لە ماوەی چەند ساڵی رابردوودا لە كوردستان چەندین هونەرمەندی موزیكژەنی گەورە هەڵكەوتوون
دڵشاد محەمەد سەعید یەكێكە لەو هونەرمەندانە كە نەك تەنیا لای هونەرمەند و موزیكژەنان ئاشنایە، بەڵكو ئەوەی ئارەزووی هونەر و موزیك بێت ئاشنایە بە كەمانەكەی دڵشاد محەمەد سەعید، ماوەی چەند ساڵێكە لە وڵاتی نەمسا ژیان بەسەر دەبات و لەوێ خوێندنی لە زانكۆی سالسبۆرگی مۆزارت بە كۆتا هێنا و پەیوەندییەكی پتەوی لەگەڵ هونەرمەندانی ئەوێ پەیدا كرد و چەندین كۆنسێرتی سەركەوتووی ساز كرد پێشتریش رووی لەبەریتانیا كردبوو بۆ مەبەستی خوێندن .
دڵشاد محەمەد سەعید وای دەبینێت هونەری كوردی لە زۆر لایەنەوە بەرەو پێشچوونی بەخۆیەوە بینیوە و دەڵێت: هونەری كوردی لە ئاستێكی زۆر باشدا دەبینم، بۆ نموونە ئێستا قوتابی و مامۆستا و موزیكژەنی زۆر باش هەن كە شارەزای موزیكن، هەروەها بە هۆی پێشكەوتنی تەكنۆلۆژیا و میدیا دەرفەتی شارەزابوون لە موزیكی جیهانی زۆر ئاسانە، و دەرفەتی خوێندن و فێربوونی زیاتر هەیە، موزیك ژەنی كورد ئاگاداری وردەكاری و گۆڕانكارییەكانی موزیكی جیهانییە، ئەمانە بوونەتە هۆكاری پێشكەوتنی موزیك و گۆرانیی كوردی، سەرەڕای ئەمە دەبینین رەنگی راستەقینەكەی خۆی وەك پێویست دەرناكەوێت، چونكە كاتێك ئێمە دەبینین موزیكی جیهانی گەیشتۆتە ئاستێكی زۆر پێشكەوتوو هونەری خۆمان بیر دەچێتەوە بەمەش رەنگی راستەقینەی خۆی لە دەست بدات.
سەبارەت بە هونەری وڵاتانی دەوروبەر، مامۆستا دڵشاد دەڵێت: ئێمە ناتوانین نكۆڵی لەوە بكەین كە موزیكی توركی و عەرەبی و فارسی و ئەوروپی كە شتی خۆشی تیا هەیە، بەڵام كاتێك تۆ ئەمانە بهێنی و كۆپییان بكەیت و تەنیا تێكستی كوردی بۆدابنێی من پێموانییە ئەمە خزمەتی موزیكی كوردی بكات، ئێمەی كورد پێویستیمان بەوە هەیە كە ناسنامەی خۆمان بپارێزین بە جۆرێك ئەو موزیكە جیهانییە تێكەڵ بە موزیكی كوردی بكەین بە جۆرێك كە رەنگی خۆی هەر بمینێت.
مامۆستا دڵشاد دەربارەی ناسینەوە و پاراستنی هونەری كوردی و پەرەپێدانی زیاتر بە هونەری كوردی بۆ ئەوەی بگاتە ئاستی جیهانی دەڵێت:
ئەمە كارێكی زۆری دەوێ، سەرەتا پێویستە ئێمە موزیكی كوردی بناسینەوە و نەوەكانی خۆشمان فێر بكەین، ئەمەش رەنگە ئەمە بۆ كەسێك كە وڵاتی داگیر نەكرابێت زۆر گرنگ نەبێت، چونكە ئێمە پێویستیمان بە پاراستنی وجود و ناسنامەی كوردی هەیە تا دەگەینە ئاستێك كە دڵنیا دەبین مەترسی لەسەر نەماوە، پێویستە ئێمە بەردەوام هەر گوێ لە موزیكی رەسەنی كوردی بگرین و نەوەكانیشمان فێركەین چۆن گوێی لێدەگرن و فێری بن، من بۆم دەركەوتووە هەرچەندە ئێمە و باب و باپیرانیشمان گوێیان لە موزیكی كوردی گرتووە، بەڵام تا ئێستا بە تەواوی موزیكی رەسەنی كوردی ناناسین ئەمەش بۆ گرنگی نەدانی ئێمە ناگەڕێتەوە، بەڵكو بۆ ئەو دەوڵەمەندی و فرەییە ی هونەری كوردی دەگەڕێتەوە، بۆ نموونە كاتێك موزیكی رەسەنی كوردی بە ستایلێكی نوێ پێشكەش دەكرێتەوە و خەڵكانێكی بێگانە گوێی لێبگرن بەمە خزمەتێكی زۆر پێشكەش بە موزیكی رەسەنی كوردی و موزیك بە گشتی دەكەن، بەڵام كاتێك ئەگەر كۆپییەكی فارسی یان عەرەبی پێشكەش بكرێت لەسەر گۆرانییەكی كوردی ئەوا بۆ مرۆڤێكی ئەوروپی كارێكی كۆنە و نوێیەكە موزیكی كوردییە، بۆیە شارەزا بوون و ئاشنابوون بە مۆسیقای كوردی لەسەر هەموو لایەك پێویستە، هەروەها ئەركێكی زۆر دەكەوێتە ئەستۆی میدیا بەتایبەتی تەلەفزیۆنەكان دەبێ گرنگی زیاتری پێ بدەن، لێرەدا پێویستە ئاماژە بە شتێك بكەم ئەویش ئەوەیە كاتێك تیپی دهۆكمان دامەزراند كاری ئێمە پێشكەش كردنی گۆرانی، من هەوڵم دا گۆرانیی كۆنی كوردی پێشكەش بكەین بێ ئەوەی كاریگەریی لەسەر رەسەنایەتی میلۆدی كوردی هەبێت و زۆریش سەركەوتوو بووین، بەڵام بە شێوەیەك كە گەنجەكانی ئێمە یان ئەوروپییەك كاتێك گوێیان لێدەبێت نەڵێن ئەمە بەرهەمێكی كۆنە و حەز بكەن جارێكی دیكەش گوێی لێبگرن.
دڵشاد محەمەد سەعید وای دەبینێت كە ئاساییە سوود لە هونەری گەلانی تر وەربگیرێت و دەڵێت: ئێمە هەموو كاتێك دەتوانین سوودی زۆریان لێ وەربگرین ئەمەش كارێكی ئاساییە كە تا زۆرترین رادە سوودیان لێ وەربگرین تەنانەت ئاساییە ببیت بە مامۆستای موزیكی عەرەبی، سوود وەرگرتن جیاوازە لەگەڵ تێكەڵ كردن، كاتێك تۆ ئاوازێك دادەنێیت ئەو كاتە ئەگەر كەمێك فارسی یان عەرەبیشی تێدا بێت بەڵام نەگاتە ئەو ئاستەی كاریگەریی لەسەر موزكی كوردی هەبێت و دەقاو دەق كۆپی نەبێت، مۆسیقاش وەك زمان وایە تۆ كە بە كوردی قسە دەكەیت رەنگە وشەی فارسی یان عەرەبی یان ئینگلیزی تێدا بێت بەڵام نابێتە هۆی ون بوونی زمانی كوردی.
دڵشاد محەمەد كە ئێستا مامۆستایە و وانەی موزیكی دەڵێتەوە، رایگەیاند كە پێویستە گۆرانیبێژ خۆی رۆشنبیر بكات بە زانستی موزیك نەك تەنیا دەنگخۆشی ئەمەش سوودێكی زۆری بۆیان دەبێت، سەبارەت بە موزیكژەنەكانیش ئامۆژگاریم ئەوەیە كە تایبەتمەندێتی خۆی هەبێت و مەشقی زیاتر بكەن و دوور بن لە لاسایی كردنەوە.