئەو سیاسەتە شۆڤێنی و ڕەگەزپەرستییە هەڵگیرێت كە چەندین ساڵە لەلایەن ڕژێمی سوریاوە پەیڕەو دەكرێت و كار بۆ گۆڕینی دیمۆگرافی و سڕینەوەی ناسنامەو چەوساندنەوەی میللەتی كورد لەسوریا دەكرێت، سێیەم دەبێت پشتگیری مافی میللەتی كورد بكرێت و بەشێوەیەكی دیموكراتی كێشەی میللەتی كورد چارەسەر بكرێت و بۆ ئەم كارەش دەبێت ڕیفراندۆمێكی ئازاد و شەفاف بە پاڵپشتی و چاودێری نێودەوڵەتی ئەنجام بدرێت و میللەتی كوردیش ئەو كات خۆی چارەنووسی خۆی دیاری دەكات و بڕیار دەدات وەكو میللەتێك لەسەر خاكی خۆی دەژیت یا مافی چارەنووسی لەچوارچێوەی وڵات بۆ خۆی دیاری دەكات، لەلایەكی تر ئەمڕۆ هێزی گەورەو دیارو بەتوانا لەسوریا ئەنجومەنی نیشتمانی سوریایە، ئەم هێزەش پێكهاتەكانی ناو سوریا بە یەك میللەت دەزانن و میللەتی كورد بە جیاواز نازانن، واتە گەلی كورد بە میللەتێكی سەربەخو و جیاواز لە میللەتی عەرەب و سوریا نازانن و باوەڕیان بەوە هەیە كە كورد زوڵم و ستەمی لێكراوەو ئەو سیاسەتە شۆڤینی و ڕەگەزپەرستیەی بەرامبەری كراوە نەمێنێت و چارەسەر بكرێت و ئۆپۆزسیۆن باسی ئەوەش دەكەن كە مافی كورد لە سوریا پێویستە چارەسەر بكرێت بە شێوەیەكی دیموكراتی، بەڵام بەبێ ڕیفراندۆم و ئەمەش بەپێچەوانەی داواكاری ئێمەو میللەتی كوردە و ئێمە ئێستا داوادەكەین كە مافەكانی میللەتی كورد پێش ڕووخان و نەمانی بەشارو ڕژێمەكەی دیاری بكرێت و لەناو پڕۆژە سیاسیەكەو وەكو دیكۆمێنت و دەستوورێك وایە دەبێت وردەكاری هەستیارو گونجاو و دروست بۆ میللەتی كورد دیارو پارێزراو بێت، گەرچی ئەوان دەڵێن نەخێر پاش ڕووخان و شۆڕش بڕیار لەسەر ماف و چارەنووسی كورد دەدەین، ئەمەش لەلایەن ئێمە قبووڵ نییە، چونكە كارو بەڵێن و پەیمانی زارەكی جێگای متمانەو باوەڕ نییە، مێژووی كوردیش شاهیدی ئەو بەڵێن و پەیمانە زارەكییانەی داوە كە چ فرتوفێڵ و ناهەقییەك بەرامبەرمان كراوە، هەربۆیە مەرجەعیەتی ماف و ئازادی و دیموكراتیەت لەلای ئێمە و هەموو وڵاتان بۆ دیاریكردنی چارەنووس ڕیفڕاندۆمە، كە بەچاودێری ڕێكخراوەكانی نێودەوڵەتی چاودێری دەكرێت و پارێزگاری لە شەفافییەت و راستیەكان بكەن .
• كورد ئێستا لەسوریا وەكو میللەتێك بۆ بەدەستهێنانی ئەو ماف و بەرژەوەندییانە لەدوای رووخانی رژێمی بەشار چی دەوێت و دەبێت و ئێوەش وەكو ئۆپۆزسیۆن و نوێنەری میللەتی كورد لەسوریا چ هەنگاوێك دەگرنەبەر؟
- جگە لەوەی دەبێت ئۆپۆزسیۆن میللەتی كورد قبووڵ بكات وەكو میللەتێك كە لەسەر خاكی خۆی دەژی و لەدەستووریشدا تەواوی مافەكانی دابنرێت و بچەسبێت و ئەو سیاسەتە دوژمنكارییەی كە پێشتر بەرامبەری كراوە هەڵگیرێت و و قەرەبووی میللەتەكەش بكرێتەوەو بەشێوەیەكی دیموكراتی و بەڕیفراندۆمێكی ئازادو شەفاف كورد بڕیار لەسەر چارەنووسی خۆی بدات، هاوكات ئێمە وەكو كورد داوای حوكم و دەسەڵاتی نامەركەزی سیاسی دەكەین، لەمەش دا پێویستە نامەركەزییەكە بەشێوەی ئۆتۆنۆمی یا سیستمی فیدراڵی بێت، ئەمڕۆ زیاتر ئێمە جەخت لەسەر سیستمی فیدرالیەت بۆ كورد دەكەینەوە وەكو بنەماو خاڵ و ناوەڕۆكە راستەقینەكەی فیدرالیەت نەك وەكو فیدرالیەتێك تەنیا بەناو و قسەبێت. واتا دەمانەوێت لەسیستەمی فیدراڵیەت دا بۆ كورد لەسوریا لەهەموو لایەنەكانی ئابووری و سیاسی و كۆمەڵایەتی. بەپێی داخوازی و پێداویستیەكانی خۆمان كار بكەین، بۆ ئەوەی بتوانین لەسەر تواناو هێزی خۆمان چارەسەری كێشەو گرفتەكانمان بكەین و خزمەتگوزاری بۆ ناوچە كوردنشینەكان و میللەتەكەمان دابین بكەین، هەروەها بەسیستەمی فیدرالی دەتوانین ئیدارەی سنوورو ناوچەكانی خۆمان بەدەستی خۆمان و بەئازادانە بەڕێوەببەین كە چەندین ساڵە ئومێدو خواستمانە. لەلایەكی تر بەپێی ئەم سیستەمە دەتوانین داهات و ئیدارەی خۆمان بزانین و بتوانین لەپێشخستن و گەشەسەندنی بوارەكانی ژیان بەكاری بهێنین . ئەو كێشەو گرفتانەی كە چەندین ساڵە هەمانە و بەدەستیەوە دەناڵێنین بەتایبەتی مەسەلەی ناسنامەی نەتەوەیی و گۆڕینی دیمۆگرافی و زۆر لایەنی تر چارەسەر بكەین و لەسەر شێوازێكی هاوچەرخ و پێشكەوتوو بونیادی بنێینەوە . هەروەها لەڕووی پەروەردەو زمان و كلتوورو تەندروستی و هەموو بوارەكانی تری ژیان و خزمەتگوزاری كە چەندین ساڵە پشتگوێخراون و زارۆك و نەوەكانمان لێی بێبەش كراون هەنگاو بەرەو پێشەوە بنێین و چارەسەری سەرجەم گرفت و كەموكوڕییەكان بكەین، ئەگەر بێتوو كێشەی كورد وەك میللەت چارەسەر نەكرێت و سیستەمی سیاسی فیدرالییەت و نامەركەزی نەچەسپێت شەڕێكی ناوخۆیی گەورەو بەرفراوان و درێژ لەسوریا دروست دەبێت، لەنێوان سەرجەم پێكهاتەكانی سوریا بەتایبەتی لەنێوان عەلەوی و سوننەو شیعەو دروزی و تەنانەت كوردیش، بەڵام سیستەمی فیدرالی بۆ سوریا نەك تەنیا خزمەتی كورد دەكات، بەڵكو خزمەتی سەرتاسەری وڵات و هەموو پێكهاتەكان دەكات، هەروەها خزمەتی یەكێتی و سەروەری و سەربەخۆیی خاكی سوریاش دەكات.
• ڕۆلی جەنابی سەرۆك بارزانی لەم بارودۆخەو بەرانبەر بەشۆڕشەكەو میللەتی كورد لە سوریا چۆنەو بەڕێزتان چۆنی هەڵدەسەنگێنی؟
-بۆ ئێمە وەكو پارتی لەسوریا بارزانی سمبولێكی نەتەوەییە و شانسێكی كوردانە كە ئێمە كەس و مالباتێكی وەكو جەنابی سەرۆك بارزانیمان هەیە و پشتگیرییەكی زۆرو گەورەو بەهێزی ئەنجومەنی نیشتمانی كردووە و جەنابی بارزانی كە لەهەر دیدارو كۆبوونەوەیەكی كە لەگەڵ وڵاتانی مەزن و سەرۆك و بەرپرسانی دنیای وەكو ئەمریكاو فەرەنساو توركیا و . . . تاد كردووە تێیدا باسی لە پشتگیری و هاوكاری لە دیموكراتی بۆ سوریا و هاتنەدی مافی گەلی كوردی سوریای كردووە و ئەو باس و پشتگیریانەش بۆ ئێمەی كورد و ئەنجومەنی نیشتمانی كورد لەسوریا زۆر گرنگ و كاریگەرە، چونكە ڕۆڵێكی گرنگی داوەتە كوردو ئەنجومەنی نیشتمانی كورد لەسوریادا، ئێمەی ئەنجومەنی نیشتمانی كورد لەسوریا بەنوێنەری ڕاستەقینەی میللەتی كوردی سوریای داناوە، ئەمەش جێی ڕێزو پێزانینە . ئەمەش لەلایەكی تر بۆ ئێمە پاڵپشتی و هێزێكی گەورەو گرنگە، هاوكات جەنابی سەرۆك بارزانی دەفەرموویت ئێمە هاریكاری ئێوەین بۆ بەدەستهێنانی مافی میللەتی كورد لەسوریا و كەسیش جگە لەكوردی سوریا خۆیان نەبێت ناتوانێت بارودۆخی ئێوە كۆنترۆڵ بكەن، قبووڵیش ناكات میللەتی كورد لەسوریا لەژێر زوڵم و ستەم و چەوساندنەوە بمێنێتەوە .
* ئەگەر دوا پرسیار سەبارەت بە ڕۆڵی حكومەتی هەرێمی كوردستان بكەین وەك پشتگیری بۆ ئیوە، ئایا هیچ پشتگیری كردوون؟
دەسەڵاتی سیاسی و حكومەتی هەرێمی كوردستان هاریكارو پشتیوانێكی گرنگ و كاریگەرو باشن بۆ ئێمە كە ئەمەش بۆ ئەوەیە كە میللەتی سوریا بەگشتی و كوردی سوریا بەتایبەتی لەم قۆناخە ناخۆش و دژوارە ڕزگاریان بێت و سیستەمێكی دیموكراتی بێتەدی و میللەتی كوردیش بەخاك و زمان و كلتوری و هیواو ئاواتەكانی بگات، داواكاریشم لە گۆڤاری گوڵان گرنگیەكی تایبەت و بەردەوام بەبارودۆخ و گۆڕانكارییەكانی سوریا بدات و دۆسیەی تایبەت و جیاجیای لەسەر بنووسێت و لەڕێگای ئەو دۆسیەو نووسینانەدا گرنگی بە مافی میللەتی كورد و ڕۆڵی ئەنجومەنی نیشتمانی كورد لەسوریا بدات.