ئافرەتێك لەدووڕیانی چاوەڕوانیدا: نازانم چ بڕیارێك بۆداهاتووی خۆم ومنداڵەكانم–بدەم
August 4, 2019
کۆمەڵایەتی
![ئافرەتێك لەدووڕیانی چاوەڕوانیدا: نازانم چ بڕیارێك بۆداهاتووی خۆم ومنداڵەكانم–بدەم](https://gulanmedia.com/public/old_images/articles/AUHHAA.jpg )
گوڵان: كۆمەڵایەتی
شادان ئافرەتێكی تەمەن 39 ساڵەیە و ژنی ماڵەوەیە، وەك خۆی باسیكرد، دایكی سێ منداڵە و دوو كوڕی تەمەن 6 و 9 ساڵی هەیە كچە گەورەكەی تەمەنی 14 ساڵە و ماوەیەكە بە هۆی ناپاكیی هاوسەری ماڵی خۆی بەجێ هێشتووە. شادان بەمجۆرە باسی بەسەرهاتی خۆی دەكات: «زیاتر لە 16 ساڵە لەگەڵ مێردەكەم كە زۆر بە تەمەن لە من گەورەترە دەژیم و خاوەنی سێ منداڵین، بەڵام لە هەموو ئەو ماوەیەدا هەر خیانەتی لێم كردووە و منیش تەحەمولم كردووە و هەوڵم داوە، بێتە سەر رێی راست هەتا منداڵەكانم سەرلێشێواو نەبن. چەندین جار خیانەتی مێردەكەمم بە چاوی خۆم بینیوە، تەنانەت ئەو بەقاڵەی سەری كۆڵانەكەشمان جارێكیان بە بەرچاوی چەند ئافرەتی گەڕەكەكەمان پێی گوتم مێردەكەت شەوانە دەچێتە ماڵە عەرەبەكانی گەڕەك و پەیوەندی لەگەڵ ژنەكان هەیە، زۆر كەسی تریش باسی ئەوەیان دەكرد و بەو قسانە زۆر دڵگران دەبووم و خەمم بۆ شكۆی خێزانەكەم دەخوارد، جگە لەوەش شەو رۆژ خەریكی مۆبایلەكەی دەستیەتی، ئەو شەوانە نایەتە ناو جێگەم و بەبیانووی تەنگەنەفەسی شەوان لە ژووری میوان دەخەوێت، دواجار ماوەیەك پێش ئێستا شەوێكیان بە هۆی ژانە سك (كیسە لەسەر هێلكەدانم دروست بووە) سەعات سێی نیوەشەو بە ئاگا هاتم و چوومە چێشتخانە بۆ ئاوهێنان تاوەكو حەبێكی ئازارشكێن بخۆم، لەناكاو گوێم لە هەناسەبڕكێی هاوسەرەكەم بوو، منیش بەپەلە رام كردە ژووری میوان، وامزانی مێردەكەم وەزعی تەندروستی خراپ بووە، بەڵام چیم بینی، ژنێكی رووتم لە باوەشی مێردەكەم بینی، منیش كردمە هات و هاوار و منداڵەكانم بەئاگاهاتن، ئەویش دەرگای لەسەر ژنەكە داخست بۆ ئەوەی منداڵەكان نەیبینن، دوای ئەوەی زۆرێكی لێدام، دەستی گرتم و بازنە زێڕەكانی لە دەستم داماڵی و من و منداڵەكانمی بەم نیوەشەوە خستە بەر دەرگا و دەرگای لێ داخستین، كوڕە بچووكەكەم كە تەمەنی شەش ساڵە لەو دیو دەرگا زیڕەی دەگەیشتە ئاسمان، بەو شەوە چووینەوە بۆ ماڵی دایكم، لەو كاتەوە تا ئێستا لە ماڵی دایكمین. من هیچ داهاتێكم نییە، باوكم نەماوە و پیرە دایكێكم هەیە، ناوێرم لای براكانیشم قسە بكەم، دەترسم ببێتە شەڕە تفەنگ، دایكم كە لە یەكێك لە قوتابخانەكانی شار بەردەستە، پێم دەڵێت لای من دابنیشە من منداڵەكانت بۆ بەخێو دەكەم، ئێستاش مێردەكەم ناردوویەتی بە شوێنمدا و داوای گەڕانەوەم لێ دەكات، نازانم چی بكەم. زۆر رارام و ناتوانم هیچ بڕیارێك بدەم، زۆر دەترسم بڕیارێكی هەڵە بدەم، چونكە من جگە لەخۆم ئۆباڵی سێ منداڵی بێ گوناهیشم لە ئەستۆدایە، نازانم چی بكەم، دوێنێ راوێژم بە پسپۆڕێكی كۆمەڵایەتی كرد كە لە قوتابخانەكەی بەرامبەر ماڵی دایكم توێژەرە، ئەو هیچی بۆ نەگوترا، تەنیا بە دەنگێكی لەرزۆكەوە گوتی: هیچ شتێك نییە لە كەرامەت گرنگتر بێت. ئەو كاتەی پیاو جورئەتی ئەوە دەكات، حەرەمی ماڵەكەی بشكێنێ و تیایدا رابوێرێ، ئەو پێكەوە ژیانە هیچ مانایەكی نامێنێ. «
سەبارەت بەم كێشەیە چالاكی مافناس عیماد ئەحمەد بەمجۆرە ئامۆژگاری ئەم خاتوونە دەكات»دەبێت لە كاتێكی گونجاو قسە لەگەڵ هاوسەرەكەی بكات، سەرەتا نابێت یەكسەر تۆمەتی ئاراستە بكات، بەڵكو هەندێك وەسفی شتە باشەكانی بكات، بۆ ئەوەی یەكسەر تووڕە نەبێت و كێشەكە گەورەتر نەبێت، دواتر باسی هەندێك لە هەڵسوكەوتە نەشیاوەكانی باس بكات، پێی بڵێ تۆ خاوەن خێزانی و كچت گەورە بووەو منداڵەكان هەست بە زۆر شت دەكەن، ئەگەر هەر سوودی نەبوو، وا باشترە لە ڕێگەی كەسێكی باوەڕپێكراوی نزیكی خۆیان كێشەكەی بۆ باس بكات و پیاوەكە ئامۆژگاری بكات، بەڵكو شەرم لەو كەسە بكات و قەناعەتی بێت و هەڵسوكەوتەكانی چاك بكات، هەموو مرۆڤێكیش قابیلی گۆڕانە. سەبارەت بەگرتنە بەری رێكاری یاساییش، ئەگەر ئەم ئافرەتە بیەوێت سكاڵای یاسایی لەدژی هاوسەرەكەی تۆمار بكات بە تۆمەتی ناپاكیی هاوسەری، ئەوا دەبێت بەڵگەی بەهێزی هەبێت و بتوانێت لە بەردەم دادوەر بیسەلمێنێت، وەك شاهیدی رووداو، یان گرتەی ڤیدیۆیی و كورتەنامە و پەیوەندی تەلەفۆنی بۆ ئەوەی ناپاكییە هاوسەرییەكە بسەلمێنێت، یان ئافرەتەكە بناسێت و زانیاری لەسەر هەبێت كە پەیوەندی لەگەڵ هاوسەرەكەی هەیە، سەبارەت بە مادەی یاسایی هیچ بڕگە و مادەیەك بە ناوی ناپاكیی هاوسەری لە یاساكانی كوردستان و عیراق نییە، بەڵام ماددەیەك هەیە بەناوی زینای زەوجی بە گوێرەی ماددەی 377 لەیاسای سزادانی عیراقی گەر دادوەر بۆی دەركەوت، ئەوا بە گوێرەی ئەو مادەیە دادگایی دەكرێت و هاوسەرەكەی و ئافرەتەكە دەستگیر دەكرێن. ئەگەر بیەوێت لە سكاڵاكەی خۆش بێت، ئەوا دەبێت لە هەردووكیان خۆش بێت، تەنیا خودی خۆیشی دەتوانێت سكاڵا تۆمار بكات، لەبەر ئەوەی مافێكی كەسییە كە لە ماددەی سێی یاسای بنەماكانی دادگاییكردنی سزایی هەمواركراو باس كراوە، تەنها خودی تاوانلێكراو دەتوانێت سكاڵا تۆمار بكات، ئەویش لەسەر هەردووكیان.
دوای جیابوونەوە لە حاڵەتی سەلماندنی ناپاكیی هاوسەری راستەوخۆ دەبێتە خاوەنی منداڵەكان و بژێوی مانگانەش لەسەر باوكیان دەبێت، كچەكە تا هاوسەرگیری دەكات، كوڕەكانیش تا 18 ساڵی، یان تا خوێندن تەواو دەكەن، دەتوانن تا سێ ساڵیش لەناو خانووەكەی بێت، ئەگەر خانووەكە موڵكی پیاوەكەی بێت، مارەییەكەشی بە پاشەكی و پێشەكییەكەیەوە بەپێی یاسا لە مێردەكەی وەردەگرێت».