هەرێمی كوردستان لەم قۆناخەدا رووبەڕووی كۆمەڵێك تەحددی دەبێتەوە لەسەر ئاستی ناوخۆ و دەرەوە، پەرلەمانی كوردستان كە بەرزترین دەسەڵاتی یاسادانانە لە كوردستان هەموو كات شوێنی هەڵسەنگاندن و تاوتوێكردن و بڕیاردان بووە لەسەر كێشەكان، بۆ قسەكردن لەسەر بارودۆخی سنوورەكانی هەرێمی كوردستان و تۆپبارانی دەوڵەتانی دراوسێی و كێشەی دەركردن و كوشتنی كورد لە ناوچەكانی جەلەولا و سەعدیە و كێشە هەڵواسراوەكانی نێوان هەرێم و ناوەند، دیمانەیەكی تایبەتمان لەگەڵ بەڕێز دكتۆر كەمال كەركووكی سەرۆكی پەرلەمانی كوردستان ئەنجامدا و بەسوپاسەوە بەڕێزی بەڕاشكاوی وەڵامی پرسیارەكانی گوڵانی دایەوەو ئەمەش دەقی دیمانەكەیە.

هەرێمی كوردستان و تەحەددیاتی دەوروبەر
* سەرەتای پرسیارمان لەوەوە دەست پێ دەكەین كە جەنابی سەرۆكی پەرلەمانی كوردستان بەشێوەیەكی گشتی وێنایەكی ئەمڕۆی هەرێمی كوردستانمان پیشان بدات، بەتایبەتی لەناو ئەو كێشەو تەحەدییانەی كە رووبەڕووی هەرێمی كوردستان دەبێتەوە؟
- ئەمڕۆ وەكو هەموومان دەیبینین هەرێمی كوردستان قۆناغێكی باشی بڕیوە، چ لەپرۆسەی دیموكراتی یان چەسپاندنی پرۆسەكەدا، ئەگەر بەراوردی بكەین لەگەڵ شوێنەكانی تری ناو عێراق دەبینین لە زۆر بوارەوە هەنگاوی باشی ناوە، بەتەئكید هەرێمی كوردستانیش بەدەرنییە لەگەڵ ناوچەكەو ناو عێراق و دەوروبەر، ئەمڕۆ ئەوەی لەناو هەرێمی كوردستان كە سەركردایەتی سیاسی كوردستان رێزدار سەرۆكی هەرێمی كوردستان و پەرلەمانی كوردستان و حكومەتی كوردستان باوەڕیان پێیەتی و كاری لەسەر دەكەن، چارەسەری كێشەكانە بەدیالۆگ و، دوور لە توندوتیژی و پابەندبوون بە یاسا و بنەمای دیموكراسی و كاری موئەسەساتی، بەداخەوە كێشەی دەوڵەتانی ئیقلیمی لەناوخۆیان، كەمێك كاریگەری نەرێنی هەیە لەسەر هەرێمی كوردستان، بۆنموونە كێشەی ناوخۆی توركیا، كاتێك بەڕێز ئۆردوگان كرانەوەی دیموكراتی بۆ چارەسەری كێشەكان ڕاگەیاند ئێمە زۆرخۆشحاڵ بووین و پشتیوانیمان لێكرد، ئێستاش باوەڕمان وایە تەنیا ئەو ڕێگایەیە كە كێشەی ئەوانیش ناهێڵێت، ئەوجا ئەنجامەكانی بە ئەرێنیش بۆ سەر هەرێمی كوردستانی خۆشمان ڕەنگدانەوەی دەبێت، هەروەها سەبارەت بەئێرانیش.
ئێستا ئەو كێشانەی ئیقلیمی و بە كێشەی نێوخۆی عێراقیشەوە هەر لەنێوان لیستەكانی العراقیە و دەوڵەتی یاسا كە بەهەوڵ و كۆششی سەرۆكی هەرێمی كوردستان توانراوە سەرۆكایەتی پەرلەمانی عێراقی فیدرال دابنرێت و توانراوە هەردوو سەرۆك كۆمارو سەرۆكی ئەنجومەنی وەزیران دەستنیشان بكرێت و كابینەكە پێك بهێنرێت، گەرچی تاكو ئەمڕۆ هەندێك كەموكورتی ماوەو، هەندێك لە كارەكانیان هێشتا ئەنجام نەدراوە، كە وا بڕیار بوو رێكەوتنی لەسەر بكرێت، لەوانەش هەندێك كێشەی سەربازی و ناوخۆو ڕێژەی پێكهاتەكان و ناوچە كوردستانیە دابڕاوو كێشە لەسەرەكان كە هێشتا كێشەكانیان چارەسەر نەكراوە، هەروەها ماددەی 140 ماددەیەكی زیندووی دەستووری عێراقی فیدراڵییە، یەكێكە لەو ماددانەی كە سەقامگیری تەواوی ناوخۆی عێراقی پێوە بەستراوە، ئەگەرچارەسەر بكرێت، عێراق هەنگاوێكی گەورە بەرەو سەقامگیری و پێشكەوتن دەهاوێت بەڵام تا ئێستا دواخراوەو جێبەجێ بوونی ماوەتەوە، هەروەها مەسەلەی پێشمەرگە كە ئێمە دەڵێین پێشمەرگە بەشێكە لە مەنزوومەی بەرگری عێراقی، هێشتا مەلەفەكەی بەهەڵپەسێردراوی ماوەتەوە، دابینكردنی بودجەكەی ئەركی حكومەتی فیدراڵی و وەزارەتی بەرگری عێراقە، بەڵام هێشتا لە بودجەی هەرێمی كوردستان پارەی بۆ تەرخان دەكرێت و ئەم گرفتەش چارەسەر نەكراوە، وێرای مەسەلەی پڕ چەككردن و راهێنان و ...تاد، كە هێشتا بە هەڵپەسێراوی ماوەتەوە.
یاسای نەوت و غازیش هەر بە هەڵواسراوەیی ماوەتەوەو كێشەكانی بنبڕ نەكراوە.
هەروەها سەرژمێری لە عێراق كە هێشتا نەكراوە، ئەمەش زۆربە سلبی لەسەر هەرێمی كوردستان تەواو دەبێت، چونكە هەر زیادەی نادروستی دانیشتووان لەخوارەوەی هەرێمی كوردستان ساڵانە بەسەدان ملیۆن دۆلار زیان لە هەرێمی كوردستان دەدەن، هەروەها لە ئەنجومەنی نوێنەران ژمارەی نوێنەرەكانی هەرێمی كوردستان كەمتر دەكات، چونكە كەمبوونەوەت هەیە لەسەر هەرێمی كوردستان، هەروەها تا ئێستا ئەنجومەنی فیدراڵی پێك نەهێنراوە بەوەی كە عێراق دەوڵەتێكی فیدراڵییەو یەك فیدراڵییەت هەیە ئەنجومەنەكەی نییە، لەگەڵ هەموو ئەم تەحەددیانەی ناوخۆو ئیقلیمی كوردستان گەرچی بەحیكمەتی سەركردایەتی سیاسی توانراوە هەنگاوی باش بنرێت، تەمەننا دەكەم بتوانین ئەو خاڵانەی كە باسمان كردن و هێشتا هەڵپەسێرراون، بەدەرو دوور لە توندوتیژی بتوانین پێكەوە بە ڕێگای دیالۆگ ڕێگاچارەیان بۆ بدۆزینەوە.


مامەڵەی دروست و بەئارامی پەرلەمان لەبەرامبەر كێشەكانی هەرێم
* جەنابی سەرۆكی پەرلەمانی كوردستان وەك بەڕێزتان ئاگادارن ماوەیەكە ناوچە سنوورییەكانی هەرێمی كوردستان تۆپباران دەكرێت، ئەم تۆپبارانەش بیانوویەكی هەیە بۆ وڵاتانی دراوسێ، لە كاتێكدا ئاماژەت بۆ ئەوە كردووە كە دەبێت بەدیالۆگ كێشەكان چارەسەر بكرێن، ئایا ئێوە وەكو پەرلەمانی كوردستان چۆن مامەڵە لەگەڵ ئەو كێشەیە دەكەن، بەتەمان دیالۆگ لەگەڵ كێ بكەن، بۆ ئەوەی ئەو مەترسییە لەسەر هەرێمی كوردستان دوور بخەنەوە؟
- راستە ئەو وڵاتانەی دراوسێ، ئەو شتانەیان كردووەتە بیانوو، بەڵام ئەگەر بچینە ناو ئەسڵی بابەتەكانەوە بیانووەكەیان بەتاڵە، ئەمە بیانووی بەهانەیە چونكە كێشەیەك هەیە لەلای خۆیان ئینكاری كێشەكە دەكەن، واتا چارەسەری دروستی كێشەكان لای خۆیان ناكەن، ئەگەر بەجددی و بە دروستی مامەڵە لەگەڵ كێشەكان بكرێت زۆر روون و شەفافەو زۆر بەئاسانی تەواو دەبێت و كێشەش نامێنێت و هیچ لایەكیش زەرەر ناكات.
بەڵام لەگەڵ ئەوەشدا بەهانەیەك هەیەو دەڵێن «خەڵكێك لەمدیوەوەو لێرەوە هێڕش دەكەنە سەر ئەودیوو خەڵكی ئێمە دەكوژن» ئەم بیانووە وەك هۆكاری تۆپباران و بۆردومانەكە دەهێننەوە، دەبێت حكومەتی هەرێمی كوردستان لەگەڵ گشت لایەنە پێوەندارەكان بەشێوازێكی زۆر جددی و هێمن كار بكات، بۆ ئەوەی ئەو بەهانانە نەهێڵێت و جارێكی تر دەگەڕێمەوە بۆ ئەو بیانووە، بەڕێزان لە حكومەتی توركیا دێن و دەڵێن لە قەندیل خەڵكێك هەیەو دێن لە ئێمە دەدەن و دەگەڕێنەوە بۆ قەندیل، ئەگەر ڕووپێوی قەندیل تا سنووری ئەوان بكەیت هەموومان دەزانین چەند دوورەو چەند شاخاوییەو چەند زەحمەتە و وائاسان نییەو شەقامێك نییە بچیتە ئەو بەرەوەو پرۆسەی سەربازی ئەنجام بدەیت و بگەڕێیتەوە، ناوچەیەكی زۆر شاخاوی ئاڵۆزە و لەكاتی خەباتی خۆمان دژی رژێمی دیكتاتۆری بەعس، لەژیانی پێشمەرگایەتی دا لەو ناوچانە كارمان كردووەو زۆر باش شارەزای ناوچەكەین و سەدام چەند هێزو بەكرێگرتەی هەبوو هەروەها توانای ماددی زۆر بەهێزی هەبوو نەیدەتوانی كۆنترۆڵی سنوورەكەی بكات، دەوڵەتی توركیا دەوڵەتێكی گرنگە لەڕووی سەربازیشەوە بەهێزەو دەوڵەتێكی دامەزراوەییەو ناتوانرێت ئینكاری بكرێت، ئێرانیش بەهەمانشێوە، ئەو دەوڵەتانەش نەیانتوانیوە سنوورەكانی خۆیان بە باشی كۆنترۆڵ بكەن، گەر بێتوو دروست بیری لێبكەیتەوە، ئەگەر ئێمە پێیان بڵێین بۆچی هاووڵاتی و خەڵكی تۆ دێن و لەم دیوەوە لەسەر سنوورەكان لە ناوچە شاخاویەكان لەلایەنی كوردستانی دەمێننەوەو پاشان دەبێتە كێشە بۆ دانیشتووانی ئەمدیو نزیك سنوورەكان! و ئێوەش دێن تۆپبارانی ناوچەكە دەكەن، زیانی گیانی زۆر بەدانیشتووانی ئەم دیو دەكەوێت، لەبری راكردن بۆ ئەم دیوی سنوور و بۆردومان و تۆپبارانی وڵاتەكانیان بۆ سنووری هەرێمی كوردستان، دەكرێ بەرێگەی ئاشتیانە چارەسەری گرفتەكانیان بكەن.
ئێمە ڕوومان لە هەموو لایەنەكانە بەبێ جیاوازی، كارمان كردوەو كاریش دەكەین بۆ بەردەوامیدان بە پێوەندیەكانی كە لەگەڵ وڵاتانی دراوسێ هەیە تاوەكو بەرەو باشتری ببەین، هەرێمی كوردستانیش موڵكی هەموو ئازادیخوازێكەو ماڵی هەموو مرۆڤێكی لێقەوماوو دیموكراتیخوازە، واجبی هەموو مرۆڤێكە كە بیر لە بەرەو پێشبردنی پرۆسەی دیموكراسی بكاتەوە، بیرلە پێكەوەژیانی ئاشتیانە بكاتەوەو بیر لە دوارۆژێكی باشتر بۆ پرۆسەی دیموكراتی لەناوچەكە بكاتەوە، پێویستە ڕەچاوی ئەم بارودۆخە بكات، بۆیە ئێمە لەپەرلەمانی كوردستان دانیشتنێكی نائاساییمان ئەنجامدا و كۆمەڵێك خاڵ لەلایەن پەرلەمانتارەكانەوە بڕیاریان لەسەردرا، خاڵێك لەو بڕیارانە ئەوەیە « داوامان لە گشت لیژنە هەمیشەییە پێوەندارەكانی پەرلەمانی كوردستان بەو بارودۆخەوە كردووە، دیراسەیەكی ورد لەسەر بارودۆخەكە ئامادە بكەن و بیدەن بەسەرۆكایەتی پەرلەمانی كوردستان بۆ ئەوەی لێرەدا دیراسەی بكەین و بەپێی ئەو راپۆرتانەو ڕاو بۆچوونی زۆرینەی پەرلەمانتاران مامەڵەی لەگەڵ دەكەین.

كێشەی سنوورەكانی هەرێمی كوردستان
* جەنابتان وەكو یەك فایل مامەڵە لەگەڵ هەردوو لایەنی توركیاو ئێران دەكەن، یا بەشێوەیەكی جیاواز؟
- هەردوو دەوڵەتی توركیاو ئێران وەكو دوو دەوڵەتی ئیقلیمی پێوەندی ئیجابیمان لەگەڵ هەردوو لایەن هەیە، هەردوو لایەنیش بە ئێمە دەڵێن ئێمە كێشەو گرفتمان لەگەڵ ئێوە نییە، واتا بەفەرمی و بەئاشكرا وامان پێ دەڵێن، ئێمە هیچ كێشەیەكمان لەگەڵ هەرێمی كوردستان نییە، بەڵام كەسانێك لەو ناوچە شاخاوییانە دژی ئێمە كار دەكەن، دێن خەڵكی ئێمە دەكوژن، ئەمە قسەی ئەوانەو بیانووەكەیان ئەمەیە، ئێمە داوا لەهەردوو دەوڵەتە دراوسێیەكە دەكەین: یەكەم تۆپباران و بۆردومانكردنی ناو سنووری خاكی هەرێمی كوردستان كە سەر بەدەوڵەتێكی دراوسێی ئەوان و ئەندامە لە نەتەوە یەكگرتووەكان، ئەو تۆپباران و بۆردومانە ڕابگرن و دووبارە نەبێتەوە، چونكە خەڵكی سیڤیلی لێ بووە بە قوربانی و خەڵكێك ئاوارەبوون و لە كەسابەتی خۆیان دوورخرانەوەو ڕەزەكانیان وشك بوو ئاژەڵەكانیان كوژرا منداڵ و پیرەمێرد و ئافرەتیان لێ شەهید بوون، ئەمە تاوانە، ئەمانەی ئەو كارە دەكەن بەرپرسن لەسەر ئەو كارانە، بۆیە دەبێت ئەو بۆردومانە ڕابگرن، بۆیە دەنگی پەرلەمانی كوردستان ئەوەیە هەم توركیا هەم ئێران بۆردومان و تۆپبارانەكان و لەشكركێشیەكانیان كۆتایی پێ بهێنن و ڕێگا چارەی تر هەیە بۆ كۆتایی هێنان بەكێشەكان، ڕێی تر هەیە دوور لە توندوتیژی، دەتوانن بەبێ ئەوەی خوێن لەیەك مرۆڤ بڕژێت چارەسەری كێشەكان بكەن، واتا ئەو ڕێگایە بگرن باشترە ئێمە هەردوولا، جارێك پژاك و پەكەكە یەكن و بەیەك چاو تەماشای دەكەین لەیەك جیا نین واتا دوو هێزی چەكدارن و مێژوویان دیارە چۆن دروست بوون، ئومێد دەخوازین كێشەكانیان بەڕێگای ئاشتی چارەسەر بكرێن، ئەوانیش بەكوشتنی چەند سەربازێك یا پاسدار ناتوانن بگەنە هەقی خۆیان، بۆیە رێگایەكی بەرز و پیرۆز لەپێش هەمووانە ئەویش بە دوور لەتوندوتیژی هەر لایەك دەنگی بۆ بەرز بكاتەوە جێگەی ڕێزە، بەڵام هەرچی بۆردومان و تۆپبارانی ناو سنوورەكانمانە ئیدانەی دەكەین.


واقیعبینی لە مامەڵەی دروست بۆ بارودۆخەكان
* بەڵام بەڕێز سەرۆكی پەرلەمانی كوردستان جگە لە هەردوو لایەنی پژاك و پەكەكە كۆمەڵێك لایەنی سیاسی تری وڵاتانی دەوروبەر لە كوردستانن، بەڵام كە تەماشای ئەوان دەكەین ڕەچاوی بارودۆخی هەرێمی كوردستان دەكەن و هەرێمەكەیان نەكردۆتە بنكەو مۆڵگەیەك بۆ خەباتی چەكداری خۆیان، ئایا ناكرێت لەگەڵ ئەم دوولایەنەش قسە بكرێت و پێیان بووترێت هەرێمی كوردستان بارودۆخێكی ناسكی هەیە، چونكە ناكرێت بیانوو بدرێتە دەست وڵاتانی دراوسێ ئەمەش لە پێناوی ئەوەی ئەزموونەكەمان بپارێزرێت؟
- لەڕاستیدا ئەوەی جەنابت دەیڵێیت لەسەدا سەد ڕاستە، حزبی دیموكراتی كوردستانی ئێران و كۆمەڵە لەم دیوەو خەباتی سیاسی خۆیان دەكەن و هەوڵ دەدەن ڕێگایەك بگرنە بەر كە لەسەرخەباتی خۆیان بەردەوام بێت و ڕەچاوی هەرێمی كوردستانیش بكەن و بەهانە نەدەنە دەستەوە، ئومێد دەخوازم ئەو لایەنانەش ئەو بەهانانەی باسی دەكەن هەر ئەوە بێت، لەگەڵ ئەوەش بەتەئكید حكومەتی هەرێمی كوردستان ئەركێتی لەگەڵ لایەنەكان زۆر بەهێمنی و بە وردی و بەڕێگایەكی دیپلۆماسی بۆ دۆزینەوەی چارەسەرێك كاربكەن بۆ ئەوەی ڕێگا بەو بیانووە نەدرێت، ئەویش بەلایەنی كەمەوە لەناو هەرێمی كوردستان هێزی چەكداری بەكارنەهێنن واتا ئەو بەهانەیەی باسی دەكەن كە خۆم ئەمە بەبەهانە دەزانم و لە بەهانە زیاتر نییە بۆیە پێویستە لایەنەكانی بەرپرسی ناو هەرێمی كوردستان ئەو بەهانانە بنەبڕبكەن.

* ئێستا لە سوریا كوردێكی زۆر هەن، ئەو كوردانەش تەنانەت ئێستاشی لەگەڵ بێت لەمافی بەهاووڵاتیبوون بێبەشن، لەم بارودۆخەدا سوریا لەسەروبەندی گۆڕانكارییەكی گەورەی چاوەڕوانكراوەدایە، جەنابت وەكو سەرۆكی پەرلەمانی كوردستان چی ڕاسپاردەیەكت بۆ كوردی سوریا هەیە؟
- ئێمە لەگەڵ مافی چارەنووسی میللەتانین لە هەموو شوێنێكدا، میللەتی ئێمەش و نەتەوەی ئێمەش یەكێكە لەو نەتەوانەی دنیا كە مافی خۆیەتی مافی چارەنووسی خۆی بەخۆی بڕیاری لەسەر بدات، بەنسبەت خوشك و براكانمان لەسوریا كە ئێستا لایەنی سیاسی جۆراوجۆرو كۆمەڵگای مەدەنییان هەیە، لەو بارودۆخەی ئێستا لەگەڵ خەڵكی سوریا ڕۆڵی دیارو سەرەكیان هەیە، ئێمە بەوان ناڵێین وا بكەن یا ئەو كارە مەكەن، ئەوەی ئەو خوشك و برایانەی ئێمە لەو پارچەیە كە لەگەڵ یەك پێكەوە پێی ڕازی دەبن ئێمە پشتیوانیان لێ دەكەین. هەر گۆڕانكاریەكی دیموكراتی ببێت میللەتی ئێمەش لێی بێبەش نابێت.

* جەنابت گەشبینیت بەوەی لەوێ كورد هەنگاوێك بچێتە پێشەوە ؟
- بەتەئكید كوردو گەلانی تریش لەم قۆناغەو لەم جموجووڵەی میللەتان لەناوچەكەدا كورد بێبەش نابێت .

* لەو ماوەیەدا سەردانی لوبنانت كردو وەكو سەرۆكی پەرلەمان لە ئاستێكی بەرز لە لوبنان پێشوازییان لێ كردن، لەوێش كوردێكی زۆر هەیە ئایا سەردانەكەت فەرمی بوو یاچاوێكت بەو كوردانەش كەوت كە لەوێن ؟
- سەردانەكە زۆر سەركەوتوو بوو، شاندی پەرلەمانی كوردستان، بەسەرۆكایەتی سەرۆكی پەرلەمانی كوردستان پێشوازیمان لێ كرا، لەسەر ئاستی سەرۆك كۆمارو سەرۆكی پەرلەمان و وەزیری ناوخۆو بەرپرسیی هێزەكانی ئاسایشی ناوخۆ و سوپاسالاری ئەو وڵاتەو سەرۆكی زانكۆكان و تیمی ئەكادیمی و هەروەها كوردی لوبنانیش شەوێكمان بۆیان تەرخان كرد، لایەنە سیاسییەكان و كۆمەڵگای مەدەنی و كەسایەتییەكانیش تا درەنگانی شەو ماینەوەو گوێمان لە بیرو بۆچوونەكانیان بوو، زۆربەی پێشنیارەكانیش نووسراونەتەوەو دراوە بە ئێمە، ئێمە زۆر بەڕاشكاوانە پێمان وتن، ئێمە لەگەڵ داواكاری و مافی ئێوەین و بەشێوازێك لەگەڵ یاسای وڵاتی لوبنان بگونجێت، ئێوە هاووڵاتی ئەو وڵاتەن و ڕێز لە دەنگتان دەگیرێت و لوبنانیش وڵاتێكی دیموكراتییە، بۆیە ئێمە لەگەڵ خەڵكەكەی خۆمانی ئەوێین و كە لە رابردووشدا دەنگ و ڕەنگیان هەبووە، زۆریشیان لە رابردوو لە خەباتی كوردایەتی و لە بزووتنەوەی رزگاریخوازی گەلی كوردستان ڕۆڵیان هەبووەو زیانێكی زۆریشیان كردووە، بۆیە ئێمەش وەكو نەتەوەیەك بەدڵ لەگەڵ ئێوەداین. بەڵام ئەو لێك نزیكبوونەوەیەی ئێوەو پاڵپشتی و هاوكاری ئێوە لەدژی یاساكانی لبنان و یاساكانی ئێمە نەبێت.

* ئایا تا چ رادەیەك دەتوانرێت بۆ پەرەپێدانی هەرێمی كوردستان سوود لە شارەزایی و توانای ئەوان وەربگیرێت؟
- بۆچوونەكانی ئەو بەڕێزانەم زۆر بەوردی وەرگرت، خۆم تێبینیەكانم نووسییەوەو خۆشیان بەنووسراوچەندین تێبینی و زانیارییان پێداوم، ئێمە لای خۆمان دیراسەی دەكەین، پاشان لەپێوەندی دەبین لەگەڵیاندا، بە ڕای من ئەگەر بتوانرێت لە ڕێگای سەنتەرێكی رۆشنبیرییەوە خزمەتیان بكەین و سوودیان بۆ هەرێمی كوردستان و بۆ خۆشیان هەبێت، چونكە ئەوان خەڵكێكی زۆرن و لایەنی سیاسی جیاوازیان هەیە و پێویستیان بەكۆكردنەوە هەیە، چەندین بواری وەبەرهێنان و رۆشنبیری و كادری بەهێزو خەڵكی سیاسی بەتوانایان هەیە، بۆچی ئێمە بتوانین سوود لە پسپۆرێكی بیانی وەربگرین لەكاتێكدا كەسێكی شارەزاو بەتوانای لوبنانیمان هەبێت و لەنەتەوەی خۆشمان بێت، هەر بۆیە بەڕای من ڕێگای هەرێمی كوردستان بۆ ئەو خوشك و برایانەی ئێمە كراوەیە، ئەوەی من تێبینیم كرد كە من دووجار لەگەڵیان دانیشتووم جارێكیان بە تەنیا جارێكیشیان لەگەڵ جالیەی عیراقی، لە ئاڵوگۆڕی بیروڕا زۆر مورتاح بوون ئێستاش بە دڵنیایی چاوەڕوانی ئەنجامی گفتوگۆكانن.
ئێمە كاتێك كەسایەتییە بەرپرسەكانی ئەو وڵاتەمان بینی هەر لە سەرۆكی پەرلەمانەوە تا بەرپرسە باڵاكانی تری ئەو وڵاتە هەموویان ئامادەییان هەبوو سەردانی كوردستان بكەن، لەكوردستانیشەوە خەڵكێكی شارەزاو لێوەشاوەی ئێمە بۆ ئەوێ بانگهێشت بكەن، دواتر لە هەوڵدا بووین بۆ چارەسەری كێشەی ئەو قوتابیانەی كە لەوێ دەخوێنن، كە كێشەی نشینگە(ئیقامە)یان هەبوو، بۆ ئەو مەبەستە لەگەڵ وەزیری ناوخۆ قسەمان كرد، هەر لەناو دانیشتنەكەدا بووین، تەلەفونی كرد بۆ بەرپرسی نشینگەی ئەو وڵاتەو وتی بە زووترین كات لە جیاتی سێ مانگ ئیقامەیان بۆ بكەنە ساڵێك و هەر لەو دانیشتنەدا ئەمە دابین بوو، دوای ساڵەكەش ئەگەر پێویستیان بوو بۆیان درێژ بكەنەوە تا دوو ساڵ و زیاتریش، ئەمەش بە ئاگاداری بەڕێز باڵیۆزی عیراق شێخ عومەر بەرزنجی كە بەڕاستی باڵیۆزێكی چالاك بوو لەسەر ئاستی باڵیۆز، وەك لە كەسانی تریشمان بیست جێگەی شیاوی خۆی كردۆتەوە، چ لەناو دەزگا فەرمیەكان و لەلای بەرپرسان، یاخود لەناو جالیەی عیراقی و قوتابییەكان و كوردی لبنان..
پێشمەرگە لە ناوچەكانی سەعدیە و جەلەولا ناكشێنەوە

*مەسەلەیەكی تر كە ئێوە وەك پەرلەمانی كوردستان دانیشتنتان بۆ سازدا مەسەلەی دەركردنی كوردەكانی سەعدییەو جەلەولایە لەسەر زێدو ماڵ و حاڵی خۆیان، لەسەر ئەم زوڵمەی لە كوردی دانیشتووی ئەم ناوچانەو تا دەگاتە ناوچەكانی شەنگارو ناوچە كوردنشینەكانی تری كە بە ناوچەی ناكۆكی لەسەر دەناسرێن، ئێوە وەك پەرلەمانی كوردستان چ هەڵوێستێكتان هەیەو بەرنامەتان چییە بۆ ڕووبەڕووبوونەوەی ئەو زوڵم و زۆرەی لە كورد دەكرێت؟
- ئەو زوڵمەی ئەنجام دراوە لەو ناوچانەیە كە بە ناوچەكانی ماددەی 140 ناسراون واتە تا ئێستا چۆن بۆ عیراقە ئاوهاش هی كوردستانە، ئەوانە ناوچەیەكن كێشەیان لەسەرە باشە تا یەكلایی دەكرێتەوە بۆچی ئەو حەقی هەبێت لەوێ بێت بۆ منی كورد لەوێ نەبم تا كێشەكە چارەسەر دەكرێت، هەركاتێك خەڵكەكە لە ڕیفراندۆمێكدا بڕیاریاندا ئیدارەی شارەكانیان سەر بە ناوەند یان هەرێم بن ئەو كات بەو شێوەیە یاساكان دادەڕێژرێنەوەو سەربازو پۆلیس ودادو فەرمانگە كارگێرییەكان شكڵی خۆیان وەردەگرن، هێشتا یەكلایی نەكراوەتەوەو بەمەبەستی سیاسی و بۆ مەرامی تر دەیانەوێت كوردی لێ دەربكەن، ئەمەش بە هەڵەو زوڵمی دەزانین، بۆیە پەرلەمانی كوردستان حەقی خۆیەتی كە لەسەرخەڵكی ئەو ناوچانە بێتە وەڵام، نەك تەنیا كوردیش بەڵكو ژیانی توركمان و مەسیحی و عەرەبی ڕەسەنی ئەوێش ئەوانەی كە لەكۆنەوە لەوێ نیشتەجێن، هەروەها كەمە نەتەوەیی تریش كە لە مەترسی و لەبەر هەڕەشەدان بپارێزرێن، دەزگاكانی سەربازی و پۆلیس و ئەمن و ئاسایشی ناوچەكەش شكست لە دوای شكست دەهێنن و ناتوانن ئاسایش بپارێزن، بەتایبەتیش لە پاراستنی خەڵكی كوردی ئەوێ هیچیان نەكردووەو بە بەردەوامی خێزانە كوردەكان خەڵكیان لێ دەكوژرێت و تەعددایان لێ دەكرێت و ڕۆڵەكانیان دەڕفێنرێن و زەوی و موڵكیان لێ داگیر دەكرێت، بۆیە بە ئەركی دەزگاكانی هەرێمی كوردستانی دەزانین كە بچن لەوێ بەرگری لەو خەڵكە مەزڵومە بكەن و لەوێ بۆ پاراستنیان بمێننەوەو ئامادەش بن بۆ هەر ئەگەرێكی تر كە مەترسی بێت بۆ سەر ژیانی كوردو خەڵكی ڕەسەنی ئەو ناوچەیە..

* تۆ پێت وایە كە ناكرێت پێشمەرگە لەو ناوچانە جارێكی تر بكشێنەوە؟
ــ هیچ هۆكارێك بەدیناكەم بۆ كشانەوەی پێشمەرگە لەو ناوچانە، تا چارەنووسی ئەو ناوچانە یەكلایی نەكرێتەوە..

* ئەمانەی ئەو زوڵمانە لە كورد دەكەن بە هۆكاری ڕەگەزپەرستی وادەكەن یان گرووپە تیرۆریستەكانن كاری قێزەون ئەنجام دەدەن..
- زۆر هۆكار هەن، خۆ ئەوە تیرۆریست نەبوو كە ناوی نەفتخانەی گۆڕی بۆ هەیئەی عملیاتی دیالا، خۆ تیرۆریزم نەبوو كە نەفتخانەی لەسەر نەوتی باكوور لادا و خستییە سەر نەوتی وەسەت؛ بۆچی؟ خۆ ئەو كوردانەی بە بەردەوامی و بە پێی بەرنامەیەكی داڕێژراو دەكوژرێن، تەنیا لەبەر ئەوەی كوردن، كێ دەڵێت تیرۆریست ئەم كارانە دەكەن، با گوللە بە تاریكییەوە نەنێین، هێزەكانی ناوخۆ دەڵێن ئەمانە كاری تیرۆریستین و بەتایبەتیش ناتوانن كورد بپارێزن، كەواتە ئەمە واتای ئەوەیە كەمتەرخەمی دەكەن لە ئەركەكانیان، یان لەتوانایاندا نییە بیانپارێزن، بۆیە پێویستە هێزی پێشمەرگە بە ئەركی نیشتمانی و ئینسانی خۆی هەستێت و ئەو جینۆسایدە ڕابگرێت كە بەرانبەر كورد ئەنجام دەدرێت، پێشمەرگە چووەتە ئەوێ تا عەدالەت ڕابگرێت و تا ئەو ماددە دەستوورییەی تایبەتە بەم ناوچانە جێبەجێ بكرێت، خۆ وەزارەتی نەوتی سەر بە حكومەتی ناوەندیش كە بێ پەرواو بە بێ گەڕانەوە بۆ دەستوور دەست لە كاروباری كارگێڕی ئەو ناوچانە وەردەدات تیرۆریست نین كە هاوزەمەن لەگەڵ كوشتنی خەڵكی كوردا كاری نادەستووری وادەكەن، ئەمانە نیشانەی پرسیارو سەرسوڕمانی زۆر هەڵدەگرن، و دەبێت ئێمەش كار بكەین. بۆیە پێشمەرگە چووەتە ئەوێ و ناشگەڕێتەوە..

* پێتان وانییە ئەم كێشانە لە دەرئەنجامی جێبەجێ نەكردنی مادەی 140و كەچی پەرلەمانی كوردستان تا ئێستا لەسەر ئەم پرسە گرنگە دانیشتنی تایبەتی گرێ نەداوە؟
ـــ گوناحەكە لە ئەستۆی پەرلەمانی كوردستان نییە، زۆر بە ئەمانەتەوە بە ئەركەكانی خۆی هەڵدەستێت، بەڵام ماددەی 140 ماددەیەكە دانراوە بۆ چارەسەری كێشەی ئەو ناوچانە، كێشەكانیش لە نێوان حكومەتی ناوەندی و حكومەتی هەرێمی كوردستان چارەسەر دەكرێت، كۆمەڵێك هۆكار هەن بۆ دواخستنی جێبەجێكردنی بەندەكانی ماددەكە یەكەمیان ئەو بەربەستانەن كە كۆنە بەعسییەكان دەیخوڵقێنن، ئەوانیش بە هاوكاری تاقمە تیرۆریستەكانی سەر بە قاعیدە كە بەرنامە دادەڕێژن و تا كێشەی بەردەوام لەنێوان كوردو عەرەب دروست بكرێت، هێزە سیاسییەكان لە یەكتر دڕدۆنگ بكەن تا بارودۆخی باشتر بۆ خۆیان بخوڵقێت و بە ئاسانی كار بكەن، دوای ئەوانە دی مستۆرەو ئەدمیلكەرت لەنەتەوە یەكگرتووەكانەوە كێشەكەیان دوادەخست و ئاڵۆزیان دەكرد، لە كاتێكدا ئەو ماددەیە دانراوە بۆ چارەسەری كێشەیەك نەك نانەوەی كێشەی تر بەناوی ئەوەوە، ئەم كێشەیەش لە نێوان حكومەتی ناوەندی و حكومەتی هەرێمە، ئەوان پێشنیازی خۆیان دەهێنایە پێشەوە بەناوی هاوكاری كردن بۆ جێبەجێ كردنی مادەكە، چونكە كێشەكە لەنێوان حكومەتی ئیتیحادی و حكومەتی هەرێمی كوردستانە و بە ریفراندۆم لەلایەن دانیشتووانی رەسەنی ئەو ناوچانە یەكلا دەكرێتەوە، دوایی هەر بۆ دواخستنی چارەسەری ماددەی 140 لیژنەكانی UN دەچوون كۆڵان بە كۆڵان دەسوڕانەوەو لە خەڵكێكی سادەی بێ ئاگایان دەپرسی چیتان بۆ بكەین، لە كاتێكدا كێشەكە دیاریكراوەو بە ماددەی دەستووری چارەسەری بۆ دانراوە، ئیتر ئەم بەهەدەردانی توانا و كات و پارەیەتان لە چی؟؟ ئەو وەخت كوشتن و بەكارهێنانی بیرۆكراتییەتە زۆرە، هۆكاری دووەمی سەرەكی دواخستنی مادەكە بوو لە دوای هۆكاری یەكەمەوە كە بۆم باس كردن، دواتر هەمیشە بۆچوون و بەیانات و لێدوانەكانی ناو پەرلەمانی كوردستان لەسەر ئەو مەسەلەیە ڕوون و ئاشكرابووە، چ ئەوانەی نوێنەرانمان لە بەغداو چ ئەوانەی سەرۆكی هەرێمی كوردستانیش، نەمانهێشتووە لەسەر هێڵ و سكەی خۆی ئەم ماددەیە لا بدەن، دیموستۆرا پرۆپۆزەڵێكی هێنا بوو، تۆوی ڕەگەزپەرستی دەچاند بە شێوەیەك كورد بۆ كورد دەنگ بدات عەرەب بۆ عەرەب و مەسیحی بۆ مەسیحی، ئەمەی زۆر مەترسیدار بوو، من پێم وت تۆ وادەكەی تا هەمووان دژایەتی یەكتر بكەن، ئەی خێزانێك گەر تێكەڵە بن لە دوو ئیتنی یان سێیان ئەوان بە كێ دەنگ بدەن، ئەم شێوازە ڕەگەزپەرستییەی ئەومان ڕەفزكردەوە، ماوەیەكی تر هاتن تا 10 كورد و 10 توركمان و 10 عەرەب و 4 مەسیحی بۆ ئەنجومەنی كەركووك دابنێن، ئەمەش ناعادیلانە بوو، بۆیە رەفز دەكراو كاتیش بەهەدەر دەڕۆیشت.

* بۆچی ئێمە كە باسی حكومەتی ئینتیقالی دەكەین وەك ئەوەی لە دوورەوە بین، لە كاتێكدا ئێمە شەریكین لە حكومەتی ئیتیحادی، سەرۆك كۆمار، جێگری سەرۆك وەزیران، سەرۆكی ئەركان كوردن، بۆچی هەندێك گلەیی لە ئەوانی خۆیشمان نەكەین بەوەی كە كەمتەرخەمن؟
- من دڵنیام ئەو بەڕێزانەش هەوڵیانداوە، ناكرێ بڵێین هیچیان نەكردووە یان دڵسۆز نەبوون ئەمەیان خوا قبوڵ ناكا، چونكە ئەوەی ئەوان لە توانایاندا هەبووە كردوویانە، بەڵام بۆیان نەكراوە و نەیانتوانیوە خۆیان فەرز بكەن دەكرا هەندێك هەڵوێست وەربگرین بەیەكەوە، یان موقاتەعەی حكومەتی عێراق بكەین و كێشەی بۆ دروست بكەین كەحكومەتەكە خۆی كێشەی هەیە لە كاتێكدا ئێمە هەموو هەوڵێكمان بۆ ئەوە بوو حكومەتەكە پێكبێت و ئەگەر دەستپێشخەری جەنابی سەرۆك بارزانی نەبوایە حكومەتەكە پێك نەدەهات، لەبەر ئەوەی بارودۆخی عێراق بەجۆرێك بوو هەوڵ دەدرا كە بە شێوازێك چارەسەر بكرێ، هەم حكومەتەكەی عێراق بە گونجاوی بمێنێتەوە و هەم كێشەكەش چارەسەر بكرێ، لەبەرئەوە‌ برادەرانی خۆمان زۆر پێیان دانەگرت، بۆیە كەمتەرخەمی هەموومانە كە ئێمەش لەگەڵ برایانمان لە بەغدا نەمانویست بچینە خانەی حەددی یان ئەوە بكەین و ئەوە دەكەین ئەگەر ئەمە بكرابا ئەنجامەكان چی دەبوو؟! روون نەبوو!.
بەڕای من ئێستاش دەرفەت ماوە، چونكە ئێستا لە جیهانی عەرەبی بزووتنەوەكان میللەت بڕیاریان لەسەر دەدەن، لە میسر 35 ساڵ زیاتر ڕێكخستنی چەكداری لایەنە سیاسییەكان دژی موبارەك هەبوو نەیانتوانی هیچ بكەن، بەڵام میللەت بە 17 رۆژ توانیی رژێمەكە بگۆڕن، بۆ گێڕانەوەی ناوچە دابڕێنراوەكان ئەگەر رێگا نەدەین زیاتر دوا بكەوێت و ئەگەر هەوڵی زیاتر دواحستنی بدرێت لەلایەنی حكومەتی ئیتیحادی ئەوا میللەت بڕیاری خۆی دەدات لەسەر گێڕانەوەیان، بەرێگای ئاشتی و دوور لەتوند و تیژی وەكو میسر.
یەكڕیزی نێوماڵی كورد مەرجی سەرەكیە بۆ پاراستنی دەسكەوتەكان

*ئەو هەموو تەحەدییانەی كە باسمان كرد ئێستا رووبەڕووی هەرێمی كوردستان دەبێتەوە یەك دەروازە هەیە كە بتوانین خۆمانی بۆ ساز بكەین ئەویش یەكڕیزی و پاراستنی ئەو ئاشتییەیە كە لە كوردستان هەیە، ئەوەی جێی خۆشحاڵی بوو جەنابی سەرۆكی كوردستان چوار بڕیاری گرنگی دەركرد كە جێگای ئومێدی هەموو لایەك بوو بۆ دەستپێكردنەوەی كۆبوونەوەكان كە پێوەندییەكی نزیكیان بە پەرلەمانی كوردستانەو هەیە، چونكە شوێنی كۆبوونەوەكانە، حەز دەكەین جەنابی سەرۆكی پەرلەمان رای خۆی بەرامبەر بەو چوار بڕیارەی سەرۆكی كوردستان بخاتە ڕوو تا چەند دەبێتە فاكتەرێك بۆ ئەوەی خۆمان ڕێك بخەینەوە بۆ رووبەڕووبوونەوەی ئەو تەحەدیانە؟
- راستە یەكڕیزی ناو ماڵی خۆمان مەرجێكی سەرەكییە بۆ ئەوەی بتوانین باشتر كار بكەین و دەستكەوتەكانی هەرێمی كوردستان پارێزراو بێت وئەوانەشی ماوە زووتر بەدەستی بهێنین، بە رای من زۆر ئاسانە ئەگەر ئێمە بە دڵسۆزییەكی تەواو و بیرێكی وردەوە سەیری بكەین، جەنابی سەرۆك ماوەیەكی زۆرە كار لەسەر چاكسازی دەكات، بەر لەوەی سەردانی ئیتاڵیا بكات بەڕێزیان سەرۆكی گشت لایەن و كوتلەكان و سەرۆكایەتی پەرلەمان و حكومەتی بانگهێشت كردو باسی چاكسازی كردو داوای لە هەموو لایەك كرد كە خۆیان ئامادە بكەن و دوای گەڕانەوەی هەموو لایەك دەست بكەین بەو شتانەی كە پێویستیان بە چاكسازی هەیە تا بیخەنە بەر دەستی بەڕێزیان بۆ ئەوەی لە رێگای حكومەتی هەرێمەوە جێبەجێ بكرێن، بەداخەوە ئەو ڕووداوانەی كوردستان هاتنە ئاراوە، بەڵام ئێستاش دەرفەت هەیە و ئەو ئیرادەیە هەر ماوە و بەردەوامە و چاكسازیش دەستی پێكردووە، لەگەڵ ئەوەی بە داخەوە ئەو ڕووداوانە ڕوویان دا بەڵام پرۆسەی چاكسازی كە بەڕێز سەرۆكی هەرێم بەڵێنی دابوو هەر بەردەوامە، بەڵام هەموو شتێكیش بە شەوو رۆژێك ناكرێ وپێویستە هەنگاو بە هەنگاو چاكسازی ئەنجام بدرێت.
بۆ ئەوەی نێو ماڵی خۆمان ڕێك بخەین پێویستە هەموومان پابەند بین بە یاسا و بنەماكانی دیموكراسی و كاری موئەسەساتی و پشتیوانی لە پرۆسەی چاكسازی سەرۆكی هەرێم بكەین دڵنیام هیچ كێشەیەكمان نامێنێت.

* چوار بڕیارەكەی سەرۆكی هەرێم بە گێڕانەوەی بودجەی ئۆپۆزسیۆن و نەمانی سزای سیاسی و سزادانی تاوانباران، ئەمانە تا چەند دەبنە هۆی ئەوەی ئۆپۆزسیۆن و پارتی و یەكێتی بەرەو قۆناغی ئایندە هەنگاو بنێن؟
- ئەمە هەنگاوێكی گرنگ بوو و دەستخۆشی لە جەنابی سەرۆكی هەرێم دەكەین بۆ ئەو هەنگاوانە، بە دڵنیاییەو پارتی و یەكێتی و هەرسێ لایەنەكەی تری ئۆپۆزسیۆنیش بە یەكەوە دادەنیشن بۆ بەردەوام بوونی دانیشتنەكانیان، بەڵام پێویستە هەموویان پابەند بن بە یاساو بنەماكانی دیموكراسی و كاری موئەسەساتیی، من لە دڵسۆزی هەموو لایەنەكان دڵنیام وبەو ئاڕاستەیەش هەنگاو دەنێن، ئێمە خاوەن حكومەتی موئەسەساتین لە هەرێمی كوردستان، ڕاستە كە كەموكوڕیان هەیە و پێویستە چاكیان بكەین، بەڵام ناكرێ تێكیان بدەین و ئەگەر بڕوامان بە پرۆسەی دیموكراسی و هەڵبژاردن هەبێت، دەبێ هەموومان ڕێزمان بۆ دەنگی زۆرینەی خەڵكی كوردستان هەبێت، لە هەڵبژاردن لایەنێك زۆرینەی دەنگەكان بەدەست دەهێنێت لایەنێك كەمینە، لەوانەیە لە خولێكی دیكەی هەڵبژاردندا بە پێچەوانە بێت، ئەوەی جێگای خۆشحاڵییە ئەو لایەنەی كە زۆرینەی دەنگەكانی لە هەڵبژاردنەكانی 25/7/2009، بەدەستهێناوەو ئامادەیە لە حكومەت بەشداری بەو لایەنانە بكات كە ئۆپۆزسیۆنن و كەمینەی دەنگەكانیان بەدەست هێناوە، و حكومەتێكی بنكە فراوان پێك بێت، ئەگەر بەشدار بوون بەو وەزارەتانەی بەر ئەو بەڕێزانە دەكەوێت نیشانی خەڵكی كوردستانی بدەن كە تاچەند دەتوانن خزمەت بكەن ئایا دەتوانن یان ناتوانن؟ خەڵكی كوردستانیش چاودێرێكی زۆر دادپەروەرانەیە، رەنگە چەند حزبێك خراپ بن، بەڵام مومكین نییە میللەتێك هەموو خراپ بن، میللەتەكەمان زوڵمی زۆری بینیوە و ناكرێ زوڵم لە كەس بكات، لەوانەیە كەسانێك هەبن هەوڵ بدەن كارە باشەكان چەواشە بكەن، بەڵام میللەت وشیارەو حوكمی عادیلە وهێزەكەشی، هێزێكی لەبن نەهاتوە.
ئەگەر ئۆپۆزسیۆن بەشدار بوون لە حكومەت، خەڵك بەكار و ئەدایان هەڵیاندەسەنگێنێ كە تا چەند دەتوانن خزمەت بكەن بۆ ئەوەی لە هەڵبژاردنی داهاتوودا دەنگی زیاتریان پێ بدەن، ئەگەریش لە حكومەتی بنكە فراواندا بەشداری نەكەن ئەوا لە ئۆپۆزسیۆنێكی تەندروستدا پێویستە پابەند بن بە یاساوە، هەروەها رەخنەی بونیادنەریش بگرن و كەموكوڕیەكانی دەسەڵات بۆ خەڵك روون بكەنەوە و خەڵكیش دواتر بڕیار دەدات كە دەنگ بە كام لایەن بدات، بەڵام مەرج نییە هەرسێ لایەنی ئۆپۆزسیۆن بە یەكەوە بەشداری لە حكومەتدا بكەن یان بەشداری نەكەن، چونكە مەسەلەكە تەكەتول نییە بەڵكو بیروباوەڕ و بۆچوونە و كام لایەن بەرژەوەندی خۆی و بەرژەوەندی خەڵكی كوردستان چۆن ببینێت بەرای من بەو شێوەیە ڕەفتار دەكات.

* دوا پەیامی بەڕێزتان چییە بۆ خەڵكی كوردستان؟
- ئێمە ڕێزمان بۆ گشت خەڵكی كوردستان هەیە و كاری ئێمە بەردەوام خزمەت كردنە بەو خەڵكە بۆ ئەوەی بیانبەین بۆ قۆناغێكی باشتر، ئەگەر كوردستان بەراورد بكەی لەگەڵ پێشوودا زۆر شت كراوە، بەڵام ئەگەر سەیری جیهانی دیموكراسی و پێشكەوتووش بكەی هێشتا زۆرمان ماوە، گواستنەوەش لە قۆناغێكی دیكتاتۆری بۆ قۆناغێكی دیموكراسی رووبەڕووی كەمتەرخەمی و سلبیاتی زۆر دەبێتەوە، گرنگ نیاز پاكی و كاركردنە بۆ كەمكردنەوەی كەموكوڕیەكان و راستكردنەوە یا لادانی ئەو كەسانەیە كە بە دروستی و بە پاكی كار ناكەن، یەكڕیزی ناوماڵی خۆمان زۆر گرنگ و پێویستە بۆ هەموو لایەكمان و پاراستنی ئەزموون و پڕۆسەكە و موئەسەساتەكانی و پابەندبوون بە یاسا ئەركی سەر شانی هەموو یەكێك لە ئێمەیە‌ و داواش لەگشت لایەنەكان دەكەین، موراعاتی ئەم ئەزمونە دیموكراسیەی ناو هەرێمی كوردستان بكەن و هیوای سەركەوتن بۆ ئێوەش دەخوازم.