«ڤاڵانتاین»ی قەدیس، ناوی رەبەنێكی كە لە سەدەی سێیەمی زایینی لە رۆمانیا بە هۆی گەیاندنی خۆشەویستان بە یەكدی، گیانی خۆی فیدا كرد. دواتر رۆژێكی جیهانی بەو ناوە بۆ خۆشەویستان دەستنیشان كرا. رۆژی 14/2ی هەموو ساڵێكیش كە بە (ڤاڵانتاین) ناسراوە، وەك رۆژی خۆشەویستی لە زۆربەی وڵاتانی جیهان یادی دەكرێتەوەو لەم رۆژەدا هاوسەران و بەتایبەتی توێژی لاو بە كڕینی دیاری بۆ خوشەویستەكانیان هێمایەك لە عەشق و خۆشەویستیی بێخەوشی خۆیان پێشكەش بە یەكتری دەكەن و پەیمانی وەفاداری هەتاهەتایی بۆ یەكتری نوێ دەكەنەوە. ئەگەرچی عەوداڵانی خۆشەویستی تەرخانكردنی تەنیا یەك رۆژ لە ساڵێكدا بۆ خۆشەویستی بە كەم دەزانن، بەڵام وەك رەمزێك لێی دەڕوانن و بە گەرمی پێشوازی لەو رۆژە دەكەن. بەشداربووانی ئەم راپۆرتەی گوڵان لەوبارەیەوە را و سەرنجی خۆیان دەخەنەڕوو.

«بە بڕوای من خۆشەویستی رۆژێكی بەس نییە، تا ئێمە تەنیا لەو رۆژە خۆشەویستی خۆمان بۆ كەسوكار و خۆشەویستانمان دەرببڕن. بەڵكو خۆشەویستی وەك نەمامێكە و رەگی خۆی بۆ ئەبەدی لە ناخی ئادەمیزاد دادەكوتێ». زەینەب رزگار كارگێڕی لقی كەركوك (ی.ق.ك)وایگوت. ئەو خاتوونە دەڵێت: « هیوام وایە هەموو ئینسانێك دەستپێكی هەموو رۆژێكی پڕ لە موحیبەت و خۆشەویستی بێت بۆ كەسانی دەوروبەری، بۆ خاك و نیشتمانەكەی و بۆ دین و ئایینی خۆی و تەنانەت بۆ كار و پیشەكەی. ئومێدەوارم هەریەك لە ئێمە هەموو رۆژێكمان بكەین بە رۆژی خۆشەویستی و رق و كینە بوونی نەمێنێت لە نیوان كەسەكاندا، چونكە هەر مرۆڤێك بە خۆشەویستییەوە خوڵقاوە و هەر بەو جۆرەش جوان دەبێت.
بڵند نەوڕەس مامۆستایە لەكۆلێژی ئادابی زانكۆی سەڵاحەدین و سەبارەت بە هەمان پرس رایوایە: «رۆژی خۆشەویستی وەك هێمایەك دانراوە بۆ خۆشەویستەكان، ئەم رۆژە تایبەتمەندترە و شێوازێكی نیمچە فەرمی وەرگرتووە، رۆژێكی شادی بەخشە و ساڵ بە ساڵ زیاتر رەگ دادەكوتێت لە ناو خۆشەویستەكان بە گشتی و گەنجان بەتایبەتی، فەنتازیایەكی ژیانە و خەندەبەخشە. هەر كارێك، یان بۆنە و یادێك ئامانجی دڵخۆشكردنی مرۆڤەكان بێت، مایەی گرنگیپێدانە و دەبێت پانتایی فراوانی بۆ تەرخان بكرێت، راستە ((ڤاڵانتاین)) وابەستەی كولتووری ئێمە نییە، بەڵام یەكێكە لەو بۆنە جوانانەی كە كەشێكی ئارام و هێمن دەبەخشێت بە كۆمەڵگە و خۆشەویستەكان لە رێگەی پەیام و گوڵ بەخشینەوە بە یەكتر دووپاتی یەك ویستی و ژیان ویستی دەكەنەوە و وەك رۆژێك بەكاری دەهێنن بۆ گوزارشتكردن لە هەستیان بەرامبەر بە خۆشەویستەكانیان و مانایەكی مەعنەوی دەبەخشن بەو رۆژە». هاوكات دەڵێت: «پەیامی من و هەموو كەسێك دەبێت پەیامی خۆشەویستی بێت لەسەر بنەمایەكی پتەوی بڕوا بە خۆبوون و بڕواكردن بە بەرامبەر، ئێمە لە ناوچەیەكی ئاڵۆزی پڕ كێشەداین، ئەم جۆرە رۆژ و یادانە گرنگ و پێویستن بۆ ناخ و هەست و دەروونی تاكەكان بۆ ئەوەی ئەگەر بۆ ساتێكیش بێت، دەرباز بن لە پاڵەپەستۆی ژیان و ئارامی بە خۆیان و بەرامبەرەكانیان ببەخشن.
نووسەر، شاعیر و چالاكی مەدەنی ناز فەلەكەدین كاكەیی، سەرەتا پیرۆزبایی لە خۆشەویستان دەكات و دواتر دەڵێت: «هیوادارم هەمیشە و لە هەر كاتێكی ژیاندا بە دڵێكی پڕ عەشق و سۆز سپێدەی ژیان دەست پێ بكەین و هەر بە خۆشەویستی لە شەویش تاریكمان رووناك بكەینەوە بۆ دەستپێكی رۆژانی ژیان ئامادە بین. بێگومان هەموو بونەوەرێك لە ناخی خۆیدا هەستی خۆشەویستی هەیە و ئەگەر ونیشی كردبێت، دەیدۆزێتەوە. جا ئەو خۆشەویستییە چ بۆ دایك و نیشتمان و هاوسەر بێت، یان گەڵای جوانی درەختێك بێت، یان گوڵاڵە سوورەی سەر چیا و دەشتی بەهاری وڵاتەكەی بێت. رۆژی خۆشەویستی تازەكردنی خوێن لە دەماری ژیانە، بۆ زیاتر نزیكبوون لە دڵدار وهاوڕێ و كەسانی نزیك و دەوروبەر، هەروەها نزیكبوون بە رۆح و هەستی ئەهوورایی كە مرۆڤ بۆ دنیای پاك و دوور لە هاژە هاژی دونیایی دەبات. خۆشەویستی گرینگیدانە بە لوتكەی مرۆڤایەتی و دوورە لە رق و كینە و خوێنڕشتن و تەنیا جوانییەكانی ژیان بەرجەستە دەكات. رۆژێكە بۆ ئەوەی مرۆڤ پابەند بێت بە خۆشەویستەكەی و نەتەوەكەی و بە هاوكاری و هاوخەمی دەست لە ناو دەستی یەكتر، نەتەوەییەكی پڕ لە رۆحی ئاشتەوایی ساز دەكەن، بە دوور لە دووبەرەكی و دوژمنایەتی. هیوادارم دەستپێكی ئەم رۆژە كۆتاییهێنان بە ناخۆشییەكانی نەتەوەكەم بێت»..
نووسەر و ئەندازیار پۆڵا خەلیفە، هێما بۆ ئەوە دەكات كە «خۆشەویستی مامەڵەیە، دروستبوونی پەیوەندییەكی زۆر جار خۆنەویستانەیە لە نێوان دوو كەس كە جیا لە مامەڵە رۆتینی و تەقلیدییەكانی، پێكەوەژیان بەیەكەوەبوون كۆیان دەكاتەوە، بە جۆرێك كە هەموو هەوڵێكیان گەرەكبوونی خۆشییە بۆ یەكدی، بۆیە بەم پێیە پێت لە نێو كۆمەڵگەیەكی داخراو، یان پابەند بە كولتووری ئایینی گەورەترین دەستكەوت لە پەیوەندیی خۆشەویستی گەیشتنە بە یەكدی، ئەم گەیشتنەش تەنیا لە چوارچێوەی هاوسەرگیریدا خۆی دەبینێتەوە، كە رەنگە لەوەوە زۆر جار تەفسیری میزاجی و بێ بنەمای بۆ دەكرێ، هۆكارەكەش ئەوەیە كە خۆشەویستی شتێكی بەرجەستە نییە، هێندەی شتێكی رۆحی و حاڵەتێكی دەروونی و تایبەتە، باشتر وایە پێی بگوترێت ژیان لە نێو خەیاڵی خۆشەویستی، مرۆڤی ژیر دەتوانێت لە پاڵ ژیانە رۆتینەكەی رۆژانەیدا بەردەوام لە نێو خەیاڵی خۆشەویستیدا بژی و هەموو رۆژێك كەشێكی ڤاڵانتاینی دروست بكات، چونكە هیچ كارێك بە بێ خۆشەویستی و گۆڕینەوەی زەردەخەنە ئاسان نابێت و بناغەی هەموو ئایینە ئاسمانیەكانیش بریتین لە چەسپاندنی خۆشەویستی، چونكە پێچەوانەكەی هەموو شت دەڕووخێنێ و مرۆڤایەتی لەناو دەبات. مرۆڤ دەبێ بە خۆشەویستییەوە بڕوانێتە هەموو شتەكانی دەوروبەری، بۆ ئەوەی رووە جوانەكانی دونیا ببینێ، ئاسوودەبوون و بەختەوەریی راستەقینە لە خۆشەویستیی یەكتردایە». بۆیە پەیوەندیی خۆشەویستی، سازانی نێوان دوو رۆحە، دان و ستاندنی هەیە، چەند ببەخشی، هێندە وەردەگریتەوە، ئەگەر باڵانسی هێز بە لایەكدا بوو، هەمیشە ئەو لایەیان پتر ئازاری بەردەكەوێت و تا دەگاتە بێ ئومێدی، خۆشەویستی ببەخشن بە چوار دەورتان، خۆشەویستی خەڵك بەدەست دێنن».