درۆكردن، چارەنووسی مناڵەكەت بەكوێ دەگەیەنێت
مناڵ نەوەی ئێستای خێزان و جیلی داهاتووی كۆمەڵگەن، خاوەن جیهانێكی تایبەت بەخۆیانن لەبەرئەوەی زۆر هەستیارن و بەپێی ڕاوبۆچوونی زانایانیش دەبێت هەستیارانەو هۆشیارانە مامەڵەیان لەگەڵدابكرێت تا لەدواجاردا نەبنە سەرچاوەی پەشیمانی و نەبنە زیادەیەك لە كۆمەڵگەدا بەڵكو لەو جۆرە مرۆڤانەبن كە ئەركی داهاتووی كۆمەڵگەیان پێبسپێرێت،كەواتە بابزانین بەشێك لە خانەوادەكان چۆن مامەڵەی راستگۆیی و بەرپرسیارانە لەگەڵ ئەم جیهانە ناسك و گرنگەدا دەكەن.
« بۆت دەردەكەوێت ئەو درۆیەی لەگەڵیدا كردوتە زیانی زۆری پێ گەیاندووە»
وادەزانم مناڵ هەموو ژیانی منەو بەبێ مناڵەكانم ناتوانم هەناسەیەكی خۆش هەڵمژم، بەڵام كاتێك درۆیەكیشم لەگەڵداكردون واهەستم كردووە لەبەرژەوەندی ئەوان ئەو درۆیەم كردووە بەڵام پاش تێپەڕبوونی ماوەیەك بۆم دەركەوتووە كە ئەو درۆیەی لەگەڵیدا كردومە زیانی زۆری بەمناڵەكەو بەخۆشم گەیاندووە، ئەمە وتەی ئەوین ئەحمەد جەباری مامۆستای زمانی كوردی بوو،هەروەها باوەڕیشی وابوو كە هیچ دایك و باوكێك بیر لەوە نەكاتەوە كە درۆو چاوبەستەكی لەگەڵ مناڵەكەیدا بكات.
«مرۆڤی هۆشیار زوو فریای خۆی و مناڵەكانی دەكەوێت»
لێتناشارمەوە ئێمەی باوكان ستەم لە مناڵەكانمان دەكەین و لەرێگەی درۆكردنەوە دەمانەوێت مناڵەكانمان ڕازی بكەین خۆزگە وانەبوینایە بەڵام پێویستیمان بەهەوڵدانی زۆر هەیە تاكو خۆمان لەم كێشەیە رزگار دەكەین لەبەرئەوەی تەنیا مرۆڤی هۆشیار دەتوانێت زوو فریای خۆی و مناڵەكانی بكەوێت، ئەمە وتەی نازم كەریم ئەبوبەكری تەمەن 45 ساڵی خاوەن 3 مناڵە، پێشیوایە كە مناڵی ئێستا زۆر وریاو چاوكراوەیەو زوو هەست بەوە دەكات كە درۆی لەگەڵدادەكرێت یان نا بۆیە هەروەك كورد وتویەتی پەتی درۆ كورتە با ئیتر درۆیان لەگەڵدا نەكەین.
«با مناڵەكەشت درۆت لەگەڵدا نەكات»
لەبەردەمی قوتابخانەیەكی بنەڕەتی ویستم یەكێك لە قوتابیەكی مناڵ بدوێنم لەسەر ئەوەی كە ئایا لەماڵەوە دایك و باوكیان بەڕاستگۆیی مامەڵەیان لەگەڵدا دەكەن، چوار قوتابی پۆلی سێی بنەڕەتی لێم كۆبوونەوەو هەریەكەیان لەلای خۆیەوە وەڵامی دەدامەوە،كارزان وتی ئەگەر هەموو دایك و باوكێك وەكو ئەوانەی من بوونایە هیچ مناڵێك كێشەی نەدەبوو،دەروون وتی هەستدەكەم جارجار دایكم درۆم لەگەڵ دەكات بەڵام دڵیشم نایە پێی بڵێم كە بۆچی وایەو زوو زووش باوكم بەدایكم دەڵێت درۆ لەگەڵ مناڵەكان مەكە،محەمەدیش خۆی پێنەگیراو وتی ئەگەر دایكم یان باوكم درۆم لەگەڵدا بكات ئەوا منیش درۆیان لەگەڵدا دەكەم.
«خەرمانی تەمەنت مەسووتێنە»
مناڵ وەكو لاپەرەیەكی سپی وایە چی لەسەربنووسیت ئەوە دەردەچێت و چ وێنەیەكیشی لەسەر بكێشیت ئەو وێنەیە دەردەكەوێت بۆیە بەهەموو كەسێكی خەمخۆر بۆ مناڵەكانی دەڵێم كە مناڵ بەرهەم و ڕەنجی چەندین ساڵەی ئەوانەو بەهۆی درۆكردن و هەندێك ناڕاستییەوە ئەو خەرمان و بەرهەمەیان نەسووتێنن، ئەمە بۆچوونی لوقمان سدیق عارفی توێژەری كۆمەڵایەتییە كە لەرێگەی ئیمێڵەوە سەرنجی خۆی پێووتین، باوەڕیشی وابوو كە لەوانەیە تەنیا دایك و باوك نەبن درۆ لەگەڵ مناڵ بكەن بەڵكو كەسانی دەرەوە و هاوڕێكانیشی درۆی لەگەڵدا بكەن بەڵام دەبێت دایك و باوك و خوشك و براكانیان ئەو بۆشاییەی خەڵكی دەرەوەشیان بۆ پڕبكەنەوە چونكە كە مناڵیش گەیشتە ئەو قۆناغەی ئەویش درۆ بكات ئیتر كێشەكە كەمێك ئاڵۆزتر دەبێت.
« باشترین رێگە راستگۆییتە»
مناڵ جیهان و ژیانێكی تایبەتی هەیە نابێت بەهۆی درۆكردنەوە ژیانی مناڵێتی لێبستێنینەوەو كارێكی وانەكەین ئەو شتەی كە ناتوانین بۆی دابین بكەین لەرێگەی هۆكاری ناتەندروستەوە چارەسەری بۆبكەین، چونكە ئەگەر ئێستاش لەداوایەكی مناڵەكەت خۆت رزگاركرد ئەوا سبەی ناتوانیت، بۆیە باشترین رێگەی پەروەردەو دۆستایەتیكردنی مناڵەكەت ئەوەیە كە زۆر لەگەڵیدا راستگۆبیت، ئەمە وتەی سەبریە عومەر فارووقی مامۆستای زیندەوەرزانی بوو.