بەمەبەستی ڕێزگرتن لەمافەكانی مرۆڤ و یەكسانی و تەبایی و دادپەروەری، لەژێر دروشمی (پۆلیس لەخزمەتی گەل و نیشتمان و یاسادایە) كۆلیژی پۆلیس 133 ئەفسەری ئافرەتی بەتوانای ڕاهێنراو بە گەل و نیشتمان دەبەخشێت، بەشداریی ئەفسەرانی ئافرەت لەبواری دەسەڵاتی جێبەجێ كردندا و بەتایبەتی لەڕیزی پۆلیس كە ژیانی ڕۆژانەی هاووڵاتیانی پێوە بەندە، لە سیمای حكومەتدا گۆڕانێكی نەوعییە، لەگەڵ هەموو ئەوانەشدا ئافرەتانی ئەو بوارە كێشەو ئاریشەی تایبەت بە خۆیان هەیە.
ئەفسەری كچ هەیە زۆر لە ئەفسەرە كوڕەكان زیرەكترەو بەقەد سێ پیاو كاردەكات
عەمیدی مافپەروەر دڵشاد شێخ سەعید راگری كۆلیژی پۆلیس، ئاماژە بەوە دەكات كە كۆلیژی پۆلیس ساڵی 1997 لە هەولێر دامەزراوەو ساڵی 2001 بۆ یەكەمجار شەش خوێندكاری كچ لە پڕۆسەی خوێندنی كۆلیژ بەشدار بوون، ساڵی 2002 ژمارەیان بوو بە هەشت كچ، 2003 دە كچ بەشدار بوون، 2004 و 2005یش 21 كچ، 2006 و 2008یش 25 كچ، 2009یش 17 كچ بەشدار بوون، گوتیشی «تاوەكو ئێستا 133 ئەفسەری ئافرەتمان پێگەیاندووە و ئێستاش 22 خوێندكاری كچ لە كۆلیژی پۆلیس دەخوێنن».
راگری كۆلیژی پۆلیس ئەوەشی خستەڕوو كە ئافرەتان لەم بوارەدا سەركەوتنێكی پێوانەییان تۆماركردووە و ئەگەری ئەوەش زۆرە كە لە داهاتوودا كچان زیاتر ڕوو لە سلكی پۆلیس بكەن، پێشیوایە كە توانای كچان لە تواناكانی كوڕان كەمتر نییە، گوتیشی: «ئەفسەری كچ هەیە زۆر لە ئەفسەرە كوڕەكان زیرەكترە و بەقەد سێ پیاو كاردەكات».
ئافرەتانی پۆلیس ڕووبەڕووی تانەلێدان دەبنەوە
ملازمی یەك فلامینیا وەحید فەخری لە بەڕێوەبەرایەتی توندوتیژی شەقڵاوەیە، نایشارێتەوە كە لەبواری كاركردنیدا رووبەڕووی گرفت و تانەلێدان بۆتەوە، گوتیشی«سەرەتای دەست بەكاربوونم، تێڕوانینی كۆمەڵگە زۆرخراپ بوو، ئەوەش گرفتی زۆری بۆ پەیدادەكرین، تەنانەت عەقڵییەتی كۆمەڵگە ئەوەی قبووڵ نەبوو كە ئافرەتێك لەم بوارە كاربكات، زۆرجار بەمنیان دەگوت ئەوە ئیشی دیكە نەبوو بیكەی، یان باشتر نەبوو لە بواری مەدەنی دەوام بكەی، بەڵام ئێستا تا ئاستێكی باش گۆڕانكاری لە تێگەیشتنی تاكەكان بەرجەستەبووە و زۆركەم ڕووبەڕووی ئەو كێشانە دەبمەوە كە لە رابردوودا رووبەڕووم دەبووەوە».
نەقیب ژیان تەلعەت سلێمان لە بەڕێوەبەرایەتی گشتی پاسپۆرتی هەولێر، دەڵێت: «ئەو قۆناغەمان تێپەڕاندووە كە خەڵكی بە چاوی خراپ لەئافرەتانی پۆلیس بڕوانێت». ڕاشیگەیاند لە ئێستادا كاركردن لە سلكی پۆلیس وەك هەر بوارێكی دیكەی كایەكانی تری كۆمەڵگە وەكو مامۆستا و ئەندازیار و فەرمانبەرانی دیكە بەلای خەڵكەوە ئاسایی بۆتەوە، پێچەوانەی رابردوو كە كاركردن لەم بوارە بە شیاوی ئافرەتان نەدەزاندرا.
پێشتر پۆلیسی پیاویش ئەوەی پێ قبووڵ نەدەكرا
ئافرەت نەجمەی لەسەر شان بێت
سەبارەت بەخودی ئەو گرفتانەی هاتوونەتە رێگەی، نەقیب ژیان گوتی: «من بەشبەحاڵی خۆم كە هاتمە ناو ئەو بوارە كەسانێك هەبوون لە دەوروبەرم پێیان خۆش نەبوو لەم بوارە كاربكەم، تەنانەت دەیانگوت چۆن دەبێ ئافرەت پۆلیس بێت، نابێ بەشەو دەربچێت، نابێ بڕواتە دەرەوەی شار و...تاد، جگە لەوەش لەناو فەرمانگەكانی پۆلیس، پۆلیسی پیاو ئەوەی پێ قبووڵ نەدەكرا ئافرەت نەجمەی لەسەر شان بێت، تەنانەت من پۆلیسی خۆم دەهاتە ژوورەوە تەحیەی نەدەكرد، منیش پێیانمدەگوت: ئێوە كە تەحیە دەكەن، بۆ منی ناكەن وەكو ئافرەتێك، بەڵكو بۆ نەجمەكەی سەرشانمی دەكەن، ئەو نەجمەیە لەسەر شانی پیاو بێت، یان ئافرەت هیچ جیاوازی نییە و نابێتە هۆی مانع بوونی تەحیە، تەنانەت ئافرەتانی پۆلیس ئەوكات لەسەر ئەو بابەتە چوونە لای وەزیر و گلەییان كرد، ئینجا وردە وردە بەلایانەوە ئاسایی بوو».
ئەگەر پیاوێك هۆشیار بوو، مرۆڤێك هۆشیار دەبێ، ئەگەر ئافرەتێك هۆشیار بوو میللەتێك هۆشیار دەبێ
لەلای خۆیەوە قادر قاچاخ بەرپرسی ئەكادیمیای پارتی، ئافرەت و پیاو بەتەواوكەری یەكتر دەزانێت و لەو ڕووەوە ئاماژەی بە وتەی زانایەك كرد كە دەڵێت: ئەگەر پیاوێك هۆشیار بوو، مرۆڤێك هۆشیار دەبێ، بەڵام ئەگەر ئافرەتێك هۆشیار بوو میللەتێك هۆشیار دەبێ، یان دەڵێت: داهێنەرانی بەناوبانگ ئافرەت نەبووین، بەڵام ئافرەت بە پەروەردە و فێركردن گەورەترین داهێنانی كردووە. قادر قاچاخ گوتیشی «پێموایە ئەوەی پیاو دەیكات، ئافرەت باشتر و دڵسۆزانەتر ئەنجامی دەدات، بەداخەوە لە كۆمەڵگەی ئێمەدا خانوو، ئۆتۆمبێل و ستایلی جلوبەرگ گۆڕاوە، بەڵام هزر و هۆشمان نەگۆڕاوە، لەكاتێكدا جلی كۆن شوورەیی نییە، بەڵام هزری كۆن عەیبە، بەردەوام شەرم و ترس دوو هەڕەشە و دوو كۆسپی گەورە بوون، كە عەشیرەتگەری و دیدی بەرتەسكی ئایینی سەرچاوەی ئەوەن كە ئافرەت نەتوانێ رۆڵی كارای لە كاروباری رۆژانەدا هەبێت، سەردەم سەردەمی ئینتەرنێت و جیهانگەراییە و لەبنیادتنانی كۆمەڵگە نێر و مێ تەواوكەری یەكترن، خزمەتی پۆلیسیش ئەركێكی پیرۆزە جگە لەوەی كە سیستەمی دیموكراتی هەمیشە دەسەڵات دەخاتە دەست پۆلیس و ئەم ئەركە پیرۆزەش شایانی ئافرەتی دڵسۆز و بەهەڵوێستە، جێگەی سەرفرازییە كە حكومەتی هەرێمی كوردستان دەرفەتی بە ئافرەت داوە لەم بوارە هەستیار و پیرۆزە شوێن پەنجەی دیاربێت و خزمەت بكات، دیسان مایەی خۆشحاڵییە كە كەسوكاری ئەو ئافرەتانەش رێگری ناكەن و هاوكارن، چونكە یەكێك لە پێوەرەكانی دەسەڵاتی دیموكراتی و پێشكەوتوویی هەبوونی ئەفسەر و پۆلیسی ئافرەتە.
دابونەریت و ناتێگەیشتویی تاك گرێ و كۆسپی خستۆتە نێو ئەو پڕۆسەیەك نەك ئایین
هەر سەبارەت بەو پرسە سەلام كەریم راوێژكار لە وەزارەتی ئەوقاف و كاروباری ئایینی، جەخت لەوە دەكاتەوە كە تێڕوانینی ئیسلام بۆ ئافرەت زۆر گەورە و پڕ بایەخ بووە، پێشیوایە كە دابونەریت و نەفامی و ناتێگەیشتوویی تاك گرێ و كۆسپی خستۆتە نێو ئەو پڕۆسەیە، نەك ئایین. گوتیشی» خزمەتی خاك و وڵات فەرزە لەسەر گشتمان چ كچ بیت یا كوڕ، ئەو ئافرەتانەی بەجلی سەربازییەوە خزمەت دەكەن دایەنی میللەتن. لەسەردەمی خەلافەتدا پیاو و ژن پێكەوە دەستنوێژیان گرتووە. حەزرەتی عائیشە لە جەنگی (جمل) بەربوویەوە بە یاوەری 50 پاسەوان بۆ مەدینە نێردرایەوە، پاش گەڕانەوەی حەرزەتی عائیشە، سەیری كرد گشتیان كچن كە ئیمامی عەلی وەك یاوەر لەگەڵی ناردوون، پێغەمبەر (د.خ) لە سوڵحی حودەیبیە پرس و رای بە ئوم سەلەمە كرد و پەیڕەوی راكەی كرد، بۆ شكاندنی ئیحرام نەچوون بۆ شاری مەككە». ئەو ڕاوێژكارە ئایینییە هێمای بۆ ئەوەش كرد كە. «یەكەم كەس كە موسڵمان بووە، ئافرەت بوو كە خدیجەی خێزانی پێغەمبەر بووە. یەكەم شەهید لە مێژووی ئیسلام ئافرەت بوو بە ناوی (سومەییە). گوتیشی «ئەوڕۆ مەكری تیرۆر و تیرۆریستان بووەتە قەیرانێك و دەبی گەلان و میللەتان دەست لەناو دەستی یەكتر پێكەوە بۆ بنبڕكردنی ئەو قەیرانە هاوكاری یەكتر بن، ئیمەی كوردیش وەك خێزانێك بڕوانینە ئەو قەیرانەو كچانمان و خوشكانمان ئەوانەی لەو بوارە كاردەكەن و پاش ئەوەی راهێنان و قۆناغەكانی تەواو دەكەن، دەبی بەچاوی ڕێز و سوپاسەوە سەیریان بكەین كە ئەم ئەركە قورسە دەخەنە ئەستۆی خۆیان بۆ خزمەتی خاك و نیشتمان».