دوای ئەو مشتومڕە زۆرەی كە زنجیرە درامای توركی (حریم السلطان) دروستی كرد بەهۆی ئەو رەخنە زۆرانەی كە لێی گیران بەتایبەتی لەلایەن رەجەب تەیب ئەردۆگانی سەرۆك وەزیرانی توركیاوە، بەپێی چەند سەرچاوەیەكی نزیك لە دەرهێنەر و بەرهەمهێنەری زنجیرەكە، لە دوای كۆتایی هاتنی بەشی سێیەم وێنەگرتنی زنجیرەكە كۆتایی دێت، بەڵام بێ ئەوەی پەلە لە رووداوەكانی بكرێت وەك ئەوەی پێشتر بڵاوبۆوە.
ئێستا نووسینی بەشی چوارەمیش تەواو بووە، بەڵام پێدەچێت بینەران لە بینینی سزادانی سوڵتانە هویام بێبەش دەبن لە كاتێكدا بەشێكی زۆری بینەران بە پەرۆشەوەن كە ببینن هویام سزا دەدرێت، لەلایەكی دیكەوە و دوای لە سێدارەدانی (ئیبراهیم پاشا) كە ئەكتەری توركی ئۆكان یلابیك رۆڵی دەبینێت، ستافی زنجیرەكە ئاهەنگێكی تایبەتیان بۆ ساز كرد، چونكە رۆڵی تەواو دەبێت، هەر بەم بۆنەیەوە فیلمێكی تۆماریان نمایش كرد كە گرنگترین دیمەنەكانی ئیبراهیم پاشای تێدا بوو و دوای كۆتایی ئاهەنگەكەش ئۆكان بۆ بەسەر بردنی پشوو رووی لە ئەمریكا كرد و بڕیارە تا مانگی ئەیلوول لەوێ بمێنێتەوە.