بڵاوبوونەوەی كۆرۆنا دۆخێكی نوێی هێنایە كایەوە، بەجۆرێك كە سەرتاسەری جیهان بۆ ماوەیەكی زۆر كەرەنتینەیان راگەیاند و خەڵك ناچار كرا لە ماڵەكانی خۆیان بمێننەوە، بەمەش زۆربەی چالاكییەكان وەستان، بەتایبەتی چالاكییە هونەرییەكان، هونەرمەندانی كورد هەریەكەوە بەجۆرێك ئەو كاتەیان بەسەر برد، كە لەم بەسەركردنەوەیەی گوڵاندا باسی دەكەن.

هونەرمەند عەلی كەریم: هاوسەرەكەم پێی خۆش بوو
لە ماڵەوە بم، بەڵام من هەرگیز خۆشحاڵ نەبووم

هونەرمەندی ناسراوی كوردستان عەلی كەریم یەكێكە لە ئەستێرەكانی بواری نواندن لە كوردستان و، یەكێكە لەو كەسانەی كە زۆر مانەوە لە ماڵ بۆی ئاسان نییە، بەڵام ناچار بوو هەرچۆنێك بێت رۆژانی كەرەنتینە و قەدەغەی هاتوچۆ لە ماڵەوە بەسەر ببات و، بەم شێوەیە باس لە بەسەربردنی كاتی كەرەنتینە دەكات: «كارێكی ئاسان نییە، لە ماڵەوە بمێنمەوە و رێی فڕینم لێ بگیرێت، ئاخر من لەو كەسانە نیم حەزم لە بەندكردن بێت، چونكە لە ژیانمدا بۆ یەك خولەكیش زیندانی نەكراوم، تەنیا جارێك بەهۆی وەرگەڕانی ئۆتۆمبیلەوە، زیاتر لە دوو مانگ بە هەمان دەردی ڤایرۆسی كۆرۆنا بە ناچاری لە ماڵەوە مامەوە، ئەم ماوەی پەتای ڤاپرۆسەش، سەرەتا بەهەموو ئەو نوكتە خۆشانەوە كە لە رێگای پەیج و فرێندەكانمەوە بۆم دەهات، زۆر پێكەنیم، ئاخر من بە كەسێكی مۆن و عەبووس ناسراوم، شەوانی درەنگیش هەرچۆنێك بێت سەیری فیلمێكی عەرەبیم دەكرد، هەموو بەیانییەكیش زوو تیڤیم هەڵدەكرد بۆ زانینی هەواڵی تازەی تووشبوون و چاكبوونەوە، ئەنجا خۆشمم بە ئەرشیفی خۆمەوە خەریككرد و دەستم كرد بە لێك جیاكردنەوەی بابەتەكانی ناو ئەرشیفەكەم، چاوپێكەوتنەكانم لە نووسینەكانم جیا كردەوە، كاتێكم زانی نووسینەكانم بە زمانی عەرەبی لە دوای جیاكردنەوەیان نزیكە لە كتێیێكەوە، ئەوە بوو بڕیارمدا، بڕە پارەیەك زامن بكەم بۆ لە چاپدانیان لەژێر ناوی (اضواء علی المسرح الكوردی المعاصر) كە كاتی خۆی لە پێش راپەرین لە رۆژنامە عەرەبییەكاندا گۆشەیەكم بەو ناوەوە هەبوو».
عەلی كەریم لە درێژەی باسەكەیدا هەروەها دەڵێت: «لەرووی خۆپارێزیشەوە، رۆژ هەبوو (25) جار دەستم بۆ ماوەی(20) چركە بە ئاو و سابون دەشۆرد، ئێواران هەرچۆنێك بوو خۆمم دەگەیاندە ناوەندی گاڤ، هاوسەرەكەشم زۆر خۆشحاڵ بوو كە لە من ماڵەوەبم، منیش هەرگیزم بە مانەوە لە ماڵەوە خۆشحاڵ نەبووم، هەستم دەكرد وەك باڵندەیەكی پەڕوباڵكراوم و ئازادیم لێ زەوت كراوە، ئاخر من بۆ دەقەیەكیش بەند نەكراوم و بەوە ناسراوم كە كەسێكی بزێوم، دەتوانم بڵێم ئێستا خۆشحاڵم بەوەی كە لە ماڵەوە دەرنەچوونەم، چونكە یەكەم ئەرشیفەكەم رێكخستەوە، دووەم پڕۆژەی لە چاپدانی كتێبێكیش بوو بۆ خۆم، لە سایەی سەری وەزارەتی ناوخۆ و تەندروستییەوە لە لایەك و، خۆڕاگریی هاووڵاتیان لە لایەكی دیكەوە، پەتای ڤایرۆسی كۆرۆنا جارێ تا رادەیەك لە كوردستان شكستی هێناوە».

نەتالیا: دووبارە پەیوەندییەكانمان بونیاد نایەوە
خانمە هونەرمەندی كوردی نیشتەجێی وڵاتی ئەڵمانیا (ناتالیا) ئەویش وەك هەموو كەسێك كاتی خۆی لە ماڵەوە بەسەر دەبات، بەم شێوەیەش باس لە بەسەربردنی كەرەنتینە و قەدەغەی هاتوچۆ دەكات: «گرنگترین كار كە پێویستە لەسەر هاووڵاتیان ئەوەیە لە ئێستادا لە ماڵەكانیان بمێننەوە و بە رێنماییە تەندروستییەكانەوە پابەند بن، چونكە ئەم پەتایە هیچ چارەسەرێكی نییە و تاكە چارەسەر تەنیا بریتییە لە خۆپاراستن و پابەندبوون، دڵنیا بن ئەم دۆخەش تێدەپەڕینین و سەركەوتوو دەبین، سەرەڕای ئەوەی كە مانەوە لە ماڵەوە رەنگە ئاسان نەبێت، بەڵام لە هەمان كاتدا دەرفەتێكی باشە بۆ ئەنجامدانی ئەو كارانەی كە پێشتر ئەو كاتەمان نەبووە تەواویان بكەین، هەروەها دەرفەتێكی باشە بۆ پێداچوونەوەی پەیوەندییەكانمان و لێك نزیك بوونەوەی ئەندامانی خێزان و بوونی لێك تێگەیشتنی زیاتر».
ناتالیا هەروەها دەڵێت: «منیش وەك هەموو هاووڵاتییەكی دیكە لە ماڵەوە كاتەكانم بەسەر دەبەم، جگە لە كاری هونەری كاری پارێزەرییش دەكەم، بۆیە لە ماڵەوەش كاتەكانم بە كاركردن بەسەر دەبەم، كە بریتییە لە راپەڕاندنی كاری پارێزەری، هەروەها كاری هونەرییشم پشتگوێ نەخستووە و بەردەوامم لەسەری، رۆژانە چەند پارچە موزیكێك دەژەنم و گۆرانی دەڵێم، لە ماوەی رابردوودا كارەكانی دوایین ئەلبوومی خۆمم تەواو كرد و پەنا بە خوا لە نزیكترین دەرفەتدا بڵاویان دەكەمەوە».

سەعدون یونس: باشترین دەرفەت بوو بۆ پێداچوونەوەی خۆمان

هونەرمەند و دەرهێنەری ناسراوی كورد (سەعدون یونس) كە ئێستا لە وڵاتی ئەڵمانیا نیشتەجێیە، بەم شێوەیە باس لە بەسەربردنی كەرەنتینە و قەدەغەی هاتوچۆ دەكات: «زۆربەی كاتەكانی خۆمم لە ماڵەوە بەسەر برد، هەرچەندە رێكارەكانی قەدەغەی هاتوچۆ لە ئەڵمانیا وەكو كوردستان توند نییە و من دەتوانم بۆ كاری پێویست بچمە دەرەوە، ئەو كاتانەشی لە ماڵەوە بووم، بۆ من دەرفەتێكی زۆر باش بوو، بەتایبەتی بۆ ئەو شتانەی كە دەمویست بیانخوێنمەوە، ئێستا دەستم بە خوێندنەوەی و نووسینەوەی هەندێك بابەت كردووە، جگە لەوەی بەردەوام لە پەیوەندیدام لەگەڵ كوردستان، بە رای من ئەم قەدەغەیە دەرفەتێكی باشە بۆ مرۆڤ تا پێداچوونەوەیەكی خۆی بكات، چونكە دڵسۆزترین و راستگۆترین كەس بۆ خۆت تەنیا خۆتی، دەرفەتێكی باشیشە بۆ ئەوەی مرۆڤ بزانێت چی ئەنجامداوە و چی لەسەری پێویستە تا ئەنجامی بدات لە گشت بوارەكاندا، هەر لە خۆشەویستی، ژیانی تایبەتی، پەیوەندیی كۆمەڵایەتی، دەسەڵات و حزبە سیاسییەكان، راستە ئێستا لە یەكتر دوورین، بەڵام دڵنیام بە باوەشێكی گەرم و خۆشییەوە یەكتر دەبینینەوە «.
سەعدون یونس هەروەها دەڵێت: «من بەشێكی زۆری كاتی خۆمم بۆ خوێندنەوە تەرخان كردووە، رۆژانە دوو جار وەرزش ئەنجام دەدەم، پیاسەیەكی كورت، لەگەڵ پێداوچوونەوەی وردی خۆم، تا بزانم چیم ئەنجام داوە و چ ئەركێكم لەسەرە، بۆیە هیچ كاتێك دڵتەنگ نەبووم و دلخۆشم و زۆریش بە گەشبینییەوە لە دواڕۆژ دەڕوانم و دڵنیام كە ئەو دۆخەش تێدەپەڕێنین، لە هەموویشی گرنگتر پێویستە مرۆڤ لە خودا نزیك ببێتەوە، كە ئەمە دەرفەتێكی گەورەیە بۆ ئەنجامدانی ئەم كارە و قەرەبووكردنەوەی ئەو هەلانەی كە لە دەستمان چووە».