هەڵمەتی هەڵبژاردنی خولی پێنجەمی پەرلەمانی كوردستان دەستی پێكردووە و لە ئێستادا هەموو پێكهاتەكانی كوردستان لە كەشێكی ئازاد و چارەنووسسازدا خۆیان بۆ چوونە بەردەم سندوقەكانی دەنگدان ئامادە دەكەن، بۆ ئەوەی نوێنەرانی خۆیان بۆ پەرلەمانێك هەڵبژێرن، كە چاوەڕوان دەكرێت كاندیدەكانی پارتی دیموكراتی كوردستان لە دوای بەدەستهێنانی سەركەوتن كار و كۆششی جیددی بكەن بۆ بەهێزكردنی پێگەی هەرێمی كوردستان و پتەوكردنی دامەزراوەكانی حكومەت و دەستەبەركردنی خۆشگوزەرانی بۆ خەڵكی كوردستان و چەسپاندنی سەروەری یاسا و نەهێشتنی پشێوی و پاشاگەردانی سیاسی و داڕشتنی دەستوورێكی هاوچەرخ بۆ كوردستان، بۆ ئەوەی ببێتە چوارچێوەیەك بۆ دەستەبەركردن و دەستنیشانكردنی مافی سەرجەم پێكهاتەكانی كوردستان و چەند پرسێكی پەیوەندیدار و گرنگی دیكە. لێرەشدا ژمارەیەك لە گەنجانی نیشتمانپەروەر راو بۆچوونی خۆیان لەم بارەوە بۆ گۆڤاری گوڵان خستەڕوو.

دوریا شێروانی چالاك لەبواری سۆسیال میدیا:
پارتی هەمیشەخزمەتی خاك وخەڵكی كردووە و شایستەی متمانەپێدانە
«دەنگم بۆ پارتییە چونكە، خاوەنی دۆزی رەوای گەلێكی مەزڵوومە و بە درێژایی تەمەنی ئەم حزبە بۆ تاكە جارێكیش نە خاكیان فرۆشتووە و نە سڵیان كردووەتەوە لە خزمەتكردنی ئەم گەلە، ئەگەر سەرنج بدەین لە پڕۆسەكانی ریفراندۆم و سەربەخۆیی و هەڵبژاردنەكان گەنجە خوێن گەرمەكانی ئەم خاكە لە سەركەوتن و هاندانی خەڵك پێشەنگ بوون، بێگومان نیشانەی هاوكاری و خزمەتكردنی گەنجە لەلایەن پارتی دیموكراتی كوردستان، داوا لە لاوی كورد دەكەم، پێش ئەوەی كار لە كار بترازێ و دووبارە ئەنفالێكی دیكە و كیمیابارانێكی دیكە دووبارە ببنەوە، ئێوە دەستپێشخەر بن و هاوكاربن و دۆزی رەوای گەلی كورد بەرز رابگرن، هەروەك چۆن بەرز راگیراوە. چاومان لە ئێوەیە برینی ساڕێژنەكراوی دایكە شەهیدەكان ساڕێژ بكەن و ببنە پۆڵا بۆ پاراستنی ئەم خاكە و ببنە دانا و داهێنەر بۆ گەلەكەتان و كاتی ئەوە هاتووە خاوەن دەوڵەتی خۆمان بین و بۆ نەوەكانمان دروستكەری بناغەیەكی ساغڵەم بین. وەك چۆن جەنابی سەرۆك بارزانی بە درێژایی ژیانی خزمەتی ئەم گەلەی كرد، تاوەكو ئەمڕۆ دۆزی رەوای گەلی كوردی لەشاخ گەیاندە كۆشكی سپی و جیهان، ئاواش ئومێدمان بە هەردوو سەركردەی ئارامی و ئاوەدانی جەنابی مەسروور بارزانی و جەنابی نێچیرڤان بارزانی هەیە، كە خزمەتی ئەم دۆزە رەوایە بكەن و رێ و رێبازی پیرۆزی بارزانیی نەمر درێژە پێ بدەن.»


هاوژین بەكر دەرچووی كۆلیژی زانستی و ئەندام مەكتەبی لقی 24ی پارتی دیموكراتی كوردستان:
هەر لیستێك سەرۆك بارزانی لەپشت بێت،هەموو كوردێكی نیشتمانپەروەر دەنگی پێدەدات
«پەرلەمان بەهێزترین ناوەندی هەر وڵاتێكە بۆ ئەوەی بە دەركردنی یاسا و داڕشتن و هەمواركردنەوەی یاساكان خوشگوزەرانی و ئاسایشی هاووڵاتییانی دابین بكات، لە ئێستاشدا كە لە هەڵبژاردنەكانی خولێكی دیكەی پەرلەمانی كوردستان نزیك بووینەتەوە، ئەوا پێویستە زۆر بە وردی نوێنەری دڵسۆز و راستەقینەی خۆمان بۆ پەرلەمانی كوردستان هەڵبژێرین، نەك ئەوانەی كە بەنیازن كودەتا بكەن و هەموو دەستكەوتەكانی كورد سەروەرییەكانی بسڕنەوە. سەرۆكی بەڕێزمان مسعود بارزانی زیاتر لە نیوە سەدەیە پێشمەرگەیەو تەمەنی لە پێناوی ئەوە داناوە كە كورد رزگاری بێت لە ماڵوێرانی و كوشتن و داگیركاری، بۆیە هەر لیستێك ئەو سەرۆكەی لە پشت بێت، هەموو كوردێكی بەوەفاو دڵسۆزو نیشتمانپەروەر دەنگی پێ دەدات و پشتیوانی لێ دەكات، منیش سەربەرزم كە وەك شوێنكەوتوویەكی رێبازی بارزانی خۆم و هەموو ئەندامانی خێزانەكەم كە مافی دەنگدانمان هەیە، دەنگ بە لیستی 183ی پارتی دیموكراتی كوردستان دەدەین.»


میللەت مەهدی فەرمانبەر لەكارەبای بەردەڕەش:
لیستی 183 ئاشتی و ئاوەدانییە
«من وەكو ئەندامێكی پارتی دیموكراتی كوردستان و گیانفیدایەكی رێبازی پیرۆزی بارزانی دەنگ دەدەم بە لیستی شەهیدان و لیستی ئاشتی و ئارامی و ئاوەدانی كە لیستی (١٨٣)ی پارتی دیموكراتی كوردستانە، ئەگەر پارتێك جەنابی سەرۆك و پێشمەرگەی كوردستان كاك مسعود بارزانی سەركردەی بێت، نەك تەنیا دەنگی پێ دەدەم، بگرە ئامادەم گیانی خۆمی بۆ بەخت بكەم. دڵنیاشم سەركەوتن بەدەست دێنین، چونكە ئێمە خاوەنی سەركردەیەكی سیاسی و كارێزما و لێزان و بەتوانای وەك جەنابی سەرۆكین و ئەمساڵیش وەك ساڵانی رابردوو ئاهەنگی سەركەوتن دەگێڕین، چونكە ئەیلوول مانگی سەركەوتنی پارتەكەمان، پارتی دیموكراتی كوردستانە و ئەستێرەی گەشی نێو ئاسمانی وەرزەكانی ساڵە و بە ڕێبەرایەتی باوكی رۆحیی نەتەوەیی كورد ژەنڕاڵ مستەفا بارزانی شۆڕشی ئەیلوول بەرپاكراو ئامانجەكەشی پێكا، ئەوە بوو لە ساڵی رابردوو لە ئایلوولی ٢٠١٧ ریفراندۆم ئەنجام درا، بە سەركردایەتی جەنابی سەرۆك و پێشەواو پێشەنگمان كاك مسعود بارزانی كە لە سەدا ٩3ی خەڵكی كوردستان دەنگی بە بەڵێ دا بۆ سەربەخۆیی كوردستان و بە هەموو دنیاش سەلمێندرا، كەوا گەلی كوردستان داوای مافی رەوای خۆی دەكات.


هێمن حالی شێرۆكی، قوتابی ماستەر لەزانستی كارگێڕی وفەرمانبەر لەدیوانی چاودێریدارایی هەرێمی كوردستان:
دەنگم بۆ پارتییە
«دەنگم بۆ پارتییە، چونكە پارتی داینەمۆی كوردایەتی و ئاوەدانی كوردستانە و تاكە حزبە كە بە جددی داكۆكی لە مافەكانی گەلی كورد دەكات، ئەوەش سەلمێندراوە كە ئەگەر پارتی بەهێز بێت، ئەوا كوردستان بەهێز دەبێت.»