ناكۆكی نێوان دوو دراوسێ
ماڵی(مەجید) و ماڵی(موراد)، تەنیا دیوارێكییان نێوان بوو، هەردوولا بێ منداڵ بوون، ژنی هەردوولاشیان چاویان بەیەك هەڵنەدەهات و هەمیشە مۆڕەیان لەیەك دەكرد
لە هەر رێگە و جێگەیەك بانە، لای خەڵكی زەم و زەمكاری یەكتریان دەكرد، تەنانەت وایلهاتبوو تەقەیان لە سێبەری یەكتر دەكرد، هەموو ئەو ناكۆكییەش (گوڵیزار)ی ژنی(مەجید) دروستیكردبوو، ژنی موراد كە ناوی(پەرژین) بوو بەتەمەن چوار پێنچ ساڵان لە (گوڵیزار)بچووكتر بوو، بەڵام بە تەنیا بچووك نەبوو، بەڵكو جوانتر و رێكوپێكتر و خاوێنتریش بوو، ماڵی (گوڵیزار) هەمیشە دەتگوت گوڤەك خانەیە، لە ژوورەوە دەگری تا بەردەرگایان بەردەوام پیسبوو، ژنە منداڵی نەدەبوو، دەر و جیرانان دەیانگوت نەزۆكە، بەڵام كەس نەیدەزانی نەزۆكییەكەیان هی ئەوە یان هی مێردەكەیەتی، چونكە كەس نەیدەوێرا باسی منداڵ نەبوونیان لەگەڵدا بكاتەوە، ئیرەیی دنیاشی بەو كەسمە دەبرد تەنانەت یەك منداڵیشی ببوایە ماڵی (گوڵیزار) پێشتر لە كۆڵانەكە بوون، واتە پێش ئەوەی ماڵی (پەرژین) بێتە تەنیشتیان ئەوان چەند ساڵێك دەبوو لەوێ بوون(گوڵیزار) هەر وەك (شەونم)ی دراوسێیان دەیگێڕێتەوە و دەڵێ(ئەو ژنە تەبیعەتێكی توند و زۆر خراپی هەبوو، حەزی لێبوو خۆی لە هەموو شتێك هەڵقورتێنێ، كە منداڵیشی نەبوو زۆر بە منداڵی خەڵكی قەڵسی دەبوو، ئەوەشمان لەوەڕاهەست پێ دەكرد كاتێك ئەگەر منداڵ لە ناو كۆڵان تۆزێك بە یاری كردن دەنگیان دەربهاتایە، دەیكردە هەرایەك نەبێتەوە، هەموویانی دەردەكرد و منداڵەكانیش لە ناچاریان دوور دەكەوتنەوە و لەولا یاریان دەكرد، گەورەترین كێشەی ئەو ژنە منداڵ نەبوون بوو، ژنە كە منداڵی نەدەبوو، نەماندەزانی خەتایی خۆیەتی یان مێردەكەیەتی، رق و كینەی خۆی بە ژنەكانی دەر و دراوسێ دەردەكرد، كە ماڵی (پەرژین) هاتنە كۆڵانەكە هەفتەیەكی نەبرد كەوتە پەڵپ و بیانوو پێگرتنی، بەتایبەتیش كە زانیبووی ژنە تازە مێردیی كردووە و تازە منداڵێكی لەبەرچووە.

شەڕ و لێكدانی دوو ژنە دراوسێ
سەبارەت بە كێشەی ئەم دوو ژنەش(شەونم) بەمشێوەیە ناكۆكییەیان دەگێڕێتەوە و دەڵێ: یەك دوو جارێك ئەوانە لەبەر دەرگا بووە دەنگە دەنگیان و ئیتر لەو ساوە ناكۆكی كەوتە نێوانیان، چەند جارێك قسەیان لەگەڵ یەك تەرك كرد و دواتر(گوڵیزار) بە هەر رێگەیەك بایە خۆی لە (پەرژین) دەگەیاندەوە و قسەی لەگەڵ دەكردەوە، بەڵام (پەرژین) لەو شێوازەی (گوڵیزار) بێزار دەبێ ئیتر بەهیچ شێوەیەك خۆی لێ ناگەیەنێ واتە بە تەواوەتی فەرامۆش و ئیهمالی دەكات، وەك ئەوەی هەر دراوسێش نەبێت، ئەم بەزمە یەك دوو مانگ دەخایەنێ و(پەرژین) سكی دەبێ، دوو سێ مانگ رەتدەبێ ئەوجا(گوڵیزار) دەزانێ كە(پەرژین) سكی هەیە، ئیدی لە هەژمەتا هێندەی دیكە لێی دەكەوێتە رق و كینە(موراد)یش بە بەزمەكە دەزانێ بۆیە بڕیار دەدەن كە هەر منداڵەكەیان ببێت ئیتر ئەوان لەدەست(مەجید) و (گوڵیزار)ی ژنی خانووەكە دەفرۆشن و بە یەكجارەكی بار دەكەن، پاش نیوەڕۆیەك دەنگە دەنگ لەبەر دەرگای هەردووكیان بەرزبۆوە، ئێمەش هاتینە دەرێ بزانین چی بووە، كە سەیرمان كرد دەبینین (پەرژین و گوڵیزار) شەڕە قسەیانە و دەستیان ناوەتە تیتكی یەكتر و بە پێڵاو مەترەق لەیك دەدەن، هەتا ئێمە چووین لێكیان بكەینەوە بە چاوی خۆمان دیتمان كە(گوڵیزار) مەترەقی لە دەستە، هەتا هێزی تێدابوو رایوەشاند و لە سكی(پەرژین) دا و ژنە زیڕەیەكی لێهەڵسا و دەموودەست بەربۆوە، كە بەربۆوە (گوڵیزار) رەنگی لەبەر نەما و زراوی چوو، یەكسەر هەڵات، بۆ كوێ چوو؟ نەمانزانی ئیتر تەلەفۆن بۆ(موراد)ی مێردی(پەرژین) كرا و دوای چەند خولەكێك گەیشتە سەر ژنەكەی و بە پەلە لەگەڵ دەر و دراوسێ گەیاندیانە نەخۆشخانە.
گرتنی گوڵیزار
پۆلیسی نەخۆشخانە گوفتاری (موراد)ی وەرگرت و ئەو قسانەی كە دراوسێكان لە رێگای گەیاندنی ژنەكەی بۆ نەخۆشخانە پێیان گوتبوو، بە لێكۆڵەرەی دادی گوت، ئەوانەی كە لەگەڵ موراد هاتبوون و یارمەتیان دابوو ژنەكەی بگەیەنێتە نەخۆشخانە، گوفتاری ئەوانیش وەك شایەت وەرگیرا( پەرژین) حاڵی زۆر شڕ بوو، پزیشكەكان یەكسەر بردیانە ژووری نەشتەرگەری، ژنە، منداڵەكەی لە سیكدا مردبوو، دەبوو منداڵەكەی بە نەشتەرگەری دەربێنن، دوو سێ كاتژمێر لە نەشتەرگەری مایەوە ئینجا كە نەشتەرگەریەكەی تەواوبوو بە سەركەوتوویی لێی دەربازبوو هێنایانە دەرەوەو ناردیانە هۆڵی چاودێری چڕ، رۆژی دواتر ئینجا بە خۆهاتەوە لێكۆڵەرەوەكە گوتبووی ئەگەر بەخۆ هاتەوە ئاگادارم بكەنەوە(موراد)یش و كەسوكارەكەیان ئاگاداركردبۆوە، ئەویش چوو گوفتاری وەرگرت و لە لێكۆڵەرەكەی گەیاند كە ژنێكی دراوسێیان بە دارێكی ئەستوور لە سكی دایە و منداڵەكەی لە ناو سكیدا كوشتووە، (گوڵیزار)یش چۆن خۆی بزركردبوو، هەروا خۆی بزركردبووە نە خۆی و نە مێردی نەوێرابوون بچنەوە ماڵ، دوای دەرچوونی فەرمانی دەستگیركردنی، پاش سێ رۆژ لە دوای رووداوەكە دەستگیر دەكرێ، سەرەتا نكۆڵی دەكات كە مردنی منداڵەكەی بەهۆی ئەوەوە بووە، بەڵام دواتر بەهۆی قسەی شایەتەكانەوە دان بەوە دادەنێ كە لەشەڕەكەدا دارێكی لە سكی ژنەكە داوە و زانیوویەتی كەسكیشی هەیە، بەڵام ئەو رووداوەكەی دەبردە قاڵبی قەزا و قەدەر، (گوڵیزار) دەخرێتە بەندیخانە و لێكۆڵینەوەش بەردەوام دەبێ تاوەكو تەواوبوونی، ئینجا پەراوەكەی رەوانەی دادگای تاوان دەكرێت، دانیشتنەكانی دادگا چەند جارێك دەخایەنێ و گوفتاری( پەرژین) وەك تاوانلێكراو و خەڵكی گەڕەك وەك شایەتحاڵی رووداوەكەش، وەردەگیرێت و دەمێنێتەوە رۆژی بڕیاردان، لەو ماوەەیدا مێردی(گوڵیزار) و كەسوكارەكەی هەر چەند هەوڵدەدن سوڵح و ئامادەیی دەردەبڕن كە لە بری لەبارچوونی كوڕپەكە قەرەبووش بدەنەوە، بەڵام نە(پەرژین) و نە(موراد)یش ئامادەیی سوڵح كردن نابن، بۆیە كاتێك دوا رۆژی دادگاییكردن دیاری دەكرێت و هەموولا ئامادە دەبن، دادگا بڕیار دەردەكات بە زیندانی كردنی(گوڵیزار) بۆ ماوەی سێ ساڵ و قەرەبووكردنەوەی(پەرژین) بە قەرەبووی مادی لە دادگای شارستانی.