شێنێ محەمەد شەریف، ساڵی 1993 لە پارێزگای سلێمانی لەدایك بووە. دەرچووی بەشی كۆمپیوتەرە و وەك خۆی باسی دەكات، نزیكەی 10 ساڵە لە شاری هەولێر نیشتەجێیە. خانمە دەستڕەنگینە و خاوەنی كارگەیەكی دروومانی جلوبەرگی بوكێنی و بۆنە و ئاهەنگەكانە، لە گفتۆگۆیەكیشدا لەگەڵ گۆڤاری گوڵان باس لە ئەزموون و سەركەوتنەكانی لە بواری كار و داهێنانەكانی دەكات.

گوڵان: كۆمەڵایەتی

 

ئافرەت و كار بە درێژایی مێژووی مرۆڤایەتی دوانەیەكی لێكدانەبڕاون و ئافرەتان لە هەموو قۆناخەكانی مێژووی نەتەوە بەشێكی تەواوكاری پیاو بووە لە هەموو سەختی و ناخۆشییەكاندا،

دەبینین هەر كۆمەڵگە و كولتوورێك جۆرە شوناسێكی بە خانمان بەخشیوە و ئەوان شوناس و بوونێكی كولتووری، كۆمەڵایەتی و تایبەتمەندیی خۆیانیان هەیە بەپێی ئەو كولتوور و كۆمەڵگەیەی تێیدا دەژین.

شێنێ محەمەد خاتوونێكی خاوەن كار و دانیشتووی هەولێری پایتەختە و بەمجۆرە باسی تێكەڵبوونی بە بازاڕی كار دەكات «ساڵی 2015 خوێندنم تەواو كرد و وەكو زۆربەی دەرچووەكانی دیكە بەهۆی شەڕی داعش و قەیرانی داراییەوە، دەرفەتی دامەزراندنم نەبوو، بۆیە بیرم لە كاری ئازاد كردەوە، چونكە پێشتریش ئەزموونم لە دیزاینكردنی جلوبەرگ هەبوو، بڕیارم دا، برەو بە بەهرە و شارەزاییەكەی خۆم بدەم، ئێستاش نزیكەی پێنج ساڵە خاوەنی شوێنكاری خۆمم بە ناوی «شێنێ درێس» كە تایبەتە بە جلوبەرگی خانمان بۆ ئاهەنگی هاوسەرگیری، لەدایكبوون و یاد و بۆنەكان، هاوكات لەگەڵ خۆمدا هەلی كارم بۆ چەند خانمی دیكەش ڕەخساندووە، ئەوەش زۆری دڵخۆش كردووم. جگە لە درێسی هاوردە، خۆشمان لێرە درێس بە گوێرەی خواستی كڕیارەكانمان دەدوورین».

لە وەڵامی ئەو پرسیارەشدا كە پشتیوان و هاندەرت بۆ كاركردن كێ بووە؟ گوتی: «سەرەتای كاركردنم بە پاڵپشتیی باوك و دایك و خێزانەكەم بوو، ئەوان لە سەرخستنی بیرۆكەكانم بەردەوام پاڵپشتییان كردووم، خوشكەكانم هەمیشە پاڵپشتێكی گەورەی مەعنەوی بوون بۆم، دواتریش كە هاوسەرگیریم كرد، هاوسەرەكەم بەهەمان شێوە زۆر پشتگیری كردم بۆ ئەوەی شوێنی شێنێ درێس بكەمەوە.

لە منداڵییەوە ئاواتم ئەوە بووە كارێكی سەربەخۆم هەبێت و لە ڕووی مادییەوە بارگرانی نەبم، ئەمەش خەسڵەتی هەموو ژنێكی كوردە كە نایەوێت ببێتە ئەرك بەسەر باوك، برا، هاوسەر و كوڕیەوە».

لە وەڵامی ئەو پرسیارەش كە ئایا تاچ ئاستێك دڵخۆشی بە كارەكەت؟ گوتی:» من زۆر دڵخۆشم بە كارەكەم، چونكە توانیومە هەلی كاریش بۆ خانمی دیكە بڕەخسێنم، لە ئێستادا چوار خانمی بەڕێز لە كارگەكەم و لە شوێنی فرۆشتن و بەكرێدانی درێسەكان كارمان لەلا دەكەن، هەروەها دەتوانم یارمەتیی خێزانەكەم بدەم، لە هەمووی زیاتر ئەوە دڵخۆشم دەكات كە دەتوانم یارمەتی ئەو كچانە بدەم كە هاوسەرگیری دەكەن، چونكە ڕۆژێكی زۆر خۆشە لە ژیانیان و من بەشداریی ئەو خۆشییەیان دەكەم لە ڕێگەی جێبەجێكردنی خواستەكەیانەوە، هەم بۆ دابینكردنی درێس و هەم بۆ نرخەكەشی».

ئەو خاوەن كارە لە درێژەی قسەكانیدا و سەبارەت بە پێشكەوتن و بەردەوامی ڕەوتی كاركردنی خانمان و مافەكانیان ئاماژە بەوە دەكات: «پێشێلكردنی ماف پەیوەندی بە ڕەگەزەوە نییە، پیاو و ژن، لە هاوكاری و ستەمدا وەكو یەك پشكیان هەیە، ئەوەی كە وا دەكات پیاو یان ژن ببێتە ستەمكار، ئەهریمەنەكەی ناخیەتی. بەڵام بێگومان كاركردنی ئافرەت، واتە باشبوونی دارایی، وەك كوردەواریش دەڵێت: كاسەی پڕ ئاشتیی ماڵە. ئافرەتی كوردیش لەوەتی هەیە هاوشانی پیاو كاری كردووە. ئێمە داپیرمان درەوی كردووە و باخی ئاو داوە و بێستانی كردووە. دایكمان مەڕی دۆشیوە و شیرینی و كولیچەی دروست كردووە، ئێستا من و تۆش كاری خۆمانمان هەیە. واتە كاركردنی ئافرەت لە كۆمەڵگەی ئێمەدا شتێكی نوێ نییە، وەكو كۆڵەكەیەكی خێزان وایە و بووەتە كەلتوری ئێمەی كورد».