ئەكتەر و ناودارانی جیهانی بە شێوازی جیاجیا رووبەڕووی ڤایرۆسی كۆرۆنا دەبنەوە، هەندێكیان بە خۆشەویستی و هاوسەرگیری و بەردەوام بوون لە جێبەجێكردنی پلانەكانی ژیانیان سەرەڕای رێوشوێنەكانی بەرەنگاربوونەوەی كۆرۆنا و ترسی بەردەوام لەو ڤایرۆسە.
لەم بارەوە رۆژنامەی دەیلی میلی بەریتانی رایگەیاند كە خانمە ئەكتەر سكارلێت جۆهانسۆنی تەمەن 35 ساڵ دوای دوو ساڵ لە پەیوەندی خۆشەویستی، ژیانی هاوسەریی لەگەڵ ئەكتەری كۆمیدی كۆلن جۆستی تەمەن 38 ساڵ پێكهێنا لە ئاهەنگێكی نهێنیدا، سكارلێت لەسەر تۆڕی كۆمەڵایەتی ئەنستاگرام رایگەیاند: بەخۆشحاڵییەوە هەواڵی پێكهێنانی ژیانی هاوسەریمان رادەگەیەنین لە ئاهەنگێكی تایبەت لەگەڵ خزم و كەسان بە پابەندییەكی تەواو بە رێنماییە تەندروستییەكان بۆ بەرەنگاربوونەوەی ڤایرۆسی كۆرۆنا.
شایەنی باسە ئەمە سێیەم جارە سكارلێت ژیانی هاوسەریی پێكدەهێنێت، جاری یەكەم ساڵی 2008 بوو تا ساڵی 2011 لەگەڵ ئەكتەر ریان رینۆڵدز، جاری دووەمیش لەگەڵ رۆژنامەنووسی ناسراو رۆمان دۆریا لە ساڵی 2014 تاكو 2017، بەڵام ئەمە یەكەمجارە كۆلن جۆست ژیانی هاوسەریی پێكدەهێنێت.