حەڤدە ساڵ تێدەپەڕێت بەسەر دامەزراندنی یەکێتیی کەمئەندامانی کوردستان، لەم بۆنەیەشدا کەمئەندامان و خاوەن پێداویستیە تایبەتیەکان نیگەرانیی خۆیان دەردەبڕن بەهۆی ئەوەی هیچ لایەنێکی حکومی و حزبی لە هەرێمی کوردستان ساڵیادەکەیانی پیرۆز نەکردووە.

سەرۆکی مەڵبەندی گشتیی سلێمانیی یەکێتیی کەمئەندامانی کوردستان "عومەر کەریم" بە ئاژانس و رادیۆی پەیامنێری راگەیاند: "ئێمە زۆر نیگەرانین لە حکومەت و لایەنەکەکانی ئۆپۆزیسیۆن و ئەو لایەنانەش لەناو حکومەتدا نین بەهۆی ئەوەی تاکو ئێستا تەنها پیرۆزباییەکمان بۆ نەهاتووە بەبۆنەی ساڵیادی دامەزراندنی یەکێتیەکەمانەوە."

عومەر کەریم گوتی: "تاکو ئێستاش یاسای ماف و ئیمتیازاتی کەمئەندامان و خاوەن پێداویستیە تایبەتیەکان جێبەجێ نەکراوە کە ئێمە ئومێدمان وابوو ئەمساڵ لەکاتێکدا یادی یەکێتیەکەمان بکەینەوە کە بار و گوزەرانی کەمئەندامان زۆر باش بووبێت بەڵام بەداخەوە پێشبینیەکانمان وادەرنەچوون."

راشیگەیاند: "دەتوانین بڵێێن هیچ لایەنێک لە هەرێمی کوردستاندا لە خەمی کەمئەنداماندا نییە لەکاتێکدا ئێمە چاوەڕوان بووین حکومەت وەکو چەترێک وابێت و لەژێر ساباتی خۆیدا تاوێک ئازارەکانمان کەم بێتەوە."

سبەینێ لە شاری سلێمانی سەرجەم کەمئەندامان و خاوەن پێداویستیە تایبەتیەکان پرسە رادەگەیەنن و جلی رەش دەپۆشن بەهۆی جێبەجێ نەکردنی داخوازیەکانیانەوە.