ماوەیەكە ژمارەی كوشتن و خۆكوشتنی گەنجان لەشاری سلێمانی زۆر بووە، بەجۆرێك تەنیا لە یەك هەفتەدا سێ گەنج گیانیان لەدەستداوە. توێژەرانی كۆمەڵایەتیش ئاماژە بە مەترسییەكانی ئەو دیاردەیە دەكەن و داوای دۆزینەوە و رێكارێك دەكەن كە رێگری لەزیاد بوونی ئەو ڕووداوانە بكات.
لە هەفتەیەكدا سێ گەنجی سلێمانی بۆ هەمیشە لە ژیان دادەبڕێن
لەیەكێك لەڕووداوەكانی خۆكوشتندا لە هەفتەی رابردوو، گەنجێكی تەمەن (16) ساڵی دانیشتووی سلێمانی بەناوی (ش.م) بە فیشەكێك كۆتایی بە ژیانی خۆی هێنا. بەپێی لێدوانی بەڕێوەبەرایەتی پۆلیسی سلێمانی ئەو گەنجە بەهۆی كێشەی كۆمەڵایەتییەوە پەنای بۆ ئەو كارە بردووە، توێژەرێكیش هۆكاری زیاد بوونی ئەم ڕووداوانە دەگەڕێنێتەوە بۆ هەبوونی چەك لەماڵانداو داواش لەلایەن پەیوەندیدارەكان دەكات ڕێوشوێنی پێویست و جددی بۆ نەهێشتنی چەك لە ماڵان بگیرێتە بەر.
لەڕووداوێكی دیكەدا دوای تێپەڕبوونی 16 كاتژمێر لەو خۆكوشتنە، لەیەكێك لەشەقامەكانی شاری سلێمانی دوو گەنج كە هاوڕێی یەكتر بوون، دەبێتە شەڕە چەقۆیان و یەكێك لەو دوو گەنجە گیان لەدەست دەدات و ئەوی دیكەشیان بەسەختی بریندار دەبێت، بەپێی زانیارییەكان ئەو ڕووداوەش بەهۆی كێشەی كۆمەڵایەتییەوە بووە، بەڵام تاكو ئێستا هۆكارەكانی ئەو ڕووداوە دیاری نەكراوە .
لەڕووداوێكی دیكەی خۆكوشتندا گەنجێكی خەڵكی كوردستانی ئێران كە بەهۆی كارەوە لەگەڵ خانەوادەكەی ڕووی لەشاری سلێمانی كردبوو، بە پەردەی پەنجەرەی ماڵەوەیان خۆی هەڵواسی و بۆ هەمیشە ماڵئاوایی لە دونیای رووناكی كرد. بەڕێوەبەرایەتی پۆلیسیش ئاماژە بەوە دەكات، كە ڕووداوەكە خۆكوژییەو دەستی هیچ كەسێكی تێدا نەبووە، بەڵام لێكۆڵینەوە لەڕووداوەكەش بەردەوامە، ئەمە سەرەڕای ئەوەی ژنێك لەگەڕەكێكی شاری سلێمانی دەدرێتە بەر دەستڕێژی گوللە و بەسەختی بریندار دەكرێت و دواتر ڕەوانەی نەخۆشخانەی فریاكەوتنی سلێمانی دەكرێت.
بكوژی كەسێك، یان خۆكوژێك زیاتر كێشەی كۆمەڵایەتی و دەروونی هەیە
جەزا حەمەساڵح، توێژەرێكی كۆمەڵایەتییەو هێما بۆ ئەوە دەكات كە ئەو ڕووداوە نەخوازراو توندوتیژییانەی كەڕوودەدات وەك كوشتنی كەسێك یان خۆكوشتن و خۆسووتاندن، چەند هۆكارێكی هەیە، لەوانە: هۆكاری كۆمەڵایەتی، زەبروزەنگێكی فیزیكی، یان سایكۆلۆجی و سیمبولی لەپشتیەوە هەیە، هەروەها كێشەی دەروونیش كاریگەری لەسەر ئەو تاكانە هەیە كە دەبنە بكوژی كەسێك، یان خۆیان دەكوژن.
ئەو توێژەرە كۆمەڵایەتییە، دەڵێت «كۆمەڵگەی ئێمە كۆمەڵگەیەكی لەڕووی ئیدارەكردنی ململانێ و كێشە كۆمەڵایەتی و دەروونییەكانی پەروەردەنەكراوە، بۆیە لەڕووداوێكی ئاسایی وەك دەمەقاڵێی دوو گەنجدا كوشتنی لێدەكەوێتەوە.
سیستەمی پەروەردە بەرامبەر بە كێشە كۆمەڵایەتی و دەروونییەكان كەمتەرخەمە
جەزا «خراپی سیستەمی خوێندن»یش بە هۆكارێكی دیكەی بەرزبوونی ڕێژەی تاوانەكان دەزانێت و دەڵێت «بەدرێژایی ساڵانی خوێندن تاكو تەواوكردنی پلەی باڵا تاكی كورد لەخوێندندا هیچ كۆرسێك وەرناگرێت لەسەر ئیدارەدانی كێشە كۆمەڵایەتی و دەرونییەكان، بۆیە نازانێت چۆن ئیدارەی كێشەكانی خۆی بكات و سەرئەنجام كێشەكەی توندوتیژی و كارەساتی لێ دەكەوێتەوە». ئەوتوێژەرە كۆمەڵایەتییە رایوایە «تاكی كورد بەڕادەیەك لاوازە، دەستی دەچێتە كوشتنی نزیكترین كەسی خۆی»، گوتیشی «لەبەرئەوەی ئینسان كائینێكی بایەلۆژییە، بە پڕۆسەی ئاراستەكردن و پەروەردە دەبێت رابهێنرێت،ـ بۆ ئەوەی بتوانێت، بە ئاسانی ڕووبەڕووی كێشە كۆمەڵایەتییەكانی ببێتەوە، واتە هەتا پڕۆسەی كۆمەڵایەتی بوون و پەروەردە لاواز بێت، تاكێكی كۆمەڵایەتی لاواز بەرهەم دێت»، جەختی لەوەش كردەوە كە «لە كوردستاندا دامەزراوەكانی پڕۆسەی بە كۆمەڵایەتی كردنی تاك زۆر لاوازە».
كەناڵەكانی ڕاگەیاندن نرخ و بەهای هاوڕێیەتی و خۆشەویستی كەم دەكەنەوە
دەربارەی ئەو گرفتانەی لەنێوان كەسانی نزیكی یەكتردا ڕوودەدات ولەیەكێك لەڕووداوەكاندا دووكەسی نزیك لەیەكتر دەبێتە شەڕە چەقۆیان و یەكێكیان گیان لەدەست دەدات، ئەوتوێژەرە گوتی «هۆكاری سەرەكی ئەم جۆرە ڕووداوانە خێزان و پەروەردەو خوێندن و كەناڵەكانی ڕاگەیاندنە كە نرخ و بەهای هاوڕێیەتی و دۆستایەتی و خۆشەویستی كەم دەكەنەوە، تەنانەت هیچ وانەیەك بە نەوەكانی ئەم وڵاتە نادرێت لەسەر خۆشەویستی و هاوڕێیەتی و ڕاستگۆیی و ئیدارەدانی كێشەكانی نێوان دووهاوڕێ، بەردەوام میدیاكان تاكی ئەم وڵاتە فێری تەكنیكی كوشتن و سەربڕین دەكەن، بۆیە ڕوودانی شەڕەچەقۆ لەنێوان دوو هاوڕێدا بووە بەكارێكی ئاسایی لەئێستادا». دەربارەی هەوڵدان بۆكەمكردنەوەو چارەسەركردنی ئەو ڕووداوانەش ئەو توێژەرە بە پێویستی زانی «لێژنەیەكی دەروونی و پسپۆڕ بۆ تەواوی میدیاكان دابنرێت و هیچ بەرهەمێك لە كەناڵەكانەوە پێشكەش نەكرێت، تاكو بەفلتەری كۆمەڵایەتی و دەروونی ئەو لێژنەیەدا تێپەڕ نەبێت، بۆ ئەوەی بزانرێت شیاوە بۆ بڵاوكردنەوە، یاخود نا، پاشان پرۆگرامەكانی خوێندنگەكان لەڕووی كۆمەڵایەتییەوە گۆڕانكاری تێدا بكرێت، بەتایەت دانانی پرۆگرامی لێبووردەیی و دژایەتی توندوتیژی و ژینگەپارێزی گرنگی زیاتر پێبدرێ بۆ ئەوەی پرۆسەی پەروەردە تاكێك بەرهەم بهێنێت بەمانای وشە تاكێكی كۆمەڵایەتی تەندروست بێت و لەسەر بەها پەروەردەییەكان راهاتبێت».