ئایا هۆكاری گرفتەسێكسیەكان، بایەلۆژیین یان هۆكاری تری وەكو سۆسیۆلۆژیش واتە كۆمەڵایەتی لەپشتەوەیە؟ هۆكاری سەرهەڵدانی ئەم گرفتە لەچییەوەیە، ئاخۆ هۆكاری كۆمەڵایەتی لەپشتەوەیە؟ ئەم گرفتە دەبێتە هۆی سەرهەڵدانی كێشە لەنێوان ژن مێرددا، زۆر جار ئەم كێشەیە سەری كێشاوە بۆ جیابوونەوەو لێكهەڵوەشانی خێزان و تێكچوونی شیرازەكەی، یاخود بووەتە هۆی ناپاكی هاوسەری، سەبارەت بەم بابەتە ڕابۆچوونی چەند كەسێكمان وەرگرت،تا بە پێی ئەزموون و شارەزایی ئەوانیش ڕاو بۆچوونی هەمەجۆر بخەینە ڕوو.

سۆزداری و ڕۆمانسیەت لە لای ئافرەت یەكەمین شتن
بێگومان ساردی سێكسیی لای ئافرەتان لەئاست و پلەی جیاوازدا ڕوودەدەن، وەك: (كەمبوونەوەی ئارەزووی سێكسیی، ئەنجامدانی پێوەندیی سێكسیی، نەگەیشتن بە ئۆرگازم، نەمانی ئارەزووی سێكسیی) بێگومان بوونی ئەم حاڵەتە ژانكۆیەكی دەروونی گەورە دروست دەكات چ بۆ خودی ئافرەتەكە و چ بۆ هاوسەرە پیاوەكەیشی. ئەگەرچی ئافرەتان لەڕووی پێكهاتەی سایكۆلۆژییانەوە ئەوەندی گرنگی و بایەخ بەلایەنی سۆزداری و ڕۆمانسیەت دەدەن، ئەوەندە سێكس گرنگی نییە لەلایان، لەم بارەیەوە توێژەری دەروونی(سامان سیوەیلی) سەرۆكی سەنتەری ڕاوێژكاریی خێزان لەسلێمانی پێی وایە، مەسەلە سۆزداری و ڕۆمانسییەكان یەكەمینن لای ئافرەتان، ئەمەش بەپێچەوانەی پێكهاتەی ڕەگەزی نێر یان پیاوانەوەیە، كە سێكس لەلای یەكەمین شتە لەپێوەندكردن بە ڕەگەزی بەرامبەر یان بڵێین لە پێوەندی كردن بە هاوسەرەكەیەوە.
(سامان سیوەیلی) دەڵێت « بەداخەوە زۆرجار لەئەنجامی ئاشنانەبوونی هاوسەران بە سروشت و پێكهاتەی سایكۆلۆژییانەی ڕەگەزی بەرامبەر، دەكەونە كێشەو ناتەباییەوە، بۆ نموونە ئافرەتان دەخوازن هاوسەرە پیاوەكانیان وەك خۆیان سۆزدارو ڕۆمانسی بن، یان پیاوان دەخوازن هاوسەرەكانیان وەك خۆیان گرنگی بە سێكس بدەن، ئەمەش لێكتێنەگەیشتنەو مەودای ڕۆحیی نێوان هاوسەران لەیەك دوورتر دەخاتەوە.
سێكس گرنگی زۆری هەیە لەژیانی هاوسەریداو بەیەكێك لە پایە بەهێزەكانی ژیانی هاوسەریی دادەنرێت، بۆیە لەرزۆك بوونی ئەم پایە گرنگە یان داڕمانی، ئەگەری ئەوەی لێدەكرێت ژیانە هاوسەرییەكە بەرەو داڕمان و هەڵوەشاندنەوە ببات، هەربۆیە هەندێكجار كێشەكانی ناو جێگای نووستنە ڕێی دادگا بە هاوسەران دەگرێتەبەر، ئەگەرچی تا ئێستا لەكۆمەڵگەی كوردیدا هاوسەران ئەگەر ژانكۆییشیان لەمبوارەدا هەبێت، دەرینابڕن و بۆ جیابوونەوەكانیان پاساوی تر دەهێننەوە.
هۆكارەكانی دەروونی لەپشتەوەیە
سامان سیوەیلی لەبارەی ئەوەی تاچەند هۆكاری دەروونی كاریگەری هەیە وتی «لەوانە دەروونی، جەستەیی، كۆمەڵایەتی، پەروەردەیی. بۆنموونە فشاری دەروونی زۆر یان تووشبوونی ئافرەت بەنەخۆشی دەروونی بەتایبەتی خەمۆكی، ئارەزووی سێكسیی ئافرەتان كەمدەكاتەوە، تا ئاستی ڕەتكردنەوەی پێوەندییە سێكسییەكان، هەروەها هەندێكجار ئەزموونە سێكسییە تاڵەكانی سەردەمی منداڵی یان هەرزەكاری لەجۆری دەستدرێژی كردنی سێكسیی ئەگەری هەیە ئافرەتان تووشی گرێی دەروونی بكات بەرامبەر سێكس. یان ئەو ئافرەتانەی بەزۆرەملێ هاوسەرگیرییان لەگەڵ كەسێك پێدەكرێت كەخۆیان هەڵیان نەبژاردووە، یان ئەو كەسانەیان بەدڵ نییە، یان خۆیان دڵخوازی خۆیان هەبووەو خێزان و خانەوادە ڕێگر بوون لە بەیەك گەیشتنیان، ئەمانە تێكڕا دەبنە هۆی دروستبوونی ساردی سێكسیی لای ئافرەتان. هەروەها لە هۆكارە جەستەییەكان، خەتەنەكردنی ئافرەتانە كە لەڕێی ئەم پرۆسەیەوە گرنگترین بەش یان ئەندام لەجەستەی كچان دەبڕدرێت كە گەورەترین ڕۆڵ لە پرۆسەی سێكسی و وروژاندن و چێژوەرگرتندا دەگێڕێت، بەداخەوە لە ڕابردوودا بەشێكی زۆر لە كچانی كۆمەڵگەی ئێمە خەتەنە دەكران، ئەگەرچی لەم ڕۆژگارەدا بەهۆی زیاتر هۆشیاربوونی كۆمەڵگەوە لە مەترسییەكانی خەتەنە كردن ئەم دیاردەیە كەمتر بۆتەوە، هەروەها هەندێكجار بەهۆی بوونی نەخۆشی یان هەوكردن لەناوچەی زێی ئافرەتان یان تەنگی زێی ئافرەتان كە دەبنە هۆی وەرگرتنی ئازار لە پێوەندی سێكسییدا، ئەمەش وادەكات ئافرەتەكە خواستی نەبێت لەسەر جووتبوون. لەهۆكارەكانی تر بۆ دروستبوونی ساردی سێكسیی، ئەو ڕۆتینە سێكسییەیە كە لەنێوان هاوسەراندا ڕوودەدات، بۆ نموونە لەئەنجامی نەبوونی هۆشیاری سێكسییەوە بەشێك لە هاوسەران تەنیا لە یەك بار و بێ هیچ گۆڕانكاری و تامەزرۆییەكەوە پرۆسەی سێكسیی ئەنجام دەدەن، یاخود خۆپەرستی پیاو كە هەندێجار پیاوان گوێ نادەنە هاوسەرەكانیان و بێ هیچ پێشەكییەك بۆ وروژاندنی هاوسەرەكانیان یەكسەر پەنا بۆ جووتبوون دەبەن و بەگەیشتنی خۆیان بە ئۆرگازم ڕاستەوخۆ دەكشێنە دواوە، ئەمانە تێكڕا كاریگەرییان لەسەر دروستبوونی ساردی سێكسیی لای ئافرەتان هەیە.
بەزۆر دامیان بەشوو، هیچ بایەخێكیان بەقسەكانی من نەدا
ئافرەتێكی تەمەن 28ساڵە، وەك خۆی باسی دەكات، ماوەیی 4ساڵە ژیانی هاوسەری پێكهێناوەو خاوەنی یەك منداڵە. بەردەوام هاوسەرەكەی گلەیی ئەوەی لێدەكات وەك پێویست لەگەڵی ناخەوێت. ئەو ئافرەتە ئاماژە بەوەش دەكات، كەهیچ گرفتێكی دەروونی نییە « خۆشم نازانم بۆچی ناتوانم وەك پێویست بایەخ بەسێكس بدەم، تەنیا ئەوەندە دەزانم كەئارەزووی سێكسیم نییە. ئەو ئافرەتە وتیشی سەرەتا كە ئەو پیاوە هاتە داوام حەزم نەدەكرد شووی پێبكەم، بەڵام بەزۆر دامیان بەشوو. ئافرەتێكی تری تەمەن 35 ساڵە كە ماوەیی 10 ساڵە ژیانی هاوسەری پێكهێناوە وەك خۆی باسی دەكات، بەردەوام كێشەی هەیە لەگەڵ هاوسەرەكەی كەناتوانێت وەك پێویست لەگەڵ هاوسەرەكەی بخەوێت بۆیە بەردەوام كێشەیان هەیە. ئەو ئافرەتە دەڵێت « سەرەتا كە ژیانی هاوسەریم پێكهێنا لەگەڵ هاوسەرەكەم لەسێكس كردن هیچ كێشەیەكم نەبوو، بەڵام لەم ساڵانەی دواییدا زۆر هەوڵم دەدا كە هاوسەرەكەم سۆزو خۆشەویستیم پێببەخشێت بەداخەوە بەردەوام بەس داوای سێكسی لێدەكرم، تاوای لێهات هاوسەرەكەی خۆم لەبەر دڵكەوت و ناتوانم ئێستا سێكسی لەگەڵ بكەم، زۆر هەوڵ دەدەم بەڵام بەدەست خۆم نییە، ئەو ئافرەتە ئەوەش دەخاتەڕوو كەئێستا هاوسەرەكەی دەڵێت ژنی دووەم دەهێنم تۆ كەڵكت نەماوە.
هەر سەبارەت بەم بابەتە، پیاوێكی تەمەن 39ساڵە كەماوەیی 12 ساڵە ژیانی هاوسەری پێكهێناوە خاوەنی دوو منداڵە و دەڵێت « خێزانەكەم وەك پێویست لەگەڵم ناخەوێت تەنانەت لەلاشم نانوێت زۆر داوای لێدەكەم كە لەلام بخەوێت، بەڵام ئەو هەرخۆی بەدوور دەگرێت لێم، نازانم هۆكارەكەشی چییە چەندین جار داوام لێكردوە كەبیبەم بۆلای دكتۆر، بەڵام ئەو هەردەڵێت من هیچ كێشەیەكم نییە، ناچم هەر ئەو مابوو، بۆ حەیام نابەیت لای دكتۆر.
هۆكارە كۆمەڵایەتیەكان گرفتی سێكسی دروست دەكەن
جەزا حەمەساڵح توێژەری كە كۆمەڵایەتییە سەبارەت بەم بابەتە دەڵێت « لەئەنجامی كێشە كۆمەڵایەتییەكانەوە گرفتی سێكسی دروست دەبێت وەكو (خەتەنەكردن،نەبوونی خۆشەویستی، بەزۆر بەشوودان،خەمۆكی،دڵەڕاوكێ،ترس) كە ئەمانە هەموویان كێشە دروست دەكەن لەنێو خێزان دواجار دەبێتە هۆی لاوازی سێكسی و جیابوونەوە لەیەكتر.
ئەو توێژەرە پێشی وایە، كەئێمە لە كۆمەڵگایەكی پیاوسالاری دوا كەوتوو دەژین و مافەكانی ژن نەبۆتە ئەساسیەتی واقیعیەكی سەلمێنراوو كاری پێبكرێت، ناتوانن ئەم گرفتەی خۆیان باس بكەن، بڵێن كێش و كۆمەڵایەتیەكانمان لەگەڵ هاوسەرمان هۆكارەكەی سێكسیە، لەجیاتی ئەوەی باسی ئەوەبكەن كەژی كێشەكە دەخەنە قاڵبێكی ترەوە، چونكە لەكۆمەڵگای كوردیدا هەرداكۆكی كردنێكی ژنان لەماف وئارەزووە سێكسیەكانیان شەرم وعەیبە و حەیابردنە .
دواتر د.سامان ئەوەشی خستەڕوو كە نەبوونی سۆز و خۆشەویستی لەنێوان هاوسەرانداو لەجێی ئەمە فەرامۆشكردنی ئافرەتان لەلایەن هاوسەرەكانیانەوەو بوونی كێشەو گرفتی خێزانی و كۆمەڵایەتی هەموو ئەمانەش هۆكارن بۆ دروستبوونی ساردی سێكسیی. هەندێجاریش هەیە پیاوان خۆیان گرفتی سێكسییان هەیە، ئارەزووی سێكسییان كەمە، یان زوو دەگەنە ئۆرگازم، واتە پیاوان خۆیان ناتوانن سێكسێكی دروست بكەن لەگەڵ هاوسەرەكانیاندا، بۆیە لەهەموو ئەم حاڵەتانەدا ساردی سێكسیی لای ئافرەتان دروست دەبێت.
چارەسەركردن
بەگوتەی (د.سامان ) ئەوكەسانەی تووشی ساردی سێكس دەبن یاخود كێشەیان لە هاوسەرەكانیاندا هەیە، سەردانی پزیشكی دەروونی و دەروونناسان بكەن بۆ چارەسەركردنی ئەم حاڵەتە تا هەر كێشەیەك بە پێی تایبەتمەندی خۆی چارەسەری بۆ بدۆزرێتەوە..