ساڵێکی پڕ خزمەت و دەستکەوت بەسەر ھەشتەمین کۆنگرەمان (کۆنگرەی نیشتمان) تێپەڕی
رۆژی ٣٠ی ئەیلوولی ٢٠١٩ بە بۆنەی تێپەڕبوونی ساڵێکی پڕ دەستکەوت و خزمەت بەسەر کۆنگرەی ھەشتەمدا (کۆنگرەی نیشتمان) یەکێتی ئافرەتانی کوردستان لە چالاکییەکی بێ وێنەدا و بە ئامادەبوونی بەڕێز فازڵ میرانی سکرتێری مەکتەبی سیاسی پارتی دیموکراتی کوردستان، ھەڤاڵانی بەڕێزمان لە ئۆرگانە حزبی و حکوومییەکان، رێکخراوەکانی کۆمەڵگەی مەدەنی و ژمارەیەکی بەرچاو لە ئافرەتانی ئازیز، کۆی چالاکییەکانی لە سەر ئاستی مەکتەبی سکرتاریەت، ئەنجومەن و ناوەندەکانی خستەڕوو کە بە شانازییەوە لە ماوەی ساڵێکدا توانراوە لە سەرجەم بوارەکان چالاکیی گرنگ و زەرووریی ئەمڕۆی کۆمەڵگەمان بە ئەنجام بگەیەنێت.
سەرەتای مەراسیمەکە بە خولەکێک وەستان لەگەڵ ماڕشی ئەی رەقیب بۆ رێزگرتن لە گیانی پاکی شەھیدان و سەروەریان بارزانیی نەمر و کاکە ئیدریسی ھەمیشە زیندوو، دەستی پێکرد.
دواتر بەڕێز د.ڤیان سلێمان سکرتێری یەکێتی ئافرەتانی کوردستان وتارێکی پێشکەش کردو، تیشکی خستە سەر چالاکییەکانی ساڵیکی رێکخراوەکەمان و لەگەڵ ئاماژەکردن بە ھەندێک پڕۆژەی نوێ، لەوانە:
زیادکردنی بەشەکانی پلاندانان و بەدوداچوون و تواناسازی .
بەشداریپێکردنی ئەندامانمان لە پێکھاتە ئایینی و ئیتنییەکان لە نێو پێکھاتەی سەرکردایەتیی ڕێکخراو. دانانی پلانی ستراتیژیی لە پێناو بەرەوپێشچوونی یەکێتی ئافرەتان و مانەوەی لە پێشەنگیدا.
تۆڕی پێکەوەبەستنی ئۆرگانەکانی رێکخراوەکەمان بە شێوەی (online) کە لە (٤) بەش پێکدێت: ئامار و ڕێکخستن، چالاکییەکان و پشتگیریی کۆمەڵایەتی.
دامەزراندنی تۆڕی میدیایی ھێلین، بە ئامانجی یەکخستن و فراوانکردنی کەناڵەکانی ڕاگەیاندنمان و ھەندێک پڕۆژەی نوێ وەک پڕۆژەی تواناسازی و دابینکردنی ھەلی کار بۆ ئافرەتان، ئامادەکردنی چەند پڕۆژە یاسایەک بۆ پەرلەمانی کوردستان، پێگەیاندنی کادران بە شیوەی ڕاستەوخۆ و ئۆنلاین و چەندین پڕۆژەی دیکە.
پاشان بەڕێز فازڵ میرانی سکرتێری مەکتەبی سیاسی پارتیمان وتارێکی پێشکەش کرد و تیشکی خستە سەر ئەوەی کۆمەڵگەی پێشکەوتوو دروست نابێت، ئەگەر یەکسانی بوونی نەبێت، واتە ھەر دوو رەگەز لە یەکتر تێبگەن و ھەھامەنگ بن.
یەکێتی ئافرەتانی کوردستان خەباتی سیاسی و تەنانەت خەباتی نھێنیشی ھەبووە، یادی سکرتێرەکانی یەکێتی ئافرەتان بکەینەوە کە خۆشبەختانە سەرکردەکان و پێکھاتەکانی یەکێتی ئافرەتانی ئێمە ھەموو ئافرەتی بەتوانان لە بواری سیاسی، کۆمەڵایەتی و رۆشنبیری، ئەمەش دەلیلی ڕەسەنییەتی رێکخراوەکەی ئیمەیە بە بیروڕای حزبێکی ئەسیلی کوردستانی، کە ئەویش پارتی دیموکراتی کوردستانە.
- دواتر پێشکەشکردنی دۆکێومێنتارییەک لەسەر راگەیاندنی یەکێتی ئافرەتانی کوردستان لە دەستپێکەوە تا ئەمڕۆ.
- نمایشکردنی چەندین تابلۆی ھونەری.
- پێشکەشکردنی چەند پارچە میوزیک و گۆرانییەک و لە کۆتاییدا نمایشکردنی کارە دەستییەکانی ماڵی ھێلین.
جێگەی ئاماژە پێکردنە لەم چالاکییەدا لە رێگەی بڵاوکراوەیەک کە تایبەتە بە چالاکییەکانی یەکێتی ئافرەتانی کوردستان لە ئەیلوولی ٢٠١٨ بۆ ئەیلوولی ٢٠١٩ بە چاپ گەیاندرا و خرایە بەر دەست ئامادەبووانی بەڕێز.